‘Aoka Ianareo Halala-tanana sy ho Vonona ny Hizara’
1 An-jatony taona maro lasa izay, dia nanome toromarika an’i Timoty mba hampirisika ny mpiray finoana taminy mba ‘hanao soa, hanan-karena amin’ny asa tsara, [halala-tanana sy ho vonona ny hizara, NW]’, ny apostoly Paoly. (1 Tim. 6:18). Nampahatsiahy an’ireo Kristianina hebreo koa i Paoly mba tsy hanadino ny “fanaovan-tsoa sy ny fizarana zavatra amin’ny hafa”. (Heb. 13:16, NW). Nahoana izy no nanoratra ireo toromarika ireo? Satria fantany fa hisy “voninahitra sy laza ary fiadanana (...) ho an’ny olona rehetra izay manao ny tsara”. — Rom. 2:10.
2 Noho izy Mpamorona, dia i Jehovah Andriamanitra no Tompon’ny zavatra rehetra. (Apok. 4:11). Tena ankasitrahantsika tokoa izay ataony ho antsika amin’ny alalan’ny fananany. Na dia olona maro be aza no tsy mahay mankasitraka, dia mbola mamela ny rehetra handray soa avy amin’ireo fanomezany amim-pahalalahan-tanana mba hahafahantsika ho velona, ihany ilay Avo Indrindra. (Matio 5:45). Nanome ny Zanany malala indrindra ho sorona mihitsy aza izy, mba hahafahantsika hahazo fiainana mandrakizay. Moa ve ny fitiavana naseho antsika tsy tokony hanery antsika hahay hankasitraka, amin’ny fanehoana fahalalahan-tanana amin’ireo mpiara-belona amintsika? — 2 Kor. 5:14, 15.
3 Inona no azontsika zaraina? Ara-dalàna tsotra izao ny hampiasantsika izay zavatra ananantsika amin’ny fomba mahafaly an’Andriamanitra. Tena tiantsika tokoa ny hanohana ny asan’ilay Fanjakana maneran-tany, eo amin’ny lafiny ara-nofo sy ara-panahy. Mazava ho azy fa ny vaovao tsara no harena sarobidy indrindra mety hananan’iza na iza, satria “herin’Andriamanitra ho famonjena” izy io. (Rom. 1:16). Amin’ny fampiasana amim-pahalalahan-tanana ny fotoanantsika sy ny fananantsika isam-bolana, eo amin’ny asa fitoriana sy fampianarana, dia mety ho afaka hizara io harena ara-panahy io amin’ny hafa isika, mba hahazoan’izy ireo fiainana mandrakizay.
4 Tena faly i Jehovah, rehefa manampy an’ireo izay tsy dia ampy fivelomana isika. Mampanantena fitahiana izy, no sady mampahatsiahy antsika hoe: “Ny harena dia tsy mahasoa amin’ny andro fahatezerana; fa ny fahamarinana no mamonjy tsy ho azon’ny fahafatesana.” (Ohab. 11:4; 19:17). Ny fanohanana ny asan’ilay Fanjakana eo amin’ny lafiny ara-nofo sy ny fandraisana anjara feno amin’ny fitoriana ny vaovao tsara dia fomba tsara dia tsara ahazoantsika mampiseho fa tena malala-tanana sy vonona ny hizara isika.