Voalamina “Amin’ny Fahamendrehana sy ny Filaminana”
1 Tsy maintsy misy fiaraha-miezaka raha tiana hahomby ny fivoriamben’ny distrika. Mandamina toeram-pivoriana araka ny tokony ho izy, ary koa toerana ilasiana, ny fitantanan-draharahan’ny fivoriambe. Mikarakara ny diany sy ny filasiany ny tsirairay sy ny fianakaviana. Mandrindra ny ezak’ireo mpiasa an-tsitrapo eo aminy ireo kongregasiona, mba hisian’ny mpiasa any amin’ireo sampan-draharaha maro ilaina, mba hampizotra tsara ny fivoriambe. Ny ‘hanaovana ny zavatra rehetra amin’ny fahamendrehana sy ny filaminana’ no kendrena.—1 Kor. 14:40.
2 Rehefa mandrindra ny ezaka ataonao amin’ny an’ireo mpandamina ny fivoriambe ianao, dia ataovy an-tsaina fa ilaina ny fanomanana am-bolana maro, an-taonany maro aza indraindray. Misy rahalahy an-jatony maro mandany fotoana be mba hanomanana ireo zavatra ilaina. Mety ho anisan’izany ny fanofana trano sy ny fanangonana ny fitaovana ary ny fakana mpiasa. Mitondra fitahiana ara-panahy ho an’ny rehetra izany fanomanana mialoha izany. Inona no azontsika atao mba hanampiana?
3 Fiahiana ireo manan-javatra ilaina manokana: Mety hila fanampiana ny zokiolona, ny osa sy ireo manompo manontolo andro ary ny hafa mba hanatrehana ny fivoriambe. Ny havana sy ny anti-panahy ary ny hafa ao amin’ny kongregasiona izay mahafantatra ny tarehin-javatra manokana misy ireny olona manan-javatra ilaina manokana ireny, dia afaka mikarakara amim-pitiavana izay ilain’izy ireo. Tsy tokony hailika any amin’ny mpandamina ny fivoriambe ny andraikitry ny fianakaviana sy ny kongregasiona. (1 Tim. 5:4) Raha mbola azo atao koa, dia irintsika hanatrika ny fivoriambe ny rehetra. Tsy tokony hisy olona ho hadino.
4 Ataovy izay hanatrehana ireo telo andro mahafinaritra amin’ny fivoriambe: Mitaky ezaka fanampiny ny fivoriambe. Koa mety àry raha tapa-kevitra ny ho eo isika mandritra ireo telo andro anaovana ny fivoriambe. Hahamenatra raha toa ireo rahalahy sy anabavy ary ny fianakaviany ka tsy hahazo ilay fifaliana sy sakafo ara-panahy sarobidy aroso mandritra ireny fivoriana lehibe ireny. Raha mbola tsy niresaka tamin’ny mpampiasa anao ianao fa tsy ho tonga ny zoma, na ny alakamisy mihitsy aza raha voatery hanao dia lavitra mba hahatongavana ara-potoana, dia aoka ianao hanao izany sy hanamafy izany any aminy. Mahalana vao mahazo fotoana tsy iasana raha am-poto-moty vao mangataka azy ireny. Resaho amin’i Jehovah amim-bavaka izany ary mitalahoa aminy mba homeny ny herim-po ilaina hanazavana ilay toe-javatra amin’ny mpampiasa anao. Tsarovy fa namaly ny vavaka mafy sy fohy nataon’i Nehemia i Jehovah. (Neh. 2:1-6) Mampiasa zavatra mifanohitra i Jesosy ao amin’ny Filazantsara mba hampisehoana fa afaka mamindra tendrombohitra ny finoana. (Matio 17:20) Mety hila handresy zava-manahirana toy ny tendrombohitra ianao mba hanatrehana ireo telo andro amin’ny fivoriambe. Raha manam-pinoana sy fahatapahan-kevitra anefa ianao, dia ho hitanao fa tsy fohy loatra akory ny tanan’i Jehovah mba hanampiana anao.—Isaia 59:1.
5 Zava-nitranga tamin’ny andron’ny Baiboly: Ny andro firavoravoana fitoerana amin’ny trano rantsankazo no lehibe indrindra tamin’ireo andro firavoravoana telo fanao isan-taona tsy maintsy natrehin’ny fianakaviana teo amin’ny Isiraely. Nampahatsiahy an’ireo Isiraelita ny fiainan’ireo razambeny tany an’efitra io andro firavoravoana io. Nifaly ny Isiraelita nandritra ireo fito andro naharetan’ilay firavoravoana, na dia azo lazaina hoe faran’izay tsotra aza ny filasiana tamin’izany. Nampiray sy nampifanatona azy ireo ny fotoana niavaka tao amin’ny tempoly sy ny fitoerana tanaty lay. Nahafahana nifampahatsiahy ireo fotoana niarahana tamin’ny lasa ireny fotoana ireny, ary fotoam-pifaliana koa. Afaka mampahery antsika izany zava-nitranga tamin’ny andron’ny Baiboly izany, ary afaka mampiavaka ny fivoriambentsika ny firahalahiana kristianina sy ny fahaiza-mandray vahiny. Natao izany mba hihazonantsika ny fivavahana amin’i Jehovah ho eo amin’ny toerana voalohany. Azo antoka fa afaka haneho fitiavana sy fifaliana isika, ka handresy ny toe-piainana mampanahy eto amin’ity tontolo ity.
6 Noho isika mpanompon’i Jehovah Andriamanitra, dia manana fahafahana ny hanome taratry ny toetrany amin’izay rehetra ataontsika isika. Anisan’izany ny fanaovana fandaharana mba hanatrehana ireo fivoriambe mahatafiditra ny anaran’Andriamanitra. Tadidio fa “Andriamanitra tsy tompon’ny [fikorontanana, NW ], fa tompon’ny fiadanana” izy.—1 Kor. 14:33.