Fandaharana Amin’ny Fivoriana Momba ny Fanompoana
Herinandron’ny 10 Jolay
12 min: Fampandrenesana eo an-toerana. Fampandrenesana nofantenana avy ato amin’Ny Fanompoantsika Ilay Fanjakana. Miresaha ny amin’ny tatitra momba ny fanompoana tamin’ny Martsa teto amin’ny tanintsika sy tao amin’ny kongregasiona. Sariho ny saina ho amin’ilay faritra voafefy hoe “Jereo ny Pejy Farany”, ary anaovy fampisehoana ny iray amin’ireo fomba fampiseho anoloran-kevitra, izay handaitra tsara eo amin’ny faritany eo an-toerana.
15 min: “Tsy Afaka Mitsahatra Tsy Hiteny Isika”. Fero tsy hihoatra ny iray minitra ny teny fampidirana, ary araho fiaraha-midinika amin’ny alalan’ny fanontaniana sy valiny. Hamafiso ny antony iheverantsika ho tena zava-dehibe ny fanirahana antsika hitory. Mampidira hevitra mifanentana tsara amin’izany, avy ao amin’Ny Tilikambo Fiambenana 15 Janoary 1997, pejy 23-24.
18 min: “Aoka ny Zavatra Rehetra Hatao ho Fampandrosoana”. Miara-miresaka momba ilay lahatsoratra ny loholona roa. Vakio ny fehintsoratra tsirairay sy ireo andinin-teny voatonona. Asongadino ireo foto-pitsipika voalaza ao. Antitrantero ny ilana fahaiza-manavaka eo amin’ny fifampiraharahana ara-barotra na ny fampiasam-bola. Jereo indray ny torohevitra ao amin’Ny Tilikambo Fiambenana 15 Martsa 1997, pejy 18-19, 22.
Herinandron’ny 17 Jolay
15 min: Fampandrenesana eo an-toerana. Tatitra momba ny kaonty. Hazavao vetivety ny fomba hampiasana ny bokikely Trinite, mba hanampiana ny olona liana iray hahatakatra fa tsy fampianarana araka ny Soratra Masina ny Trinite. — Jereo ny boky Fanjohian-kevitra, pejy 389-394.
10 min: “Fandaharana Vaovaon’ny Fivoriamben’ny Fizaran-tany”. Fanontaniana sy valiny. Lazao ny datin’ny fivoriamben’ny fizaran-tany manaraka, ary ampirisiho ny rehetra hanatrika amin’ireo andro roa. Ampirisiho ny rehetra hanao ezaka manokana mba hanasa ireo mpianatra ny Baiboly. Mety hanafaingana ny faniriany hifanerasera tsy tapaka amin’ny kongregasiona ny fanatrehany ilay fivoriambe.
20 min: Iza no Tokony ho Modelinao? Mitarika fianaram-pianakaviana amin’ny zatovo iray na roa ny raim-pianakaviana iray. Voamariny tato ho ato fa olo-malaza amin’ny fanatanjahan-tena, ny sarimihetsika, ny televiziona, ary ny hira no mibahana matetika ao amin’ny resak’izy ireo. Milaza ny fanahiany izy, satria endrika iray isehoan’ny toe-tsain’ity tontolo ity ny fahalianana mafy toy izany. Miresaka momba ny Mifohaza! 8 Jona 1998, pejy 12-14, izy ireo. Takatr’ireo tanora ireo fa mampidi-doza ny manindrahindra olo-malaza eo amin’ity tontolo ity, ary manaiky izy ireo fa tsy manana na inona na inona hatolotra ho an’ny Kristianina ny toerana ambony eo amin’ity tontolo ity. Resahin’izy ireo ny soa entin’ny fandraisana ho modely ny ray aman-dreniny, ny loholona, ny olona fakan-tahaka hafa ao amin’ny kongregasiona, ary indrindra fa i Jesosy Kristy.
Herinandron’ny 24 Jolay
5 min: Fampandrenesana eo an-toerana.
15 min: Mampiseho ny Tenantsika ho Mpanompon’Andriamanitra Isika. Miresaka momba ny fananaran’ny Soratra Masina tao amin’Ny Tilikambo Fiambenana 15 Desambra 1998, pejy 19-20, ny mpanampy amin’ny fanompoana roa. Takatr’izy ireo fa ilaina ny mahafeno tsara ireo fepetra ho an’ny mpanampy amin’ny fanompoana, ary resahiny izay azon’ny tenany manokana atao mba hampisehoana fa manatontosa ny asa nanendrena azy ny tenany. Hitany fa zava-dehibe ny ho ohatra tsara eo amin’ny fanompoana eny amin’ny saha, ary miresaka momba ny fomba ahafahany manampy an’ireo loholona, amin’ny fanampiana ny hafa, izy ireo. Manaiky izy ireo fa tiany ny hanao izay rehetra azony atao mba hanampiana ny kongregasiona hahatakatra fa mandodona ny fotoana, sy hitombo ary hiroborobo eo amin’ny ara-panahy.
10 min: Fanoratana Taratasy ho An’ny Olona Tsy Mety Tratrantsika. Lahateny sy fiaraha-midinika amin’ny mpanatrika. Koa satria mihasarotra hatrany ny mahita olona ao an-tranony, dia manoratra taratasy ny mpitory sasany, ka mahazo vokatra tsara. Diniho ireto toro lalana ireto: Tokony ho fohy ireo taratasy, hiorina amin’ny Soratra Masina, ary ho feno fanajana. Aza mandefa taratasy tsy mitonona anarana. Soraty amin’ny tanana na amin’ny milina fanoratana, amin’ny fomba madio sy azo vakina ny taratasy. Omeo ny adiresin’ny Efitrano Fanjakana sy ny oran’ny fivorian’ny kongregasiona, miaraka amin’ny taratasy fanasana. Aza mampiasa ny adiresin’ny Fikambanana. Jereo indray ireo fanipazan-kevitra ao amin’ny Boky ho An’ny Sekoly, pejy 87-88, sy ny Valin’ireo Fanontanianareo ao amin’Ny Fanompoantsika Ilay Fanjakana Novambra 1996.
15 min: Mampiasà Fampidiran-dresaka Mandaitra. Mifantena fampidiran-dresaka roa na telo avy ao amin’ny boky Fanjohian-kevitra, pejy 9-15, ary resaho ny fomba azo ampiasana azy ireo amin’ny fomba mandaitra eny amin’ny faritany eo an-toerana. Anontanio ny mpanatrika hoe: “Fampidiran-dresaka inona avy no ampiasainareo, rehefa manatona olona iray eny amin’ny arabe ianareo, na mitory tsy ara-potoana, na amin’ny fomba hafa?” Anaovy fampisehoana ny fampidiran-dresaka iray na roa, arakaraka ny fotoana.
Herinandron’ny 31 Jolay
15 min: Fampandrenesana eo an-toerana. Ampahatsiahivo ny rehetra mba hamerina ny tatitra momba ny fanompoany tamin’ny Jolay. Asao ny mpanatrika hitantara zavatra hitany, fony nizara bokikely, tamin’iny volana iny.
12 min: Zavatra ilaina eo an-toerana.
18 min: “Mankasitraka ny Faharetan’i Jehovah ve Ianao?” Fanontaniana sy valiny. Manaova fanazavana mifanentana tsara amin’ny fahari-pon’i Jehovah. — Jereo Ny Tilikambo Fiambenana 1 Jona 1999, pejy 4-6.
Herinandron’ny 7 Aogositra
10 min: Fampandrenesana eo an-toerana.
17 min: “Saro-kenatra ve Ianao?” Fanontaniana sy valiny. Miresaha momba ny fitantarana mampahery iray ao amin’ny Diary 1997, pejy 43-44.
18 min: Aoka Ianao ho Hendry Amin’izay Hiafaranao. Lahateny ataon’ny loholona iray. Maniry hanana hoavy sambatra miaraka amin’ireo olona tiany ny tanora. Zavatra ara-dalàna izany, nefa tsy maintsy mampihatra ny torohevitr’Andriamanitra izy ireo, raha tiany ny hahomby. (Ohab. 19:20). Mahery be ny fanintonan’ny tsy lahy na tsy vavy tahaka ny tena, mandritra ny fahatanorana. Raha tsy voafehy ny fihetseham-po, dia zava-doza no ho vokatr’izany. Fanontaniana maro no mipoitra, momba ny hoe fahendrena ho an’ny zatovo ve ny mahatsapa fihetseham-po ho an’ny olona iray tsy lahy na tsy vavy tahaka azy, ny mamboly fifandraisana akaiky aminy, ary amin’ny farany dia ny “mampiaraka” aminy. Jereo indray ilay fananarana ao amin’ny boky Manontany ny Tanora, pejy 231-235. Asongadino ireo hevitra lehibe indrindra ao amin’Ny Tilikambo Fiambenana 15 Novambra 1999, pejy 18-23, izay mampiseho fa zava-dehibe ny hanaovan’ny tanora izay rehetra tokony hataony eo anatrehan’Andriamanitra. Ampirisiho ny zatovo mba hisaintsaina momba io torohevitra io sy hiresaka amin’ny ray aman-dreniny, raha manana fanontaniana izy.