Valin’ny Fanontanianareo

◼ Inona no tokony hataon’ny tsirairay mba hahafahan’ny rehetra hifantoka tsara any am-pivoriana? (Deot. 31:12)

Ampirisihina ny rehetra ho tonga aloha sy ho vonona hampianarin’i Jehovah, mba ho fanajana lalina azy sy ho fanajana ny fivoriana alaminy. Tsara raha mipetraka eny aloha kokoa isika, mba ho an’ireo manan-janaka kely sy ireo tonga tara tsindraindray ny toerana any aoriana. Tokony hovonoina na tsy hasiana feo ny finday alohan’ny hanombohan’ny fivoriana, mba tsy hanelingelina ny mpanatrika. Tsy hisy ho voahelingelina firy, raha toa ny rehetra ka samy maneho fanajana mandritra ny fivoriana.—Mpito. 5:1; Fil. 2:4.

Rehefa misy vaovao sambany vao mivory, dia mety hipetraka eo akaikiny ny olona iray mahafantatra azy. Ho afaka hanampy an’ilay vaovao izy amin’izay, indrindra raha manan-janaka kely izy io. Mety ho zava-baovao tanteraka aminy mantsy ireo fivoriantsika. Azo antoka àry fa ho tiany kokoa ny hipetraka any aoriana mba tsy hanelingelenany ny hafa, raha tsy maintsy mitondra ny zanany hivoaka kely izy. (Ohab. 22:6, 15) Tsy tokony hipetraka ao amin’ny efitra iray hafa ireo manan-janaka kely, satria mety hitabataba fotsiny ireo ankizy. Tsara kokoa raha miverina eo amin’ny toerany ireo ray aman-dreny sy ny zanany, rehefa avy nikarakara an-janany na nibedy azy izy ireo.

Andraikitr’ireo mpikarakara ny mpanatrika ny manampy ny rehetra hanaja ny toeram-pivavahana. Ampiany hahita toerana ireo fianakaviana sy ireo tonga tara. Mahay mandanjalanja sy miezaka ny tsy hanelingelina ny hafa izy ireo rehefa manao izany. Hain’izy ireo tsara koa izay tokony hataony rehefa misy zavatra tsy ampoizina. Rehefa misy ankizy manomboka manelingelina ny hafa, ohatra, dia mety hanontany an’ireo ray aman-drenin’ilay ankizy izy ireo raha misy azony anampiana.

Mianatra momba an’i Jehovah sy ny fikasany hampisy tontolo vaovao hanjakan’ny fiadanana sy fahamarinana isika any am-pivoriana. Afaka miezaka àry ny tsirairay mba hahafahan’ny rehetra hifantoka tsara.—Heb. 10:24, 25.