Bokin Jipañ ko ñan Kein Katak eo Ad ilo kweilo̦k eo, Jerbal eo Ad im Wãween Ad Mour
M̦aaj 6-12
KATAK KO RAORÕK JÃN NAANIN ANIJ | JEREMAIA 1-4
‘Ij Pãd Ippam̦ ñan Lo̦mo̦o̦ren Eok’
Lale im Ekkõl Ãinwõt Kar Jeremaia
4 Emaroñ kar 25 an Jeremaia iiõ ke Jeova ear lel̦o̦k jerbal in ñan e ãinwõt juon rũkeeañ. (Jer. 1:1, 2) Bõtab ear l̦õmn̦ak bwe ej dik wõt im ejaje kilen kõnono ippãn rũtto ro, ro me remãlõtlõt im utiej. (Jer. 1:6) Ear kwal̦o̦k naan in ekajet ko rekajoor im kajju ñan bũrij ro, rũkanaan ro reriab, im kiiñ ro. Bareinwõt ear aikuj kwal̦o̦k naan kein ñan ro im rar l̦oor wãween mour eo an ro jet im rar “oktak jãn m̦ool aolep iien.” (Jer. 6:13; 8:5, 6) Tampel̦ eo eaiboojoj Kiiñ Solomon ear kalõke, eo im kar jikin kabuñ ium̦win enañin 400 iiõ ko, ear buñ im jorrããn. Naaj ko̦kkure Jerusalem im Juda, im armej ro ie renaaj kajipo̦kweik er. Ennaan eo kar lel̦o̦k ñan Jeremaia bwe en keeañ kake ear lukkuun aorõk!
Kwõj Pokake Wõn—Anij Ke Ak Armej?
18 Anij ear jiroñ rũkanaan Jeremaia: “Kwõn jab mijak er, kõnke inaaj pãd ippam̦ im kõjparok eok.” (Jeremaia 1:8) Ewi wãween an Jeova kanemkwõj kõj jãn matõrtõr rainin? Emaroñ kããlõt juon riekajet em̦m̦an ãinwõt Gameliel. Ak emaroñ kõm̦m̦an bwe juon ruutiej ekõmmaanwa en bõk jerbal eo an juon ruutiej elãj im nana. Bõtab, jet iien, Jeova emaroñ kõtl̦o̦k bwe armej ro an ren pãdwõt ilo matõrtõr m̦ae jem̦l̦o̦kin. (2 Timote 3:12) El̦aññe Anij ej kõtl̦o̦k bwe jen bõk matõrtõr, enaaj kõkajoor kõj bwe jen kijenmej wõt. (1 Korint 10:13) Im jekdo̦o̦n ta mãlejjoñ eo Anij ej kõtl̦o̦k, enaaj ejjel̦o̦k ad pere kõn ta eo enaaj wal̦o̦k ilo jem̦l̦o̦kin: Ro rej tarin̦aeik armej ro an Anij rej tarin̦aeik Anij, im ro rej kõjdate Anij rejãmin lo tõprak.
jr-E 88 pãr. 14-15
‘Inaaj Kakkijeik Ro Rem̦õk’
KWÕMAROÑ KE KÕKAJOOR RO REM̦ÕK?
14 Eaorõk bwe jen jel̦ã wãween an kar Jeremaia bõk kõketak im wãween an kar kõketak ro jet me rar ‘m̦õk.’ (Jer. 31:25, UBS) Rũkanaan in ear bõk kõketak im kaenõm̦m̦an jãn Jeova. L̦õmn̦ak m̦õk kõn eñjake eo am̦ el̦aññe Jeova ear ba naan kein ñan eok: “Im Ña, lale m̦õk, rainin Iar kõm̦m̦an eok bwe kwõn ãinwõt juon jikin kweilo̦k epen . . . renaaj tarin̦aeik eok, ak reban anjo̦ ioom̦, bwe Ña Ij ippam̦ ñan lo̦mo̦o̦ren eok,” Jeova ej ba. Ejjel̦o̦k pere naan kein renaaj kar kõkajoor eok. (Jer. 1:18, 19) Eñin unin Jeremaia ekar kõkkar kõn Jeova ãinwõt ‘an kajoor im em̦ epen im an jikin tilekek ilo raan in jorrããn.’—Jer. 16:19.
15 Elukkuun aorõk an kar Jeova ba ñan Jeremaia: “Ña ij ippam̦.” Kwõj ke loe ilo naan kein kõn ta eo kwõmaroñ kõm̦m̦ane ñe ewõr juon eo kwõjel̦ã kajjien im ej aikuj naanin kõketak im kaenõm̦m̦an? Jemaroñ kile el̦aññe juon iaan rũttõmak ro m̦õttad ak bõlen juon nukũd ej aikuj jipañ; ak enaaj em̦m̦anl̦o̦k el̦aññe jenaaj em̦m̦akũt im jipañe. Men eo ekkã an em̦m̦an ñan kõm̦m̦ane ej pãd ippãer ãinwõt an kar Anij kõm̦m̦ane ñan Jeremaia. Innem bõlen tokãlik lel̦o̦k naanin kõketak, ak en jab lukkuun lõñ men ko kwõj ba. Em̦m̦an el̦aññe naan ko reiet, im rej naan ko rekkar im renaaj kõketak im kõkajoor eo em̦õjn̦o̦. Naan ko kwõj ba rej aikuj lukkuun em̦m̦an im en bar lukkuun em̦m̦an wãween am̦ kwal̦o̦ki. Kõjerbal naan ko repidodo mel̦el̦e kaki im rej kaalikkar ke kwõj itoklimo, kea, im yokwe er. Naan rot kein renaaj lukkuun tõpar bũrueer.—Riit Jabõn Kõnnaan 25:11.
Kal̦apl̦o̦k Am̦ Mel̦el̦e
Katak Ko Rel̦l̦ap Jãn Bokin Jeremaia
2:13, 18. RiIsrael ro rejjab tiljek rar kõm̦m̦an ruo men ko renana. Rar el̦l̦o̦k jãn Jeova, eo ear wũnjãn kajeraam̦m̦an, tõl, im kõjparok eo aer. Ilo naanin kõkkar rar kũbwiji aebõjlal̦ eo aer make ilo aer pukot jipañ jãn aelõñ in Ijipt im Assiria. Ilo raan kein ad, ñe jej el̦l̦o̦k jãn Anij im atartar ioon l̦õmn̦ak ko an armej im kien ko an lal̦, ej ãinl̦o̦k wõt ad kõm̦m̦an bwe aebõjlal̦ ko “rettal im dãn eban pãd ie” ren bõk jikin “unin dãn enno̦.”
Katak Ko Rel̦l̦ap Jãn Bokin Jeremaia
4:10; 15:18—Ilo wãween et eo Jeova ear m̦on̦e armej ro an rejum̦ae? Ilo raan ko an Jeremaia, ‘rũkanaan ro rar kwal̦o̦k riab ko.’ (Jeremaia 5:31; 20:6; 23:16, 17, 25-28, 32) Jeova ear jab kabõjrak er jãn aer kwal̦o̦k naan ko reriab.
M̦aaj 13-19
KATAK KO RAORÕK JÃN NAANIN ANIJ | JEREMAIA 5-7
“Ear Bõjrak Aer Kõm̦anm̦an Ankilaan Anij”
w88-E 4/1 11-12 pãr. 7-8
Jeremaia—Rũkanaan eo An Anij me rar Jab M̦õn̦õn̦õ Kake kõn an kar Kwal̦o̦k Naanin Ekajet eo an Anij
7 Jeova ear kakkõl im ba: “Renaaj tarin̦aeik eok, ak reban anjo̦ ioom̦.” (Jeremaia 1:19) Kiiõ etke RiJu ro im rũtõl ro aer rekõn̦aan tarin̦aeik ak m̦ane rũkanaan in? Kõnke ennaan eo ear kwal̦o̦k ear n̦ae men ko rar remminene in kõm̦m̦ani im wãween aer kabuñ. Meñe ãindein ak Jeremaia ear kajju ilo an ba: “Lo naanin Jeova ej ñan er ãinwõt men in kajjirere, rejjab m̦õn̦õn̦õ kake. Bwe jãn ro reddik ñan ro rerũtto, er otemjej el̦ap aer an̦okn̦ak, im jãn rũkanaan ñan bũrij [ro me ren kar aikuj lale im kõjparok armej ro jãn mour ettoon im katakin er ñan kaorõk katak ko an Anij], rej aolep kõm̦m̦an riab.”—Jeremaia 6:10, 13.
8 Em̦ool bwe rar tõl aelõñ eo ilo aer kõm̦m̦an menin katok ko. Rar kõm̦m̦ani men ko rej aikuj kõm̦m̦ani ikijjeen kabuñ eo erreo, ak rar jab kõm̦m̦ani men kein jãn bũrueer. El̦ap wõt aer kõm̦m̦ani men kein kõnke rejel̦ã ke rej aikuj kõm̦m̦ani ak ear jab jim̦we m̦wil im kõm̦m̦an ko aer. Bareinwõt rũtõlin kabuñ ro an RiJu ro rar m̦on̦e aelõñ eo im ba ke ewõr aenõm̦m̦an ke rar ba, “Aenõm̦m̦an, aenõm̦m̦an,” ak ejjel̦o̦k aenõm̦m̦an. (Jeremaia 6:14; 8:11) Aet, rar riabe armej ro im ba ke eaenõm̦m̦an im em̦m̦an wõt jem̦jerã eo aer ippãn Anij ak ear jab. Rar l̦õmn̦ak bwe ejjel̦o̦k men en̦ rej aikuj inepata kake bwe rej armej ro an Jeova me ear lo̦mo̦o̦ren er, im rej jokwe ilo jikin in eokkwõjarjar im epãd tampel̦ eo ie. Ak eñin ke bar l̦õmn̦ak eo an Jeova?
w88-E 4/1 12 pãr. 9-10
Jeremaia—Rũkanaan eo An Anij me rar Jab M̦õn̦õn̦õ Kake kõn an kar Kwal̦o̦k Naanin Ekajet eo an Anij
9 Jeova ear kakien Jeremaia bwe en jutak im̦aan mejãn armej ro ilo kõjãmin wõrwõrin tampel̦ eo im kwal̦o̦k ennaan eo An ñan rũkabuñ ro rar itõn del̦o̦ñ. Jeremaia ear aikuj jiroñ er im ba: “Kom̦win jab lõke naanin riab ko rej ba, “Tampel̦ in Jeova, tampel̦ in Jeova, tampel̦ in Jeova men in!” . . . kom̦ij lõke naanin riab ko me reban jipañ.” El̦ap an kar RiJu ro lõke tampel̦ eo aer ak rar jab mour ekkar ñan aer kar aikuj tõmak. Em̦õj aer mel̦o̦kl̦o̦k naanin kakkõl eo an Jeova ke ear ba: “Lañ ej aõ tũroon, im lal̦ ej eran neõ. Innem em̦ rot eo kom̦ naaj maroñ kalõke ñan eõ, ak jikin rot eo kom̦ naaj kõm̦m̦ane bwe in jokwe ie?” Innem Jeova, Irooj Bõtata eo ioon aolepen lal̦ in, eban jokwe ilo tampel̦ eo jekdo̦o̦n ñe ear lukkuun aiboojoj!—Jeremaia 7:1-8; Aiseia 66:1, UBS.
10 Jeremaia ear wõnm̦aanl̦o̦k kõn naanin kakkõl ko an rekajju ke ear ba: ‘Kom̦ij ko̦o̦t, im uror, im l̦õñ, im eriab ami kallim̦ur, im kom̦ij katok ñan Beal ke? Im kom̦ij l̦oor anij ro jet me kom̦ar jab jel̦ã kaki ke?, . . . im kiiõ ba, ‘ejjel̦o̦k uwõta ñan kõm’ meñe kõmij kõm̦m̦ani men in kajjõjõ kein otemjej.’ RiJu rein me Anij ear kããlõt er rar l̦õmn̦ak enaaj kar kõtl̦o̦k aer kõm̦m̦ane jabdewõt m̦anit rekõn̦aan, men eo wõt, ren bõktok kein katok ko aer ñan tampel̦ eo. Bõtab, ñe rar l̦õmn̦ak bwe Jeova ej juon jemãn eo ej anlo̦ke wõt an eo ej make wõt nejin kõm̦m̦ani men ko ekõn̦aan eokwe relukkuun bõd, im enaaj kwal̦o̦k ñan er joñan an bõd l̦õmn̦ak in aer.—Jeremaia 7:9, 10; Exodus 19:5, 6.
jr-E 21 pãr. 12
Karejar “ilo Raan ko Ãliktata”
12 Ilo jinoin an Jihoiakim tõl, Jeova ear jiroñ Jeremaia bwe en etal ñan tampel̦ eo im lukkuun kwal̦o̦k joñan an nana men ko rein rar pãd ilo Juda rar kõm̦m̦ani. Rar l̦õmn̦ak tampel̦ eo an Jeova ewõr an maroñ ñan kõjparok er. Bõtab el̦aññe rar jab jol̦o̦k aer ‘ko̦o̦t, uror, l̦õñ, riab aer kallim̦ur, im katok ñan Beal,’ Jeova enaaj jol̦o̦k tampel̦ eo an. Im enaaj bar jol̦o̦k rũkabuñ ro me retao, ãinwõt an kar jol̦o̦k im̦õn kõppãd eo ilo Shailo ilo tõre ko an Bũrij L̦apl̦ap eo Ilai. Aelõñ in Juda enaaj kar “jeepepl̦o̦k.” (Jer. 7:1-15, 34; 26:1-6) L̦õmn̦ak m̦õk joñan an Jeremaia aikuj kar peran ñan an kwal̦o̦k ennaan in! Emaroñ kar kõm̦m̦ane men in ilo ijo elõñ armej ie, im im̦aan mejãn ro reutiej, rebuñbuñ, im m̦weiie. Ilo raan kein elõñ ro jeid im jatid rej bõk ejja l̦õmn̦ak in wõt bwe rej aikuj lukkuun peran ñan aer maroñ kwal̦o̦k naan ilo̦bwilej im kwal̦o̦k naan ñan ro rem̦weiie im utiej. Ak jemaroñ lõke bwe: Anij enaaj rejetake kõj, ãinwõt an kar kõm̦m̦ane ñan Jeremaia.—Hi. 10:39; 13:6.
Kal̦apl̦o̦k Am̦ Mel̦el̦e
Kwõnaaj Ke Etetal Ippãn Anij?
11 Jej lukkuun kõtl̦o̦k ke bwe Naanin Anij en tõl kõj? Ewõr tokjãn ñan etale kõj make jãn iien ñan iien. L̦õmn̦ak kõn juon eoon me emaroñ jipañ kõj kõm̦m̦ane: “Irooj ej ba ñan ro doon, ‘Kom̦win jutak ilo kãpoonin ial̦ ko im reito reitak im kajjitõk, ewi kar ial̦ ko etto, im ewi ial̦ eo em̦m̦aan tata iaaer. Kom̦win etal ie im kom̦ naaj lo aenõm̦m̦an.’” (Jeremaia 6:16) Naan kein rej kakeememej kõj kõn juon riitoitak eo ej bõjrak jidik ñe ej itok ñan juon ial̦ ruo mõeãñen ñan an kajjitõk kõn naanin kõmel̦el̦e ko. Ilo juon wãween l̦oor jetõb, armej ro rar jum̦ae Jeova ilo Israel rar aikuj kõm̦m̦an ãindein. Rar aikuj bar jepl̦aak ñan “ial̦ ko etto.” “Ial̦ eo em̦m̦an tata” kar ial̦ eo me ro jim̦m̦aer retiljek rar etetal ie, ial̦ eo me aelõñ eo ear jebwãbwe jãne. Ekabũrom̦õjm̦õj bwe, Israel ear jab kõn̦aan l̦oor naanin kakeememej in ej yokwe jãn Jeova. Ejja eoon in wõt ej wõnm̦aanl̦o̦k: “Ak rej ba, ‘Kõm jãmin!’” Ak, ilo raan kein, armej ro an Anij rej em̦m̦akũt ilo juon wãween eoktak ñan naan in kakapilõk rot kein.
w88-E 4/1 13 pãr. 15
Jeremaia—Rũkanaan eo An Anij me rar Jab M̦õn̦õn̦õ Kake kõn an kar Kwal̦o̦k Naanin Ekajet eo an Anij
Juda ear M̦adm̦õd
15 Emaroñ kar ilo iiõ ko 632 M̦okta jãn Kũraij, RiKaldia im RiMidia ro rar anjo̦ ioon Assiria, im Ijipt ear pãd iturõkin Juda im ear jab juon aelõñ elukkuun kajoor ilo tõre in. Bõtab men eo ekauwõtata ej pojak in wal̦o̦k ej itok jãn juon aelõñ ituiõñin Juda. Kõn men in, Jeremaia ear aikuj kwal̦o̦k ñan RiJu rein m̦õttan juon ennaan ekabũrom̦õjm̦õj! “Lo juon jarin armej ej itok jãn ãne eo iõñ. . . rellãj im rejjab tũriam̦o. . . . em̦õj kõllejar n̦ae eok, jiroñ eo nejin Zaion, ãinwõt juon em̦m̦aan eo epojak ñan tarin̦ae.” Babil̦on ear aelõñ eo ekajoortata ilo tõre in. Innem Anij enaaj kõjerbal aelõñ in ñan kajeik armej ro ilo Juda me rar jab kõn̦aan pokake.—Jeremaia 6:22, 23; 25:8, 9.
M̦aaj 20-26
KATAK KO RAORÕK JÃN NAANIN ANIJ | JEREMAIA 8-11
“Armej Renaaj Lo Tõprak El̦aññe Rej Kõtl̦o̦k bwe Jeova en Tõl Er”
it-1-E 555
Kiudi
Joor ko, al̦al̦ ko, im men ko jet rar pãd ilo jikin kallib ko bwe menninmour ko ren mijak in itok ñani, im ear bar wõr “kein kaamijak bao ko lo jikin kallib in kiudi” me ear ejjel̦o̦k aer maroñ ñan kõnono im rũkanaan Jeremaia ear kõkkar kaki ñan aelõñ ko rar kabuñ ñan ekjab.—Jer 10:5.
Wõn Ro Rej Kaiboojoj Anij Rainin?
10 Jekdo̦o̦n el̦aññe kwõj reilõñl̦o̦k ñan lañ ak reito-reitak im lo men in kõm̦anm̦an ko ijin ioon lal̦, menin kam̦ool ko rej kaalikkar bwe ewõr juon Rũkõm̦anm̦an. (Jeremaia 10:12, NW) Jej aikuj errã kõn aolepen bũruod ippãn jetõb ro ilañ me rej lam̦õj: Ekar ñan Kwe, O Irooj im am Anij, bwe kwõn bõk aiboojoj im nõbar im kajoor; bwe kwaar kõm̦anm̦an men ko otemjej, im kõn ankilaam̦ rar pãd im em̦õj kõm̦anm̦ani.” (Revelesõn 4:11) Ak, elõñ jaintiij ro rej likjab in lo menin kam̦ool ko kõn ‘mejãn bũrueer,’ meñe rej bwilõñ kõn jekjekin men ko rej lo kõn mejãer. (Epesõs 1:18) Jemaroñ waanjoñak kake men in ilo wãween in: Ñan m̦õn̦õn̦õ kõn aiboojoj im jekjekin menin kõm̦anm̦an ko im kaarmejjeteik Eo Ear Kõm̦anm̦ani ej juon l̦õmn̦ak ebwebwe im ej ãinwõt ad lo juon pija eaiboojoj im ba ilo ejja iien eo wõt bwe ejjel̦o̦k juon ear jiñaik pija em̦m̦anm̦õn eo. Ejjel̦o̦k bwilõñ bwe rej n̦aetan ro rej kaarmejjeteik Anij ãinwõt ro “ren jab maroñ in uwaak”!
Kwõj Ke Inepata Ippãn Anij?
Wãween ko relukkuun nana rej wal̦o̦k ilo raan kein rej kaalikkar bwe armej rejjab maroñ tõl er make. Kien ko an lal̦ rejjañin de bõktok aenõm̦m̦an im kõm̦m̦an bwe jen jab ekkõl im uwõta kõn jabdewõt men ilo lal̦ in. Bareinwõt, rejjab maroñ kõm̦m̦an bwe jen lo m̦õn̦õn̦õ eo em̦ool. Ejjab men kein wõt, ak em̦õj aer kõm̦m̦an bwe en l̦apl̦o̦k wõt nana ko rej wal̦o̦k. Wãween kein rej kam̦oole naan ko ilo Baibõl̦ ke ej ba “ejjel̦o̦k en̦ emaroñ peek men otemjej ilo mour eo an.” (Jeremaia 10:23, UBS) Anij wõt emaroñ kõm̦m̦an bwe en wõr aenõm̦m̦an ñan indeeo im bwe jen lo m̦õn̦õn̦õ eo em̦ool. E wõt emaroñ kabwe aikuj ko ad el̦aññe enaaj tõl armej ro. Etke? Kõnke eñin kar baj kõn̦aan eo wõt an.—Aiseia 45:18.
Kal̦apl̦o̦k Am̦ Mel̦el̦e
Pãd Epaake Wõt Jeova
16 Jen m̦õn̦õn̦õ im utiej bũruod bwe jej Ri Kõnnaan ro an Jeova. (Jeremaia 9:24) Kõnke jej m̦õn̦õn̦õ im utiej bũruod kõn men in, aolep iien jej kate kõj ñan kõm̦m̦ani pepe ko rem̦m̦an im l̦oor kien ko an Anij. Bõtab, jej aikuj kõjparok bwe jen jab oktak im utiej bũruod ilo ad l̦õmn̦ak bwe el̦apl̦o̦k ad jel̦ã jãn Jeova. Etke? Kõnke men in emaroñ bar kattol̦o̦k kõj jãn Jeova.—Sam 138:6; Rom 12:3, UBS
Katak ko Rel̦l̦ap Jãn Bokin Jeremaia
3:11-22; 11:10-12, 17—Etke Jeremaia ear kobaiki bwij ko joñoul itueañ in aelõñin Israel ilo naanin ekajet ko an meñe Sameria ear buñ ilo 740 B.C.E.? Kõnke jeepepl̦o̦k eo an Jerusalem ilo 607 B.C.E. ear juon naanin ekajet n̦ae aolepen aelõñ in Israel, im jab ñan Juda wõt. (Ezekiel 9:9, 10) Bareinwõt, ãlikin an kar buñ, kõjatdikdik ko an bwij ko joñoul ñan bar jepl̦aak ear jerbal wõt ilo Jerusalem, kõnke ennaan ko an rũkanaan ro an Anij rar wõnm̦aanl̦o̦k im kobaiki Ri Israel ro.
M̦aaj 27–Eprõl̦ 2
KATAK KO RAORÕK JÃN NAANIN ANIJ | JEREMAIA 12-16
“RiIsrael ro rar Mel̦o̦kl̦o̦k Jeova”
jr-E 51 pãr. 17
Kõjparok bwe Bũruom̦ en Jab M̦õn̦e Eok
17 Ilo kar jerbal eo an Jeremaia ear aikuj pokake naanin tõl ko jãn Anij. Ñe en kar kwe Jeremaia, kwõn kar ke pokake jabdewõt naanin tõl naaj kar lewaj ñan eok? Juon iien, Jeova ear ba ñan Jeremaia bwe en bõk juon m̦õttan nuknuk im kañũrñũr e kake. Tokãlik, Anij ear ba en etal ñan Upretis. Ñe kwõnaaj lale ilo juon mab, kwõnaaj loe bwe emaroñ kar 300 m̦ail̦ (500 km) aetokan ial̦ eo an Jeremaia. Im ke ear tõpar ijo, Jeremaia ear aikuj n̦ooje m̦õttan nuknuk eo ilo ro̦ñin juon dekã kileplep im bar etetal l̦o̦k im ro̦o̦l ñan Jerusalem. Innem Anij ear ba en bar ro̦o̦ll̦o̦k ñan Upretis im bõke m̦õttan nuknuk eo. (Riit Jeremaia 13:1-9.) Emaroñ kar 1,200 m̦ail̦ (1,900 km) aetokan aolepen ial̦ eo an Jeremaia. Ro rej etale Baibõl̦ rejjab tõmak kõn joñan aetokan an kar Jeremaia aikuj etetal, ear etetal ium̦win jejjo allõñ. (Ezra 7:9) Bõtab, eñin men eo Anij ear ba im eñin men eo Jeremaia ear kõm̦m̦ane.
jr-E 52 pãr 18
Kõjparok bwe Bũruom̦ en Jab M̦õn̦e Eok
18 Pijaikl̦o̦k m̦õk rũkanaan in an etetall̦o̦k ilo tõl ko ilo Juda im bõlen ear etal l̦o̦k ilo juon ãne jem̦aden im kaiokl̦o̦k Upretis. Unin an kar kõm̦m̦ane men kein ej kõn wõt juon m̦õttan nuknuk ear n̦ooje. Joñan toon an kar jako emaroñ kar kõm̦m̦an an armej ro l̦õmn̦ak kõn ia eo ear pãd ia. Ke ear ro̦o̦l ear jako m̦õttan nuknuk eo ippãn. Innem Anij ear ba en bar ro̦o̦ll̦o̦k im bõke m̦õttan nuknuk eo me kiiõ em̦õj an jorrããn im “ejjel̦o̦k tokjãn ñan jidik.” L̦õmn̦ak m̦õk kõn joñan an naaj kar pidodo an Jeremaia m̦õkaj im l̦õmn̦ak bwe elukkuun l̦ap jerbale men in ear kõm̦m̦ane ak ãinwõt ejjab lo aorõkin. Bõtab kõn an kar kõtl̦o̦k bwe Anij en katakini im tõl e, ear jab l̦õmn̦ak rot in. Ear jab ba jabdewõt ak ear kõm̦m̦ane aolep men ko Anij ear jiroñe bwe en kõm̦m̦ani!
jr-E 52 pãr. 19-20
Kõjparok bwe Bũruom̦ en Jab M̦õn̦e Eok
19 Ro̦o̦ll̦o̦k eo an Jeremaia kein karuo Anij ej kab kõmel̦el̦eiki unin an kar kõm̦m̦ane men in. Bõtab Jeremaia ear aikuj m̦okta kõm̦m̦ani men ko Anij ear jiroñe ñan kõm̦m̦ani bwe en pojak ñan an kwal̦o̦k ennaan in ekajju im kajoor: “Armej rein renana; ro rej abwin eo̦roñ naan ko Aõ, rej etal ilo bũrueer repenawiia, im rej l̦oor anij ro jet bwe ren jerbal ñan er im kabuñ ñan er, renaaj ãinwõt nuknuk in eo ejjel̦o̦k tokjãn ñan jidik.” (Jer. 13:10) Ekabwilõñlõñ wãween an kar Jeova katakin armej ro an! Innem meñe jemaroñ l̦õmn̦ak bwe men eo Jeremaia ear kõm̦m̦ane ear jab lukkuun aorõk ak an kar m̦õn̦õn̦õ in pokake, ear maroñ wõr kun̦aan ilo eddo in eaorõk an Jeova ñan kajjioñ tõpar bũruon armej ro.—Jer. 13:11.
20 Ilo raan kein Anij ejjab kajjitõk ippãn Kũrjin ro bwe ren etetal elõñ bũki m̦ail̦ ko ñan kajjioñ katakin er kõn juon men. Bõtab kããlõt eo am̦ ñan mour ãinwõt juon Kũrjin em̦ool emaroñ kõm̦m̦an an ro jet inepata im kabõd kããlõt in am̦. Remaroñ jab errã ippam̦ kõnke eoktak wãween am̦ nuknuk im tõrejab, pepe eo am̦ kõn jikuul̦ im jel̦ãl̦o̦kjen̦ ko reutiejl̦o̦k, jerbal n̦e am̦, ak pepe eo am̦ ñan bõk dãnnin arkool̦. Bõtab kwõnaaj ke jek ilo bũruom̦ ñan pokake wõt naanin tõl ko jãn Anij ãinwõt kar Jeremaia? Pepe ko kwõj kõm̦m̦ani me rej kaalikkar bwe kwõj kõtl̦o̦k an Anij ãeik im l̦ame bũruom̦ remaroñ bõktok nõbar ñane. Iien otemjej ñe kwõnaaj pokake naanin tõl ko ilo Baibõl̦ im naanin tõl ko an Jeova me rej itok jãn rũkarejar etiljek im mãlõtlõt, kwõnaaj jeraam̦m̦an. Ijello̦kun am̦ kõtl̦o̦k bwe bũruom̦ en m̦õn̦e eok, kwõmaroñ ãinwõt Jeremaia. Innem jek ilo bũruom̦ ñan kõtl̦o̦k bwe Anij en ãeik im l̦ame eok; kõtl̦o̦k bwe en ãeik eok ãinwõt juon jãpe emaroñ to an kõjerbale.
it-1-E 1121 pãr. 2
Ipin
Jeova ear ba kõn RiIsrael ro im ro ilo Juda bwe rej ãinwõt kañũr eo ilo ipin, ãindeinl̦o̦k wõt an kar kepaake tok er bwe ren maroñ menin nõbar im aiboojoj ñane. (Jer 13:11) Kar kanaan kõn an Jijej Kũraij tõl im ej kañũrñũr ipin kõn wãnõk im tiljek. Men in ej kaalikkar bwe kajoor eo an Jijej Kũraij ej ekkejel ippãn wãnõk im tiljek im men in eban oktak. Im ãinwõt an juon kañũr jipañ, wãween ko rem̦m̦an ippãn me rewãnõk rej jipañe ñan jerbal ãinwõt Riekajet eo em̦õj an Jeova kããlõte.—Ais 11:1, 5.
Kal̦apl̦o̦k Am̦ Mel̦el̦e
jr-E 118 pãr. 11
Kwõj Ke Kajjitõk Aolep Raan im Ba, “Ewi Jeova?”
11 Ewõr juon an kar Jeremaia kajjitõk kõn an inepata ke ear lo an rinana ro jeraam̦m̦an. (Riit Jeremaia 12:1, 3.) Meñe ekar jab pere wãween an Jeova tõl ilo wãnõk, bõtab rũkanaan in ear kõn̦aan jel̦ã uwaakin men eo ej inepata kake. An kar kajju kwal̦o̦k kajjitõk eo an ej kaalikkar an kar lukkuun epaake Anij, ãinwõt juon ajri ñan jemãn me ej yokwe e. Jeremaia ear bõkm̦aantak kajjitõk eo an kõnke ear jab mel̦el̦e etke RiJu ro rej lo jeraam̦m̦an meñe rej kõm̦m̦ani men ko renana. Jeremaia ear ke lo juon uwaak em̦m̦an ñan kajjitõk eo an? Jeova ear ba ñane bwe enaaj jol̦o̦k aolep ro renana. (Jer. 12:14) Ke Jeremaia ear lo an uwaak jar eo an, emaroñ kar l̦apl̦o̦k an lõke wãween an Anij tõl. Kõn men in, Jeremaia emaroñ kar l̦apl̦o̦k an kepaak Anij ilo jar im kwal̦o̦k bũruon ñan Jemãn ilañ.
Kwõn Peran Ãinwõt Jeremaia
Jen Lale Kain Armej Rot Ro Jej Kõm̦m̦ao Ippãer
16 Jeremaia ej kwal̦o̦k kõn bar juon men ear jipañ e bwe en peran. Ear ba: “Iar jab jijet im kõm̦m̦ao ippãn juon kumi in armej ro rej ettõñ kõn kõjak ko im kautiej doon. Kõn peim Iar kamakelok iaõ im jijet, kõnke kwaar kobrak eõ kõn naanin ekajet ko.” (Jeremaia 15:17, NW) Jeremaia enaaj kar kããlõt bwe en make iaan jen an kobal̦o̦k ippãn rinana ro. Ilo raan kein l̦õmn̦ak in ej ãindein ippãd. Jejjab mel̦o̦kl̦o̦k kõn naanin kakkõl eo an rijjilõk Paul bwe “kõm̦m̦ao ko renana rej kakõt m̦anit ko rem̦m̦an,” ekoba m̦anit ko ad rem̦m̦an jãn elõñ iiõ ko m̦okta.—1 Korint 15:33.