Ahoana no Atao Raha Te Hanohina ny Fon’ny Mpianatra?

1. Inona ny vokatry ny fampianaran’i Jesosy tamin’ny mpihaino azy?

¹ Nanohina ny fon’ny mpihaino azy i Jesosy Kristy. Nisy fotoana aza, “toy ny nisy afo niredareda” mihitsy tao am-pon’ny mpianany, rehefa nohazavain’i Jesosy tsara taminy ny Soratra Masina. (Lioka 24:32) Ny fo no tokony hanosika ny olona hankatò an’Andriamanitra. Inona àry no hanampy antsika hanohina ny fon’ny olona ampianarintsika, ka hahatonga azy hanova ny fomba fiainany?—Rom. 6:17.

2. Nahoana no tena ilaina ny hoe mahay mandanjalanja sy mandinika tsara raha te hanohina ny fon’ny olona?

² Mahaiza mandanjalanja sy mandinika: Matetika ny olona no tsy manao zavatra, raha resahina aminy fotsiny hoe inona no mety sy tsy mety. Vao mainka aza izy tsy hianatra intsony, raha totofana andinin-teny manaporofo hoe diso ny zavatra inoany. Diniho tsara àry aloha ny antony mahatonga azy hanao na hino zavatra iray. Mahaiza koa mandanjalanja ka mifidiana fanontaniana hahatonga azy hiresaka an’izay tena ao an-tsainy. (Ohab. 20:5) Afaka miresaka hevitra manohina ny fony avy ao amin’ny Tenin’Andriamanitra ianao avy eo. Asehoy koa hoe miahy azy ianao, ary manàna faharetana. (Ohab. 25:15) Tsy mitovy ny olona tsirairay fa misy mandroso haingana ary misy miadana kokoa. Avelao hanova tsikelikely ny fisainan’ilay olona sy ny zavatra ataony ny fanahy masin’i Jehovah.—Mar. 4:26-29.

3. Inona no tokony hataontsika mba hahatonga ny mpianatra Baiboly hanana toetra tsara?

³ Ampio hanana toetra tsara izy: Asehoy azy ny andinin-teny ahitana ny toetra tsaran’i Jehovah toy ny fitiavana, satria hanampy azy hanana toetra tsara izany. Ampiasao, ohatra, ny Salamo 139:1-4 na Lioka 12:6, 7, izay milaza fa miahy antsika tsirairay Andriamanitra. Rehefa mankasitraka ny hatsaram-panahy tsy manam-paharoan’i Jehovah ilay olona, dia vao mainka ho tia sy hahafoy tena ho azy. (Rom. 5:6-8; 1 Jaona 4:19) Rehefa fantany koa hoe misy vokany amin’i Jehovah ny fitondran-tenany, dia mety hahatonga azy hanao zavatra mampifaly an’i Jehovah sy hanome voninahitra azy izany.—Sal. 78:40, 41; Ohab. 23:15.

4. Ahoana no ampisehoantsika fa manaja ny safidin’ny olona isika rehefa mampianatra?

⁴ Tsy teren’i Jehovah hankatò ny didiny ny olona. Manohina ny fon’ny olona kosa izy, ka asehony hoe mahasoa ny torohevitra omeny. (Isaia 48:17, 18) Manahaka an’i Jehovah isika, raha ny olona ampianarintsika ihany no avelantsika hanatsoaka hevitra. Hisy vokany maharitra aminy ny zavatra ampianarintsika, raha izy mihitsy no resy lahatra hoe mila miova. (Rom. 12:2) Hahatonga azy hanatona akaiky kokoa an’i Jehovah, ilay “mpandinika ny fo” izany.—Ohab. 17:3.