Fanolokoloana ny Fahalianana Nateraky ny Vaovao Momba Ilay Fanjakana No. 36
1 Efa nahavita ny fizarana ny anjaranao tamin’ny Vaovao Momba Ilay Fanjakana No. 36 ve ianao? Mametraka fanontaniana mifanentana tsara amin’izao andro izao toy izao izy io mba hodinihin’ny rehetra: “Ny Taonarivo Vaovao — Inona no Ampanantenain’ny Hoavy ho Anao?” Rehefa nihananatona ny taona 2000, dia nisy fanantenana maro tena samihafa ny amin’izay hoentin’ny taonarivo vaovao. Ny Vaovao Momba Ilay Fanjakana No. 36 dia miresaka momba ny sasany amin’ireo fanantenana ireo ary mampahatsiahy antsika fa tsy mahatonga antsika hanantena fihatsaran-javatra ny fahitana ny toe-piainana eo amin’izao tontolo izao. Ny Fanjakana Arivo Taonan’i Kristy Jesosy no hany arivo taona hitondra ilay fiadanana sy filaminana katsahin’ny ankamaroan’ny olona. Ny fatokisantsika fa tena misy ny Fanjakany dia nanosika antsika hizara ny Vaovao Momba Ilay Fanjakana No. 36 amin’izay rehetra azontsika anaovana izany.
2 Fihetsiky ny olona nahazo ny Vaovao Momba Ilay Fanjakana: Ny fizarana ny Vaovao Momba Ilay Fanjakana teo aloha dia hita ho fandrisihana tsara dia tsara ho antsika teo amin’ny asantsika. Mahakasika ny Vaovao Momba Ilay Fanjakana No. 35, dia nanoratra toy izao ny sampan’i Kanada: “Nafana fo nanohana io ezaka manokana io ireo mpitory sy mpisava lalana teny amin’ny saha, ka fitantarana mampahery maro no azo.” Tsy isalasalana fa nampiseho hafanam-po toy izany koa ianao, tamin’ny fizarana ny Vaovao Momba Ilay Fanjakana No. 36.
3 Izao ezaka manokana amin’ny fanelezana ny Vaovao Momba Ilay Fanjakana izao dia natao hifarana ny 17 Novambra 2000. Efa voasa avokoa ve ny faritany nanendrena ny kongregasionanao? Raha tsia, dia mety hangataka anao hanohy ilay ezaka manokana hatramin’ny faran’ny Novambra, ireo loholona.
4 Nanao ahoana hatramin’izao ny fihetsiky ny olona nizarana ny Vaovao Momba Ilay Fanjakana No. 36, eo amin’ny toerana misy anao? Angamba hisy olona vitsivitsy hameno ilay tapakila sy hangataka ilay bokikely Takina sy/na fampianarana Baiboly any an-tokantrano. Kanefa, ny ankamaroan’ireo izay nampiseho fahalianana tamin’ny voalohany tamin’ny foto-kevitra momba ilay taonarivo no tsy azo inoana fa hanao zavatra raha tsy rehefa misy Vavolombelon’i Jehovah miverina any aminy. Tokony hotsidihina indray ireo rehetra nampiseho fahalianana. Rahoviana no tsara hanaovana izany? Tokony hatao haingana araka izay azo atao ny fanolokoloana ny fahalianana.
5 Indreto misy fitantarana mahakasika ny Vaovao Momba Ilay Fanjakana No. 35. Mariho ny vokatra azo noho ny niverenana tany amin’ireo olona nametrahana azy io. Nametraka Vaovao Momba Ilay Fanjakana tamin’ny tompon’ny hotely fisakafoana iray ny mpisava lalana iray tany Irlandy. Nampiaiky volana an’ilay vehivavy ilay hafatra, ka nanasa ilay anabavy hiverina izy. Niverina ilay anabavy rehefa afaka roa andro, ary natomboka ny fianarana Baiboly. Tany Danemark, dia nisy Vaovao Momba Ilay Fanjakana napetraka tao amin’ny trano iray tsy nahitana olona. Tamin’io andro io ihany, dia nandefa ilay tapakila tany amin’ny biraon’ny sampana, izay nandefa azy io indray tany amin’ny kongregasiona teo an-toerana, ilay vehivavy nipetraka tao. Mbola tsy tapitra akory ilay herinandro, dia nisy anabavy roa nitsidika tany. Natao ny fandaharana mba hanaovana ny fianarana, ary nanatrika voalohany ny fivoriany tany amin’ny Efitrano Fanjakana ilay vehivavy!
6 Izay holazainao rehefa miverina: Ny fanaovana fiverenana mitsidika ny olona nametrahana ny Vaovao Momba Ilay Fanjakana dia somary mora ihany, ary tapany mahafinaritra amin’ny fanompoantsika izy io. Rehefa manao izany ianao, dia hety ny hitondrana any aminao ny Vaovao Momba Ilay Fanjakana No. 36, satria mety tsy eo am-pelatanan’ilay tompon-trano ny azy. Azonao atao ny manandrana ireto fanoloran-kevitra ireto.
7 Rehefa avy nampahatsiahy an’ilay tompon-trano ianao hoe iza ianao, dia afaka milaza toy izao:
◼ “Nametraka taminao taratasy mivalona iray mitondra ny lohateny hoe ‘Ny Taonarivo Vaovao — Inona no Ampanantenain’ny Hoavy ho Anao?’ aho. Tsy nampahery anao ve ny namaky fa tsy ho ela ny Fanjakana Arivo Taonan’i Kristy Jesosy dia hanomboka, ka hitondra toe-piainana paradisa eto an-tany? [Asehoy ny sarina Paradisa ao amin’ny Vaovao Momba Ilay Fanjakana No. 36.] Ato amin’ny pejy farany, dia asaina ianao hangataka ilay bokikely hoe Inona no Takin’Andriamanitra Amintsika?” Asehoy ilay bokikely, avadiho ho eo amin’ny lesona faha-5, ary vakio ny fanontaniana voalohany sy ny fehintsoratra 1 sy 2, ary asaivo manome ny valiny ilay tompon-trano. Mamakia sy mandiniha andinin-teny iray na roa. Raha azo atao, dia mandiniha fanontaniana sy fehintsoratra iray hafa, ary avy eo dia manaova fandaharana mba hiverina sy hanohy ilay resaka.
8 Koa satria ny zavatra hatolotra mba hanolokoloana ny fahalianana amin’ny Novambra dia ny bokikely “Takina” na ny boky “Fahalalana”, dia azonao atao ny milaza toy izao:
◼ “Fony aho nitsidika anao farany, dia nametraka taratasy mivalona hoe ‘Ny Taonarivo Vaovao — Inona no Ampanantenain’ny Hoavy ho Anao?’ Misy fanolorana fampianarana Baiboly maimaim-poana ao. Niverina aho mba hampiseho aminao ny boky ampiasaintsika amin’izany. [Asehoy ny bokikely Takina, ary jereo ny fonony ao aoriana; na asehoy ny boky Fahalalana, ary avadiho ho ao amin’ny pejy 188-189.] Ilay Arivo Taona resahina ao amin’ny Baiboly dia hitondra toe-piainana tahaka ny hitanao eto amin’ity sary ity. Mba hahazoana ny fiainana ao amin’ny Paradisa, dia ilaintsika ny mandray fahalalana araka ny marina momba an’Andriamanitra. Mamelà ahy hampiseho fohy aminao ny fomba ianarantsika ny Baiboly.”
9 Ny fizarana ny Vaovao Momba Ilay Fanjakana No. 36, dia nanosika antsika hampitombo ny fandraisantsika anjara eo amin’ny fanompoana, ka nahatonga fanambarana lehibe. Azo inoana fa nanaitra ny fahalianan’ny olona maro teny amin’ny faritany izy io. Ny fiarahantsika miezaka mba hanolokolo an’io fahalianana io, dia hahatonga antsika ho faly hahita olona maro kokoa toy ny ondry, noho ny fanampian’i Jehovah. — Matio 10:11; Asa. 13:48, 49, 52.