Ankasitraho Izay Omen’i Jehovah Antsika
1 Nidera ireo olona notendrena hanamboatra ny tempoly i Josia Mpanjaka. Hoy izy: “Tsy nampamoahina ny amin’ny vola natolotra teo an-tànany ireo, fa nahatoky izy.” (2 Mpanj. 22:3-7) Niharihary tamin’ny fomba nitantanan’ireo lehilahy ireo ny vola nankinina taminy, fa nihevitra ny zavatra masina ho sarobidy izy ireo. Mitory ny vaovao tsaran’Andriamanitra isika ankehitriny. Tokony hahatoky koa àry isika rehefa mitantana ireo zavatra nomena antsika.
2 Eny amin’ny saha fanompoana: Sarobidy amintsika ny boky sy gazetintsika, satria takatsika fa misy hafatra tena lehibe ao anatin’izy ireny, ary vola be no lany tamin’ny fanontana azy. Tsy tokony homentsika boky sy gazety ny olona tsy tena liana amin’ny hafatra ara-baiboly. Azontsika omena taratasy mivalona, fa tsy boky na gazety, ny olona iray, raha tsy liana firy amin’ny vaovao tsara.
3 Aza zarazaraina befahatany fotsiny ny boky sy gazetintsika. Aza apetraka eny amin’ny toerana falehan’ny besinimaro izy ireo, satria mety haparitaky ny olona fotsiny. Isao ny boky sy gazety anananao any an-trano, alohan’ny hakana hafa. Tsy verivery fotsiny izy ireny amin’izay. Aoka ianao hampihena ny isan’ny gazety hafaranao raha manana ambiny foana isaky ny nomerao tsirairay.
4 Boky sy gazety hampiasain’ny tena manokana: Izay boky na gazety tena ilaintsika ihany no tokony hohafarantsika. Tokony hahay handanjalanja indrindra isika rehefa manafatra ireo zavatra lafo vidy amin’ny fiteny hafa, toy ny teny frantsay. Anisan’izany ny Baiboly misy ranom-bolamena, ny Baiboly Misy Fanondroana Andininy Hafa, ny boky Fahatakarana ary ny boky Mpitory, izay samy nandaniam-bola be.
5 Misy anarana sy adiresy ve ny boky sy gazetinao manokana? Amin’izay mantsy dia tsy voatery hosoloana foana izy ireny, raha sendra diso toerana. Misy toerana fanangonana zavatra very any amin’ny Efitrano Fanjakana na ny toerana fanaovana fivoriambe. Koa raha very ny fihirananao, na Baiboly, boky na gazety, dia any no mety hahitanao azy.—Lioka 15:8, 9.
6 Aoka isika ho malina rehefa mampiasa ny boky sy gazetintsika. Asehontsika amin’izany fa mahatoky isika, rehefa mitantana ny vola nomen’i Jehovah antsika hanaovana ny asan’ilay Fanjakana.—Lioka 16:10.