Ukutemwa Kwakwe Leza Kukaikalilila Manda Pe

1-2. Iintazi ci zino Aina Klistu aingi yakakwata?

ELENGANYINI ukuti uwato ukupita ala kuli sana icimuza. Amaimbi amaka sana yakusunkanya uwato. Pakuti uwato ute ukusendwa na maimbi, umwi alinzile ukusumbila inanga pansi. Inanga ingalenga uwato ute ukusunkana nanti ukusendwa na maimbi.

² Lino mukuzizimizya intazi itale, mungayuvwa kwati uwato uukusendwa na maimbi. Vino mukuyuvwa vingasenuka zuwa. Wanda umwi mungayuvwa ukuti Yeova wamutemwa nupya akumwazwa; wanda uze imutandika ukuyuvwa ukuti Yeova asikulola intazi ino mukweti. (Masa. 10:1; 13:1) Limwi cuza winu wamunena amazwi aakuteekezya, nupya muvwako ningo. (Mapi. 17:17; 25:11) Lelo nupya kwene mwatandika ukutwisika ndi cakuti Yeova akumwazwa. Mungatandika nu kuilola ukuti mwemwe aasile sile. Wakwe vino inanga ingalenga uwato ute ukusunkana, nga namwe mungacita uli pakuti muzizimizye intazi? Mungasininkizya uli ukuti Yeova wamutemwa nu kuti alatwalilila ukumwazwa?

3. Uzye amazwi aakuti “ukutemwa ukwa cumi,” aalumbulwa pali Masamu 31:7 na 136:1 yakapiliula cani, nupya u mulandu ci uno tungalandila ukuti Yeova ali wino waya nu kutemwa kwa cumi kuno tungakolanya? (Loliniko ni cikope.)

³ Inzila yonga iingatwazwa ukuzizimizya intazi u kwiusha vino Yeova waya nu kutemwa kwa cumi. (Belengini Masamu 31:7; 136:1.) Amazwi aakuti “kutemwa ukwa cumi” yakalozya uku kutemwa na ucisinka kuno umuntu akalanga uku muntu muze. Yeova u waya nu kutemwa alino na ucisinka uno tungakolanya. Baibo ikamulondolola ukuti “u waya sana nu kutemwa kwa cisinka.” (Kufu. 34:​6, 7) Nupya Baibo ikalanda pali Yeova ukuti: “Waya sana nu kutemwa kwa cumi kuli yonsi aakalilila kuli wewe.” (Masa. 86:5) Elenganyini pali vino mazwi yaa yakapiliula: Yeova atalatala atazyele ya kapepa yakwe acisinka. Ukwiusha vino Yeova waya nu kutemwa kwa cumi, kungalenga muzizimizye intazi ino mukweti.—Masa. 23:4.

MWAIUSHA UKUTI UKUTEMWA KWAKWE YEOVA KWAYA PA MASAMBILILO AKUTANDIKILAPO AMULI BAIBO

4. Landiniko pa masambililo akutandikilapo amuli Baibo yamwi, nu mulandu uno twazumilila ukuti acumi?

⁴ Inzila na yuze iingamwazwa ukuzizimizya intazi, u kwiusha ukuti ukutemwa kwakwe Yeova kwaya pa masambililo akutandikilapo amuli Baibo. I vyani vino mukaelenganya nga muvwa mazwi aakuti “masambililo akutandikilapo amuli Baibo”? Limwi mukaiusha pa masambililo yano mwasambilila umwi Izwi lyakwe Leza. Wakwe, mwasambilile ukuti izina lyakwe Leza a Yeova, ukuti Yesu umwana wakwe Leza, ukuti afwe yatamanya icili consi, nu kuti insi ilaya paladaise muno antu yalikala amanda pe. (Masa. 83:18; Kasa. 9:5; Yoa. 3:16; Kuso. 21:​3, 4) Lino mwazumile masambililo yaa, mutaleesile ukuti umuntu ali wensi alenge mute ukuzumila ukuti acumi. U mulandu ci? Pano mwamanyile ivisinka ivikalangilila ukuti masambililo yaa acisinka. Lekini tulole vino kwiusha ukuti ukutemwa kwakwe Yeova kwaya pa masambililo akutandikilapo amuli Baibo kungatwazwa ukuta ukwelenganya ukuti Yeova asitusakamala nu kuti asimanya intazi zino tukweti.

5. Londololini vino umuntu angacita pakuti akane ivisambilizyo vya ufi.

⁵ Lino mwatandike ukusambilila Baibo, i vyani vyamwazwile ukuta ukuzumila umu visambilizyo vya ufi? Mufwile makolanyanga vino mwasambililanga kuno mwapepa kuli vino mwasambilile umu Malembo. Wakwe, tuti limwi mwazumile ukuti Yesu a Leza wa Maka Yonsi. Lino mwasambililanga Baibo, mufwile mwayuzyanga ukuti ‘Uzye icisambililo cii ica cumi?’ Pa cisila ca kusambilila vino Baibo ikalanda, mwizile imumanya ukuti Yesu asi Leza. Lyene mwatiile ukutaila icisambilizyo ca ufi, nu kutandika ukutaila icumi ca muli Baibo icakuti: Yesu iiyeli pa viumbwa vyonsi, “Mwana wakwe Leza uwavyalwa sile wenga.” (Kolo. 1:15; Yoa. 3:18) Ukuya kwene ivisambilizyo vya ufi vyaya wa “vintu ivikome” nupya catala ukuta ukuvitaila. (2 Kol. 10:​4, 5) Lelo lino mwasambilile icumi, mutaswilile uku visambilizyo vya ufi.—Filipi 3:13.

6. U mulandu ci uno mungatailila ukuti ‘ukutemwa kwakwe Yeova ukwa cumi kukaikalilila manda pe’?

⁶ Vikwene ali vino mungacita ndi cakuti mukutwisika ndi cakuti Yeova wamutemwa. Lino mwakwata intazi nupya mukutwisika ndi cakuti Yeova wamutemwa, mwayuzya ukuti, ‘Uzye vino nkwelenganya vili sile ningo?’ Nga mwatandika ukutwisika mwaelenganya pa mazwi aaya pa Masamu 136:​1, apafumile umutwe wa cipande cii. U mulandu ci uno Yeova walondolwela ukutemwa kwakwe ukuti ukwa “cumi”? U mulandu ci uno amazwi aakuti “ukutemwa kwakwe ukwa cumi kukaikalilila manda pe” kwayela imiku 26 umu masamu icipande 136? Wakwe vino itusambilila, ukutemwa kwakwe ukwa cumi kwaya pa masambililo akutandikilapo amuli Baibo, aakolana na masambililo yano mwasambilile pa kutandika umwi Izwi lyakwe Leza. Imyelenganyizizye iya kuti Yeova akamilola ukuti mwemwe aasile sile nanti atamitemwa iya ufi. Mwakana ufi uu, wakwe vino mungakana ivisambilizyo vyuze ivya ufi.

7. Landiniko malembo yamwi aakalenga musininkizye ukuti Yeova wamutemwa.

⁷ Muli Baibo mwaya usininkizyo uwingi uukalangilila ukuti Yeova watutemwa. Wakwe, Yesu wanenyile alondezi yakwe ukuti: “Mwacindama ukucila utunyi utwingi.” (Mate. 10:31) Yeova umwineco wanenyile antu yakwe ukuti: “Ndakukomya, nupya ndakwazwa, ndakulemelela ni ikasa lyane lya kwi lunji ilya ulungami.” (Eza. 41:10) Amazwi yaa yalanda umu kulungatika. Yesu atalanzile ukuti ‘Limwi mwacindama ukucila,’ nupya Yeova atalanzile ukuti ‘Limwi ningakwazwa.’ Lelo yalanzile ukuti: “Mwacindama ukucila” na “Ndakwazwa.” Ndi cakuti mukutwisika ukutemwa kwakwe Yeova lino muli ni ntazi, malembo yaa yangamwazwa ukuyuvwa nu kumanya ukuti wamutemwa. Pano ali vino malembo yakalanda. Ndi cakuti mwapepa kuli Yeova nu kwelenganya pa malembo yaa, lyene mungalanda amazwi aaya pali 1 Yoani 4:16 aakuti: “Twamanya nu kusininkizya” ukuti Leza watutemwa.”a

8. I vyani vino mungacita ndi cakuti mwatandika ukutwisika ndi cakuti Yeova wamutemwa?

⁸ Nga ndi cakuti insita zimwi mukatwisika ndi cakuti Yeova wamutemwa? Mwakolanya vino mukuyuvwa kuli vino mwamanya. Vino mukuyuvwa vingasenuka, lelo vino Yeova watutemwa ali cumi cino Baibo ikasambilizya. Ndi cakuti tukwelenganya ukuti Yeova atatutemwa, ala tusikwelenganya pa miyele icindamishe ino wakwata kuli kuti, kutemwa.—1 Yoa. 4:8.

MWAELENGANYA PALI VINO YEOVA “WAMUTEMWA”

9-10. I vyani vino Yesu walandangapo lino walanzile amazwi aaya pali Yoani 16:​26, 27 aakuti “Tata [umwineco] wamutemwa”? (Loliniko ni cikope.)

⁹ Tungasambilila ivingi pali vino Yeova waya nu kutemwa nga twelenganya pa mazwi yano Yesu wanenyile alondezi yakwe aakuti: “Tata [umwineco] wamutemwa.” (Belengini Yoani 16:​26, 27.) Yesu atalanzile mazwi yaa pakuti alenge asambi yakwe yuvwe ningo. Alino icipande cii cikalangilila ukuti Yesu atalandanga pali vino asambi yakwe yayuvwanga pa nsita iya. Lelo cikalangilila ukuti walandanga pa cintu cuze kuli kuti, ipepo.

¹⁰ Yesu wanenyile asambi yakwe ukuti yalinzile ukupepa ukupitila muli aliwe asi kuli aliwe. (Yoa. 16:​23, 24) Cacindime uku yasambi ukumanya icisinka cii. Pa cisila cakuti Yesu watuutululwa, limwi asambi nga yatunsilwe ukupepa kuli aliwe. Pano Yesu wizile aya cuza wao. Limwi nga yelenginye ukuti pa mulandu wakuti Yesu wayatemilwe sana, wali nu kulakutika uku mapepo alino anena Isi ukuti ayazwe. Lelo Yesu wayanenyile ukuti yatalinzile ukulaelenganya ivya musango uu. U mulandu ci? Pano wayanenyile ati: “Tata [umwineco] wamutemwa.” Cisinka cii caya mu masambililo akutandikilapo amuli Baibo aakalanda pa kupepa. Elenganyini pali cino cii cikupiliula kuli mwemwe: Ukupitila umu kusambilila Baibo, calenga mumanye Yesu nu kumutemwa. (Yoa. 14:21) Lelo wakwe vino cali uku yasambi yakwe Yesu akutandikilapo, namwe kwene mungapepa kuli Leza pano mwamanya ukuti “[umwineco] wamutemwa.” Mukalanga ukuti mwataila amazwi yaa lyonsi lino mwapepa kuli Yeova.—1 Yoa. 5:14.

MWAMANYA IVIKALENGA MWATWISIKA

11. U mulandu ci uno Satana angayela ni nsansa nga twatandika ukutwisika ndi cakuti Yeova watutemwa?

¹¹ I vyani ivingalenga twatwisika ndi cakuti Yeova watutemwa? Limwi mungalanda ukuti a Satana aakalenga, nupya i ca cumi insita zimwi aliwe akalenga. Ciwa ‘aakalonda uwakuti alye’ nupya aakalonda ukuti twatwisika ndi cakuti Yeova watutemwa. (1 Pet. 5:8) Nupya pa mulandu wakuti Yeova watutemwa watupeela ilambo, icintu cino Satana akalonda twayuvwa ukuti tutalinga ukupokelela. (Aeb. 2:9) Nomba a weni akauvwa ningo nga tukutwisika ndi cakuti Yeova watutemwa? A Satana. Nupya a weni akauvwa ningo ndi cakuti twatoovoka nu kuta ukuombela Yeova? A Satana. Satana akalonda twaelenganya ukuti Yeova atatutemwa. Lelo vii ivya ufi. Satana kwene ali wino Yeova atatemwa. Nomba umu “micenjelo” yakwe yonsi akalonda twayuvwa ukuti tutatemwikwa nupya Yeova asitulonda. (Efes. 6:11) Ndi cakuti twiluka vino umulwani witu akulonda ukucita, cilalenga ukuti twalondesha ‘ukulakaanya ciwa.’—Yako. 4:7.

12-13. Uzye uluyembu luno twapyana lungalenga uli twatwisika ndi cakuti Yeova watutemwa?

¹² Kwaya icintu na cuze icingalenga tutandike ukutwisika ndi cakuti Yeova watutemwa. I cani cico kwene? U luyembu luno twapyana. (Masa. 51:5; Loma 5:12) Uluyembu lwalenga antu ukutaluka kuli Kaumba wao. Nupya lonona na vino antu yakaelenganya, vino yakayuvwa, alino nu umi wao.

¹³ Uluyembu lonona vino swe yantu tukaelenganya, lwalenga ukuti twayuvwa amulandu, kusakamala, ukuyuvwa ukuti tutacingililwa, alino nu kuvwa insonyi. Tungayuvwa vii ndi cakuti twacita uluyembu. Nupya tukayuvwa vii ndi cakuti twiusha ukuti tutamalilika, pano asi vino Leza waumvile antu. (Loma 8:​20, 21) Wakwe vino motoka ikweti itayala ilitulike itanga yapita ningo, alino vino na swe yantu aatamalilika tusiomba ukulingana na vino Leza watuumvile ukuti twaomba. Fwandi ali mulandu uno insita zimwi tukatwisikila ndi cakuti Yeova watutemwa. Ndi cakuti twatandika ukutwisika tulinzile ukwiusha ukuti Yeova ‘wakulisya nupya uwa kuzungusya, wino akalanga ukutemwa kwa cumi kuli yano yamutemwa nupya aakalondela masunde yakwe.’—Neem. 1:5.

14. Uzye ukwelenganya api lambo kungatwazwa uli ukuta ukwisika ndi cakuti Yeova watutemwa? (Loma 5:8) (Loliniko na kambokosi akakuti “Mwacenjela uku kubepwa pa mulandu ‘na maka ya luyembu.’”)

¹⁴ Ukuya kwene, insita zimwi tungayuvwa ukuti tutalinga ukuti Yeova atutemwe. Lelo icisinka icakuti tutalinga nupya i cikalenga ukuti ukutemwa kuno watutemwa kuye ukuiyele. Yeova asitutemwa pa mulandu na vino tukakwanisha ukucita uku maka itu. Nanti ciye vivyo, ilambo likalenga ukuti imembu zitu zyelelwe, nupya Yeova wacita vivyo pa mulandu wakuti watutemwa. (1 Yoa. 4:10) Nupya mwaiusha ukuti Yesu wizile umu kupususha ayembu, asi antu amalilike. (Belengini Loma 5:8.) Tutanga tukwanishe ukucita ivintu wa yantu amalilike, nupya Yeova asitwenekela ukucita vivyo. Ndi cakuti twiluka ukuti ukukanamalilika ukukalenga twatwisika ndi cakuti Yeova watutemwa, tulalondesha ukucimvya amelenganyo yaa.—Loma 7:​24, 25.

SOOLOLINIPO UKUYA ACISINKA

15-16. I vyani vino tungasininkizya ndi cakuti twatwalilila ukuya acisinka kuli Yeova, nupya u mulandu ci? (2 Samweli 22:26)

¹⁵ Yeova akalonda ukuti tusoololepo “kupalama sana kuli aliwe.” (Malan. 30:​19, 20) Nga twacita vivyo, tungasininkizya ukuti Yeova atwalilila ukupalama kuli sweswe. (2 Samweli 22:26.) Nga twatwalilila ukuya acisinka kuli Yeova, tungasininkizya ukuti alatwalilila ukutwazwa ukuzizimizya intazi izya mu umi.

¹⁶ Wakwe vino itusambilila, tungatwalilila ukuzizimizya asi mulandu ni ntazi zino tungakwata. Twamanya ukuti Yeova watutemwa nupya alatwazwa. Vikwene ali vino Baibo ikatusambilizya. Ndi cakuti tukutwisika ndi cakuti Yeova watutemwa, tulinzile ukwika mano kuli vino twamanya ukucila ukwika sana mano kuli vino tukuyuvwa. Lekini tutwalilile ukutaila ukuti ukutemwa kwakwe Yeova ukwa cumi kukaikalilila manda pe.