Ampiasao mba Hanombohan-dresaka ny Teny Fampidirana ny Tenin’Andriamanitra
1. Inona ny fitaovana vaovao azontsika ampiasaina eny amin’ny fanompoana?
1 Faly isika nahazo an’ilay bokikely hoe Teny Fampidirana ny Tenin’Andriamanitra, tamin’ny fivoriamben’ny vondrom-paritra “Katsaho Foana Aloha ny Fanjakan’Andriamanitra!” Ahoana no azontsika ampiasana azy io rehefa manomana fomba fitory isika? Toy ny ao amin’ny boky Fandresen-dahatra, dia misy foto-kevitra ara-baiboly isan-karazany ao, ary efa misy andinin-teny vitsivitsy eo ambaniny. Azo ampiasaina tsara mba hanombohan-dresaka àry izy io.
2. Ahoana no azontsika ampiasana ny Teny Fampidirana ny Tenin’Andriamanitra rehefa manompo?
2 Afaka mampiasa ny fanontaniana faha-8 ianao sady miteny hoe: “Maro no lasa saina hoe ‘Andriamanitra ve no mahatonga antsika hijaly?’ [Tsara kokoa indraindray raha aseho an’ilay olona mihitsy ilay fanontaniana.] Ahoana ny hevitrao? [Avelao izy hamaly.] Manome valiny mahafa-po amin’io fanontaniana io ny Baiboly.” Vakio avy ao amin’ny Baiboly ny andinin-teny iray na maromaro voasoratra ao, ary hazavao izany avy eo. Raha liana ilay olona, dia asehoy ireo fanontaniana 20 ao amin’ny teny fampidirana, ary asaivo mifidy iray izy mba hovaliana amin’ny manaraka. Azonao atao koa anefa ny manolotra boky na bokikely fianarana Baiboly, izay miresaka bebe kokoa momba an’ilay foto-kevitra nodinihinareo.
3. Ahoana no azontsika ampiasana an’ilay bokikely, raha betsaka olona ao amin’ny fivavahana tsy kristianina ny faritanintsika?
3 Tena manampy antsika ny fanontaniana faha-4 sy faha-13 ka hatramin’ny faha-17c, raha betsaka olona ao amin’ny fivavahana tsy kristianina ny faritanintsika. Raha mampiasa ny fanazavana ao amin’ny fanontaniana faha-17, ohatra, ianao, dia afaka miteny hoe: “Mitsidika anao izahay satria te hanampy ny fianakaviana. Tsy hitanao ve hoe miatrika olana maro ny fianakaviana ankehitriny? [Avelao izy hamaly.] Nanampy mpivady maro ireto teny feno fahendrena ireto: ‘Aoka ny vehivavy hanaja fatratra ny vadiny.’ [Tsy voatery lazainao hoe ao amin’ny Efesianina 5:33 izany. Raha vehivavy no iresahanao, dia vakio aminy avy ao amin’ilay bokikely izay lazain’ny Efesianina 5:28.] Mahasoa ny mpivady ve io torohevitra io, hozy ianao?”
4. Raha tsy Kristianina ilay olona nitorianao, inona no azonao atao rehefa ho vita ny resakareo?
4 Rehefa ho vita ny resakareo, dia manaova fotoana aminy mba hanohizana an’ilay izy amin’ny manaraka. Azonareo resahina indray, ohatra, ny andinin-teny hafa eo ambanin’ilay fanontaniana nodinihinareo. Amin’ny fotoana mety, dia ampahafantaro azy fa avy ao amin’ny Baiboly ireo torohevitra noresahinao taminy. Omeo boky na gazety mety hahaliana azy izy, arakaraka ny resakareo farany sy ny fiheverany ny Baiboly.—Jereo ny takelaka fanampiny ao amin’ny Fanompoantsika Ilay Fanjakana Janoary 2012