Hizara Fanasana Fahatsiarovana Isika Manomboka ny 2 Aprily
1. Oviana isika no hizara ny fanasana Fahatsiarovana, ary nahoana no tena zava-dehibe io ezaka manokana io?
1 Ny Fahatsiarovana ny nahafatesan’i Kristy no fotoan-dehibe indrindra ao anatin’ny taona. Hizara fanasana isika ny 2 Aprily hatramin’ny 17 Aprily. Tena mandaitra ny ezaka manokana toy ireny, satria olona liana maro be no tonga. Niantso tany amin’ny biraon’ny sampana, ohatra, ny vehivavy iray tamin’ny andron’ny Fahatsiarovana. Hoy izy: “Vao tonga ato an-trano aho izao, ary nahita fanasana nisisika teo am-baravarana. Te handeha aho, nefa tsy fantatro hoe amin’ny firy ilay fotoana.” Nohazavain’ilay rahalahy tao amin’ny sampana fa misoratra eo amin’ilay fanasana ihany ilay izy. Nampanantena àry ilay vehivavy hoe: “Tena handeha aho rahariva!”
2. Ahoana no azo ametrahana an’ilay fanasana?
2 Fomba hametrahana azy: Tokony ho fohy ny tenintsika, satria kely ny fotoana nefa tokony ho vita daholo ny faritany. Azo atao ny milaza hoe: “Manahoana ô. Intỳ misy fanasana omenay anao sy ny fianakavianao, satria misy fankalazana lehibe hatao maneran-tany, amin’ny alahady 17 Aprily. [Omeo ilay fanasana.] Mitsingerina amin’io andro io ny daty nahafatesan’i Jesosy. Hisy lahateny ara-baiboly amin’io, hanazava hoe inona no soa azontsika avy amin’ny soron’i Kristy. Tsy misy vidim-pidirana ilay izy. Efa voasoratra amin’iny fanasana iny ny toerana sy ny ora hanaovana ilay fankalazana.”
3. Ahoana no hanasantsika olona faran’izay betsaka?
3 Raha lehibe ny faritany, dia mety hanapa-kevitra ny anti-panahy hoe azo amelana fanasana ireo tsy tratra an-trano, saingy tsy atao hitan’ny olona ilay izy. Asao ny olona tsidihinao, ny havanao, ny mpiara-miasa sy mpiara-mianatra, ary ny olom-pantatrao hafa. Mametraha gazety raha mety, rehefa mizara fanasana amin’ny faran’ny herinandro. Afaka manao mpisava lalana mpanampy ve ianao amin’ny Aprily? Ho hitanao fa tena mahafinaritra ny mandray anjara feno amin’io ezaka manokana io.
4. Nahoana no tiantsika hanatrika ny Fahatsiarovana ireo olona liana?
4 Hahazo fanazavana tena tsara ny olona liana amin’io andro io. Hohazavaina amin’izy ireo fa tena lehibe ny fitiavan’i Jehovah, matoa izy nanome ny vidim-panavotana. (Jaona 3:16) Ho fantany koa ny soa hoentin’ny Fanjakan’Andriamanitra. (Isaia 65:21-23) Hasaina hanatona ny mpikarakara ny mpanatrika ireo maniry hianatra Baiboly. Mivavaka isika mba ho maro be ireo olona tso-po hamaly ny antso, ka hiaraka amintsika hankalaza ny Fahatsiarovana!