Manahafa An’i Jehovah Amin’ny Fiahiana Marina ny Hafa
1 I Jehovah no ohatra lehibe indrindra ny amin’ny olona maneho fiahiana marina ny hafa. Amin’ny maha-Tompom-piandrianana eo amin’izao rehetra izao azy, izy dia tena mahatsapa ny zavatra ilain’ny olombelona noforoniny. (1 Pet. 5:7). I Jesosy dia nampirisika an’ireo mpanara-dia azy mba haneho ny toetran’ny Rainy, izay mampiposaka ny masoandro sy mampilatsaka ny ranonorana amin’ny marina sy ny tsy marina. (Matio 5:45). Afaka manahaka an’i Jehovah ianao amin’ny fanehoana fiahiana marina ny hafa — voaomana tsara hizara ny hafatra momba ilay Fanjakana amin’izay olona rehetra mifanena aminao. Amin’ny fahafantarana tanteraka ireo bokikely izay hampiasaina eo amin’ny fanompoana mandritra ny Jolay, dia ho tsara toerana ianao hanolotra fanampiana ara-panahy ho an’ny hafa. Ireto fanoloran-kevitra manaraka ireto dia manome hevitra sasany ny amin’ny fomba azonao iomanana ho amin’ny fitsidihana voalohany ary avy eo, dia anolokoloanao ny fahalianana amin’ny alalan’ny fiverenana mitsidika amin’ny fotoana ilana azy indrindra.
2 Rehefa manolotra ny bokikely “Tena Miahy Antsika ve Andriamanitra?” ianao, dia ho afaka hiteny toy izao:
◼ “Efa mba nanontany tena ve ianao hoe nahoana Andriamanitra no mamela ny olombelona hijaly raha tena miahy azy ireo izy? [Avelao ilay olona hamaly.] Itỳ bokikely itỳ dia tsy vitan’ny hoe manome valiny mahafa-po amin’io fanontaniana io, fa mampiseho koa fa Andriamanitra dia nampanantena fa hikosoka ny fanimbana rehetra nentin’ny olona ho an’ny tenany sy ho an’ny tany fonenany.” Vakio ny fehintsoratra faha-23 eo amin’ny pejy faha-27. Asehoy ilay sary eo ambaniny, ary vakio ny Salamo 145:16 avy eo amin’ny fehintsoratra faha-22. Atolory ilay bokikely. Raha raisin’ilay olona izy io, dia mametraha fanontaniana iray izay azo valiana amin’ny fitsidihana manaraka, toy ny hoe: “Ho tianao ve ny hahalala hoe ahoana no hanatanterahan’Andriamanitra ny fikasany hitondra fitahiana ho an’ny olombelona sy hanova ny tany ho paradisa?”
3 Rehefa miverina any amin’ireo izay nametrahanao ny bokikely “Tena Miahy Antsika ve Andriamanitra?” ianao, dia ho azonao atao ny hanomboka dinika hafa amin’izao fomba izao:
◼ “Fony aho nitsidika anao farany, dia nodinihintsika fa tena miahy antsika tokoa Andriamanitra ary fikasany ny hikosoka ny fanimbana rehetra nentin’ny olombelona ho an’ny tenany sy ho an’ny tany fonenany.” Sokafy ilay bokikely eo amin’ilay sary eo amin’ny pejy faha-2 sy faha-3 ary milazà hoe: “Isika dia namarana ny resatsika tamin’ny fanontaniana hoe: Ahoana no hanatanterahan’Andriamanitra ny fikasany hitondra fitahiana ho an’ny olombelona sy hanova ny tany ho paradisa? Ahoana no hevitrao?” Avelao ilay olona hamaly. Avadiho ho eo amin’ny pejy faha-17 ilay bokikely, ary vakio ny fehintsoratra faha-2 sy ny Daniela 2:44. Aorian’izany, dia vakio ny fehintsoratra faha-12 eo amin’ny pejy faha-18. Anontanio ilay tompon-trano raha ho tiany ny hiara-mandinika aminao ny fizarana faha-9 amin’ilay bokikely. Raha eny, dia miaraha mianatra azy io aminy.
4 Indro misy tari-dresaka izay ho azo ampiasaina amin’ny fanolorana ny bokikely “Rehefa Nody Mandry ny Olona Iray Tianao”. Asehoy ny fonony ary milazà hoe:
◼ “Anio izahay dia mizara itỳ bokikely itỳ izay mitondra fampiononana sy fanantenana ho an’ny olona an-tapitrisany maro namoy olon-tiana ao amin’ny fahafatesana. Efa mba nanontany tena ve ianao hoe inona no fanantenana ho an’ny maty? [Avelao ilay olona hamaly.] Manambara mazava ny fampanantenan’Andriamanitra fitsanganana amin’ny maty ny Baiboly.” Vakio ny Jaona 5:28, 29. Sokafy ilay bokikely ary miresaha momba ireo hevitra tiana haseho ao amin’ny fehintsoratra farany eo amin’ny pejy faha-28 sy ny fehintsoratra voalohany eo amin’ny pejy faha-31. Asehoy ireo sary miaraka aminy. Atolory ilay bokikely. Afaka manomana ny lalana ho amin’ny fiverenana mitsidika ianao amin’ny fanontaniana hoe: “Ahoana no ahazoantsika antoka fa amin’ny farany ny fahafatesana dia hofoanana tanteraka?”
5 Any amin’izay nametrahanao ny bokikely “Rehefa Nody Mandry ny Olona Iray Tianao”, dia mety ho tianao ny hampiasa izao fomba fampiseho izao amin’ny fiverenana mitsidika:
◼ “Fony isika niresaka teo aloha, dia nandinika ny fanantenana mahatalanjona ny amin’ny fitsanganana amin’ny maty isika. Ilay bokikely napetrako taminao dia manazava ny antony ahazoantsika antoka fa amin’ny farany ny fahafatesana dia hofoanana tanteraka. Tsy hitanao ho mampionona sy manome toky ve ny fampanantenan’Andriamanitra?” Avelao ilay olona hamaly. Avy eo dia avadiho ho eo amin’ny pejy faha-31 ilay bokikely, ary vakio ny fehintsoratra faharoa sy fahatelo, miaraka amin’ny Apokalypsy 21:1-4. Asongadino ny fahatsinjovana ananantsika hifaly amin’ny fiainana sy tsy ho faty mihitsy. Miankina amin’izay fahalianana miseho sy ny toe-javatra amin’izay fotoana izay, dia mety hanolotra fampianarana Baiboly amin’ny boky Fahalalana na hametraka fanontaniana hafa hanokafana ny lalana ho amin’ny fiverenana mitsidika manaraka ianao.
6 Ho azonao atao ny hilaza izao manaraka izao rehefa manolotra ny bokikely “Inona no Zava-kendren’ny Fiainana — Ahoana no Mety Hahitanao Azy Io?” ianao:
◼ “Olona maro no nanontany tena hoe inona no zava-kendren’ny fiainana. Nanontany tena izy ireo hoe: ‘Nahoana aho no eto? Inona no hiafarako? Inona no raketin’ny hoavy ho ahy?’ Aiza no heverinao fa hahitantsika ny valiny? [Avelao ilay olona hamaly.] Mariho izay lazain’ny Baiboly. [Vakio ny Salamo 36:9.] Tsy azon’ny saina ekena ve ny fanatsoahan-kevitra hoe ny Mpamorona ny olombelona no tsara toerana indrindra mba hanazava ny antony maha-eto antsika? [Avelao ilay olona hamaly.] Itỳ bokikely itỳ dia mampiseho ny fikasana lehiben’Andriamanitra ho antsika.” Avadiho ho eo amin’ny pejy faha-20-21 ilay bokikely, vakio ilay soratra miaraka amin’ilay sary ary hazavao ilay sary; avy eo dia atolory ilay bokikely. Raha raisin’ilay olona izy io dia manontania hoe: “Ahoana no ahafahantsika mahazo antoka fa mbola fikasan’Andriamanitra ihany ny hiainan’ny olona mandrakizay ao amin’ny Paradisa eto an-tany?” Mamera fotoana hiverenana.
7 Raha voapetraka ny bokikely “Inona no Zava-kendren’ny Fiainana — Ahoana no Mety Hahitanao Azy Io?”, dia ho afaka hilaza zavatra mitovy amin’izao ianao rehefa miverina:
◼ “Tamin’ny fitsidihako teo aloha, dia tena nahafaly ahy ny niara-nandinika taminao ny fomba fijerin’ny Baiboly hoe tena manana zava-kendrena ny fiainan’olombelona.” Asehoy ilay sary eo amin’ny pejy faha-31 ary manontania hoe: “Ahoana no ahafahantsika mahazo antoka fa mbola sitrapon’Andriamanitra ihany ny hiainan’ny olona mandrakizay ao amin’ny Paradisa eto an-tany?” Vakio ny fehintsoratra faha-3 eo amin’ny pejy faha-20. Mandiniha hevitra eo ambanin’ilay lohatenikely hoe: “Mbola fikasan’Andriamanitra ihany”, eo amin’ny pejy faha-21. Avadiho ho amin’ny fonony aoriana ilay bokikely, ary vakio ilay momba ny fanolorana fampianarana Baiboly maimaim-poana any an-tokantrano. Ampahafantaro azy ny boky Fahalalana ary manolora ny hampiseho ny fomba fampiasantsika azy io ho fiasana hianarana ny Baiboly.
8 Ny fanompoantsika dia tokony hahitana taratry ny fahalianantsika feno fahatsoram-po ny hanampy ireo olona tso-po “ho tonga amin’ny fahalalana ny marina”. (1 Tim. 2:4). Noho izany, dia asio fotoana ao amin’ny fandaharam-potoam-panompoanao hiverenana hitsidika ny olona tsirairay nametrahanao bokikely. Ny fanehoanao fiahiana marina azy ireo dia mety hanampy ireo izay misento sy mitaraina noho ny fahavetavetana atao ao amin’ny fivavahan-diso, hanjary ho fantatra hoe anisan’ireo ho tafita velona. (Ezek. 9:4, 6). Ho tsapanao koa ny fifaliana sy ny fahafaham-po izay avy amin’ny fahafantarana fa manahaka an’i Jehovah amin’ny fiahiana marina ny hafa ianao. — Ampitahao amin’ny Filipiana 2:20, NW.