Ampio ny Hafa Handray Soa avy Amin’ny Vidim-panavotana
Hankalazaina ny 12 Aprily ny Fahatsiarovana ny Nahafatesan’i Kristy
1. Inona no fomba iray ampisehoan’ny vahoakan’Andriamanitra, fa mankasitraka ny vidim-panavotana izy ireo?
1 “Isaorana anie Andriamanitra noho ny fanomezany maimaim-poana tsy hay lazaina!” (2 Kor. 9:15) Mety tsara ireo teny ireo mba hanehoana ny fihetseham-pontsika, manoloana ny fitiavana sy hatsaram-panahy asehon’Andriamanitra amin’ny olony, amin’ny alalan’i Jesosy Kristy Zanany. Tena hiharihary izany fankasitrahantsika izany, rehefa hiara-mankalaza ny Fahatsiarovana ny nahafatesan’i Kristy isika, ny 12 Aprily.
2. Iza no miara-manatrika ny Fahatsiarovana amin’ny mpanompon’i Jehovah, ary mila manao inona izy ireo mba handray soa avy amin’ny vidim-panavotana?
2 Olona folo tapitrisa eo ho eo isan-taona, no miara-mankalaza ny Fahatsiarovana amin’ny mpanompon’i Jehovah. Asehon’izany fa mankasitraka ny soron’i Kristy koa izy ireo. Mila maneho finoana ny vidim-panavotana anefa izy ireo, mba handray soa avy amin’izy io. (Jaona 3:16, 36) Ahoana àry no anampiantsika azy ireo hanana izany finoana izany? Afaka mampirisika azy hianatra Baiboly sy hanatrika ny fivorian’ny fiangonana isan-kerinandro isika, amin’izao vanim-potoan’ny Fahatsiarovana izao. Ireto misy soso-kevitra vitsivitsy.
3. Ahoana no azo anombohana fampianarana Baiboly, rehefa manasa olona hanatrika Fahatsiarovana?
3 Fampianarana Baiboly: Nahoana raha miezaka manomboka fampianarana Baiboly amin’ny boky Ampianarina, rehefa manasa olona liana hanatrika Fahatsiarovana? Ampiasao ny fanazavana eo amin’ny pejy 206-208, eo ambanin’ny lohateny hoe “Manome Voninahitra An’Andriamanitra ny Fankalazana ny Sakafo Harivan’ny Tompo.” Mety ho azonareo atao indray mianatra ilay fanazavana, na hozaraina roa, ary mety ho azo atao eo am-baravarana. Rehefa vita ilay izy, dia mety ho tian’ilay olona ny hianatra ny toko faha-5 hoe “Ny Vidim-panavotana no Fanomezana Tsara Indrindra.” Atombohy any amin’ny voalohany amin’izay ilay boky, raha vao mianatra tsy tapaka ilay olona.
4. Iza no azontsika anombohana fampianarana Baiboly, amin’izao vanim-potoan’ny Fahatsiarovana izao?
4 Iza no azontsika anombohana fampianarana Baiboly amin’io fomba io? Mety hanaiky izany ny mpiara-miasa, ny mpiara-mianatra, na ny mpiray tanàna. Mety ho azon’ireo rahalahy atao koa ny miresaka amin’ireo lehilahy tsy Vavolombelona, izay vadin’ireo anabavy kristianina. Ary aza hadinoina ireo havanao tsy Vavolombelona. Ankoatra izany, dia tokony hanao ezaka manokana isika mba hanasa ireo olona efa nifanerasera tamin’ny fiangonana. (Lioka 15:3-7) Enga anie isika hanampy ireny olona rehetra ireny, mba handraisany soa avy amin’ny vidim-panavotana.
5. Ahoana no ampirisihantsika ny mpianatra ny Baiboly sy ny olona liana, mba hanatrika ny fivorian’ny fiangonana isan-kerinandro?
5 Fivorian’ny fiangonana: Ny Fahatsiarovana no fivoriana voalohany atrehin’ny ankamaroan’ny mpianatra ny Baiboly sy ny olona liana. Ahoana àry no ampirisihantsika azy ireny hanatrika ny fivoriana hafa sy handray soa avy amin’izany? Izao no soso-kevitra tao amin’ny Fanompoantsika Ilay Fanjakana Aprily 2005, pejy 8: “Lazao ny lohatenin’ny lahateny ho an’ny besinimaro manaraka. Asehoy azy izay hodinihina mandritra ny Fianarana Ny Tilikambo Fiambenana sy ny Fianarana Boky. Hazavao ny atao hoe Sekolin’ny Fanompoana sy Fivoriana Momba ny Fanompoana. Raha manana anjara amin’ny sekoly ianao, dia azonao atao ny mamerina izany miaraka aminy. Resaho ny hevi-dehibe tamin’ny fivoriana. Mampisehoa sary avy ao amin’ny boky sy gazetintsika mba hahafantarany izay atao any. Vao manomboka mianatra mihitsy izy, dia asao hivory.”
6. Tokony hampirisika ny olona tso-po hanao inona isika, mba handraisany soa avy amin’ny vidim-panavotana?
6 Matetika no mandroso haingana ny olona tso-po, raha mianatra Baiboly sy manatrika fivoriana tsy tapaka. Enga anie àry isika hampirisika azy ireny hanao izany. Ho afaka handray soa avy amin’ilay fanomezana tsara indrindra nataon’Andriamanitra izy ireo amin’izay, dia ny vidim-panavotana.