“Aza mba Ketraka Amin’ny Fanaovan-tsoa”
1 Tena tsara ny hoe tonga mpanompon’i Jehovah Andriamanitra ianao. “Aza mba ketraka amin’ny fanaovan-tsoa” anefa amin’izao andro sarotra izao. (Gal. 6:9) Vitanao izany, na dia mitaky ezaka be aza. Amin’ny fomba ahoana?
2 Mambole ny toe-tsain’i Jesosy: Afaka miaritra fisedrana toa an’i Jesosy ianao, raha mifantoka amin’ny fanantenana momba ilay Fanjakana. (Heb. 12:2, 3) Matokia fa tia anao i Jehovah ary maniry ny hahombiazanao. (2 Pet. 3:9) Matokia tanteraka fa hanampy anao izy. (1 Kor. 10:13) Mahareta amin’ny fivavahana, ka mangataha fanampiana amin’i Jehovah mba hiaretana. (Rom. 12:12) Mifalia amin’ny fatokiana tanteraka fa hankasitraka anao Andriamanitra, raha miaritra ianao. (Rom. 5:3-5) Ho afa-po ianao ary hampifaly ny fon’i Jehovah, raha miezaka hatrany hanana “ilay toe-tsaina mitovy amin’ny nananan’i Kristy Jesosy”.—Rom. 15:5, NW; Ohab. 27:11.
3 Manaova soa hatrany: Ampiasao tsara izay rehetra omen’i Jehovah mba hanampiana ny vahoakany tsy ho ketraka amin’ny fanaovan-tsoa. Mizàra hatrany mamaky ny Tenin’Andriamanitra sy mianatra ireo boky sy gazety ara-baiboly omen’ny mpanompo mahatoky sy malina. Manomàna sy manatreha ary mandraisa anjara tsy tapaka amin’ireo fivorian’ny kongregasiona rehetra. Miresaha amin’ireo rahalahy sy anabavinao ara-panahy, aloha sy aorian’ireo fivoriana kristianina. Mamera tanjona azo tratrarina eo amin’ny fanompoanao, mba ho afaka handray anjara tsara amin’izany sy hanatsarana ny fahaizanao mitory ny vaovao tsara.
4 Raha manao izany ianao, dia tsy ho ketraka amin’ny fanaovan-tsoa ary hahita fifaliana koa. Izao no nolazain’ny rahalahy italianina iray momba izany: “Marina aloha fa vizana aho amin’ny hariva rehefa mody avy nanao ny fanompoana an’i Jehovah. Nefa faly aho, ary misaotra an’i Jehovah, satria nomeny fifaliana, izay tsy azo esorina amiko mihitsy.” Aza ketraka amin’ny fanaovan-tsoa àry, dia hahita fifaliana be koa ianao.