Manaova Zavatra Amin’ny fanahinao Manontolo!
1 Manana antony sesehena tokony hahavelom-pankasitrahana an’i Jehovah isika. Tafiditra amin’izany ireo zavatra nataony ho antsika taloha sy amin’izao andro izao ary amin’ny hoavy. Tokony hanosika antsika hanao inona moa ny fankasitrahantsika? Mamaly toy izao ny salamo iray nataon’i Davida: “Hisaotra an’i Jehovah lalandava aho; ho eo am-bavako mandrakariva ny fiderana Azy.” — Sal. 34:1.
2 Mampiseho mazava ny Baiboly fa nomena didy hitory isika. Asa iray tanterahintsika ‘amin’ny fanahintsika manontolo toy ny ho an’i Jehovah’ izy io. (Kol. 3:23, NW ). Ho toy inona moa ny habetsahan’ny vitantsika eo amin’ny fanompoana raha tena manao zavatra amin’ny fanahintsika manontolo isika? Rehefa mihevitra ny fitiavan’i Jehovah antsika isika, ny fontsika dia azo antoka fa hanosika antsika handray anjara amim-pandavan-tena amin’ny filazana amin’ny hafa momba azy sy ny fikasany sarobidy! Voatosika hanao izay azontsika atao isika.
3 Ho araka ny antonona ny hanantenana fa ny olona iray manao zavatra amin’ny fanahiny manontolo dia maniry hampifantoka ny sainy hatrany amin’ny fanompoana masina. Ilay mpanao salamo, izay niharihary fa nahatsapa izany, dia nanambara hoe: “Impito isan-andro no iderako Anao noho ny fitsipikao marina.” (Sal. 119:164). Ireo izay mitovy fihetseham-po amin’ilay mpanao salamo dia miezaka hanararaotra ireo fahafahana hidera an’i Jehovah. Arakaraka ny amelan’ny toe-javatra misy azy ireo, dia manompo amin-jotom-po araka izay tratran’ny heriny izy ireo.
4 Voahodidin’ny fahafahana hidera an’i Jehovah isika: Tsy voatery hiandry ny fandraisantsika anjara amin’ny fitoriana isam-baravarana isika vao hitory ilay vaovao tsara. Ireo mpiara-miasa amintsika, mpiara-mianatra amintsika, havantsika ary olom-pantatsika dia mila mandre ny hafatra momba ilay Fanjakana avokoa. Rehefa manao dia isika, dia afaka manomboka resaka izay mety hitarika ho amin’ny fanaovana fanambarana amin’ny mpiasan’ny hotely fatoriana sy ny hotely fisakafoana, mpivaro-dasantsy, na mpitondra taxi. Rehefa ao an-tranontsika isika, dia mety hanao fanambarana amin’ny mpifanila trano na amin’ny mpanatitra entana. Raha any amin’ny hopitaly isika, dia eo ireo mpitsabo mpanampy sy dokotera ary marary hafa izay azontsika itoriana tsy ara-potoana.
5 Ahazoam-bokatra ny fanaovana fanambarana tsy ara-potoana: Nandeha an-tongotra tao amin’ny zaridainam-panjakana ny Vavolombelona roa indray andro, ary nanomboka resaka tamin’ny lehilahy tanora iray izay niara-nitsangantsangana tamin’ny zanany kely. Tamin’ny farany, dia nanaiky ny fahamarinana izy sy ny vadiny. Nanambara ilay lehilahy tatỳ aoriana fa vetivety monja talohan’ny nihaonany voalohany tamin’ireo Vavolombelona roa ireo, dia nivavaka tamin’Andriamanitra izy, ka nangataka hoe: ‘Raha misy ianao, dia mba avelao aho hahafantatra anao.’ Mihevitra izy fa valiny nomen’i Jehovah ho an’ny vavaka nataony ilay fifankahitana tao amin’ny zaridainam-panjakana.
6 Ireo izay manao zavatra amin’ny fanahiny manontolo raha ny amin’ny faniriany hanampy ny hafa amin’ny lafiny ara-panahy, dia mahita fifaliana lehibe. Fantatr’izy ireo fa ny fanompoana toy izany, izay atao “amin’ny fo rehetra” dia mampifaly an’i Jehovah. — 1 Tant. 28:9.