Video Tena Mendrika Hosaintsainina
“Tena mahatonga saina ilay video!”
“Nanohina ny foko io video io!”
‘Nampihetsi-po ahy ilay izy!’
1 Izany koa ve no tsapanao tamin’ny vao nijery an’ilay video Manontany ny Tanora—Ahoana no Hahazoako Tena Namana? Taona vitsivitsy lasa izay, dia nanana olana ny rahalahy tanora iray noho ny namana nofidiny. Nanjary tsy nahaliana azy intsony ny fahamarinana ary simba ny fifandraisany tamin’i Jehovah, noho ireo namany ireo. Hoy izy, rehefa nivoaka ilay video Tena Namana: “Latsa-dranomaso aho isaky ny namerimberina nijery azy io. Nisaotra an’i Jehovah aho noho io fanampiana tonga tamin’ny fotoana nilako azy io.” Nandrisika azy hiova sy hahazo namana tsara ilay video. Hoy koa izy: “Tena hita hoe fantatrareo tsara ny manjo ny tanora.” Ry ray aman-dreny sy tanora, nahoana raha jerena indray io video io mandritra ny fianaram-pianakavianareo manaraka? Ajanony isaky ny fizarana tsirairay ilay izy, ary iaraho midinika ny fanontaniana ao amin’ireo fehintsoratra eto ambany. Ampirisihina ny rehetra tsy hisalasala hilaza ny heviny.
2 Teny fampidirana: Inona no atao hoe tena namana?—Ohab. 18:24.
3 Sakana tsy mamela hahazo namana: Ahoana no handresenao ny fahatsiarovana ho ailiky ny hafa? (Fil. 2:4) Nahoana ianao no tokony ho vonona hanatsara ny toetranao, ary iza no afaka manampy anao amin’izany? Inona no hanampy anao hanana namana maro kokoa, ary aiza no mety hahitanao azy ireny?—2 Kor. 6:13.
4 Fisakaizana amin’Andriamanitra: Inona no azonao atao mba ho naman’i Jehovah akaiky kokoa, ary nahoana izany no mendrika anaovana ezaka? (Sal. 34:8) Iza no tena afaka manampy anao hinamana akaiky kokoa amin’Andriamanitra?
5 Naman-dratsy: Iza avy no naman-dratsy? (1 Kor. 15:33) Ahoana no mety hanimban’ny naman-dratsy ny finoan’ny olona iray? Inona no ianaranao avy amin’ny tantaran’i Dina ao amin’ny Baiboly?—Gen. 34:1, 2, 7, 19.
6 Tantara maoderina iray: Nahatsiaro ho manirery i Saraha, ka inona no vokatr’izany teo aminy? Ahoana no nanamarinany ny fiarahany tamin’ireo tanora eo amin’ity tontolo ity? Inona avy no loza nosetrainy noho izany? Nahoana no tsy fantatry ny ray aman-dreniny izay nanjo azy? Inona anefa no fiovana nataon’izy ireo mba hanampiana an-janany hanana finoana matanjaka indray? Inona no nataon’ilay anabavy mpisava lalana, ka nampiseho fa tena namana ho an’i Saraha izy? Nahoana ny Kristianina no tsy maintsy manaraka ny voalazan’ny Ohabolana 13:20 sy ny Jeremia 17:9? Inona no zava-dehibe nianaran’i Saraha?
7 Famaranana: Inona no fianarana noraisinao avy tamin’io video io? Ahoana no azonao ampiasana azy io hanampiana olon-kafa?—Sal. 71:17.