“Tsy Mahaliana Ahy Izany”
1 Izany matetika no lazain’ny olona any amin’ny faritra sasany rehefa itoriana. Inona no hanampy antsika tsy ho kivy rehefa sendra olona tsy miraika, eny amin’ny faritany? Inona no azontsika atao, mba hahatonga ny olona ho liana amin’ny vaovao tsara?
2 Aoka ianao ho faly foana: Tsy hihena ny fifaliantsika, raha tadidintsika foana ny antony mahatonga ny olona tsy hiraika. Mety tsy hihevitra ny Baiboly ho sarobidy ny olona nampianarina hoe nivoatra avy tamin’ny biby isika. Toy izany koa ireo notezaina tao amin’ny fianakaviana tsy mino an’Andriamanitra. Diso fanantenana koa ny hafa rehefa mahita an’ireo mpivavaka mihatsaravelatsihy. Misy indray tsy miraika, satria ketraka sy tsy manana fanantenana. (Efes. 2:12) Ny sasany kosa ‘tsy miraharaha’, noho izy vesaran’ny fanahiana eo amin’ny fiainana.—Matio 24:37-39.
3 Afaka mahita fifaliana amin’ny fanompoana anefa isika na dia tsy miraika aza ny olona. Fantatsika mantsy fa manome voninahitra an’i Jehovah ny ezaka ataontsika. (1 Pet. 4:11) Matanjaka koa ny finoantsika rehefa miresaka ny fahamarinana, na dia tsy mandray aza ny olona. Aoka isika hihevitra ny olona eny amin’ny faritany, toy ny iheveran’i Jehovah azy. Nalahelo ny mponin’i Ninive izy, satria ‘tsy nahafantatra ny havanany sy ny haviany’ izy ireo. (Jona 4:11) Mila ny vaovao tsara koa ny olona eny amin’ny faritanintsika! Tsy tokony ho kivy àry isika, fa hitady fomba fitory izay hahatonga azy ireo ho liana amin’ny hafatra ao amin’ny Baiboly.
4 Olana misy eo an-toerana resahina: Azonao atao, ohatra, ny milaza zavatra mampanahy ny olona eo an-toerana rehefa manombo-dresaka. Avy eo dia asao ilay olona hilaza ny heviny. Henoy ny valin-teniny, ary asehoy azy ny hafatra mampionona avy ao amin’ny Baiboly. Rehefa nitory isan-trano ny Vavolombelona iray, dia naneho ny alahelony noho ny loza nitranga teo an-toerana. Inona no vokatr’izany? Hoy izy: “Tonga dia niresaka ny olona! Nahafinaritra ny fitoriako tamin’iny andro iny, satria niahy an’ireo olona niresahako aho.”
5 Hamaha ny olana rehetra manjo ny olombelona ny Fanjakan’Andriamanitra. Miezaha hamantatra izay olana tena mampanahy ny olona itorianao. Mety havelany hanazava ilay hafatra mahabe fanantenana avy ao amin’ny Baiboly ianao, raha manao izany. Ary na tsy mihaino anao aza izy amin’io fotoana io, dia mety hanao izany ihany “amin’ny manaraka.”—Asa. 17:32.