Mark
8 Ilo iien in, ear bar wõr juon jarlepju el̦ap ear pãd ippãn Jesus, ak kiiõ ejjel̦o̦k kijeer m̦õñã. Kõn men in, ear kũrtok ri-kal̦oor ro an im ba ñan er: 2 “Ilukkuun bũrom̦õj kõn armej rein kõnke jilu de raanin aer pãd ijin ippa ak ejjel̦o̦k kijeer m̦õñã. 3 Ñe inaaj jilkinl̦o̦k er ñan ijoko jikier ak rekwõle,* renaaj l̦otl̦o̦k ilo ial̦ eo aer l̦o̦k, im jet iaaer ettol̦o̦k ijoko jikier.” 4 Ak ri-kal̦oor ro rar uwaake im ba: “Jenaaj ebbõk ia pilawã ñan naajdik armej rein ke ejjel̦o̦k jabdewõt men ilo jikin in?” 5 Im ear kajjitõk ippãer im ba: “Bwe jete n̦e pilawã ippemi?” Im reba: “Jimjuon.” 6 Im ear jiroñ armej ro bwe ren jijet lal̦. Ãlikin, ear bõk pilawã ko jimjuon im jar im kam̦m̦oolol Anij, im ear kõrrãjeti ñan elõñ m̦õttan im lil̦o̦k ñan ri-kal̦oor ro an bwe ren ajeji. Innem ri-kal̦oor ro rar ajeji ñan armej ro. 7 Ear bar wõr jejjo ek jiddik ippãer, im ãlikin an jari, ear jiroñ ri-kal̦oor ro an bwe ren bar ajeji ñan armej ro. 8 Im aolep rar m̦õñã im mat, im ke rar aini bween pilawã ko, ear obrak jimjuon iep ko rekkillep. 9 Tokãlik ear jilkinl̦o̦k armej ro. Oran em̦m̦aan ro rar m̦õñã ej 4,000.
10 Im ear m̦õkaj im uwe ilo juon wa ippãn ri-kal̦oor ro an im rar jerakl̦o̦k ñan jikin eo etan Dalmenuta.* 11 Innem Parisi ro rar itok ñan ippãn im jino aer akwããl ippãn. Rar mãlejjoñe ilo aer kajjitõk ippãn bwe en kõm̦m̦ane juon menin kabwilõñlõñ* ilo etan Anij. 12 Jesus ear lukkuun bũrom̦õj ilo bũruon,* im ear ba: “Etke armej in epepen in rekõn̦aan wõt ellolo kõkal̦l̦e? Ij ba ñan kom̦ bwe ejjel̦o̦k kõkal̦l̦e enaaj wal̦o̦k ñan epepen in.” 13 Ãlikin an ba men in, ear etal jãn ijo im bar uwel̦o̦k ioon wa eo im jerakl̦o̦k ñan jikin ko iturãjetin lom̦al̦o eo.
14 Bõtab rar mel̦o̦kl̦o̦k in ebbõk pilawã, im ekar ejjel̦o̦k jabdewõt ippãer ilo wa eo ijello̦kun wõt juon wũdin pilawã. 15 Innem ear kakkõl er im ba: “Kom̦win kõjparok kom̦ jãn iij in kauwe kan̦ an Parisi ran̦ im jãn iij in kauwe kan̦ an Herod.” 16 Ke ri-kal̦oor ro rar roñ men in, rar jino aer akwããle doon kõn aer kar jab bõktok pilawã. 17 Jesus ear jel̦ã kõn men in im ear ba: “Etke kom̦ij akwããl kõn an ejjel̦o̦k pilawã? Ta kom̦ij jañin kile im mel̦el̦e kõn men eo ij kajjioñ in ba ñan kom̦ ke? Kom̦ij jañin de mel̦el̦e ilo bũruomi ke? 18 Ewõr mejãmi ak kom̦ij jab loe, im ewõr lo̦jilñũmi ak kom̦ij jab roñjake. Ta kom̦ij jab keememej 19 aõ kar naajdik 5,000 em̦m̦aan kõn 5 wõt pilawã ke, kar jete iep kom̦ar koobraki kõn bween pilawã ko?” Rar uwaake im ba: “Joñoul ruo.” 20 “Ke iar naajdik 4,000 em̦m̦aan kõn jimjuon wõt wũdin pilawã, kar jete oran iep killep ko kom̦ar koobraki kõn bween pilawã ko?” Im rar uwaake im ba: “Jimjuon.” 21 Innem eba: “Im kiiõ etke kom̦ij jab mel̦el̦e?”
22 Ke rar pol̦o̦k ilo Betseida, armej ro ie rar bõktok juon em̦m̦aan epilo im rar akwel̦ap ñane bwe en uñũri. 23 Innem ear jibwe pein em̦m̦aan eo im tõle l̦o̦k jãn bukwõn eo. Ãlikin an kaplouk mejãn em̦m̦aan eo, ear likũt pein ioon im kajjitõk ippãn im ba: “Ewõr ke jabdewõt men en̦ kwõj loe?” 24 Em̦m̦aan eo ear reilõñl̦o̦k im ba: “Ij ellolo armej, bõtab il̦ak lo er rej ãinwõt wõjke ak rej etetal.” 25 Jesus ear bar likũt pein ioon mejãn em̦m̦aan eo im ear lukkuun lol̦o̦kjen̦. Ear jako an pilo im ear alikkar an lo men otemjej. 26 Innem ear jilkinl̦o̦ke ñan m̦weo im̦õn, bõtab ear jiroñl̦o̦ke im ba: “Jab iwõj ñan bukwõn n̦e.”
27 Jesus im ri-kal̦oor ro an rar ilo̦k ñan bukwõn ko ilo Seseria Pilippai, im ilo ial̦ eo aer l̦o̦k, ear kajjitõk ippãer im ba: “Wõn ña ilo an armej ro ba?” 28 Rar uwaak im ba: “Jet rej ba Jon ri-Peptaij, bar jet rej ba Ilaija, im ro jet rej ba juon iaan ri-kanaan ro.” 29 Im ear kajjitõk ippãer im ba: “Ak baj kom̦, wõn ña ilo ami l̦õmn̦ak?” Piter ear uwaak im ba: “Kwe Christ.” 30 Innem ear lukkuun jiroñ er bwe ren jab kwal̦o̦k ñan jabdewõt kõn wõn e. 31 Bareinwõt ear kõmel̦el̦eik er bwe Nejin armej* enaaj aikuj iioon elõñ eñtaan, im bũrij ro reutiej, skraib ro im ri-tõl ro an ri-Ju renaaj kõjekdo̦o̦ne. Armej renaaj m̦ane ñan mej, bõtab ãlikin jilu raan enaaj bar mour. 32 Jesus ear kwal̦o̦k men in ñan er aolep. Ak Piter ear bõke im kõjenolo̦ke jãn er im kajjioñ kajim̦weiki. 33 Bõtab ear oktakl̦o̦k jãn Piter im reilo̦k ñan ri-kal̦oor ro jet. Innem ear kajim̦weik Piter im ba: “Kwõn ilo̦k jãn ña Setan! kõnke l̦õmn̦ak kan̦e am̦ rej an armej im jab an Anij.”
34 Innem ear kũrtok armej ro im ri-kal̦oor ro an ñan ippãn, im ear ba: “Jabdewõt eo ekõn̦aan l̦oor eõ, en kaarmejjeteik e make im ineek al̦al̦ in eñtaan* eo an, im en jab bõjrak jãn an l̦oor eõ. 35 Jabdewõt eo ekõn̦aan kõjparok mour eo an, enaaj mej. Bõtab, jabdewõt eo enaaj mej kõn wõt ña im kõn ennaan eo em̦m̦an, enaaj bar mour. 36 Ewõr ke tokjãn ñe juon armej ej bõk aolep men ko ilo lal̦ in bwe ren an ak emej jãni? 37 Ta eo juon armej enaaj kõm̦m̦ane bwe en maroñ mour wõt? 38 Armej in epepen in renana im rej lejãn.* El̦aññe jabdewõt armej ilo epepen in ej jook kõn ña im kõn naan ko aõ, Nejin armej enaaj bar jook kake e ilo iien eo enaaj itok kõn aiboojoj eo an Jemãn ippãn enjel̦ ro rekkwõjarjar.”