KATAK KO KÕN TAITÕL̦IN BOK IN | JIJEJ EJ LO̦MO̦O̦REN KÕJ—JÃN TA?
Unin Ad Aikuj Bõk Lo̦mo̦o̦r
“Armej, eo ej l̦otak jãn kõrã, reiet wõt raan ko an, im rej obrak kõn jorrããn. Ej wal̦o̦k ãinwõt juon wut, im ej m̦õrãl̦o̦k; bareinwõt, ãinwõt ellor, ej ko im jab pãdwõt.”—Job 14:1, 2.
Jãn etto in an armej ro l̦õmn̦ak kõn an naaj kar em̦m̦an ñe jenaaj kar jo̦dikdik wõt im ãjmour ñan indeeo. Bõtab, ekabũrom̦õjm̦õj bwe ilo m̦ool jejjab maroñ bwe kõj armej jej rũttol̦o̦k im mej. Meñe naan ko an Job ilõñ kar jei elõñl̦o̦k jãn 3 to̦ujin iiõ ko remootl̦o̦k ak relukkuun m̦ool im rej bar jejjet ñan kõj rainin.
El̦ap an armej ro ilo pel̦aakin lal̦ in kõn̦aan mour ñan indeeo. Etke ej ãindein? Eokwe, Baibõl̦ eo ej ba bwe Anij ear likũt indeeo ilo bũruod, mel̦el̦ein bwe ewõr ad kõn̦aan ñan mour ñan indeeo im jekõn̦aan jel̦ã ñe jenaaj. (Ekklisiastis 3:11) Anij eo el̦ap yokwe ippãn en kar ke likũti kõn̦aan in ilo bũruod el̦aññe jejjab maroñ tõpare? Eokwe ñe uwaak eo am̦ ej jaab, kwõlukkuun jim̦we. Naanin Anij ej ba bwe mej ej ad rũkõjdat im ej kallim̦ur bwe “enaaj jako.”—1 Korint 15:26.
Ejjel̦o̦k pere bwe mej ej ad rũkõjdat. Ejjel̦o̦k juon armej me em̦m̦an kõl̦mãnl̦o̦kjen̦ eo an ekõn̦aan mej. Ñan waanjoñak, ñe ewal̦o̦k juon men ekauwõtata, jej m̦õkaj im badik jãne, kũttiliek, ak ko. Im ñe jej nañinmej, jej pukot kilen bwe en em̦m̦an ad mour. Jej kate kõj joñan wõt ad maroñ ñan bõbrae jabdewõt men me enaaj kõm̦m̦an bwe jen mej.
Jemaroñ ke tõmak bwe rũkõjdat in enaaj jako? Aet. Rũkõm̦anm̦an eo ad Jeova Anij ear jab kõm̦anm̦an kõj armej bwe jen mour jet wõt iiõ innem mej. Mej ejjab m̦õttan karõk ko an. Ear kõn̦aan bwe armej ro ren mour ilo lal̦ in ñan indeeo. Jejel̦ã bwe men eo ear karõke, enaaj kajejjete.—Aiseia 55:11.
Innem, ewi wãween an naaj jako mej? Jãn etto, elõñ armej rar kajjioñ kõm̦adm̦õde apañ in, bõtab rar jab lo tõprak. Ilo raan kein, armej ro rej wõnm̦aanl̦o̦k wõt ilo aer kajjioñ kõm̦adm̦õde apañ in. Em̦õj an rũmmãlõtlõt ro kõm̦m̦an unokan jet iaan nañinmej ko. Rej ekkatak kõn mour ko ad im menninmour ko. Eñin unin, ilo elõñ jikin ko, elõñ armej etol̦o̦k aer mour jãn kar epepen ko m̦okta. Meñe ãindein, ak ejjel̦o̦k juon emaroñ jol̦o̦k mej. Elukkuun m̦ool an Baibõl̦ ba bwe aolep armej “rej ilo̦k ñan juon wõt jikin, bwidej.”—Ekklisiastis 3:20, UBS.
Jem̦õn̦õn̦õ bwe jejjab aikuj wawa ioon mãlõtlõt ko an armej ro bwe ren n̦amejal̦an apañ in me eto an wal̦o̦k. Em̦õj kadede an Jeova Anij karõk ñan an lo̦mo̦o̦ren kõj jãn mej. Im enaaj jejjet karõk in an ikijjeen Jijej Kũraij.