Emwij Ke Am Kõmmane Mol Eo Bwe En Am Make?

“A komin kejakilkil kom ilo kõkãle ami lolãtãt, bwe komin melejoñ ta ankil an Anij emõn im kabuñburuen im wãppen.”​—DRI ROM 12:2.

1, 2. Etke ejjab bidodo ñan juõn Christian eo emol rainin?

ÑAN jutak einwõt juõn Christian emol ilo ran kein eliktata​—ien kein “renana”⁠—ejjab juõn men ebidodo. (2 Timote 3:​1) Mol eo in bwe ñan anõk joñok eo an Christ, juõn ej aikwij anjo ion lal in. (1 Jon 5:4) Kememej ta eo Jesus ear ba kake kin ial eo an Christian: “Komin dreloñ iloan kejem erãniñ; bwe erbõkbõk kejem, im edrilep ial eo ej tellok ñõn mij, im elõñ ro rej dreloñ ie; bwe erãniñ kejem, im eairik ial eo ej tellok ñõn mour, im eiet ro rej loe.” Ear bareinwõt ba: “Elañe jabdewõt armij ekõnan itokilokatok, en make karmijete, im kwotak an alal in eñtan ran otemjej im lor wõt iõ.”​—Matu 7:​13, 14; Luke 9:​23, New World Translation.

² Ke emwij an lo ial eo eaidik ñan mour, aitwerõk eo tok juõn an juõn Christian ej ñan bed wõt ion. Etke menin ej juõn aitwerõk? Ej kinke wujleplok eo ad im baptais ej kõmman bwe jen menin kõjjeroro in etao ko an Satan, ak kilen ko renana im nojak. (Dri Epesõs 6:​11) Ej lale mõjno ko ad im bukõt ñan an bõk tokjeir ilo juõn jibadbad ñan kokkure mour in jitõb eo ad. Eokwe ke, ear kajeoñ kokkure Jesus, inem jemaroñ ke kõtmene bwe ejamin kokkure kij?​—Matu 4:​1-​11.

Kilen Etao ko An Satan

3. Ewi wãwen an kar Satan kaddek bere ilo lemnak eo an Eve?

³ Juõn kilen eo Satan ej kajerbale ej ñan kõmman bwe en wõr bere ilo lemnak eo ad. Ej bukõt mõjno ko ilo kein tarinae eo ad ilo jitõb. Ilo jinointata, ear kajerbal kilen in ibben Eve, im kajitõk: “Emol ke Anij e ar ba, Komin jab mõña jen wijki otemjej ilo jikin kallip eo?” (Jenesis 3:1) Einwõt ba, Satan ear ba, ‘Elukkun maroñ ke bwe Anij en kar likit juõn mo eo einwõt in iom? En kar debij ke juõn men eo elap an emõn jen yuk? Eokwe, Anij ejelã bwe ilo ran eo wõt kwoj mõñã jen wijki eo mejem renaj bellok im kwo naj einwõt Anij, kin am jelã emõn im nana!’ Satan ear kaddek juõn ine in bere im kõttar an jul im eddek.​—Jenesis 3:5.

4. Ta bere ko remaroñ jelet jet rainin?

⁴ Ewi wãwen an Satan kajerbal kilen in rainin? Elañe jej kajekdon ad read Bible, katak eo ad, jar ko ad, im jerbal in kwalok nan eo an Christian im kwelok ko, emaroñ bidodo ad lorak ilo bere ko ro jet rej bõkliñtak. Ñan wanjoñok: “Ewi wãwen ad jelã bwe eñin mol eo einwõt an kar Jesus katakin kake?” “Elukkun mol ke bwe ran kein rej ran ko eliktata? Eokwe ke, jej lukkun bed ilo ebeben eo kein ka 21.” “Jej bed ke ilo jinoin Armageddon, ak ej ettolok wõt ke?” Elañe bere rot in rej wanliñtak, ta eo jemaroñ kõmmane ñan joloki?

5, 6. Ta jej aikwij kõmmane elañe ej walok bere ko?

⁵ James ear letok nan in kakabilek eo emõn ke ear je: “A elañe jabrewõt iami ej aikwij meletlet, en kajitõk kin e iben Anij, eo Ej wujlep ñõn armij otemjej, im jab enoik kake, im naj lelok ñõn e. A en kajitõk ilo tõmak im jab berre: bwe eo ej berre ej einwõt no in lometo e makõtkit im limajnono kin kõto. Bwe armij eo en jab lemnok bwe e naj bõk jabrewõt jen iroij; E armij buruen ruo im bororo ilo ial ko an otemjej.”​—Jemes 1:​5-8.

⁶ Inem, ta, eo jej aikwij kõmmane? Jej aikwij “kajitõk wõt ibben Anij” ilo jar ñan liki im melele im leliñtak jibadbad ko ad ilo ad katak ikijen jabdewõt kajitõk ko ak bere ko. Jemaroñ bareinwõt kajitõk ñan bõk jibañ jen ro rekajur ilo tõmak eo, jab bere bwe Jehovah enaj letok ñan kij jurake eo jej aikwiji. James ear bareinwõt ba: “Inem komin kõtãik kom ñõn Anij; a komin jumae devil im e naj ko jen kom. Komin druaklok ñõn Anij, im E naj druakwoj ñõn kom.” Aet, bere ko ad renaj jako ke jej druaklok ñõn Anij ikijen katak im jar.​—Jemes 4:7, 8.

7, 8. Ta jet bedbed in etale ko ñan beek wãwen kabuñ eo Jesus ear katakin kake, im wõn ro rej tõbar wãwen etale kein?

⁷ Ñan wanjoñok, baj lemnak wõt kin kajitõk in: Ewi wãwen ad jelã bwe jej jerbale wãwen kabuñ eo Jesus ear katakin kake? Ñan uak menin, ta menin etale eo jej aikwij lemnak kake? Bible eo ej kwalok bwe Christian ro remol ej aikwij wõr yokwe eo emol ibwiljiir. (Jon 13:34, 35) Rej aikwij kokwojarjar etan Anij, Jehovah. (Aiseia 12:​4, 5; Matu 6:9) Im rej aikwij kejelã kin ãt in.​—Exodus 3:​15; Jon 17:26.

⁸ Bar wãwen eo juõn ñan kile kabuñ eo emol ej kautiej Nan in Anij, Bible eo. Ej book eo ejejuan eo ej kwalok kin Anij im karõk ko an. (Jon 17:17; 2 Timote 3:​16, 17) Bareinwõt, Christian ro remol rej keañ kin Ailiñ in Anij einwõt kejatdikdik eo wõt an armij ñan mour indio ion juõn paradise ilal. (Mark 13:10; Reveles̃õn 21:​1-4) Rej kejebellok ir jen kien ko renana an lal in im wãwen mour eo an etton. (Jon 15:19; Jemes 1:​27; 4:4) Wõn ro rainin rej lukkun tõbar menin etale kein? Mol ko rej kalikar bwe ewõr wõt juõn uak​—Ri Kennan ro an Jehovah.

Ta Elañe Bere ko Rej Bed wõt?

9, 10. Ta eo jemaroñ kõmmane ñan ellã jen bere ko rej bed wõt?

⁹ Ta elañe jej lo kij make bwe jej bed wõt ilo ad bere. Ta eo jej aikwij kõmmane? Ri meletlet eo King Solomon ej letok uak eo: “Nejiõ, elañe kwo kõnan bõk nan ko aõ, im drebij kien ko aõ na ibõm; im ein drein kwon kajirlok lojiliñõm ñõn meletlet, im kabukot jelalokjen kin buruõm; aet, elañe kwo naj kir ñõn maroñ in kili, im koutiej ainikiõm ñõn jelalokjen; elañe kwo naj bukot e einwõt silver, im kabukot e einwõt mweiuk ko retino, inem kwo naj meletlet kake mijõk Jeova, im lo jelalokjen kin Anij.”​—Jabõn Kennan 2:​1-5.

¹⁰ Menin ejjab juõn lemnak eo ekabwilõñlõñ ke? Elañe jej mõnõnõ in kanuij lale meletlet eo an Anij, jenaj “lo jelalokjen kin Anij.” Aet, jelalokjen eo kin Iroij Kajur Bõtata eo ijoko otemjelok jej maroñ tõbare elañe jej mõnõnõ in bõk im kaorõk nan ko an. Melelen menin oktaklok nan Jehovah ilo jar im ikijen ad katak. Mweiuk ko rittino in Nan eo an emaroñ jolok jabdewõt bere ko im jibañ kij lo meram in mol.

11. Ewi wãwen bere ear jelet ri karejar eo an Elisha?

¹¹ Juõn wanjoñok eo ealikar kin wãwen jar ear jibañ juõn ri karejaran Anij eo ear mijak im bere jej lo ilo 2 Kiñ 6:​11-​18. Leo ri karejaran Elisha ear jabwe an melele ilo jitõb. Ear jab melele bwe jar in tarinae ko jen lañ rar bed ijo ñan jurake ri kanan eo an Anij, eo jar in tarinae eo an Ri Syria ro rar kabole. Kin an mijak ri karejar eo ear lamõj: “Yok, aõ karo! je naj it?” Ewi wãwen an kar Elisha uak? “Kwon jab mijõk; bwe ro rej rie kij relõn jen ro rej rie ir.” Ak ewi wãwen an ri karejar eo tõmak? E ar jab maroñ lo jar in tarinae ko jen lañ.

12. (a) Ewi wãwen bere ko an ri karejar eo rar lo mejelãir? (b) Ewi wãwen ad maroñ lo mejelan bere ko emaroñ wõr ibbed?

¹² “Ilaisha e ar jar: ‘Jeova, ij akwelap, Kwon kabellok mejen lein, bwe en lolokjen.’ Jehovah ear mõkaj im kabellok mejen ri karejar eo, inem ear lolokjen; im, lo! tol ko robrak kin ors ko im jariot kijeek ko rej kabol Ilaisha.” Ilo wãwen eo Jehovah ear kõmman bwe ri karejar eo en lo jar in tarinae ko an lañ im rar kejbãrok Elisha. Bõtab, jej aikwij jab kõtmene kin ejja kain jibañ rot in ekwojarjar rainin. Kememej, bwe ri karejar eo an ri kanan eo ear jab dedelok an katak Bible ñan kakajurlok tõmak eo an. Ewõr ibbed Bible eo. Elañe ej emõn ad kajerbale, tõmak eo ad ejja ilo wãwen in lok wõt emaroñ kajurlok. Ñan wanjoñok, jemaroñ etale elõñ bwebwenato ko rej kwalok kin Jehovah ilo ekajet eo an ilañ. Bwebwenato kein rej kalikar bwe ejelok jikin ñan bere bwe Jehovah ewõr juõn an dolul ilañ eo ej jurake ro ri karejaran ilo jerbal in katak eo ibelakin lal rainin.​—Aiseia 6:​1-4; Ezekiel 1:​4-​28, NW; Daniel 7:​9, 10, NW; Reveles̃õn 4:​1-​11; 14:​6, 7.

Ekkõl kin Etao ko An Satan!

13. Ikijen ta ko Satan ej kajeoñ in kamõjnoik ad debij wõt mol eo?

¹³ Ta jet ian wãwen ko jet an Satan ñan kamõjnoik mour in jitõb eo ad im ad debij wõt tõmak eo? Juõn iair ej mour in lũñ, ilo wãwen ko otemjej in menin kalikar ko reinjuõn jen don. Ilo lal in rainin eabañ kin mantin mour in jiroñ im likao, juõn manit ejõkkar rej naetan jab tiljek ilo belele ak juõn babu ibben don eo ñan juõn wõt buñ im mour in lejen ej walok ran otemjej ñan kamõnõik ir make jekdon ewi joñan wõnãn. Movie ko, TV, im video ko rej kalaplok joñok in mour rot in. Pija in kareelel ñan mour in jiroñ im likao rej jededlok ilo jikin news eo, elaptata ilo Internet. Kabo ej kõttar ro rej lale pija rot kein im ewõr air itoklimo ie.​—1 Dri Tessalonika 4:​3-5; Jemes 1:​13-​15.

14. Etke jet Christian rar wõtlok im jorrãn jen etao ko an Satan?

¹⁴ Jet Christian rar kõtlok ir ñan kõnan ko air im rar katton lemnak ko air im burueir ilo air aluij pija in mour in lũñ. Rar kõtlok ir make ñan air wõtlok ñan loan aujid in kabo ko an Satan. Kõmman eindein ej tellok ñan rup in wa eo ilo jitõb. Armij rot in rar likjap in bed wõt im “junmare ilo niñniñ.” Rar jab oktak im “ritto ilo kajur in lolãtãt.” (1 Corinthians 14:​20, NW) Kajjojo yiõ, elõñ thousand armij rej eñtan jen tokjen ko kin air jab eddeb wõt ñan nan in kaiñi ko im kien ko an Nan in Anij. Rar kajekdon air kõnak im likit wõt “aolep ken tarinae an Anij.”​—Dri Epesõs 6:​10-​13; Dri Kolosse 3:​5-​10; 1 Timote 1:​18, 19.

Kaorõk Men eo Ewõr Ibbed

15. Etke jet remaroñ lo bwe ebin ñan kamolol kin jolet eo air ilo jitõb?

¹⁵ “Im kom naj jela mol, im mol e naj kõmõnmõn anemkwojami,” Jesus ear ba. (Jon 8:​32) Elõñ wõt ian Ri Kennan ro rar aikwij ilok jen style in mour eo air mokta im kabuñ ko rekin kobalok ie. Kin menin, emaroñ laplok air kamolol kin anemkwoj eo mol eo ej bõktok. Ilo wãwen eo juõn, jet jodikdik ro jemeir im jineir rar kakajiririk ir ro rej bed ilo mol eo remaroñ lo an bin ñan kamolol kin jolet eo air ilo jitõb. Rar jañin mõttan juõn kabuñ wan ak juõn mõttan lal in ibben kareelel eo ñan kabukõt kamõnõnõ, añũri unokan kadõk, im mour in lũñ. Einwõt juõn tokjen menin, remaroñ likjap in lo kijñeñe eo ikõtan paradise eo ad ilo jitõb im lal in enana an Satan. Jet remaroñ bo ñan edjoñe poison eo an lal in ñan lale ta eo rar likjap jene!​—1 Jon 2:​15-​17; Reveles̃õn 18:​1-5.

16. (a) Ta kajitõk ko jemaroñ kajitõkin kij make kaki? (b) Ta eo rej katakin kij kake im kõketak kij ñan kõmmane?

¹⁶ Jej lukkun aikwiji ke ad tile addin peid ñan ad jelã kin metak im eñtan? Jejjab maroñ katak jen men ko rewan ro jet rar ioni ke? Jej aikwij ke oktaklok ñan “birikõt eo” an lal in ñan lale elañe ewõr men eo jaar likjap jene? (2 Piter 2:​20-​22) Peter ear kakememej Christian ro ilo ebeben eo kein kajuõn ro rar moktalok juõn mõttan lal eo an Satan: “Bwe emõn ran ko remotlok ren bwe kin ami kõmõn kõnan an ro dri pegan, im etetal ibeir ilo lũñ, mõm ko renana, irak wain, eep ko, karek ko, im kabuñ ñan ekjõp ko, re men in jõjoik.” Emol, jejjab aikwij ione “ruñlok lallok eo ebejbej ej kejebãbwe ñan mour etton” eo an lal in ñan lo joñan an maroñ ettã mour. (1 Piter 4:​3, 4) Ilo wãwen eo juõn, rej katakin kij kin kien erreo ko reutiej an Jehovah ilo Kingdom Hall ko ad, ko rej tuiolaplap in jelãlokjen eo ilo Bible. Im rej kõketak kij ñan ad kajerbal maroñ in kõmmanwa eo ñan kamol kij make bwe ebed mol eo ibbed im kin menin kõmman bwe mol eo en ad make.​—Joshua 1:8; Dri Rom 12:​1, 2; 2 Timote 3:​14-​17.

Ãt eo Etad Ejjab Baj Juõn Kakõlle Wõt

17. Ewi wãwen ad maroñ Ri Kennan ro an Jehovah rekeie?

¹⁷ Elañe jej kõmman bwe mol eo en ad make, jenaj bukõt ad jake ibben ro jet ilo jabdewõt ien emõn. Ejjab melelen menin bwe jenaj kajeoñ jibed ion ro jet ro rej kwalok air jab itoklimo. (Matu 7:6) Ak, jenaj jamin mijak in kwalok kij make einwõt Ri Kennan ro an Jehovah. Elañe juõn armij ej kwalok juõn itoklimo jidik ilo an bõkliñtak juõn kajitõk ilo ettã ak bõk juõn book in Bible, jenaj bojak in jake kejatdikdik eo ad. Bwebõta, menin ej kwalok bwe ien otemjej ewõr jet book ak magazine in Bible ibbed jekdon ia eo jemaroñ bed ie​—ilo mweo, ilo jikin jerbal, ilo school, ilo imõn wia, ak ilo jikin ikkure ko.​—1 Piter 3:​15.

18. Ewi wãwen ad maroñ kalikar kij make einwõt Christian emol ad kajur ilo mour eo ad?

¹⁸ Ñe ej lukkun alikar ad kwalok kij make einwõt Christian ro, jej kakajurlok jojomar eo ad nae tarinae ko rekauwatata an Satan. Elañe kemem ak Christmas party ak kawinin ilo juõn office, ri jerbal ro mõttad ekkã air naj ba, “Jab inebata kake e. E ej juõn ian Ri Kennan ro an Jehovah.” Kin ejja un in wõt, armij ro bõlen renaj itok wõt in kwalok kejak ko rejõkkar ilo ad bed. Kin menin, ad kejelã kin jutak in Christian eo ad ej juõn tokjen eo elap ilo mour eo ad, einwõt an kar ri jilek Peter kalikare: “Im wõn eo e naj kokkure kom, elañe komij kijejeto ilo men ko remõn? A elañe kom iñtan kin kwojarjar, kom mõnõnõ wõt.”​—1 Piter 3:​13, 14.

19. Ewi wãwen ad jelã bwe jej toktoklok ilo ran ko eliktata?

¹⁹ Bar juõn tokjen kõmmane bwe mol eo en ad make ej bwe jenaj liki bwe men kein emol rej ran ko eliktata in jukjuk im bed in. Jenaj jelã bwe elõñ wõt ian kanan ko ilo Bible rej tõbar tukajuriir ilo ien kein ad.a Kakkõl eo an Paul ej bwe “ilo ran ko eliktata, ien ko renana re naj waloktok” menin ej kamol ikijen men ko rekamijak rar walok ilo ebeben eo lok. (2 Timote 3:​1-5; Mark 13:​3-​37) Juõn ennan ilo newspaper ilo ien ko kiõ kin ebeben eo kein ka 20 title eo an kar “Naj Kememeje einwõt Ebeben in Barbarism.” (armij in etto) Ennan eo ear kwalok: “1999 ear oktak im ej make wõt yiõ in uror ilo jimettan eo kein karuo in ebeben eo ej make wõt lap uror ie.”

20. Kiõ eien ñan kõmman ta?

²⁰ Kiõ ejjab ien ebwerer. Kajerammõn eo an Jehovah ej alikar an mol ilo jerbal in katakin eo elaptata ilo Bible eo ejañin kar kõmman ilo aolepen lal einwõt juõn menin kennan ñan ailiñ otemjej. (Matu 24:14) Kõmman bwe mol eo en am make, im jake ibben ro jet. Ilju eo am ej ñan indio ej atartar ion ta eo kwoj kõmmane kiõ. Totoik pã ejamin tellokin bõk kajerammõn eo an Jehovah. (Luk 9:​62) Ak, eien ñan “rim buruemi, im kibria, im en eor tokjemi ien otemjej ilo jerbal an Iroij, bwe komij jela bwe ami jerbal e jab jekron ilo Iroij.”​—1 Dri Korint 15:⁠58.

[Kamelele eo itulal]

Kwoj Kememej Ke?

• Ewi wãwen ad maroñ jolok bere ko?

• Ta eo jemaroñ katak jen joñok eo an ri karejar eo an Elisha?

• Nae ta kabo ko in mour erreo ej aikwij emakijkij ad waji?

• Etke jej aikwij kalikar ad kile kij make einwõt Ri Kennan ro an Jehovah?

[Pija]

Ekkeini katak Bible im jar remaroñ jibañ kij jolok bere

[Pija]

Ri karejar eo an Elisha ear lo mejelan bere ko an ikijen juõn vision

[Pija]

Rej katakin kij kien erreo ko reutiej an Jehovah ilo Kingdom Hall ko einwõt in ilo Benin