Manaova Soa ary Mizarà Amin’ny Hafa
1 ‘Be tokoa ny asa soa vitan’i Dorkasy sy ny fiantrany ny mahantra.’ (Asa. 9:36, 39) Nalala-tanana izy, ka tian’ny olona nahafantatra azy sy tian’i Jehovah Andriamanitra. Hoy ny Hebreo 13:16: “Aza manadino hanao soa sy hizara zavatra amin’ny hafa, fa sorona toy izany no ankasitrahan’Andriamanitra.” Ahoana no hanaovantsika soa sy hizarantsika zavatra amin’ny hafa ankehitriny?
2 Manao soa amin’ny hafa, ohatra, isika rehefa mizara ny ‘fananantsika.’ (Ohab. 3:9) Ahafahana manorina Efitrano Fanjakana sy Efitrano Fivoriambe ary biraon’ny sampana any amin’ny faritra maro ny vola omentsika ho an’ny asa maneran-tany. Nalala-tanana isika, ka olona an-tapitrisany no afaka mianatra momba an’i Jehovah sy mifampahery amin’ny mpiray finoana.
3 Mizarà fampiononana: Rehefa misy loza mitranga, dia vonona “hanao soa” amin’ny mpiray finoana sy ny olon-kafa ny vahoakan’i Jehovah. (Gal. 6:10) Nipoaka, ohatra, ny orinasa iray mpanao zezika tany Frantsa. Hoy ny mpivady iray nipetraka teo akaikin’io orinasa io: “Tonga nanampy anay avy hatrany ny rahalahinay kristianina. Nanadio ny tranonay sy ny tranon’olon-kafa koa izy ireo. Tena gaga ny mpiara-monina taminay satria maro be ny olona tonga nanampy.” Hoy ny anabavy iray: “Nidodododo nampahery anay ireo anti-panahy. Raha ny marina, dia izany aza no nilainay kokoa noho ny fanampiana hafa.”
4 Betsaka ny soa azontsika atao amin’ny mpiara-belona amintsika, fa ny tsara indrindra dia ny mizara aminy ny fahamarinana, izay tena sarobidy. Anisan’izany ny “fiainana mandrakizay” nampanantenain’i Jehovah. (Tit. 1:1, 2) Tena mampionona an’ireo ory noho ny fahotany sy ny toe-piainana eran-tany ny hafatra avy ao amin’ny Baiboly. (Matio 5:4) Enga anie àry isika hanao soa sy hizara amin’ny hafa, raha mbola azon’ny tanantsika atao ihany.—Ohab. 3:27.