“Ahoana no Havalinao?”
1. Inona no zava-tsarotra hitan’ny ankamaroantsika?
1 Tianao ve ny Tenin’Andriamanitra, nefa sarotra aminao ny mitadidy andinin-teny na tsipiriany amin’ny tantara ao anatiny? Tianao hahay tsara an’ireo fahamarinana sy fampianarana fototra ao amin’ny Baiboly ve ny zanakao? Afaka manampy ny rehetra, na kely na lehibe, mba hahafantatra tsara kokoa ny Tenin’Andriamanitra ilay hoe “Ahoana no Havalinao?”, eo amin’ny pejy faha-31 amin’ny Mifohaza!—Asa. 17:11.
2. Ahoana no azontsika ampiasana an’ireo lafiny samihafa amin’ilay hoe “Ahoana no Havalinao?”
2 Ahoana no azonao ampiasana tsara an’io pejy faha-31 io? Manome soso-kevitra toy izao ny Mifohaza! Janoary 2006: “Topazo maso kely ange ny pejy faha-31 e! Mino izahay fa hahasarika ny ankizy ny zavatra sasany eo amin’io pejy io. Misy ampahany amin’izy io kosa hitsapa ny fitadidian’ireo mpianatra Baiboly efa manana fahalalana bebe kokoa. Jereo, ohatra, ilay hoe: ‘Oviana no Nitranga Ireto?’ Hanampy anao izy io hitadidy ny fotoana niainan’ny olona sasany ao amin’ny Baiboly, sy ny datin’ny fisehoan-javatra lehibe hafa. Ao amin’ilay gazety ihany no misy ny pejy ahitana ny efajoro misy ny valiny. Misy fanontaniana hafa koa eo amin’ilay hoe ‘Ato Amin’ity Gazety Ity’, ary ho hitanao ao amin’ireo lahatsoratra samy hafa ao amin’ilay gazety ihany ny valiny. Nahoana raha mba manao fikarohana kely aloha, izay vao mamaky ny valim-panontaniana? Azonao resahina amin’ny hafa avy eo ny zavatra nianaranao. Azo atao koa ny midinika an’io lahatsoratra hoe ‘Ahoana no Havalinao?’ io miaraka amin’ny fianakaviana, na olon-kafa maromaro.”
3. Inona avy no soa noraisin’ny fianakaviana sasany avy amin’io pejy faha-31 io? Lafiny inona amin’izy io no tianao indrindra?
3 Maro tokoa ny fianakaviana tia mampiasa an’io pejy faha-31 io amin’ny fianaram-pianakaviany. Hoy ny reny iray: “Nihevitra izahay mivady hoe tsara raha dinihinay amin’ny fianaram-pianakavianay ilay hoe ‘Ho An’ny Ankizy.’ Amin’izay dia handray anjara ilay zanakay vavy telo taona ary hahaliana azy ilay fianarana. Tena mahafinaritra ny mijery azy. Falifaly erỳ izy mandray ny gazetiny sy mamadibadika an’ilay izy, mandra-pahitany an’ilay sary.” Nilaza toy izao ny raim-pianakaviana iray any Brezila: “Tena tianay sy Moises zanako lahy fito taona ilay hoe ‘Ahoana no Havalinao?’ ao amin’ny Mifohaza! Manampy azy hifantoka, hitady andinin-teny, hamantatra ny dikan’ny sary, ary hahafantatra daty ilay izy.” Hoy i Ashley, ankizivavy valo taona: “Misaotra anareo amin’ilay hoe ‘Ahoana no Havalinao?’ ao amin’ny Mifohaza! Nahafantarako zavatra betsaka ao amin’ny Baiboly izy io.”
4. Ahoana no azo ampiasana ny pejy faha-31 amin’ny Mifohaza! mandritra ny fianaram-pianakaviana?
4 Nahoana tokoa raha dinihina amin’ny fianaram-pianakavianareo indraindray ilay hoe “Ahoana no Havalinao?” Azonareo ampiasaina ny boky Fanondroana mba hikarohana ny valin’ny fanontaniana sarotra sasany. Hampianatra ny zanakao hanao fikarohana ianao, raha manao izany. Raha efa lehibebe ny zanakao, nahoana raha zavatra sarotsarotra kokoa no asaina karohiny, alohan’ny hanaovanareo fianaram-pianakaviana? Ohatra hoe “Iza àry Aho?”, na ilay hoe “Oviana no Nitranga Ireto?” Azony resahina mandritra ny fianaram-pianakavianareo ny vokatry ny fikarohana nataony. Anisan’ny fomba azonao ampianarana ny Tenin’Andriamanitra amin’ny zanakao ny fampiasana tsara an’io pejy faha-31 io. Mbola kely izy ireo amin’izay dia hahalala ny “Soratra Masina.”—2 Tim. 3:15; Deot. 6:7.