“Enaj Joko Mij”

“Ri kijirãt eliktata im e naj joko, mij.”​—1 KORINT 15:26.

1, 2. (a) Ta kejatdikdik eo ri jilek Paul ear likiti ñan ro remij? (b) Ta kajitõk eo kin jerkakbiji Paul ear kemleleiki?

“IJ TÕMAK ilo . . . jerkakbiji in enbwin, im mour indio.” Eindein an Ri Jilek in Creed ba. Catholic ro im Protestant ro jimor rej lukkun kejbãrok air eliji, ilo air jab kile bwe tõmak ko air rej eierlok wõt juõn ñan tõmak in Greek eo jen jabdewõt men ri jilek ro rar tõmak. Bõtab ri jilek Paul, ear kajekdon tõmak in Greek eo im ear jab tõmak ilo juõn an eo ej jabmij. Ak, ear bin an tõmak ilo juõn mour ilo ilju eo ej itok im ear jeje ilo kakõrmol: “Dri kijirãt eo eliktata im e naj joko, mij.” (1 Korint 15:26) Baj ta melelen menin ñan armij ro rej mij?

² Ilo uak, jen oktaklok ñan konono eo an Paul kin jerkakbiji eo emwij je ilo 1 Korint jebta 15. Kwo naj kememej bwe ilo eon in kabellok ko, Paul ear ejaake jerkakbiji einwõt juõn mõttan eo elap tokjen in tõmak eo an Christian. . Kiõ ej kwalok juõn kajitõk: “Mekarta, juõn enaj ba: ‘Ewi wãwen an ro remij jerkakbiji? Aet, kain enbwin rot rej itok kake?’”​—1 Korint 15:35.

Kain Enbwin Rot?

3. Etke jet rar kejekdon jerkakbiji eo?

³ Ilo bõkliñtak kajitõk in, Paul emaroñ emõn an kar karõk in ukõtlok kareelel eo kin tõmak eo an Plato. Plato ear lemnak bwe armij ewõr juõn an ej jabmij eo ej ellã im mour jen mij eo an enbwin. Ñan ro rej rittotak kin juõn lemnak eo einwõt in, katak eo an Christian kin jerkakbiji ejelok bere ejelok tokjen. Elañe an eo ej ellã im mour jen mij, ta un eo ñan juõn jerkakbiji? Bareinwõt, jerkakbiji ej einwõt juõn men eo ejõkkar. Ñe emwij an enbwin eo kõtlok ilo bũñalñal, ewi wãwen an maroñ wõr juõn jerkakbiji? Ri kõmman news in Bible eo Heinrich Meyer ej ba bwe jumae eo an jet ri Corint emaron kar bedbede “ion tõmak eo kin kejeblaktok wãwen eo kin enbwin bwe ejjab maron.”

4, 5. (a) Etke jab errã ko an ro rar jab tõmak rar jab menin kammanwa? (b) Kemleleik wanjoñok eo an Paul kin “wheat.” (c) Kain enbwin rot ko Anij ej lelok ñan ri kabit ro rej jerkakbiji?

⁴ Paul ej kejedmatmat kammanwa eo air ewan: “Kwe armij anãpãp! Men eo kwoj jeor e jab edrek, elañe e jab mij mokta; im men eo kwoj jeor e, kwoj jeor e, ejjab enbwin eo me enaj ejak, ak juõn ine wõt, bõlen emaroñ, wheat ak juõn ian ko jet; A Anij ej lelok juõn enbwin einwõt E ar kõnan, im ñan kajjojo ine enbwin eo enbwinin make.” (1 Korint 15:36-38, New World Translation) Anij ejamin kar kejerkak enbwin ko kar enbwinin armij ro ke rar bed ion lal. Ak, enaj wõr juõn oktakin baotokin.

⁵ Paul ej keidi jerkakbiji ñan juõn ine eo ej jino jul. Juõn jõkjõkin ine edik in wheat ejjab einlok wõt jõkjõkin kããn eo enaj edek jene. Book eo World Book Encyclopedia ej ba: “Ñe juõn ine ej jinotak in jul, elap an nomnom den. Den eo ej kõmman elõñ oktak in chemical ko iloan ine eo. Ej bareinwõt kõmmman bwe men ko iloan ine eo ren ebbõjlok im rub iloan ine eo.” Im ine eo ej oktak im mij einwõt juõn ine im erom juõn kããn menin eddek eo ej jino jebar lõñtak. “Anij ej lelok ñan e juõn enbwin” bwe ej kaddeke im kien science ko rej bebek an eddek, im kajjojjo ine ej bõk juõn enbwinin ekkar ñan kain enbwin eo an. (Jenesis 1:11) Ilo wãwenin lok wõt, Christian ri kabit ro mokta rej mij einwõt armij. Inem, ilo ien eo emwij an Anij karõke, ej kejeblaktok ir ñan mour ilo juõn enbwin ekãl aolepen. Einwõt Paul kar jiroñ ri Philippai ro, “Jesus Christ . . . Eo e naj kõkal enbwinier etã bwe en erom einwõt enbwinin e aibujuij.” (Pilippai 3:20, 21; 2 Korint 5:1, 2) Rej jerkakbiji ilo enbwinin jitõb im mour ilo ijo jikin jitõb.​—1 Jon 3:2.

6. Etke ej menin kammanwa ñan tõmak bwe Anij emaroñ lelok ñan ro rej jerkakbiji enbwin ko rejejjet enbwinin jitõb?

⁶ Elap ke an bin menin ñan tõmake? Jab. Paul ej kammanwa bwe menin mour ko ewõr kajjojo kain enbwiniir. Ilo kobaiktok ej keidi enjel ro ilañ ibben kaniek-im-bõtõktõk in armij, im ba: “Bareinwõt eor enbwin ilõñ, im eor enbwin i lõl.” Ebareinwõt lap an menin kõmanman ko einjuõn jen don. “Iju einjuõn jen iju in aibujuij,” Paul ear ba, etto wõt mokta jen an science lo kain enbwin iju kein einwõt iju ko reblue, kajur ko rebũrõrõ, im enbwin jidik ko remouj. Kin menin, ejjab menin kammanwa ke bwe Anij emaroñ letok enbwin ko rekkar ilo jitõb ñan ri kabit ro rej jerkakbiji?​—1 Korint 15:39-41.

7. Ta melelen jab wabanban? ban mij?

⁷ Inem Paul ej ba: “Ein drein bareinwõt jerkakbiji an ro remij. Emwij jeor e ilo wabõnbõn; ej jerkakbiji ilo jabwabõnbõn.” (1 Korint 15:42) Juõn enbwinin armij, meñe ej wãppen, ej wabanban. E maroñ mij. Ñan wanjoñok, Paul ear ba bwe Jesus eo ear jerkakbiji im “e jamin bar jeblak ñõn wabõnbõn.” (Jerbal 13:34, NW) E jamin bar jeblak ñan mour ilo juõn enwbinin armij ej wabanban, meñe ewãppen. Enbwin ko Anij ej litok ñan ri kabit ro rej jerkakbiji rejjab wabanban​—ellãlok jen mij ak kõt. Paul ej etal wõt: “Emwij jeor e ilo etton: ej jerkakbiji ilo aibujuij: emwij jeor e ilo mõjino, ej jerkakbiji ilo kajur: Emwij jeor e enbwinin armij; ej jerkakbiji enbwin jitõb.” (1 Korint 15:43, 44) Bareinwõt, Paul ej ba: “Bwe emõn wabõnbõn in en kõnak jabwabõnbõn.” Jabwabõnbõn melelen ejelok jemlokin, mour eo eban jako. (1 Korint 15:53; Hibru 7:16) Ilo wãwen in, ro rej jerkakbiji rej bõk “nememen eo ilañ,” Jesus eo ear kõmman bwe jerkakbiji eo air en maroñ.​—1 Korint 15:45-49.

8. (a) Ewi wãwen ad jelã bwe ro rej jerkakbiji ejja armij ro wõt ke rar mour ion lal? (b) Ta kanan ko rej jejjet kitiir ñe enaj walok jerkakbiji?

⁸ Jekdon oktak im einjuõn in, a ro rej jerkakbiji ir ejja armij ro wõt mokta jen air kar mij. Renaj jerkakbiji kin ejja ememlokjen ko air wõt im ejja kadkad ko wõt kadkadin Christian. (Malachi 3:3; Revelesõn 21:10, 18) Ilo wãwen in rej einlok wõt Jesus Christ. E ar oktak jen jitõb ñan nememen armij. Inem ear mij im ear jerkakbiji einwõt juõn jitõb. Ak, “Jesus Christ ej einwõt juõn inne im rainin, im indrio.” (Hibru 13:8) Juõn jerammõn aibujuij ibben ri kabit ro! Paul ej ba: “A ñe emwij an wabõnbõn in kõnõk jabwabõnbõn, im emwij an men in men in mij kõnõk banmij, inem e naj jejit nan eo emwij je, ‘Mij e jo ilo anjo.’ ‘O mij, ewi am anjo? O mij, ewi am ken iri?’”​—1 Korint 15:54, 55; Aiseia 25:8; Hosea 13:14.

Juõn Jerkakbiji Ilal?

9, 10. (a) Ilo kobban eon eo ilo 1 Korint 15:24, ta eo “jemlokin,” im ta men ko rej walok im kobalok ibben? (b) Ta eo ej aikwij walok ñan mij bwe en jako?

⁹ Ewõr ke juõn ilju eo ñan million armij ro ejelok air kejatdikdik kin mour in jitõb eo ilañ ejjab wabanban? Emol ewõr! Elikin an kemlele bwe jerkakbiji eo ilañ ej walok ilo ien eo Christ ej bed, Paul ej kõllajrak men ko renaj walok, ke ej ba: “Inem jemlokõn, ñe Ej lelok ailiñ ñan Anij, aet Jemen; ñe e naj emwij An kalotlok kajur otemjej an iroij rõn kab kieir im air maroñ otemjej.”​—1 Korint 15:23, 24.

¹⁰ “Jemlokin” ej jemlokin Tausan Yiõ in Iroij eo an Christ, ñe Jesus ej lelok ilo ettã im tiljek Ailiñ eo ñan Anij eo an im Jemen. (Revelesõn 20:4) Karõk eo an Anij bwe “En kobaik men ko otemjej ilo Kraist” enaj dedelok an jejjet kitien. (Epesõs 1:9, 10) Ak, moktata, Christ enaj kar jolok “kajur otemjej an iroij rõn kab kieir im air maroñ otemjej” ko rej jumae ankilan Anij Kajur Põtata eo. Menin elaplok jen baj jorrãn eo wõt ilo Armageddon. (Revelesõn 16:16; 19:11-21) Paul ej ba: “[Christ] En iroij ñõn ter eo emwij An likit ro otemjej rej kijirãt E iomin neen. Dri kijirãt eliktata im e naj joko, mij.” (1 Korint 15:25, 26) Aet, aolepen malkan jerawiwi im mij eo an Adam ededelok naj kar kamakiti. Inem, menin aikwij eo, Anij ededelok an naj kar jojen kobban “lũpin ememej ko” ilo an kejeblaktok ro remij ñan mour.​—Jon 5:28.

11. (a) Ewi wãwen ad jelã bwe Anij emaroñ bar kõmmanman an ko an armij rej mij? (b) Ibben kain enbwin rot eo ro rej jerkakbiji ñan lal naj lelok ñan ir?

¹¹ Melelen menin bar kõmanman an armij ro. Ejjab maroñ ke? Jab, bwe Sam 104:29, 30 (NW) ej kamol ñan kij bwe Anij emaroñ kõmman eindein: “Elañe kwoj bõk jitõb eo air jen ir, renaj jemlok, im rej jeblak im etal ñan bũñalñal eo air. Elañe kwoj jilkinlok jitõb eo an, inem emwij kõmanman ir.” Ke ro rej jerkakbiji ejja naj armij ro wõt mokta jen air kar mij, rejamin aikwij in bõk ejja enbwin ko wõt kar mokta. Einwõt ibben ro rej jerkakbiji ñan lañ, Anij enaj lelok ñan ir juõn enbwin ekkar ñan an kamõnõnõik e. Ejelok bere enbwin ko rekãl renaj lukkun ejmour im einlok wõt kar enbwin eo air mokta bwe jitenburu ro air ren kile ir.

12. Ñããt eo jerkakbiji eo ñan lal enaj walok?

¹² Ñããt eo jerkakbiji eo ilal enaj walok? Martha ear ba kin leo jein im jatin ear mij, Lazarus: “I jela e naj bar jerkak ilo jerkakbiji eo ilo ran eliktata.” (Jon 11:24) Ewi wãwen an kar jelã menin? Jerkakbiji kar juõn unin konono eo ear wõr iakwelãl ie ilo ran ko an, kinke Parisi ro rar tõmak ie ak Saddusi ro rar jab. (Jerbal 23:8) Ak, Martha emaroñ kar jelã kin Christian ri kennan ro jinoin ro rar kejatdikdik ilo jerkakbiji. (Hibru 11:35) Bareinwõt, e emaroñ kar melele jen Daniel 12:13 bwe jerkakbiji enaj walok ilo ran eo eliktata. E emaroñ kar bar katak menin jen Jesus make. (Jon 6:39) Bwe “ran eo eliktata” ej walok ilo ejja ien eo wõt ibben Tausan Yiõ in Iroij eo an Christ. (Revelesõn 20:6) Kalmenlokjen kin limotak eo ilo “rainin“ ñe men laplapin ej ijino!​—Keidi Luk 24:41.

Wõn Eo Ej Jeblaktok?

13. Ta vision eo kin jerkakbiji emwij je ilo Revelesõn 20:12-14?

¹³ Ilo Revelesõn 20:12-14 ej jeje vision eo an John kin jerkakbiji eo ilal: “Im I ar lo ro remij, ro relap im ro redrik rej jutõk iman tron eo; im ar kebellok buk ko: im ar kebellok bar juõn buk, eo ej buk in mour: im ar ekajet ro remij jen men ko emwij jeje ilo buk ko, ekar ñõn jerbal ko air. Im lometo e ar lelok ro remij ro ilo e, im Mij im Hedis r’ar lelok ro remij ro ilo ir, im ar ekajet ir, kaju iair, ekar ñõn jerbal ko air. Im ar jolok Mij im Hedis na ilo lomalo in kijeek. Eñin mij ken ka ruo, lomalo in kijeek.”

14. Wõn ro naj ibiljin ro rej jerkakbiji?

¹⁴ Jerkakbiji eo enaj koba armij ro “relap im ro redrik,” buñbuñ im jab buñbuñ jimor ro rar mour im mij. Meñe ajiri ro renaj koba ilo jerkakbiji eo! (Jeremiah 31:15, 16) Ilo Jerbal 24:15, bar juõn tibdik in men eaorõk ej kwalok: “Bwe ro remõn im ro renana re naj jerkakbiji.” Buñbuñ ibiljin ro “rewãnik” naj maan im kõrã ro etto rar tiljek, einwõt Abel, Enoch, Noah, Abraham, Sarah, im Rahab. (Hibru 11:1-40) Kalmenlok jen kin ad maroñ konono ibben rein im bõk tibdik in menin kamol ko kin mejed kin wãwen ko ilo Bible etto! “Ro rewãnik” enaj bar koba tausan ro rar mij ilo air mijak Anij ilo ien kein ran kein im ro kejatdikdik eo air ejjab ñan lañ. Ewõr ke ro uan family eo am ak juõn eo jitenburu emaroñ bed ibiljin rein? Ej menin kainemõn in jela bwe kwo maroñ bar lo ir! Ak, wõn armij ro “rejjab wãnik” im renaj bar jeblaktok? Ir ekoba million, bõlen billion, ro rar mij im ear jab wõr air ien iten katak im jerbale mol eo ilo Bible.

15. Ta melelen bwe ro rej jeblaktok naj “ekajete ir jen men ko emwij jei ilo buk limlim ko”?

¹⁵ Rein rej jeblaktok ewi wãwen naj “ekajet ir jen men ko kar jeje ilo buk limlim ko ekar ñõn jerbal ko air”? Buk limlim kein ejjab jeje in jerbal ko air ilo ien ko remotlok; ke rar mij, emwij air rõlok jen jerawiwi ko rar kõmmani ilo ien mour ko air. (Rom 6:7, 23) Bõtab, armij ro rej jerkakbiji tok renaj bed wõt iomin jerawiwi eo an Adam. Inem, ej aikwij, bwe buk limlim kein renaj kwalok nanin jiroñ ko rokwojarjar aolep rej aikwij lori ñan bõk tokjen jen katok eo an Jesus Christ. Ke malkan eo eliktata in jerawiwi eo an Adam enaj jako, ‘mij enaj jako’ ilo likio in melele in. Ilo jemlokin tausan yiõ ko, Anij “en men otemjej ilo otemjej.” (1 Korint 15:28) Ejako an naj armij aikwij an juõn Pris Elap ak Ri Binmour ñan bõk konan. Armij otemjej renaj bar jeblak ñan wãppen eo Adam ear lañliñ kake ilo jinointata.

Juõn Jerkakbiji Ilo Lajrak

16. (a) Etke ej menin kammanwa ñan tõmak bwe jerkakbiji eo enaj ilo juõn wãwen lajrak? (b) Wõn ro naj ibiljin ro moktata rej jeblaktok jen mij?

¹⁶ Ke jerkakbiji eo ñan lañ ej ilo lajrak, “armij otemjej rej jepkãlõn,” im ealikar bwe jerkakbiji eo ñan lal ejamin kõmmane juõn aebokbok kin jeded in armij ro. (1 Korint 15:23) Jemelele, bwe ro rekãl im rej jerkakbiji renaj aikwij lale ir. (Keidi Luk 8:55.) Renaj aikwij menin aikwij ko an kaniek im​—men eo elaplok an aorõk—jibañ eo ilo jitõb ñan bõk jelãlokjen eo kin Jehovah Anij im Jesus Christ ñan mour indio. (Jon 17:3) Elañe aolep ren kar jeblaktok ñan mour ilo juõn wõt ien, ejamin kar maroñ bwe ñan kejbãrok ir. Ej menin kammanwa ñan lemnak bwe jerkakbiji eo enaj walok im wõnmanlok wõt. Christian ro retiljek ro rar mij moktalok wõt jidik jen jemlokin jukjuk im bed eo an Satan renaj ibiljin ro moktata renaj jerkakbiji. Jemaroñ bareinwõt kõtmene kin juõn jerkakbiji eo imanlok ñan maan ro rar tiljek etto ro renaj jerbal einwõt “iroij.”​—Sam 45:16.

17. Ta jet ian menin konono ko kin jerkakbiji ko Bible ej ikõñ kaki, im etke Chritian ro rej aikwij jab lukkun lemnak kin men rot kein?

¹⁷ Mekarta, jej aikwij jab bed ilo kain wãwen kein ejañin lukkun wõr menin kamoli. Ilo elõñ menin konono ko Bible ejañin letok juõn uak. Ejjab spell e ilo tibdikin kin wãwen, ñããt, ak ia eo jerkakbiji eo an kajjojo armij enaj walok ie. Ejjab jiroñ kij kin wãwen an ro rej jeblaktok naj lelok imweir, najidik ir, im kanuknuk ir. Im jemaroñ ke ba ilo ad tõmak kin wãwen an naj Jehovah jerbale menin konono kein einwõt kõkajiriri im kejbãrok ajiri ro rej jerkakbijitok ak wãwen an naj kõmmane jet wãwen ko emaroñ koba ro jerad im jitenburu ro ad. Emol, kar baj eindein wõt bwe jen bwilõñ kin wãwen rot kein; ak ejamin menin meletlet ñan jolok ien ñan kajeoñ uak kajitõk kein me ilo tõre in jejjab maroñ uaki. Men eo jej kalimjeke ej aikwij jerbal eo ad ñan Jehovah im bõk mour indio. Christian ri kabit ro rej likit kejatdikdik eo air ilo juõn jerkakbiji aibujuij ilañ. (2 Piter 1:10, 11) “Sip ro jet” kejatdikdik eo air ñan juõn jolet eo ej indio ilo lal in Ailiñ eo an Anij. (Jon 10:16; Matu 25:33, 34) Ak kin elõñ tibdik ko kin jerkakbiji eo ejelok jelã kake, jej baj liki wõt Jehovah. Mõnõnõ eo ad ñan ilju eo ej itok ej bed ilo pein Eo emaroñ ‘kamat ad kõnan ñan men otemjej remour.’​—Sam 145:16; Jeremiah 17:7.

18. (a) Ta anjo eo Paul ej kwalok kake? (b) Etke jej liki kejatdikdik eo kin jerkakbiji?

¹⁸ Paul ej kejemlok iakwelel eo an ilo an ba: “A kamolol Anij, eo Ej letok ñan kij anjo kin ar Iroij Jisõs Kraist!” (1 Korint 15:57) Aet, anjo ej win ion mij eo ikijen Adam kin katok in binmour eo Jisõs Kraist, ri kabit ro im “sip ro jet” jimor rej bõk konair ilo anjo in. Bwebõta, “sip ro jet” rej mour rainin ewõr ibbeir juõn kejatdikdik eo ejejuan ñan ebeben in. Einwõt mõttan juõn “jar elap” ej lõñlok wõt, remaroñ ellã im mour jen “eñtan eo elap” ej itok im rejamin ion mij ilo enbwin! (Revelesõn 7:9, 14) Bõtab, meñe ro rej mij kin “ien im men in walok rej itok” ak ilo pein ro rej jutak kin Satan remaroñ liki ilo kejatdikdik eo kin jerkakbiji.​—Ekklisiastis 9:11.

19. Ta nanin kõketak eo Christian ro otemjej rainin rej aikwij bõk ñan burueir?

¹⁹ Kin menin, jej kijoror in kõttar ran aibujuij in ñe enaj ejelok mij. Liki eo ad ejjab makitkit ilo kalimur eo an Jehovah kin jerkakbiji eo ej letok ñan kij juõn lemnak eo emol kin wãwen men kein. Jabdewõt men eo enaj walok ñan kij ilo mour in​—meñe jej aikwij mij​—ejelok jabdewõt men emaroñ kote kij jen jinekjej eo Jehovah ear kalimur kake. Eindein, nanin kõketak eo eliktata an Paul ñan Ri Korint rainin joñan an jejjet wõt kar ruo tausan yiõ ko remotlok: “Inem ro jãtiõ, kom jitenburu, en rim buruemi, im kibria, im en eor tokjemi ien otemjej ilo jerbal an Iroij, bwe komij jela bwe ami jerbal e jab jekron ilo Iroij.”​—1 Korint 15:58.

Kwo Maroñ Ke Kemlele?

◻ Ewi wãwen an kar Paul uak kajitõk eo kin ta enbwin ko ri kabit ro renaj bõke ñe rej jerkakbiji?

◻ Ewi wãwen im ñããt eo eliktata mij enaj jako?

◻ Wõn ro renaj koba ilo jerkakbiji eo ñan lal?

◻ Ta eo ej aikwij wãwen lemnak eo ad ikijen wãwen ko Bible ej ikõñ kaki?

[Pija eo ilo peij 26]

Juõn ine “ej mij” kin juõn oktak elap ej bed ie

[Pija ko ilo peij 29]

Ri tõmak maan im kõrã ro etto, einwõt Noah, Abraham, Sarah, im Rahab, renaj ibiljin ro rej jerkakbiji

[Pija eo ilo peij 30]

Jerkakbiji eo enaj juõn ien lañliñ elap!