Araho ny Dian’i Kristy ka Manehoa Fanajana
1. Inona no foto-kevitry ny fivoriambe amin’ity taona ity, ary inona no ifandraisan’izany amin’ny fanehoana fanajana?
1 Milaza ny Baiboly fa mitafy famirapiratana i Jehovah Mpanjakan’izao Rehetra Izao. (Sal. 104:1) Ny teny hebreo tany am-boalohany nadika hoe “famirapiratana” dia midika hoe “haja.” Naneho fanajana ny Rainy sy ny fandaharana nataony foana i Jesosy, na tamin’ny teniny na tamin’ny nataony. (Jaona 17:4) Ho afaka hanahaka an’i Jesosy ny tsirairay avy amintsika mandritra ny Fivoriamben’ny Vondrom-paritra ho avy tsy ho ela, ary hanome voninahitra an’i Jehovah izany. Izao no foto-kevitr’ilay fivoriambe: “Araho ny Dian’i Kristy!”
2. Inona avy no fiomanana ilaintsika hatao mba ho eo isika mandritra ny telo andro, ka hanome voninahitra an’i Jehovah? Inona koa no zavatra tokony hoeritreretintsika mialoha?
2 Fivoriambe mendri-kaja: Asehontsika fa manome voninahitra an’i Jehovah isika, raha miezaka ho tonga amin’ilay fanasambe nomaniny ho antsika. Efa nangataka andro tsy iasana sy nandamina ny asa aman-draharahanao ve ianao, mba hahafahanao hanatrika amin’ny andro tsirairay, anisan’izany ny zoma? Efa nalaminao ve ny fotoananao mba hahafahanao ho tonga aloha, ka hahita toerana sy hahatratra ny hira sy ny vavaka fanokafana? Efa nieritreritra ny hitondra sakafo antoandro ve ianao, mba hahafahanao hiara-misakafo amin’ireo rahalahinao ao amin’ny toerana hanaovana fivoriambe? Alohan’ny hanombohan’ny mozika fanokafana, dia hanasa antsika hipetraka ny mpitari-draharaha. Tokony hofaranantsika haingana ny resatsika amin’izay, ary hamonjy toerana isika.
3. Inona no tenin’olona manaporofo fa mahatonga ny fivoriambentsika ho mendri-kaja ny fihainoana tsara?
3 Manome voninahitra an’ilay Raintsika any an-danitra koa isika, raha mihaino tsara mandritra ny fandaharana. Nandinika ny fivoriamben’ny vondrom-paritra iray tao amin’ny tanàna nisy azy ny mpanao gazety iray. Nilaza izy fa ho gaga ny olona, raha nahita ny “fitondran-tena fakan-tahaka nananan’ireo mpanatrika. Nangina sy nihaino tsara izy ireo nandritra ny toriteny. Hita fa tiany ny fampianarana avy amin’Andriamanitra.” Niresaka momba ny ankizy koa ilay mpanao gazety. Hoy izy: ‘Feno ankizy tao, nefa nahavariana fa hendry tsara daholo izy rehetra. Sondriana nikaroka andalan-teny tao amin’ny Baiboly Masina mihitsy aza izy ireo.’ Tsy tokony hiresadresaka tsy amin’antony, na handefa hafatra an-telefaonina, na hihinan-kanina, na hivezivezy isika, mandritra ny lahateny. Tokony hiara-mipetraka amin’ny ray aman-dreny ny zanany, mba hahafahany hanampy azy handray soa amin’ilay fivoriambe. (Deot. 31:12; Ohab. 29:15) Raha miezaka manao izany rehetra izany isika, dia mampiseho fa manaja ny hafa sady mankasitraka ny fampianarana iankinan’ny aina omena antsika.
4. Nahoana no tokony ho mendri-kaja ny fitafiana sy taovolontsika amin’ny fivoriambe?
4 Fitafiana sy taovolo mendri-kaja: Maro no nankasitraka an’ilay fampahatsiahivana nomena tamin’ny fivoriamben’ny vondrom-paritra tamin’ny herintaona, tamin’ilay lahateny hoe “Manehoa Fahamendrehana Amin’ny Fotoana Rehetra.” Nantitranterina tamin’izay fa tokony ho mendrika ny fitafiana sy taovolon’ny Kristianina. Mbola tokony hankatò izany toromarika izany isika amin’ity taona ity. Ny fitafiana sy taovolontsika no ahitana raha tena tiantsika i Jehovah, ary heverintsika ho voninahitra ny hoe Vavolombelony. Tokony ho fantatra amin’ny fomba fitafintsika fa “mpivavaka amin’Andriamanitra” isika.—1 Tim. 2:9, 10.
5. Tokony hanao ahoana foana ny fitafiana sy taovolontsika, na dia rehefa miala voly aza?
5 Rehefa any amin’ny fivoriambe ihany ve no tokony ho mendri-kaja ny fitafiana sy taovolo? Tadidio fa maro amin’ny olona ao amin’ny tanàna anaovantsika fivoriambe no hahita antsika manao ny karatry ny fivoriambe. Tokony hiavaka ny fitafiana sy taovolontsika, raha oharina amin’ny an’ny olona eto amin’ity tontolo ity. Tokony ho hita amin’izany fa mpanompon’Andriamanitra isika, ary hanatrika fivoriambe kristianina no anton-diantsika ao amin’ilay tanàna. Hotandremantsika tsara àry ny fomba fitafintsika na dia rehefa hiala voly aza, ka handeha hisakafo any amin’ny hotely na hanao zavatra hafa. Tsy tokony hanao jinina, na sôrta, na tiserta isika. Efa fitoriana vita ho azy izany! Faly i Jehovah rehefa hita amin’ny fitafiana sy taovolontsika fa mpanompony isika.
6. Inona no vokatra tsara azo rehefa maneho fanajana isika?
6 Misy vokany tsara: Mety ho afaka hitory tsy ara-potoana isika, raha maneho fanajana mandritra ny fivoriambe. Ho voamarik’ireo mahita antsika koa fa olona mahafinaritra isika. Hoy ny manam-pahefana iray, taorian’ny fivoriambe iray: “Mbola tsy nahita olona tsara toetra toa anareo mihitsy izahay. Ianareo no modely tian’Andriamanitra hotahafinay.” Manome voninahitra an’i Jehovah sy ny olon-kafa isika, raha maneho fanajana. Asehontsika amin’izany koa fa mifankatia isika. (1 Pet. 2:12) Ho hita fa matahotra an’ilay Raintsika isika, ary raisintsika ho tombontsoa ny hoe ampianariny. (Heb. 12:28) Aoka àry isika hiezaka haneho fanajana, eo am-piandrasantsika ilay Fivoriamben’ny Vondrom-paritra hoe “Araho ny Dian’i Kristy!”
[Efajoro, pejy 4]
Fampahatsiahivana Momba ny Fivoriambe
◼ Fandaharam-potoana: Hanomboka amin’ny 9.20 maraina foana ny fivoriambe mandritra ny telo andro. Hivoha amin’ny 8.00 maraina ny vavahady. Tokony hipetraka daholo isika rehefa manomboka ny mozikan’ilay Fanjakana. Hanomboka amim-pilaminana ny fotoam-pivoriana amin’izay. Hifarana amin’ny 5.05 hariva ny fivoriambe ny zoma sy asabotsy. Hifarana amin’ny 4.10 hariva kosa izany ny alahady.
◼ Famandrihan-toerana: Izay olona miray fiara na trano aminao ihany no azonao amandrihana toerana.
◼ Sakafo antoandro: Iangaviana ianareo hitondra sakafo antoandro, fa tsy hitady sakafo any ivelan’ny toerana anaovana fivoriambe. Azo atao ny mitondra harona kelikely azo apetraka eo ambany seza. Tsy azo atao kosa ny mitondra harona lehibe loatra sy zavatra mora vaky ary zava-pisotro misy alkaola.
◼ Fanomezana: Be dia be ny vola lany hikarakarana fivoriamben’ny vondrom-paritra. Afaka mampiseho ny fankasitrahantsika àry isika, amin’ny alalan’ny fanomezana an-tsitrapo ho an’ny asa maneran-tany. Azo atao any amin’ny Efitrano Fanjakana izany na any amin’ny fivoriambe.
◼ Fandraisam-peo: Tsy azo ampifandraisina amin’ny fitaovana elektrika na fanamafisam-peon’ny fivoriambe ny fitaovana fandraisam-peo anao manokana. Azonao atao ny mampiasa fitaovana fandraisam-peo raha tsy manelingelina ny mpanatrika izany.
◼ Taratasy Tsidiho Aza Fady: Tokony hosoratana ao amin’ilay taratasy hoe Tsidiho Aza Fady (S-43) ny mombamomba ny olona nitoriana tsy ara-potoana nandritra ny fivoriambe, ka nihaino tsara. Tokony hitondra iray na roa amin’io taratasy io any amin’ny fivoriambe ny mpitory. Azo atao koa ny maka izany ao amin’ny Sampan-draharahan’ny Boky eny amin’ny fivoriambe. Omeo an’io sampan-draharaha io na ny mpitan-tsoratry ny fiangonana ilay izy rehefa feno.—Jereo Ny Fanompoantsika Ilay Fanjakana Febroary 2005, p. 6.