Ampiasao Amin’ny Fomba Tsara Ireo Taratasy Fanasana
1 Ilaina ireo taratasy fanasan’ny kongregasiona mba hampahafantarana amin’ny olona eo amin’ny fiaraha-monina ny adiresin’ny Efitrano Fanjakana sy ny fotoana marina ho an’ireo fivoriana. Ho tsara ny hamelana taratasy fanasana iray amin’ny olona tsirairay iresahanao. Mba hahafahana hanao izany, ny kongregasiona tsirairay dia tokony hanana tahirin-taratasy fanasana ampy. Ho an’ireo kongregasiona miova ora fivoriana isan-taona, amin’ny volana Janoary, dia tokony hanafatra taratasy fanasana vaovao isan-taona, amin’ny volana Oktobra alohan’io taona io, izy ireo, mba hisian’ny tahirin-taratasy manondro ireo ora fivoriana vaovao. Tokony hampiasaina ho amin’izany zava-kendrena izany ny Fanafarana Taratasy Fanasana. Rehefa manana taratasy fanasana ianao, ahoana no azo ampiasana azy ireny mba hahazoana soa be indrindra?
2 Mpitory maro no mahita fa ny fanolorana izany amin’ny olona iray dia fomba mahomby mba hampahafantarana ny tenanao sy hanombohana dinidinika. Afaka manokatra ny lalana ho amin’ny dinidinika mahakasika ny asantsika sy ny zava-kendren’izany ny fanondroana ny fandaharam-pivoriana na ny hafatra ao ambadik’ilay taratasy. Afaka mampiditra ireo zanany kely amin’ny fanompoana ireo ray aman-dreny, amin’ny fanasana azy ireny hanolotra taratasy fanasana eny am-baravarana. Ireo mpitory mandray anjara amin’ny fanambarana an-taratasy dia tokony hampiditra taratasy fanasana ao amin’ny taratasin’izy ireo ka hanasa an’ilay olona mba hanatrika ireo fivoriana. Mety ho azo atao ny mamela taratasy fanasana amin’ireo izay tsy tratra an-trano, raha toa ka tandremana ny hametraka azy ireny ao ambany varavarana mba tsy ho tazan’ny maso mihitsy.
3 Nanampy tamin’ny fitarihana ireo olona tso-po ho ao amin’ny fahamarinana ireo taratasy fanasana. Ny fitantarana iray dia miresaka ny amin’ny vehivavy iray izay, noho ny taratasy fanasana, dia afaka nanome fahafaham-po ny faniriany hatry ny ela mba hahatakatra izay lazain’ny Baiboly. Rehefa avy nandany ny alina mba hivavahana tamin’Andriamanitra izy, dia nampaneno ny lakolosy tao am-baravarany ny mpivady Vavolombelona ny ampitson’io. Rehefa nijery teo amin’ny lavaka kely tamin’ny varavarany izy, dia nilaza fa tsy afaka mamoha ny varavarana. Nampiditra taratasy fanasana iray tao ambanin’ny varavarana ireo Vavolombelona. Izao no vakiny: “Fantaro ny Baibolinao”. Hitan’ilay vehivavy izany ka novohany ny varavarana. Natomboka avy hatrany ny fianarana ka natao batisa izy tatỳ aoriana. Amin’ny tsy fanaovana tsinontsinona mihitsy ny herin’ny fanahin’Andriamanitra, dia enga anie isika hampiasa amin’ny fomba tsara mandrakariva ireo taratasy fanasana, eo am-panatanterahantsika amin’ny fomba feno ny fanompoantsika. — Jereo koa Ny Fanompoantsika Ilay Fanjakana Febroary 1994, pejy 1.