“Aoka ho Tsara Foana ny Fitondran-tenanareo eo Amin’izao Tontolo Izao”

1. Nahoana no tokony ho tsara foana ny fitondran-tenantsika mandritra ny fivoriambe?

¹ Voamariky ny olona isika rehefa manatrika ny fivoriambe isan-taona. Tena tokony ho hita amin’ny fitondran-tenantsika àry hoe iza ilay Andriamanitra ivavahantsika. (Lev. 20:26) Tokony ho fantatry ny olona hoe tena mpanara-dia an’i Kristy isika rehefa hitany fa mahalala fomba sady milamina tsara ny akanjontsika sy ny volontsika. Rehefa hanatrika ny fivoriamben’ny vondrom-paritra na fivoriambe iraisam-pirenena isika, inona no azontsika atao mba ‘ho tsara foana ny fitondran-tenantsika eo amin’izao tontolo izao’ ka hahazo voninahitra ilay Raintsika any an-danitra?—1 Pet. 2:12.

2. Rehefa fivoriambe, inona no toetra kristianina azontsika aseho, ary amin’iza avy?

² Asehoy hoe Manana Toetra Kristianina Ianao: Tena tsy mitovy amin’ny olona eto amin’ity tontolo ity isika, satria mifankatia sady mahay mifandray “amin’ny olona eny ivelany.” (Kol. 3:10; 4:5; 2 Tim. 3:1-5) Tokony ho tsara fanahy sy hanam-paharetana amin’ireo mpiasan’ny hotely fisakafoana isika, na dia rehefa misy olana aza.

3. Inona no tokony hataon’ny ray aman-dreny, ary nahoana?

³ Tokony hanara-maso tsara ny zanany ny ray aman-dreny, na eny amin’ny fivoriambe na any amin’ny hotely fisakafoana. (Ohab. 29:15) Nisy tompona hotely niteny tamin’ny mpivady Vavolombelona iray hoe: “Tena tianay ianareo. Mahalala fomba be daholo ianareo sy ny zanakareo. Izany no ambentin-dresaky ny mpiasa ato. Satrinay foana ianareo hankatỳ isaky ny faran’ny herinandro.”

4. Tokony hanao ahoana ny fitafiantsika mandritra ny fivoriambe?

⁴ Akanjo Maotina: Tokony ho mendrika sy ho maotina ny akanjontsika rehefa fivoriambe, fa tsy hanaraka ny fomba fihaingon’ity tontolo ity izay tafahoatra loatra. (1 Tim. 2:9) Tsy tsara ny manao akanjo fitena loatra na baranahiny rehefa tsy ao amin’ilay toerana anaovana fivoriambe, aloha sy aorian’ny fandaharana. Tsy ho menatra isika amin’izay hanao ny karatry ny fivoriambe ary ho sahy hitory rehefa afaka. Ho liana amin’ny hafatra ao amin’ny Baiboly ny olona tso-po raha mendrika ny fitafiantsika sy ny fitondran-tenantsika mandritra ny fivoriambe. Ho faly koa i Jehovah.—Zef. 3:17.

Fampahatsiahivana Momba ny Fivoriambe 2014

◼ Fandaharam-potoana: Hivoha amin’ny 8.00 maraina ny vavahady. Hanomboka amin’ny 9.20 maraina foana ny mozika fanokafana mandritra ny telo andro. Tokony hipetraka daholo isika rehefa mandeha ny mozika. Hanomboka amim-pilaminana ny fandaharana amin’izay. Amin’ny 4.55 hariva ny hira sy vavaka famaranana ny zoma sy asabotsy, ary amin’ny 3.50 hariva ny alahady.

◼ Fivoriambe iraisam-pirenena: Hisy fivoriambe iraisam-pirenena any amin’ny tany sasany. Tadidio hoe efa noeritreretin’ny biraon’ny sampana tsara ny amin’ny seza sy ny parking ary ny hotely azo andraisana olona, talohan’ny nanasany an’ireo fiangonana sy vahiny avy any ivelany. Mety ho be loatra ny mpanatrika raha tonga ao koa ny mpitory tsy nasaina. Raha tsy ho afaka amin’ny fivoriambenareo ianao ka tsy maintsy hanatrika fivoriambe hafa, dia tsy tokony ho fivoriambe iraisam-pirenena no atrehinao.

◼ Parking: Araho ny toromarika omen’ny mpikarakara ny parking.

◼ Famandrihan-toerana: Rehefa vohaina ny vavahady amin’ny maraina, dia iangaviana isika tsy hihazakazaka hankeny amin’ny toerana tiantsika, ka toy ny hoe mifaninana amin’ny mpanatrika hafa. Mahafoy tena isika ka mitady izay hahasoa ny hafa. Izany no ahafantarana hoe tena Kristianina isika, ary izany no mahatonga ny olon-kafa hidera an’Andriamanitra. (Jaona 13:34, 35; 1 Kor. 13:4, 5; 1 Pet. 2:12) Izay olona miray fiara na trano aminao ihany, na ny olona ampianarinao Baiboly, no azonao amandrihana toerana. Misy toerana voatokana koa ho an’ireo zokiolona sy kilemaina. Voafetra ny toerana eo ka mpikarakara iray na roa isaky ny zokiolona na kilemaina ihany no mahazo mipetraka eo.

◼ Sakafo antoandro: Iangaviana ianareo hitondra sakafo antoandro, fa tsy hitady sakafo any ivelan’ny toerana anaovana fivoriambe. Azo atao ny mitondra harona kelikely azo apetraka ao ambany seza. Tsy azo atao kosa ny mitondra harona lehibe loatra sy zavatra mora vaky.

◼ Fanomezana: Afaka mampiseho ny fankasitrahantsika ny fivoriambe isika, ka mandrotsaka fanomezana an-tsitrapo ho an’ny asa maneran-tany rehefa eny amin’ny fivoriambe.

◼ Fanafody: Raha misy fanafody tokony hohaninao tsy tapaka, dia ento eny amin’ny fivoriambe ilay izy satria tsy hanana azy io ny fitsaboana vonjimaika.

◼ Aro Loza: Mitandrema mba tsy ho voafingana na hibolisatra. Maro ny loza mitranga isan-taona noho ny kiraro, indrindra fa ny kiraro avo. Mifidiana àry kiraro mendrika sy antonona anao tsara, sady mora andehanana amin’ny lalana mikitoantoana na mikisilasila, tohatra, sy ny toy izany.

◼ Taratasy Tsidiho Azafady (S-43): Tokony hosoratana ao amin’ilay taratasy hoe Tsidiho Azafady ny mombamomba ny olona nitoriana tsy ara-potoana nandritra ny fivoriambe, ka nihaino tsara. Omeo ny mpitan-tsoratry ny fiangonana ilay izy rehefa feno.

◼ Hotely fisakafoana: Aoka ianareo ho tsara fitondran-tena any amin’ny hotely mba hanomezam-boninahitra ny anaran’i Jehovah. Manaova akanjo mendrika ny Kristianina.

◼ Asa an-tsitrapo: Tokony hanatona ny Sampan-draharahan’ny Asa An-tsitrapo eny amin’ny fivoriambe izay te hanao asa an-tsitrapo. Afaka mandray anjara koa ny ankizy latsaka ny 16 taona, saingy tsara raha misy olon-dehibe manara-maso azy, ohatra hoe ny rainy na ny reniny, na olon-kafa nahazo alalana tamin’izy ireo.