Katak Jen Bwed Ko Mokta

KIEN erreo ko an Ri Kõmanman eo ad rej ñan indio im rejjab oktak. Kin un in nanin kaiñi eo jej lo ilo Galetia 6:7 ej jerbal rainin: “Jabrewõt eo armij ej jeor e, men in e naj bareinwõt marmir e.” Emol, juõn armij emaroñ kejekdon eddo eo an ñan Anij, ak kien eo eokwojarjar ej bed wõt. Ilo mol, ejelok armij ej ellã jen tokjen ko rej walok jen kõmman ko an.

Ak ta kin wãwen eo ibben juõn armij eo ej mour ilo juõn wãwen mour enojak inem oktak, im erom juõn ri karejeran Anij? E maroñ aikwij wõt in mour kin wãwen eo ear bed im mour ie mokta. Bõtab, menin ejjab melelen, bwe Anij ear jab jolok an bwed. Mour in lũñ eo an King David ibben Bath-sheba ear bõktok elap jorrãn ñan mour eo an. E ar jab maroñ ellã jen menin. Ak ear ukelok, im ear bõk an Anij jerolok an bwed.​—2 Samuel 12:13-19; 13:1-31.

Kwo nañin kar eñjake ke am ebwer ñe kwoj ion tokjen ko rej walok jen bwed ko kwar kõmmani? Elañe kwoj lale ilo wãwen eo ejimwe, eñjake am buromõj emaroñ jerbal einwõt juõn kein kakememej ñan kij ñan ‘ad lale bwe jen jab oktaklok ñan men eo ej kõmman jorrãn.’ (Job 36:21) Aet, eñjake ad buromõj emaroñ jibañ kij bõprae ad eliji juõn bwed. Men eo emõnlok, David ear kejerbal jelã eo ear bõk jen jerawiwi eo ear kõmmane ñan bõk tokjen jab ñan e wõt ak bareinwõt ñan ro jet. E ar ba: “Inem I naj katakin ro dri bwir ial ko Am; im ro dri jerawiwi re naj ukwelok ñan Yuk.”​—Sam 51:13.

[Pija ko ilo peij 31]

David ear katak jen jerawiwi eo an ibben Bath-sheba