Fampahatsiahivana Momba ny Fivoriambe
Fandaharam-potoana: Hivoha amin’ny 8.00 maraina ny vavahady. Hanomboka amin’ny 9.20 foana ny mozika fanokafana mandritra ny telo andro. Tokony hipetraka daholo isika rehefa mandeha ny mozika. Hanomboka amim-pilaminana ny fandaharana amin’izay. Hifarana amin’ny 5.00 hariva eo ho eo ny fandaharana ny zoma sy asabotsy, ary amin’ny 4:00 eo ho eo ny alahady.
‘Miderà an’i Jehovah amin’ny hira’: Nidera an’i Jehovah tamin’ny hira ny vahoakan’Andriamanitra fahiny, ary mbola zava-dehibe eo amin’ny fivavahana marina ny hira ankehitriny. (Sal. 28:7) Manomboka amin’ny mozika foana ny fandaharan’ny fivoriamben’ny vondrom-paritra. Tsy hoe natao hampiala voly antsika izy ireny, fa manomana antsika mba hianatra sy hivavaka amin’i Jehovah. Rehefa miteny àry ny mpanolotra fandaharana hoe hanomboka ny mozika, dia tokony hipetraka amin’izay isika, ary hankafy an’ilay izy fa tsy hiresaka intsony. Mankasitraka ny ezaka ataon’ireo mpitendry ao amin’ny orkesitry ny fandaminana isika raha manao an’izany. Mankany Patterson, any Etazonia, indroa isan-taona mantsy izy ireo, ary mianto-tena izy amin’izany. Tokony hanao ny hiran’ilay Fanjakana ny rehetra mba hiderana an’i Jehovah, rehefa tapitra ny mozika fanokafana.
Parking: Araho ny toromarika omen’ny mpikarakara ny parking.
Famandrihan-toerana: Rehefa mivoha ny vavahady, dia iangaviana isika tsy hihazakazaka, satria hoatran’ny hoe mifaninana mba hamonjy toerana. Tokony hitady izay hahasoa ny hafa aloha isika, na dia hahafoy an’izay toerana tiantsika aza. Hita hoe tena Kristianina isika raha mahafoy tena, ary hahatonga ny olon-kafa hidera an’Andriamanitra izany. (Jaona 13:34, 35; 1 Kor. 13:5; 1 Pet. 2:12) Izay olona miray fiara na trano aminao ihany, na ny olona ampianarinao Baiboly, no azonao amandrihana toerana. Aza asiana zavatra eo amin’izay toerana tsy fandrihanao, mba ho hitan’ny hafa hoe mbola azo ipetrahana ilay izy. Misy toerana voatokana ho an’ireo zokiolona sy kilemaina. Voafetra ny toerana eo ka mpikarakara iray na roa isaky ny zokiolona na kilemaina ihany no mahazo mipetraka eo.
Akanjo maotina: Tokony ho mendrika sy ho maotina ny akanjontsika rehefa fivoriambe, fa tsy hanaraka ny fomba fihaingon’ity tontolo ity izay tafahoatra loatra. (1 Tim. 2:9) Tsy tsara ny manao akanjo fitena loatra na baranahiny rehefa tsy ao amin’ilay toerana anaovana fivoriambe, aloha sy aorian’ny fandaharana. Tsy ho menatra isika amin’izay hanao ny karatry ny fivoriambe, ary ho sahy hitory rehefa afaka. Ho liana amin’ny hafatra ao amin’ny Baiboly ny olona tso-po, raha mendrika ny fitafiantsika sy ny fitondran-tenantsika. Ho faly koa i Jehovah.—Zef. 3:17.
Fitaovana elektronika: Aoka ianao hanaja an’ireo manodidina. Raha manana telefaonina na fitaovana elektronika hafa ianao, dia aza atao manelingelina ny olon-kafa izany. Raha maka sary na video ianao, dia tandremo sao manakona ny hafa. Tsy manaja ny namantsika koa isika raha variana mandefa SMS na e-mail, mandritra ny fandaharana.
Sakafo antoandro: Iangaviana ianao hitondra sakafo antoandro, fa tsy hitady sakafo any ivelan’ny toerana anaovana fivoriambe. Azo atao ny mitondra harona kelikely antonona ao ambany seza. Tsy mety kosa ny mitondra harona lehibe loatra sy zavatra mora vaky.
Fanomezana: Afaka mampiseho ny fankasitrahantsika ny fivoriambe isika, ka mandrotsaka fanomezana an-tsitrapo ho an’ny asa maneran-tany rehefa any.
Fanafody: Raha misy fanafody tokony hohaninao tsy tapaka, dia ento eny amin’ny fivoriambe ilay izy satria tsy hanana azy io ny fitsaboana vonjimaika.
Aro loza: Mitandrema mba tsy ho voafingana na hibolisatra. Maro ny loza mitranga isan-taona noho ny kiraro, indrindra fa ny kiraro avo. Mifidiana àry kiraro mendrika sy antonona anao tsara, sady mora andehanana amin’ny lalana mikitoantoana na mikisilasila, tohatra, sy ny toy izany.
Taratasy Tsidiho Azafady (S-43): Tokony hosoratana ao amin’ilay taratasy hoe Tsidiho Azafady ny mombamomba ny olona nitoriana tsy ara-potoana nandritra ny fivoriambe, ka nihaino tsara. Omeo ny mpitan-tsoratry ny fiangonana ilay izy rehefa feno.
Hotely fisakafoana: Aoka ianao ho tsara fitondran-tena any amin’ny hotely, mba hanomezam-boninahitra ny anaran’i Jehovah. Manaova akanjo mendrika ny Kristianina.
Asa an-tsitrapo: Tokony hanatona ny Sampan-draharahan’ny Asa An-tsitrapo eny amin’ny fivoriambe izay te hanao asa an-tsitrapo. Afaka mandray anjara koa ny ankizy latsaka ny 16 taona, saingy tsara raha misy olon-dehibe manara-maso azy, ohatra hoe ny rainy na ny reniny, na olon-kafa nahazo alalana tamin’izy ireo.