“Aoka ny Zavatra Rehetra Hatao ho Fampandrosoana”
1 Rehefa mifampiraharaha amin’ireo rahalahintsika isika, dia tokony hanao zavatra izay hampandroso azy ireo. Ny hevitr’izany dia hoe mieritreritra ny hiaro ny tombontsoany ara-panahy isika. Raha manomboka karazan’asa iray ho fampirisihana ny olona hividy entana iray na hanaiky asa fanampiana iray isika, dia mila mitandrina mba tsy hanao na inona na inona izay hanafintohina ny rahalahintsika. — 2 Kor. 6:3; Fil. 1:9, 10.
2 Nisy nanjary nanao raharaham-barotra samihafa, izay nampiditra ireo Kristianina namany ho clients. Ny fikambanam-barotra sasany tokoa dia mampirisika an’ireo solontenany mba hihevitra ny olona tsirairay ho toy ny client — anisan’izany ireo mpiara-miangona aminy. Koa nisy àry rahalahy nandamina fihaonan’ny Vavolombelona maro be, mba hampirisihana azy ireo hiditra ao amin’ny raharaham-barotra iray. Ny hafa mampandroso ny raharaham-barotra ataony, amin’ny fandefasana mivantana any amin’ny mpiray finoana aminy, entana, bokikely, vaovao amin’ny Internet, na kasety tsy nangatahin’izy ireo akory. Hety ve ny hampiasan’ny Kristianina iray ny fifaneraserany teokratika mba hanararaotana an’ireo rahalahiny ara-panahy? Tsia! — 1 Kor. 10:23, 24, 31-33.
3 Tokony hitandrina ireo rahalahy: Tsy midika akory izany fa tsy afaka manao raharaham-barotra miaraka amin’ny rahalahy iray ny Kristianina. Safidin’ny tsirairay manokana izany. Kanefa, misy manomboka tetika ara-barotra izay mampirisika ny fitsiriritana tafahoatra, ary mandrisika ny mpiray finoana aminy hiara-miasa aminy na hamatsy vola azy. Maro amin’ireny raharaha ireny no tsy mandeha, ka mampandany vola be an’ireo mandray anjara aminy. Na dia nety ho voatosiky ny faniriana hanankarena haingana aza ireo izay niditra tao amin’ilay raharaha, ilay nanomboka azy dia tsy tokony hihevitra fa tsy manan-tsiny ny tenany, raha tsy nahomby tamin’ilay raharaha. Tokony hoheveriny mialoha amim-pitandremana ny ho vokany eo amin’ny fahasalamana ara-panahy sy ara-batan’ireo rahalahiny, raha sendra tsy mandeha ilay raharaha. Ireo izay mitana andraikitra teokratika indrindra no tokony hitandrina ny amin’ny raharaha ataony, satria miantehitra aminy amim-panajana ny hafa ary mametraka fitokisana be aminy. Tsy hety ny hanararaotana izany fitokisana izany. Mety hamoy ny tombontsoam-panompoany masina ny rahalahy iray, raha veriny ny fanajan’ny hafa azy.
4 Ny zava-kendrentsika dia tokony ho ny ‘hanao ny zavatra rehetra ho fampandrosoana’. (1 Kor. 14:26). Tsy maintsy mitandrina isika mba tsy hanao na inona na inona izay hampiditra raharaha ara-barotra ao amin’ny kongregasiona, na hampandroso azy ireny. Tsy misy ifandraisany amin’ny antony ara-baiboly iarahantsika mivory ny zavatra toy izany. — Heb. 10:24, 25.