Ampio ny Hafa Hianatra Momba an’i Jesosy Kristy, Zanak’Andriamanitra
1 Ny volana Desambra no volana anomezan’ny ankamaroan’ireo milaza tena ho Kristiana fiheverana bebe kokoa an’i Jesosy, noho ny amin’ny fotoana hafa rehetra ao anatin’ny taona. Noho izany, dia volana tsara dia tsara mba hanasongadinana ilay boky hoe Ilay Lehilahy Niavaka Indrindra Teto An-tany izy io. Koa satria zavatra vita an-tsoratra sarobidy izy io, dia tokony hofantarintsika raha liana amim-pahatsorana ny hianatra bebe kokoa momba ny Zanak’Andriamanitra ilay tompon-trano, alohan’ny hanolorantsika ilay boky. Ahoana no azontsika anaovana izany?
2 Miezaha mampiditra resadresaka mivantana miorina amin’ny Baiboly, izay mampifantoka ny saina amin’i Jesosy.
Rehefa avy niarahaba ilay tompon-trano ianao, dia ho azonao atao ny hilaza toy izao:
◼ “Androany izahay dia nanontany ireo mpiara-belona aminay izay eritreretiny rehefa mamaky ao amin’ny Baiboliny momba ny fiainana mandrakizay izy. [Avelao izy hamaly.] Mahaliana indrindra izany satria ny Baiboly dia miresaka momba izany fahafahana izany eo amin’ny in-40 eo ho eo. Inona no mety ho hevitr’izany fiainana izany ho antsika? Mariho ange izay lazain’ny Apokalypsy 21:4 e. [Vakio.] Nomarihinao ve hoe inona no ampanantenaina eto? [Avelao izy hamaly.] Ahoana no mety hahazoantsika fiainana mandrakizay?” Vakio ny Jaona 17:3, ary hamafiso ny ilana handraisana fahalalana an’Andriamanitra sy an’i Jesosy Kristy Zanany. Raha mampiseho fahalianana sasany ilay tompon-trano, dia asehoy azy ny boky Lehilahy Niavaka, amin’ny fampiasana ireo lohatenikely ao amin’ny teny fampidirana mba hanairana ny fahalianany bebe kokoa.
3 Raha voafetra ny fahalianana nasehon’ilay tompon-trano teo am-boalohany, dia manolora ireo gazety farany indrindra amin’ny Ny Tilikambo Fiambenana sy Mifohaza! na ilay taratasy mivalona hoe Ho Tafita Velona ve Ity Tontolo Ity? Tariho ny sainy ho amin’ny hevitra voafaritra tsara iray na roa ao amin’ilay zavatra vita an-tsoratra aseho. Manolora ny hiverina amin’ny fotoana hafa mety mba hanohizana ny fiaraha-mandinika ilay foto-kevitra aminy.
4 Raha hita fa sahirana ilay tompon-trano, dia mety ho fahendrena ny hanafohezana ny fampisehoana etsy ambony. Mety ho hitan’ireo mpitory vao haingana kokoa fa mora ampiasaina koa ny fampisehoana manaraka.
Rehefa avy nampahafantatra ny tenantsika isika, dia ho azontsika atao ny hilaza toy izao:
◼ “Androany izahay dia nanontany ireo mpiara-belona aminay izay eritreretiny rehefa mamaky momba ny fahazoana ny fiainana mandrakizay izy ao amin’ny Baiboliny. Ohatra, mariho ange izay nolazain’i Jesosy ato amin’ny Jaona 17:3 e. [Vakio.] Mba hanampiana ny olona hianatra bebe kokoa momba an’i Jesosy Kristy sy izay nampianariny, dia navoaka itỳ boky itỳ.” Sokafy eo amin’ny pejy sasantsatsany misy sary tsara tarehy ilay boky Lehilahy Niavaka. Avadiho ilay boky ao amin’ny teny fampidirana, ary vakio ny fehintsoratra faharoa eo ambanin’ilay lohatenikely hoe “Soa azo avy amin’ny fianarana momba azy”. Raha liana ilay tompon-trano, dia atolory azy ilay boky amin’ny fandraisana anjara an-tsitrapo 3 000 FMG.
5 Raha mametraka ilay boky ianao, dia aoreno ny fototra ho amin’ny fampianarana Baiboly, amin’ny fanolorana fiaraha-mandinika ny toko voalohany hoe “Hafatra avy any An-danitra” amin’io fotoana io, na rehefa miverina mitsidika andro vitsivitsy atỳ aoriana. Aza manonona fe-potoana hentitra izay tokony holanina amin’ny fitsidihana hanaraka, fa lazao tsotra fa ao anatin’ny minitra vitsivitsy monja izy dia ho afaka ny hahazo fahalalana bebe kokoa mahaliana momba an’i Jesosy Kristy avy ao amin’ny Baiboly, Tenin’Andriamanitra.
6 Enga anie isika rehetra samy hampiasa itỳ fotoam-pialan-tsasatra eo amin’izao tontolo izao itỳ mba hampifantohana ny saina ho amin’ny fahamarinana momba an’i Jesosy Kristy, Zanak’Andriamanitra, mba hahafahana hanampy ny hafa hizotra eo amin’ny lalana mitarika ho amin’ny fiainana mandrakizay. — Matio 7:14.