Fitondran-tena Manome Voninahitra An’Andriamanitra
1. Nahoana no mora voamarika ny Vavolombelon’i Jehovah hamonjy fivoriamben’ny vondrom-paritra?
1 Mora voamariky ny olona isika rehefa manatrika fivoriamben’ny vondrom-paritra. Mampahafantatra ny olona momba ny fivoriambe ataontsika ny filazam-baovao, any amin’ny tanàn-dehibe maro. Matetika ny hotely fisakafoana no feno mpanatrika fivoriambe, ary voamariky ny olona eny amin’ny manodidina ireo vahiny maro manao karatry ny fivoriambe. Ireto misy fampahatsiahivana hanampy antsika hitondra tena tsara ka hanome voninahitra an’Andriamanitra rehefa any amin’ny toerana hanaovana fivoriambe.—1 Pet. 2:12.
2. Ahoana no azontsika anomezana voninahitra an’Andriamanitra rehefa any amin’ny toerana anaovana fivoriambe?
2 Akanjo maotina: Matetika no mampiaiky ny olona ny akanjontsika mandritra ny fivoriambe satria maotina. Misy vokany amin’ny olona koa anefa ny fomba fiakanjontsika amin’ny fotoana hafa, ohatra hoe rehefa mandeha taxi-be, rehefa misakafo any amin’ny hotely, rehefa miantsena, sy ny toy izany. Marina fa tsy hanao akanjo fitondra mivory isika amin’ireo fotoana ireo, nefa tokony ho maotina sy ho mendrika ary tsy ho baranahiny ny fitafintsika. Tokony ho hitan’ny olona ny maha samy hafa antsika amin’ireo tsy Vavolombelona. (Rom. 12:2) Tokony hanao ny karatry ny fivoriambe koa isika, mba ho fantatry ny namantsika sy ho afaka hanombo-dresaka hitoriana. Ho fantatry ny olona koa amin’izay hoe misy fivoriambe.
3. Ahoana no hampisehoantsika hoe manam-paharetana sy mahalala fomba isika?
3 Faharetana sy fahalalam-pomba: Tia tena sy tsy mahay misaotra ny olona maro eto amin’ity tontolo ity. (2 Tim. 3:1-5) Rehefa manam-paharetana sy mahalala fomba àry isika dia tena mamelombelona ny hafa, ohatra hoe ireo mpamily sy ireo mpiasan’ny hotely. Tsy tokony hitady an’izay hahasoa antsika isika rehefa mamandrika toerana sy milahatra haka an’izay zavatra vao nivoaka, fa tokony hiahy ny hafa. (1 Kor. 10:23, 24) Hoy ny lehilahy iray tamin’izy nanatrika fivoriambe voalohany: “Tsy nisy tadidiko ny lahateny natao tany, fa ny zavatra nataon-dry zareo kosa no tsy afaka tato an-tsaiko mihitsy.”
4. Nahoana isika no tokony hieritreritra hanao asa an-tsitrapo, amin’ny fivoriambe?
4 Vonona hiasa an-tsitrapo: Amantarana ny tena Kristianina ny toe-tsaina tia miasa an-tsitrapo. (Sal. 110:3) Afaka manolo-tena hanampy ve ianao amin’ny fivoriambe? Rahalahy sy anabavy 600 teo ho eo no nanolo-tena hanadio mialoha ny toerana iray hanaovana fivoriambe. Hoy ny olona miasa ao amin’ilay toerana: “Tsy mbola nahita hoatr’izao mihitsy izahay. Mahagaga hoe mpiasa an-tsitrapo daholo ireo olona ireo.” Tsy andrintsika ny hanatrehana ny fivoriamben’ny vondrom-paritra 2013. Ho afaka hihaino sy hianatra momba an’Andriamanitra isika amin’izay sady ho afaka hanome voninahitra azy.
[Efajoro, pejy 3]
Fampahatsiahivana Momba ny Fivoriambe 2013
◼ Fandaharam-potoana: Hivoha amin’ny 8.00 maraina ny vavahady. Hanomboka amin’ny 9.20 maraina foana ny mozika fanokafana mandritra ny telo andro. Tokony hipetraka daholo isika rehefa mandeha ny mozika. Hanomboka amim-pilaminana ny fandaharana amin’izay. Amin’ny 4.50 hariva ny hira sy vavaka famaranana ny zoma sy asabotsy, ary amin’ny 3.35 hariva ny alahady.
◼ Famandrihan-toerana: Izay olona miray fiara na trano aminao ihany, na ny olona ampianarinao Baiboly, no azonao amandrihana toerana.—1 Kor. 13:5.
◼ Sakafo antoandro: Iangaviana ianareo hitondra sakafo maivana, fa tsy hitady sakafo any ivelan’ny toerana anaovana fivoriambe. Azo atao ny mitondra harona kelikely azo apetraka ao ambany seza. Tsy azo atao kosa ny mitondra harona lehibe loatra sy zavatra mora vaky.
◼ Fanomezana: Afaka mampiseho ny fankasitrahantsika ny fivoriambe isika, ka mandrotsaka fanomezana an-tsitrapo ho an’ny asa maneran-tany rehefa eny amin’ny fivoriambe.
◼ Fanafody: Raha misy fanafody tokony hohaninao tsy tapaka, dia ento eny amin’ny fivoriambe ilay izy satria tsy hanana azy io ny fitsaboana vonjimaika.
◼ Kiraro: Maro ny loza mitranga isan-taona noho ny kiraro, indrindra fa ny kiraro avo. Mifidiana àry kiraro mendrika sy antonona anao tsara, sady mora andehanana amin’ny lalana mikitoantoana, tohatra, sy ny toy izany.
◼ Taratasy Tsidiho Azafady (S-43): Tokony hosoratana ao amin’ilay taratasy hoe Tsidiho Azafady ny mombamomba ny olona nitoriana tsy ara-potoana nandritra ny fivoriambe, ka nihaino tsara. Omeo ny mpitan-tsoratry ny fiangonana ilay izy rehefa feno.
◼ Hotely fisakafoana: Aoka ianareo ho tsara fitondran-tena any amin’ny hotely mba hanomezam-boninahitra ny anaran’i Jehovah. Manaova akanjo mendrika ny Kristianina.
◼ Asa an-tsitrapo: Tokony hanatona ny Sampan-draharahan’ny Asa An-tsitrapo eny amin’ny fivoriambe izay te hanao asa an-tsitrapo. Afaka mandray anjara koa ny ankizy latsaka ny 16 taona, saingy tsara raha misy olon-dehibe manara-maso azy, ohatra hoe ny rainy na ny reniny, na olon-kafa nahazo alalana tamin’izy ireo.