Fampirisihana Hampiasa Baiboly

FANIRIANTSIKA ny hisarika ny sain’ny olona rehetra ho amin’ny Tenin’Andriamanitra, ny Baiboly. Io boky masina io no fototr’ilay hafatra torintsika. Tiantsika ho takatry ny olona fa tsy avy amin’ny tenantsika izay lazaintsika, fa avy amin’Andriamanitra. Mila mianatra hatoky ny Baiboly ny olona.

Eny amin’ny fanompoana. Rehefa manomana ny fanompoanao eny amin’ny saha ianao, dia mifidiana foana andinin-teny iray na mihoatra, hovakina amin’ireo maniry hihaino. Na dia fohy aza ny fanolorana boky na gazety kasainao hampiasaina, dia matetika no tsara ny hamakiana andinin-teny iray mety tsara. Manan-kery kokoa noho izay rehetra mety holazaintsika ny Baiboly, mba hampianarana an’ireo ondry. Rehefa tsy afaka mamaky mivantana ao amin’ny Baiboly ianao, dia manonòna teny avy ao. Tsy nisy horonan’ny Baiboly firy azo nampiasaina, tamin’ny taonjato voalohany. Na izany aza, dia nanonona teny avy tao amin’ny Soratra Masina matetika i Jesosy sy ny apostoliny. Tokony hiezaka koa isika hitadidy andinin-teny sy hahay hampiasa azy ireny eo amin’ny fanompoantsika, amin’ny fanononana ny hevitra ao aminy fotsiny indraindray.

Rehefa afaka mamaky teny ao amin’ny Baiboly ianao, dia asehoy an’ilay tompon-trano izany, mba hanarahany ny famakianao azy. Vao mainka izy angamba hanaiky kokoa ilay zavatra vakiny, raha manaraka ao amin’ny Baiboliny.

Fantaro anefa fa misy mpandika tenin’ny Baiboly sahisahy nanova ny Tenin’Andriamanitra. Angamba tsy mifanaraka tanteraka amin’izay nolazain’ireo teny nanoratana ny Baiboly tany am-boalohany ny dikan-tenin’izy ireo. Misy fandikan-teny maoderina sasany nanesotra ny anaran’Andriamanitra, nanamaizina izay nolazain’ny teny tany am-boalohany momba ny toetran’ny maty, ary nanafina izay lazain’ny Baiboly momba ny fikasan’Andriamanitra ho an’ny tany. Mba hampisehoana amin’ny olona iray izay nataon’ireny mpandika teny ireny, dia ampitahao ny andinin-teny lehibe sasany ao amin’ny fandikan-tenin’ny Baiboly isan-karazany, na ao amin’ny fandikan-teny tranainy kokoa amin’ny fiteny iray ihany. Ny boky Ny Fomba Fanjohian-kevitra avy Amin’ny Soratra Masina dia mampitaha ny fomba nandikan’ny fandikan-teny samihafa ny teny lehibe sasany ao amin’ireo andinin-teny fampiasa matetika. Ho velom-pankasitrahana ny olona tia ny fahamarinana, mahafantatra ny zava-misy.

Any am-pivoriana. Tokony hampirisihina hampiasa ny Baiboliny ny rehetra, any am-pivoriana. Soa be dia be no azo avy amin’izany. Manampy ny mpanatrika hifantoka foana amin’ilay famelabelarana izany. Vao mainka mandaitra ilay fampianarana am-bava omen’ilay mpandahateny, rehefa hitan’ny maso koa. Izany koa dia mampiaiky an’ireo olona vao liana fa ny Baiboly tokoa no iorenan’ireo zavatra inoantsika.

Miankina be dia be amin’ny fampirisihana avy aminao, ny hanarahan’ny mpanatrika ny famakianao andinin-teny ao amin’ny Baiboliny na tsia. Ny fanasana mivantana no anisan’ny mandaitra indrindra.

Anjaranao mpandahateny ny manapa-kevitra hoe andinin-teny iza avy no tianao hohamafisina amin’ny fangatahana ny mpanatrika hijery azy ireo. Ny tsara indrindra dia ireo andinin-teny hanampy anao hamelabelatra ireo hevi-dehibe. Avy eo, raha ampy ny fotoana, dia makà andinin-teny hafa mba hanohanana ny fanaporofoan-kevitrao.

Tsy ampy ny milaza fotsiny ilay boky sy toko ary andininy, na ny manasa fotsiny ny mpanatrika hijery andinin-teny iray. Raha mamaky andinin-teny iray ianao, ary avy eo mifindra ho amin’ny iray hafa, nefa mbola tsy nanam-potoana hahitana ilay voalohany ny mpanatrika, vetivety dia ho kivy izy, ka tsy hanaraka ao amin’ny Baiboliny intsony. Mahaiza mandinika. Vakio ilay andinin-teny, rehefa hitanao fa nahita azy ny ankamaroan’ny mpanatrika.

Mieritrereta mialoha. Lazao aloha ben’ny hamakianao azy ilay andinin-teny. Hihena ho faran’izay kely ny fotoana lany hiandrasana ny hahitan’ny mpanatrika azy. Hihena ny zavatra ho azonao hazavaina, raha miandry ny mpanatrika hahita ireo andinin-teny ianao, nefa andraso ihany, fa tsy ho very maina ny fanaovanao izany.