CIPANDE CA KUSAMBILILAMO 42
LWIMBO NA. 44 Ipepo Lyakwe Wino Ali nu Ulanda
Vino Mungapepa Pakuti Mupalame Sana Kuli Yeova
“ Nkulilila kuli wewe nu mwenzo wane onsi, ngasuke we Yeova.”—MASA. 119:145.
VINO TUMASAMBILILAPO
Vino tungasambililako uku mapepo ya aomvi yakwe Yeova aalembwa muli Baibo.
1-2. (a) I vyani ivingalenga citutalile ukunena Yeova vino tukuyuvwa lino tukupepa? (b) Uzye twamanya uli ukuti Yeova akakutika uku mapepo itu?
UZYE insita zimwi mukayuvwa ukuti mukalanda sile amazwi ali yamwi umu mapepo inu nu kuti musinena Yeova vino mukuyuvwa? Ndi cakuti avino mukayuvwa, ale mutaya mwenga. Pa mulandu wakuti twapamviwa, insita izingi tukapepa sile mapepo aipi nupya tukailila ukupepa mapepo aatali. Nanti limwi cingatutalila ukunena Yeova vino tukuyuvwa pa mulandu wakuti tukayuvwa ukuti tutalinga ukulanda nawe.
2 Baibo ikatusambilizya ukuti icacindama kuli Yeova asi mazwi yano tukalanda lino tukupepa, lelo u kupepa ukufuma pansi ya mwenzo. Akauvwa “ukulenga kwa yantu aafuuke.” (Masa. 10:17) Akauvwa uku mazwi yonsi yano tukalanda pano watutemwa.—Masa. 139:1-3.
3. A mauzyo ci yano tumaasuka umu cipande cii?
3 Limwi tunguzya ukuti: Uzye u mulandu ci uno tutalinzile ukuvwila intete ukunena Yeova vino tukuyuvwa lino tukupepa? Tungacita uli pakuti twapepa umu nzila iyakuti tupalame sana kuli Yeova? Uzye ukwelenganya pa mapepo aalembwa muli Baibo kungatwazwa uli ukuzifya mapepo itu? Nupya tungacita uli ndi cakuti itusakamikwa sana icakuti tutamanyile ni vya kunena Yeova vino tukuyuvwa? Lekini tuzane masuko uku mauzyo yaa.
MUTAUVWA INTETE IZYA KUPEPA KULI YEOVA
4. I cani icingatwazwa ukupepa kuli Yeova ukwaula ukuvwa intete? (Masamu 119:145)
4 Ndi cakuti tukwiusha ukuti Yeova a cuza uwaya ni cisinka nupya akalonda ivintu vyatuzipila, cilalenga ukuti twapepa kuli aliwe. Vikwene ali vino kalemba wa Masamu 119 walolanga Yeova lino wapepanga kuli aliwe. Nawe kwene wakwatanga intazi. Antu yamwi yalandanga ivya ufi pali aliwe. (Masa. 119:23, 69, 78) Insita zimwi watoovokanga pa mulandu na vino waluvyanyanga. (Masa. 119:5) Nanti cali vivyo, atuvwanga intete izya kunena Yeova vino wayuvwanga.—Belengini Masamu 119:145.
5. U mulandu ci uno tutalinzile ukulekela vino tukuyuvwa vilenge tute ukupepa? Langililini.
5 Yeova akalonda ukuti na antu aacita imembu izipishe yapepa kuli aliwe. (Eza. 55:6, 7) Fwandi tutalinzile ukuleka icili consi ukutulesha ukupepa. Katulangilile, tuti kapisha wa ndeke watamanya ukuti angalanda na antu aakalangilila ya kapisha ya ndeke kuno indeke ilinzile ukupita ndi cakuti yakulondekwa uwazwilizyo. Uzye anguvwa intete izya kulanda nayo pa mulandu wakuti wataponga nanti wataluvyanya vimwi? Awe foo. Umu nzila iili imwi kwene, naswe ndi cakuti twaponga nanti twayembuka, tungalanda na Yeova umwi pepo.—Masa. 119:25, 176.
VINO TUNGACITA PAKUTI TWAPEPA UMU NZILA IYAKUTI TUPALAME SANA KULI YEOVA
6-7. I cani icingatwazwa ukulanena Yeova vino tukuyuvwa umu mapepo itu? Langililini. (Loliniko na futunoti.)
6 Ndi cakuti lino tukupepa tukunena Yeova vino tukwelenganya na vino tukuyuvwa, tulapalama sana kuli aliwe. I vyani ivingatwazwa ukulapepa umu nzila yii?
7 Mwaelenganya pa miyele yakwe Yeova.a Ndi cakuti tukwelenganya pa miyele yakwe, cilatwangukila ukumunena vino tukwelenganya na vino tukuyuvwa. (Masa. 145:8, 9, 18) Elenganyini pali vino vyacitikile ya Kristine yano ya isi yali ankalwe. Yatiile: “Pa mulandu na vino ya tata yali, cantalile ukuzumila ukuti Yeova a Tata uwaya nu kutemwa nupya cantalile ukupepa kuli aliwe. Nayuvwanga ukuti Yeova wali nu kuta ukuntemwa pa mulandu wakuti ntamalilika.” I miyele ci yakwe Yeova iyayazwile? Yatiile: “Nelenginye sana pali vino Yeova waya nu kutemwa kwa cumi, na cii calenzile insininkizye ukuti Yeova wantemwa. Namanya ukuti lyonsi alangazwa. Nupya ndi cakuti naluvyanya, alatwalilila ukuntemwa nupya alangazwa. Ukwelenganya pa kutemwa kwakwe Yeova, kukalenga cangangukila ukumunena ivintu ivikalenga naya ni nsansa ni vikalenga naya nu ulanda.”
8-9. U mulandu ci uno cazipa ukwelenganya pali vino mumalanda lino mutatala mwapepa? Langililini.
8 Mwaelenganya pali vino mumalanda. Lino mutatala mwatandika ukupepa, mwayuzya mauzyo. Wakwe: ‘Iintazi ci zino nkuzizimizya pa nsita yii? Uzye kuli wino nkulondekwa ukwelela? Uzye kuli ivyativisenuka umu umi wane vino nkulondekwa ukuti Yeova angazwe?’ (2 Yamw. 19:15-19) Nupya mungalondela vino Yesu watusambilizye ivya kupepa lino mukupepela api zina lyakwe Yeova, Uwene wakwe, alino nu kulonda kwakwe.—Mate. 6:9, 10.
9 Lino ya Aliska yamanyile ukuti ya iya yalwile kansa iya ku ongo, cayatalile ukupepa. Yatiile: “Nali sana nu ulanda icakuti lino natandike ukupepa ntamanyile na vino nali nu kulanda.” I vyani ivyayazwile? Yatiile: “Lino ntatala napepa, nkaelenganya pali vino namanena Yeova pakuti ntalanda sile pali vino vikumile sile nemwineco na ya wane. Ukucita vii, kwalenga inje umuteekele nupya nkaya nu mutende lino nkupepa kuli Yeova pa vintu ivipusanepusane.”
10. U mulandu ci uno tulinzile ukuyela ateekele lino tukupepa? (Loliniko ni vikope.)
10 Mwateekela lino mukupepa. Ica cumi ukuti mapepo aipi yakalenga tupalame sana kuli Yeova, lelo nga mwateekela nu kupepa mapepo aatali, cilalenga munena Yeova vyonsi vino mukuyuvwa.b Ya Elijah ya iya yakwe ya Aliska, nayo yatiile: “Nkaezya ukupepa imiku iingi umu wanda, nupya calenga mpalame sana kuli Yeova ukupitila umu kupepa mapepo aatali. Yeova atapamviwa, fwandi ningateekela lino nkupepa kuli aliwe.” Mungezya ukucita vii: Mungalonda incende ni nsita kuno mungapepa, limwi ni izwi ilyuvwike ukwaula ivya kumupumvyanya. Lyene mwaezya ukuya ateekele lino mukupepa.
Mungalonda incende ni nsita kuno mungapepa ukwaula ivya kumupumvyanya (Lolini palaglafu 10)
MWELENGANYA PA MAPEPO AALEMBWA MULI BAIBO
11. Uzye ukwelenganya pa mapepo aalembwa muli Baibo kukatwazwa uli? (Loliniko na kambokosi akakuti “Uzye Mukayuvwa Wakwe Vino Yayuvwile?”)
11 Ukwelenganya pali vino aomvi yakwe Yeova aalembwa Baibo yalandanga umu mapepo yano yapepanga, na vino imbanga umu nyimbo izya kulumbanya Yeova, kungamwazwa sana. Lino mukwelenganya pali vino yelenganyanga nu kuyuvwa lino yapepanga, cingalenga namwe mwayakolanya lino mukupepa kuli Yeova. Mapepo yano yapepanga yangamwazwa ukuzana mazwi yano mungaomvya lino mukupepa. Limwi mungazana ukuti vimwi vino yapepelangapo i vili vimwi na vino mukulonda ukupepelapo.
12. A mauzyo ci yano tungayuzya lino tukwelenganya pa mapepo aalembwa muli Baibo?
12 Lino mukwelenganya pa mazwi aaya umu mapepo aalembwa muli Baibo, mwayuzya ukuti: ‘A weni uwapefile ipepo lii, uzye ivintu vyali uli umu umi wakwe, nupya u mulandu ci uno wapepiile vivyo? Uzye amazwi yano walanzile iyakolana na vino nkwelenganya? I vyani vino ningasambililako kuli vino wapefile?’ Limwi mungalondekwa ukulondelezya pakuti muzane masuko uku mauzyo yaa nupya ukucita vivyo kulamwazwa sana. Lekini tulandeko pa mapepo 4.
13. Isambililo ci lyonga lino tungasambililako ukwi pepo lino Hana wapefile? (1 Samweli 1:10, 11) (Loliniko ni pa nkupo.)
13 Belengini 1 Samweli 1:10, 11. Lino Hana wapepanga ipepo lii, wakweti intazi ziili izikalamba. Hana atakwatanga ana, nupya umuci muze wamucuzyanga. (1 Sam. 1:4-7) Ndi cakuti imukwata intazi ikalamba, i vyani vino mungasambililako ukwi pepo lyakwe Hana? Hana wapefile kuli Yeova nu kumunena vyonsi ivyamusakamikanga nupya pa cisila wizile auvwako ningo. (1 Sam. 1:12, 18) Naswe kwene tungateekeziwa ndi cakuti ‘twasumbila icisendo citu pali Yeova’ ukupitila umu kumunena vino tukuyuvwa apa ntazi ino tukweti.—Masa. 55:22.
Hana atakwatanga ana nupya umuci muze wamucuzyanga, lelo Hana wanenyile Yeova vyonsi ivyamucuzyanga (Lolini palaglafu 13)
14. (a) I vyani vyuze vino tungasambililako kuli Hana? (b) Uzye ukubelenga nu kwelenganya pa Izwi lyakwe Leza kungatwazwa uli ukumanya ivya kulanda umwi pepo? (Lolini futunoti.)
14 Pa cisila ca myaka imwi ukufuma pano Samweli wavyalilwe, Hana wamutwazile kuli Eli Simapepo Mukalamba. (1 Sam. 1:24-28) Umwi pepo lino Hana wapefile, wataizye Yeova pano waweni ukuti Yeova akacingilila nu kusakamala aomvi yakwe acisinka.c (1 Sam. 2:1, 8, 9) Intazi zino wakweti zitasizile, lelo ukucila ukwika mano uku ntazi zino wakweti wisile mano kuli vino Yeova wamupaazile. I vyani vino tungasambililako? Tungazizimizya intazi zino tukakwata ndi cakuti tukwika mano kuli vino Yeova watwalilila ukutwazwa ukufika na ndakai.
15. Ndi cakuti yatufyenga, i vyani vino tungasambililako ukwi pepo lino kasesema Yelemiya wapefile? (Yelemiya 12:1)
15 Belengini Yelemiya 12:1. Pa nsita imwi, kasesema Yelemiya uvwile uyi lino waweni antu yamwi ivintu vikuyazipila nanti cakuti yacitanga iviipe. Nupya uvwanga uyi pa mulandu na vino Aina Izlaeli yauze yamucuzyanga. (Yele. 20:7, 8) Naswe kwene tukayuvwa wakwe vino wayuvwanga pano antu yakatucuzya nupya tukalola kuno antu akacita iviipe ivintu vikuyazipila. Yelemiya wanenyile Yeova ukuti uvwanga uyi pa vintu vii, lelo atatazile alandepo ukuti Yeova ataya nu mulinganya. Lino waweni vino Yeova wafulwile antu yakwe apondwike, wizile ataila sana vino Yeova waya nu mulinganya. (Yele. 32:19) Naswe kwene tungalondolwela Yeova vino tukauvwa uyi ndi cakuti antu yasi nu mulinganya, nu kutaila ukuti pa nsita yakwe ilinge Yeova alafumyapo ulufyengo lonsi luno tukalola ndakai.
16. Ndi cakuti tusikukwanisha ukuombako imilimo imwi, i vyani vino tungasambililako ukwi pepo lya Mwina Levi? (Masamu 42:1-4) (Loliniko ni vikope.)
16 Belengini Masamu 42:1-4. Uwalemvile ulwimbo luu u Mwina Levi uwali umuzya nupya wino atapepelanga api tempele pamwi na Ina Izlaeli yauze. Vino walemvile vikalangilila vino wayuvwanga. Limwi tungayuvwa wakwe aliwe ndi cakuti itulwalisha icakuti tusikufuma na pa ng’anda, nanti nga yatwika umu cifungo pa mulandu nu kupepa Yeova. Insita zimwi tungauvwa sile ningo, insita zyuze nazyo tungauvwa uyi. Lelo asi mulandu na vino tungauvwa, tulinzile ukunena Yeova vino tukuyuvwa. Ukucita vivyo kungatwazwa ukumanya ningo vino tukuyuvwa alino nu kutwiushako ivintu ivicindame sana. Wakwe, Umwina Levi wilwike ukuti wali nu kukwata mashuko aiyele aakulumbanyizizyamo Yeova. (Masa. 42:5) Nupya welenganyanga na pali vino Yeova wamusakamalanga. (Masa. 42:8) Ukupepa kuli Yeova ukufuma pansi ya mwenzo, kungatwazwa ukumanya umulandu uno tukayuvwila umu nzila iyo, kuya nu mutende alino nu kutwazwa ukuzizimizya.
Umwina Levi uwalemvile Masamu 42 wanenyile Yeova vyonsi vino wayuvwanga. Ndi cakuti twanena Yeova vino tukuyuvwa umwi pepo, cikalenga twaika mano uku vintu ivicindamishe. (Lolini palaglafu 16)
17. I vyani vino tungasambililaukwi pepo lino kasesema Yona wapefile? (Yona 2:1, 2) Uzye amazwi yamwi aaya umwi buku lya Masamu yangatwazwa uli lino tuli ni ntazi? (Lolini futunoti.)
17 Belengini Yona 2:1, 2. Kasesema Yona wapefile ipepo lii lino wali umunda ya ciswi. Nanti cakuti Yona wakanyile ukuvwila Yeova, wasininkizye ukuti Yeova wali nu kukutika ukwi pepo lyakwe. Umwi pepo lino Yona wapefile, waomvizye mazwi aaya umwi buku lya Masamu.d Afwile wamanyile ningo mazwi aaya umu Masamu. Fwandi ukwelenganya pa mazwi yaa, kwamwazwile ukusininkizya ukuti Yeova wali nu kumwazwa. Naswe kwene ndi cakuti twamanya malembo amuli Baibo, tulayiusha nupya yalatuteekezya lino tukupepa kuli Yeova ndi cakuti tuli ni ntazi.
TWALILILINI UKUPALAMA KULI YEOVA UKUPITILA UMU KUPEPA
18-19. Ndi cakuti cikututalila ukulanda vino tukuyuvwa umwi ipepo, uzye amazwi aaya pali Loma 8:26, 27 yangatwazwa uli? Langililini.
18 Belengini Loma 8:26, 27. Insita zimwi tukasakamikwa sana icakuti tukafilwa nu kunena Yeova vino tukuyuvwa. Lelo kwaya icingatwazwa. Umupasi wa muzilo “ukatupaapatilako.” Uzye cii cikupiliula cani? Yeova waomvizye umupasi wakwe ukulenga mapepo aingi yalembwe muli Baibo. Ndi cakuti cikututalila ukunena Yeova vino tukuyuvwa, Yeova angasuka mapepo litu ndi cakuti twaomvya mazwi aaya umu mapepo yaa.
19 Ukumanya vii kwazwile nkazi Yelena uwa ku Russia. Yamulemile pa mulandu wakuti wapepanga nu kubelenga Baibo. Ya Yelena yasakamile sana icakuti cayatalile nu kupepa. Yatiile: “Niushanga ukuti ndi cakuti nasakamikwa sana nupya ntamanyile vino ningalanda umwi pepo, naomvyanga amazwi amu mapepo yano aomvi yakwe Leza aaliko mpiti yapepanga . . . nupya Yeova wasukanga mapepo yaa pano cali kwati nene napepanga mapepo yayo. . . . Ukucita vii kwanteekezyanga sana pa nsita yii itale.”
20. Tungacita uli pakuti tuipekanye lino tutatala twatandika ukupepa ndi cakuti itusakamikwa sana?
20 Ndi cakuti tukuvwa ukutonta, cingatutalila ukwikako sana mano lino tukupepa. Tungabelenga mazwi aaya umwi buku lya Masamu ni zwi ilyuvwike lino tutatala twatandika ukupepa. Nupya limwi tungalemba vino tukuyuvwa wakwe vino Umwene Devedi wacisile. (Masa. 18, 34, 142; tumazwi twapapela.) Ukuya kwene kutaya ivya kulondela pa kuipekanya lino mutatala mwatandika ukupepa. (Masa. 141:2) Fwandi mulinzile ukucita ivingamuzipila.
21. U mulandu ci uno tulinzile ukupepela ukufuma pansi ya mwenzo?
21 Cikatuteekezya ukumanya ukuti Yeova akamanya vino tukuyuvwa na lino tutatala twatandika ukupepa kuli aliwe. (Masa. 139:4) Nanti ciye vivyo, akauvwa ningo ndi cakuti twamunena vino tukuyuvwa pano tukalangilila ukuti twamutaila. Fwandi mutasitooka ukupepa kuli Tata winu uwa kwi yulu. Mwasambililako uku mapepo aalembwa umwi Izwi lyakwe. Mwapepa ukufuma pansi ya mwenzo. Mwamunena ivikalenga mwaya ni nsansa ni vikalenga mwaya nu ulanda. Nga cuza winu uwaya ni cisinka lyonsi, alamwazwa.
LWIMBO NA. 45 Melenganyo ya mu Mwenzo Wane
a Lolini “Imiyele imwi ikalamba ino Yeova wakwata” iyalumbulwa umwi buku lyakuti Malembo Aangazwa Aina Klistu pa mutwe wakuti “Yeova.”
b Mapepo aa pa cilongano yalinzile ukuya aipi.
c Lino Hana wapepanga, waomvizye amazwi akolana na amazwi yano Mose walemvile. Afwile wakwatanga insita yakwelenganya pa Malembo. (Malan. 4:35; 8:18; 32:4, 39; 1 Sam. 2:2, 6, 7) Pa cisila ca myaka iingi, Maliya nyina wakwe Yesu waomvizye amazwi aakoline na mazwi yano Hana walanzile.—Luka 1:46-55.
d Wakwe, lolini vino amazwi yano Yona walanzile aaya pali Yona 2:3-9 yakolana na amazwi aaya pa Masamu 69:1; 16:10; 30:3; 142:2, 3; 143:4, 5; 18:6; 3:8.