Dolul Eo An Jehovah Ej Jurake Jerbal In Kwalok Nan Eo Am

“Im I ar lo bar juõn enjel ej kãki i mejatoto, im iben news eo emõn ej indio bwe en keãñ kake einwõt news kamõnõnõ.”​—REVELESÕN 14:6, New World Translation.

1. Ewi wãwen an Ri Kennan ro an Jehovah bõk melejoñ, im etke rar ellã im mour?

ETKE elap tokjen ñan kile jerbal eo an dolul eo an Jehovah ilañ ilo an jurake jerbal in kwalok nan eo an Christian? Eokwe, Ri Kennan ro an Jehovah ren kar maroñ ke kõtõbrak jerbal in kwalok nan kin news eo emõn kin Ailiñ in Anij ilo juõn lal in kijirãt ilo an ejelok jibañ jen ri karuwainene ro an Jehovah ilañ? Ri Kennan ro rar kõmmane kwalok nan rot in ilo juõn ebeben eo itoklimo kin ailiñ elap jen joñan, bed ko an kien rar beek men otemjej, tarinae ko an lal, im bwoktak ko kajjo wãweiir. Ilo an ejelok jibañ eo an Jehovah Ri Kennan ro ren kar maroñ ke ellã im mour jen wãwen ko rar walok ñan ir ibelakin lal einwõt kalijeklok, jeb, matõrtõr in kowadoñ ko ekkã air walok im jutak nae ir?​—Sam 34:7.

Ellã im Mour Jekdon Jumae eo Ibelakin Lal

2. Ta eo einlok wõt im ewõr ikõtan Christian ro remol ilo ebeben eo kein kajuõn im ro rainin?

² Ilo ebeben eo kein ka-20, ri kijirãt ro, kabuñ im kien jimor rar bõkmantak jabdewõt menin kabañbañ ko rar maroñ kõmmani, jerbal in kien im jab jerbal in kien, ñan kajeoñ kabõjrak ak jolok jerbal eo an Jehovah. Christian jemjãn jemjatin maan im kõrã ro rar bõk matõrtõr, jab jimwe jutak kin ir, jeje kin ir im ruruweir​—elõñ rar mõn ir​—ekkã an jarjar men kein jen ri tel ro an kabuñ in Babylon Elap. Jemaroñ ba, einwõt kar ibben Christian ro jinoin, bwe “emol kin jar in, kim jela ijo ko otemjej rej konono nae.” Ejja einwõt ri tel in kabuñ ko an ri Ju ro ilo ien ko an Christ rar kate ir tarinae ñan kabõjrak jerbal in kwalok nan eo an, inem ri tel ro im ro rar buñ jen tõmak ilo air kobalok ibben ri kien ro air rekajur, rar kajeoñ mõn jerbal in katak in kennan eo elap an armij ro an Jehovah.​—Jerbal 28:22; Matu 26:59, 65-67.

3. Ta eo jemaroñ katak kake jen tiljek eo an Henryka Żur?

³ Jen etale einwõt juõn wanjoñok kin ta eo ear walok ilo Poland ilo March 1, 1946. Henryka Żur, juõn ledik Ri Kennan 15-yiõ dettan jen iturin Chełm, ear etal ibben bar juõn Ri Kennan, juõn brother, ñan airro lolok armij ro ear wõr air itoklimo ilo juõn bukwon eo ebaklok. Ro uan jarin tarinae eo an Catholic etan Narodowe Siły Zbrojne (Jarin Tarinae eo an Ailiñ eo) rar bõk erro Brother eo ear lap air deñõte ak ear ko im mour. Ak ear jab eindein ñan Henryka. Rar lukkun kaeñtane iomin elõñ awa ko ke rar kajeoñ jibed e bwe en kõmman kakõlle debãl eo an Catholic. Juõn ian ro rar kaeñtane ear ba: “Kwo maroñ bõk jabdewõt tõmak eo kwoj kõnan, men eo deeo kwon baj kõmmane wõt kakõllan debãl ne an Catholic. Elañe jab juõn jotin bu ej kõttar yuk!” Ledik eo ear mõjenolok ke tiljek eo an? Jab. Jarin kabuñ eo ebikõt rar iberlok ledik eo ñan bulõn wijki ko im buki na ie. Meñe eindein, ear anjo wõt! Rar likjap in rube tiljek eo an.a​—Romans 8:35-39.

4. Ewi wãwen an ra ko an kien im kabuñ kajeoñ kabõjrak jerbal in kwalok nan eo an Ailiñ eo?

⁴ Iomin buki yiõ ko, ro ri karejeran Anij ilo ien kein rej lãj ñan ir im jab kautiej ir. Kinke Ri Kennan ro an Jehovah rejjab, im jab kõnan bwe ren, mõttan kabuñ eo an Satan, armij rej lale ir einwõt ekkar bwe ren einwõt menin mour ko rej kakkirurik ir kin jabdewõt kõnan ko air ñan jumae men ko armij rej watõki rejmwe ak kijejeto eo air ilo jumae. Ran kien ko rej tarinaik ir. Elõñ Ri Kennan emwij air mij kinke rejjab kõnan karmij jeteik tõmak eo air. Meñe men eo rej naetan democracy (kien anemkwoj) rar kajeoñ kabañ in kabõjrak jerbal in kwalok nan eo kin news eo emõn. Liklok ñan yiõ eo 1917 ilo Canada im ilo United States, ri tel ro an kabuñ ir eo rej kõmman jarjar ñan naruõn Ri School in Bible ro, einwõt kar jela kake ir Ri Kennan ro ilo ien ko. Ri Tel ro an Watch Tower Society rar kalbuji ir ilo bwed, ak tokelik rar erreo jen men eo rar narueir kake.​—Revelesõn 11:7-9; 12:17.

5. Ta nan ko rar jerbal ñan kakajur ro ri karejeran Jehovah?

⁵ Satan ear kajerbal jabdewõt wãwen ko an ñan kajeoñ kabõjrak jerbal in kennan eo an Christian jemjãn jimjaten ro im ri tiljek ñan ro mõttair. Ak, einwõt an elõñ bwebwenato ko kwalok, meñe kamijak, kalelñoñ, kaeñtan enbwin, kalbuj, camp in kalbuj ko, meñe mij rar jab kaikõñ Ri Kennan ro an Jehovah. Im ej eñin wãwen eo laltak ilo bwebwenato. Ilo eljinmen, nan ko an Elisha rar jerbal einwõt menin kakajur: “Jab mijak, bwe elõñlok ro rej bed ibbed jen ro rej bed ibbeir.” Juõn unin ej bwe enjel ri tõmak ro relõñlok jen jarlepju ro an Devil!​—2 Kiñ 6:16; Jerbal 5:27-32, 41, 42.

Jehovah Ej Kejerammõn Jerbal in Kwalok Nan eo Ewõr Kijejeto ie

6, 7. (a) Ta jibadbad ko jinoin kar kõmmani ñan kwalok nan kin news eo emõn? (b) Ta oktak ko ewõr tokjeir rar walok ilo jino ilo 1943 eo?

⁶ Ilo ebeben eo kein ka20, Ri Kennan ro an Jehovah rar kajerbal elõñ wõnmanlok ko ikije menin ellolo ko, kajededlok im kamkajkajlok jerbal in kennan eo elap mokta jen an itok jemlokin. Ilo 1914 eo, Pastor Russell, president eo jinointata an Watch Tower Bible im Tract Society, ear kalaplok kajerlbal slide ko im pija makitkit ko, koba ibben kemlele ko rej bedbed ion Bible im likiti ilo record in kajañjañ ko, im ralitõk awa aetokan kõmmane im kar naetan “Photo-Drama in Kõmanman.” Ear kabwilõñ ro rar aluje ilo elõñ ailiñ ko ilo ien eo. Tokelik, ilo 1930 im 1940 ko, Ri Kennan ro rar jelã kake ir kin jerbal in kwalok nan eo air jen em ñan em ilo air kajerbal kajañjañ ko ibben record in katak ko kwalok in J. F. Rutherford, president eo kein karuo an Society.

⁷ Ilo 1943 eo ilo beran juõn buñten nee kar bõke iomin tel eo an Nathan H. Knorr, president eo kein kajilu an Society, kar beek ñan kajutak juõn school ñan ri kwalok ro ilo aolep congregation. Ri Kennan ro kar katakin ir ñan kwalok nan im katakin jen em ñan em ilo air jab kajerbal record in kajañjañ ko. Jen ien eo, school ko jet rar karõki ñan katakin missionary ro, full-time pioneer ri kwalok ro, congregation elder ro, im overseer ro rar bõk eddo ilo ra ko an Watch Tower Society. Ta tokjen eo ear walok?

8. Ewi wãwen an kar Ri Kennan ro kwalok air tõmak ilo 1943 eo 1943 eo?

⁸ Ilo 1943 eo, ilo eolaplapin Bata eo an Lal Kein Ka II, ear wõr wõt 129,000 Ri Kennan ro rar boub ilo 54 ailiñ ko. Ak, rar tõmak im likit ilo air lemank bwe Matu 24:14 enaj jejjet kitien mokta jen an itok jemlokin. Rar liki bwe Jehovah enaj kar lale bwe ennan in kakkõl eo elap tokjen ren kar keãñ kake moktata imanin lajrak in wãwen ko renaj kar walok im bõktok jemlokin jukjuk im bed in enana. (Matu 24:21; Revelesõn 16:16; 19:11-16, 19-21; 20:1-3) Emwij ke nawõnãn jibadbad ko air?

9. Ta mol ko rej kwalok bwe jerbal in kennan eo ewõr tõbrak ie?

⁹ Ewõr kiõ 13 ailiñ ko elõñlok jen 100,000 Ri Kennan ro rej boub ilo kajjojo iair. Elõñ ian ailiñ kein ekajur kabuñ in Catholic ie. Bõtab, lale mõk wãwen eo. Brazil ewõr 450,000 ri kwalok nan ro kin news eo emõn, im elõñlok jen 1,200,000 rar bed ilo ien eo rar Kememej Mij eo an Christ ilo 1997 eo. Mexico ej bar juõn wanjoñok, kin iturinlok 500,000 Ri Kennan ro im elõñlok jen 1,600,000 rar bed ilo kwojkwoj in Kememej eo. Ailiñ ko jet an Catholic rej Italy (ewõr 225,000 Ri Kennan ro), France (enañin 125,000), Spain (elõñlok jen 105,000), im Argentina (elõñlok jen 115,000). Ilo United States, ijo ekajur kabuñ in Protestant, Catholic, kabuñ eo an ri Ju, ewõr 975,000 Ri Kennan ro im elõñlok jen 2,000,000 rar bed ilo ien Kememej eo. Emol, jar ko relõñ rej ibep nabõjlok jen Babylon Elap, jukjuk im bed in kabuñ wan eo an lal, ibben katak ko an im rej oktaklok ñan kalimur ko an Anij rebidodo im mol kin “lañ ko rekãl im lal eo ekãl.”​—2 Piter 3:13; Aiseia 2:3, 4; 65:17; Revelesõn 18:4, 5; 21:1-4.

Kõmman Ukoktak ñan Aikwij ko An Armij

10. Ewi wãwen an wãwen ko oktak ilo jet jikin ko?

¹⁰ Elõñ ian ro emwij air oktaklok ñan Jehovah ikijen Christ rar lo ir jen em ñan em. (Jon 3:16; Jerbal 20:20) Ak kilen ko jet kar bar kajerbali. Ien im wãwen ko emwij air oktak, im wãwen ko kin economy ej bwe elõñ kõrã ro kiõ rej jerbal ilik in mweo. Iloan juõn week, ekkã wõt air lo jejjo armij ilo mweo. Kin menin, Ri Kennan ro an Jehovah rej kõmman ukoktak ñan wãwen eo. Einwõt Jesus im ri kalor ro jinoin, rej ilok ñan ijo rej lo armij ro ie.​—Matu 5:1, 2; 9:35; Mark 6:34; 10:1; Jerbal 2:14; 17:16, 17.

11. Ia eo Ri Kennan ro an Jehovah rej kwalok nan ie rainin, im kin ta tokjen eo?

¹¹ Ri Kennan ro ir eo rej make bõkman im ilo kejbãrok kwalok nan ñan armij ro ilo melan park (jikin kakije im ikkure) ko, jikin wia ko, factore ko office ko im jikin business ko, school ko, police station ko, gas station ko, hotel ko im restaurant ko, im ilo ial ko. Ilo mol, rej kwalok nan ijoko jabdewõt rej lo armij ro ie. Im ñe armij ro rej bed ilo moko imweir, inem Ri Kennan ro rej etal wõt im bar jeblak ñan ibbeir ijo. Wãwen ukoktak in im kebak armij ro ilo wãwen in ej walok tokjen ilo an lõñlok Bible literature ko rej lito-litak. Ro einwõt sip rej lo ir. Rej jino katak Bible ibben ro rekãl. Jerbal in jelãlokjen (education) eo elap ilo bwebwenato rej bõkmanlok ilo kijejeto ibben elõñlok jen lalem im jimettan million ri kwalok nan ro rej lelok ien ko air make ilo ejelok wõnãn! Ewõr ke jerammõn in ibbam ilo am juõn iair?​—2 Korint 2:14-17; 3:5, 6.

Ta eo ej Kamakit Ri Kennan ro an Jehovah?

12. (a) Ewi wãwen an Jehovah katakin armij ro an? (b) Katak in ta eo ear jelet?

¹² Ewi wãwen an dolul eo ilañ kwon ibben aolepen wãwen jerbal in? Isaiah ear kanan: “Im naj katakin ro nejõm otemjej kin Jehovah, im ainemõn an ro nejõm e naj lap.” (Aiseia 54:13) Jehovah ej katakin menin ibelakin lal burukuk eo an jemjãn jemjatin ikijen dolul eo an ilal jej lo kin mejed​—ilo Kingdom Hall ko, ilo kwalok in convention ko, im ilo assemblie ko. Burukuk im ainemõn ej walok tokjen. Katakin eo an Jehovah emwij an kwalok juõn armij eo ejejuan, katakini ñan yokwe don im ro ri turiir einwõt ir make, im jab kijirãte ro ri turiir, ijoko jabdewõt remaroñ jokwe ie ilo lal in ejebelbel.​—Matu 22:36-40.

13. Ewi wãwen ad maroñ tõmak bwe tel eo an enjel ekoba ilo jerbal in kwalok nan eo?

¹³ Yokwe ej men eo ej kamakit Ri Kennan ro an Jehovah ñan air etal wõt im kwalok nan jekdon ñe ejelok itoklimo ak ewõr matõrtõr. (1 Korint 13:1-8) Rejelã bwe tel eo ilo jerbal in lomor eo air ej kajjutok jen lañ, einwõt an Revelesõn 14:6 kwalok. Ta ennan eo rej keãñ kake iomin tel eo an enjel? “Mijõk Anij im lelok aibujuij ñõn E, bwe auõ in ekajet eo An e mottok, im komin kabuñ ñõn Eo e ar kõmõnmõn lõñ, im ene, im lometo, im un ko unin dren.” Kwalok nan kin news eo emõn kin Ailiñ eo ej kautiej etan Jehovah. Armij ro rej kir ir ñan air lelok aibujuij ñan Ri Kõmanman eo, Anij, jab ñan menin kõmanman ko im evolution (armij ear walok jen menin mour). Im etke jerbal in kwalok nan eo elap ekairiur kake? Kinke awa in ekajet eo emottok​—ekajet eo nae Babylon Elap im aolep wãwen ko jet in jukjuk im bed eo an Satan jej loi kin mejed.​—Revelesõn 14:7; 18:8-10.

14. Wõn ro rekoba ilo karelel in katak in elap?

¹⁴ Ejelok Christian ro emwij air ujleplok rej jako jen jerbal in kwalok nan in. Elder ro ilo jitõb rej tel ilo jerbal in kwalok nan ibben congregation eo. Pioneer ro emwij air katak im kaminene rej jerbal full-time ilo jerbal in. Ri kwlok ro rej kijejeto ilo ennan eo an Ailiñ eo, meñe rej maroñ kwalok nan jejjo wõt awa ilo juõn alliñ ak elõñlok, rej kajeded ennan eo ilo jabdewõt kona ko in lal in.​—Matu 28:19, 20; Hibru 13:7, 17.

15. Ta eo ej juõn menin kalikar bwe kwalok nan eo an Ri Kennan ro an Jehovah ej jelete?

¹⁵ Aolepen jibadbad in emwij ke an jelet lal in? Juõn menin kamol eo elamwan ej oran ien ko Ri Kennan ro an Jehovah rej walok ilo program in TV ko im ilo news ko. Men kein ekkã air kalikar kijejeto eo ad im bebe eo ad ñan tõbar armij otemjej. Emol, kijejeto eo ad im ad ekkeini bed ej kõmman juõn kabwilõñlõñ emũlal, meñe jarlepju in armij ro rej kejekdon ennan eo im ri keãñ ro!

Kijejeto eo Ad ñan Kadedelok Kennan eo

16. Ta lemnak eo ej aikwij alikar kiõ kin joñan ien in ebed?

¹⁶ Jejjab jelã ewi joñan ien eo ebed ñan jukjuk im bed in, im jejjab aikwij jelã toan wõt an erreo emmakit eo ad ilo ad karejar ñan Jehovah. (Matu 24:36; 1 Korint 13:1-3) Ak jejelã bwe ñan kalikar yokwe, kajur, im ekajet jimwe eo an Jehovah, news eo emõn rej aikwij kwalok kake “moktata.” (Mark 13:10) Kin menin, jekdon jete yiõ in ad maroñ kar kõttar jemlokin jukjuk im bed in enana, ekajet bwed, koadoñ an lal, jej aikwij kijejeto ilo ad mour ñan ujleplok eo ad ekkar ñan wãwen ko ad. Jemaroñ ritto ak nañinmij, ak jemaroñ karejar wõt ñan Jehovah kin kijejeto eo ear bed ibbed ilo ran ko ke jaar dik wõt ak ejmour. Bõlen ejako ad maroñ kajerbal elap ien ilo jerbal in kwalok nan einwõt ad kar kõmman mokta, ak jemaroñ lukkun debij wõt kadkad in katok in wijtak eo ad ñan Jehovah.​—Hibru 13:15.

17. Kwalok juõn bwebwenato in kõketak eo emaroñ jibañ kij otemjej.

¹⁷ Kin menin, meñe dik ak ritto, jen kwalok ad kijejeto im bõk konad ilo ennan eo an lal eo ekãl ibben ro otemjej jej ion ir. Jen einwõt ledik eo jiljilimjuõn yiõ dettan ilo Australia eo ear etal ibben jinen lok ñan imõn wia eo. E ar roñ ilo Kingdom Hall eo kin ewi joñan an lap tokjen ñan aolep bwe en kwalok nan, inem ear likit ruo Bible brochure ko ilo ieb eo an. Ke jinen ear boub ilo counter eo, ledik jidikdik eo ear jako. Ke jinen ear bukõt e, ear lo an lelok juõn brochure ñan juõn kõrã! Jinen ear ilok im jolok an bwed kin jabdewõt men ledik eo nejin emaroñ kar kabnõnõnik kõrã eo kake. Ak kõrã eo ear mõnõnõ im bõk brochure eo. Ke jinen ear bar make ian ibben ledik eo nejin, ear kajitõk ibben ewi wãwen an kar beran in kebak juõn ruwamaejet. Ledik eo ear uak: “I ar baj ba ñan ña make, Ready, Set, Go! (eñin kajin eo rej kajerbale ñe rej jino iten ettõr ilo iaekwoj kin nee.) Im I ar etal!”

18. Ewi wãwen ad maroñ kwalok juõn jitõb in nebar?

¹⁸ Kij aolep jej aikwiji juõn jitõb eo einwõt in an ledik in Australian eo, elaptata ilo ad kebak ruwamaejet ro ak meñe ri kien ro kin news eo emõns. Jemaroñ mijak air kejekdon kij. Jen jab meloklok ta eo Jesus ear ba: “Komin jab inebata buruemi kijkan ak ta eo kom naj uak, ak ta eo kom naj konono; Bwe Jitõb Kwojarjar e naj katakin kom ilo auõ eo ta emõn ami ba.”​—Luke 12:11, 12.

19. Ewi wãwen am lemnak kin kwalok nan eo am?

¹⁹ Inem liki ilo jibañ eo an jitõb eo an Anij ilo am kebak armij ro kin news eo emõn ilo juõn wãwen joij. Million rej likit air liki ilo maan im kõrã ro ejelok tokjeir ro rej bed ijin rainin im motlok ilju. Jej liki Jehovah im dolul eo an ilañ​—Christ Jesus, enjel kwojarjar ro, im Christian ri kabit ro emwij air jerkakbiji ​—ro rej mour ñan indio! Kin menin, kememej: “Elõñ ro rej bed ibbed jen ro rej bed ibbeir”!​—2 Kiñ 6:16.

[Kamelele eo itulal]

Ewi Wãwen Am Uak?

◻ Ta jerbal eo dolul eo an Anij ilañ ear kõmmane ilo an armij ro an Jehovah ellã im mour?

◻ Ta eo ra ko an kien im kabuñ rar jibed Ri Kennan ro an Jehova ilo ebeben eo kein ka20?

◻ Ewi wãwen an Ri Kennan ro an Jehovah ukukõt kwalok nan eo air ñan aikwij ko an ien ko?

◻ Ta eo ej kamakit yuk ñan am kwalok nan?

[Pija eo ilo peij 9]

Henryka Żur

[Pija ko ilo peij 10]

Japan

Martinique

United States

Kenya

United States

Ri Kennan ro an Jehovah rej kwalok nan jabdewõt jikin im jabdewõt ien rej lo armij ro

[Pija eo ilo peij 12]

Ilo jinoinlok ebeben in, kajañjañ ko rar kajerbali ñan kajededlok ennan eo an Ailiñ eo