“E Naj Druakwoj Ñõn Kom”

“[Anij] E jab etolok jen kij otemjej.”​—JERBAL 17:27.

1, 2. (a) Ñe jej reiliñlok ñan lañ ilo boñ, ta kajitõk eo jemaroñ kajitõk kake ikijen Ri Kõmanman eo? (b) Ewi wãwen Bible eo ej kamol ñan kij bwe armij raorõk iman mejen Jehovah?

KWONAÑIN reiliñlok ke ñan lañ ilo juõn boñ erreo im alikar im kwoj obrak kin bwilõñ? Joñan lõñin iju ko im lapin lañ ej kõmman ad lelñoñ. Ilo lañ eo elap an lap, lal in ej baj juõn period jiniñniñ. Ej melelen ke bwe Ri Kõmanman eo, “Eo Eutiejtata ion aolepen lõlin,” elap an utiej ñan an lemnak kin armij ak elap an etolok im ettino ñan ad maroñ jelã?​—Sam 83:18.

² Bible eo ej kamol bwe armij rejjab jettokjen ilo mejen Jehovah. Ilo mol, Nan in Anij ej rejañ kij ñan bukõte, ilo an ba: “E jab etolok jen kij otemjej.” (Jerbal 17:27; 1 Kronikel 28:9) Emol, elañe jej bõk buñten nee ko ñan ruaklok ñan Anij, enaj uak ñan jibadbad ko ad. Ilo wãwen et? Nan ko ilo unin tel in yiõ eo 2003 rej letok uak in ekamãnãn buru: “E naj druakwoj ñõn kom.” (Jemes 4:8) Jen etale jet ian jerammõn ko raibujuij me Jehovah ej lelok ñan ro rej ruaklok ñan e.

Juõn Men in Letok ñan Kwe Make Jen Jehovah

3. Ta men in letok eo Jehovah ej lelok ñan ro rej ruaklok ñan e?

³ Mokta, ri karejar ro an Jehovah ewõr ibbeir juõn men in letok eaorõk me ear kejbãroke ñan armij ro an. Aolep kajur, mweie, im jelãlokjen ko an jukjuk im bed in rejjab maroñ letok men in letok in. Ej juõn men in letok ñan kwe make, juõn men me Jehovah ej lelok ñan ro wõt im rej ruaklok ñan e. Ta en? Nan in Anij ej uak: “Elañe kwo naj . . . koutiej ainikiõm ñõn jelalokjen; Elañe kwo naj bukot e einwõt silver, im kabukot e einwõt mweiuk ko retino: Inem kwo naj meletlet kake mijõk Jeova, im lo jelalokjen kin Anij. Bwe Jeova ej letok meletlet.” (Jabõn Kennan Ko 2:​3-6) Lemnak kin armij ro rejjab wãppen im rej maroñ lo “jelalokjen kin Anij”! Men in letok in​—jelãlokjen eo jej loe ilo Nan in Anij​—rej keidi ñan “mweiuk ko retino.” Etke?

4, 5. Etke jemaroñ keidi “jelalokjen kin Anij” ñan “mweiuk ko retino”? Kõmman juõn wanjoñok.

⁴ Kin juõn un, jelãlokjen kin Anij ewõr aorõkin. Juõn ian jerammõn ko an raorõk ej kejatdikdik eo kin mour indio. (Jon 17:3) Ak meñe kiõ jelãlokjen in ej kaibujuij mour eo ad. Ñan wanjoñok, tokjen ad katak kin Nan in Anij, jej jelã uak ko ñan kajitõk kein raorõk einwõt: Ta ãt eo etan Anij? (Sam 83:18) Ta lukkun wãwen ro remij? (Ekklisiastis 9:​5, 10) Ta karõk eo an Anij kin lal in im armij? (Aiseia 45:18) Jej jelã bareinwõt bwe wãwen eo emõntata ñan mour ej ikijen ad jerbale nan in kakabilek eo emeletlet ilo Bible. (Aiseia 30:20, 21; 48:17, 18) Kin men in, ewõr ibbed nan in tel eo ewãppen me ej jibañ kij ñan kijenmij kin inebata ko an mour im ñan jibadõk juõn wãwen mour me ej kowõnmanlok mõnõnõ eo emol im juburu. Ilõñin men otemjej, katak eo ad kin Nan in Anij ear kamaroñ kij ñan jelã kadkad ko raibujuij kadkadin Jehovah im ñan ruaklok ñan e. Ta eo emaroñ aorõklok jen juõn kõtan ebak ibben Jehovah eo ej wawa ion “jelalokjen kin Anij”?

⁵ Ewõr bar juõn un jemaroñ keidi jelãlokjen eo kin Anij ñan “mweiuk ko retino.” Ejja einwõt elõñ mweiuk ko, rejeja ilo lal in. Ian jiljino billion armij ro rej jokwe ion lal, enañin jiljino million ri kabuñ ro an Jehovah, ak tarrin 1 jen 1,000 rar lo “jelalokjen kin Anij.” Ñan wanjoñok kin jerammõn eo ñan jelã mol eo kin Nan in Anij, lemnak kin juõn wõt kajitõk ilo Bible: Ta eo ej walok ñan armij ñe rej mij? Jej jelã jen Jeje Ko bwe aan armij ej mij im bwe ro remij rej jajelokjen. (Ezekiel 18:​4, NW) Ak, enañin aolep kabuñ ko an lal in rej bõk tõmak eo ewan bwe ewõr juõn men iloan juõn armij eo ej mour manlok elikin mij. Ej juõn mõttan eaorõk ilo kabuñ ko an Christendom. Ej bareinwõt lap ilo kabuñ ko an Buddhism, Hinduism, Islam, Jainism, Judaism, Shinto, Sikhism, im Taoism. Baj lemnak​—juõn wõt katak ewan ear mone elõñ billion armij ro!

6, 7. (a) Wõn ro wõt remaroñ lo “jelalokjen kin Anij”? (b) Ta wanjoñok eo ej kwalok bwe Jehovah ear kajerammõn kij kin lolokjen eo me ejelok ibben elõñ “ro dri meletlet im dri jelalokjen”?

⁶ Etke elõñlok armij rar jab lo “jelalokjen kin Anij”? Kinke juõn armij ejjab maroñ melele kin Nan in Anij ilo an ejelok jibañ ñan E. Kememej bwe jelãlokjen in ej juõn men in letok. Jehovah ej leloke ñan ro wõt im rej mõnõnõ in etale Nan eo an ilo mol im ettã buru. Rein remaroñ jab “meletlet lor kõniek.” (1 Dri Korint 1:​26) Ekkar ñan lajrak in kien ko an lal in elõñ iair rej watõki einwõt “dri jab katak im dri jab meletlet.” (Jerbal 4:​13) Ak, ejjab aorõk men in. Jehovah ej letok jerammõn eo kin “jelalokjen kin Anij” kin kadkad ko ej loi ilo buruõd.

⁷ Lemnak kin juõn wanjoñok. Elõñ ri meletlet ro ilo Christendom rar kõmman kamelele ko relap kin Bible eo. Kamelele kein remaroñ kwalok kin bedbed in bwebwenato eo, melele in nan ko ilo kajin Hebrew im Greek, im elõñlok men ko jet. Kin aolep jelã ko air, ri meletlet rein rar lo ke “jelalokjen kin Anij”? Eokwe, rej melele ke ilo alikar kin unin tel in Bible eo​—karreoik lotan eo nae iroij bõtata an Jehovah ikijen Ailiñ eo an ilañ? Rej jelã ke bwe Jehovah Anij ejjab mõttan juõn Trinity (Jilu Anij ilo juõn)? Ewõr ibbed melele eo emol kin men rot kein. Etke? Jehovah ear letok ñan kij lolokjen kin mol ko ilo jitõb me ejelok ibben elõñ “ro dri meletlet im dri jelalokjen.” (Matu 11:25) Elap an Jehovah kajerammõn ro rebak ñan e!

“Jeova Ej Kejbãrok Ir Otemjej Rej Yokwe E”

8, 9. (a) Ewi wãwen David ear kwalok kin bar juõn jerammõn an ro rej ruaklok ñan Jehovah? (b) Etke Ri Christian ro remol rej aikwiji kejbãrok eo an Anij?

⁸ Ro rebake Jehovah rej lañliñ kin bar juõn jerammõn​—kejbãrok eo an. Ri jeje psalm David, eo ear iion elõñ abañ ko, ear je: “Jeova ej ebak ñõn ir otemjej rej kir ñõn E, ñõn ro otemjej rej kir ñõn E ilo mol. E naj kamol kõnan an ro remjõk E; e naj bareinwõt roñjake air lamij im lomorir. Jeova ej kejbãrok ir otemjej rej yokwe E; a ro renana otemjej E naj kokkure ir.” (Sam 145:18-​20) Aet, Jehovah ej ebake ro rej yokwe e im kin men in emaroñ mõkaj an uake air lamõj kin jibañ.

⁹ Etke jej aikwiji kejbãrok eo an Anij? Ijellokin ad iioni tokjen ko kin ad mour ilo “ien ko renana,” Ri Christian ro remol rej juõn kein kõjjeroro ejej uan an Ri Kijirãt eo elaptata an Jehovah, Satan Devil eo. (2 Timote 3:1) Ri kijirãt etao in ekõnan “kõñ” kij. (1 Piter 5:8) Satan ej matõrtõre, jibede, im kabo kij. Ej bareinwõt bukõte wãwen ko ilo lemnak im buruõd me emaroñ kajerbale nae kij. Ewõr juõn an mejenkajjik ej lemnak kake: ñan kamõjnoik tõmak eo ad im kokkure mour in jitõb eo ad. (Reveles̃õn 12:12, 17) Kin ad aikwij jelmae juõn ri kijirãt elap an kajur, ejjab juõn men in kakajur ke ñan jela bwe “Jeova ej kejbãrok ir otemjej rej yokwe E”?

10. (a) Ewi wãwen Jehovah ej kejbãrok armij ro an? (b) Kain rot kejbãrok eo eaorõktata, im etke?

¹⁰ Ak, ewi wãwen an Jehovah kejbãrok armij ro an? Kallimur in kejbãrok eo an ejjab melelen bwe enaj ejelok abañ ko ilo ad mour ilo jukjuk im bed in; bareinwõt ejjab melelen bwe ej aikwij kõmman men in bwilõñ ko ñan tokjen eo ad. Mekarta, Jehovah enaj kejbãrok armij ro an einwõt juõn kumi. Bwe, ejamin kõtlok bwe Devil eo en torlokbõke ri kabuñ ro remol jen mejen lal in! (2 Piter 2:9) Ilõñin men otemjej, Jehovah ej kejbãrok kij ilo jitõb. Ej letok ñan kij men eo jej aikwiji ñan kijenmij iumin melejoñ ko im ñan kejbãrok kõtan eo ad ibben. Elaptata, kejbãrok eo ilo jitõb ej men eo eaorõktata. Etke? Elañe jej kejbãrok kõtan eo ad ibben Jehovah, ejelok juõn men​—ekoba mij​—emaroñ kokkure kij indio.​—Matu 10:28.

11. Ta karõk ko Jehovah ear kõmmani ñan lelok kejbãrok ilo jitõb ñan armij ro an?

¹¹ Elõñ karõk ko Jehovah ear kõmmani ñan letok kejbãrok eo ilo jitõb ñan ro rebake. Ikijen Nan eo an, Bible eo, ej letok ñan kij meletlet ñan kamadmõde abañ ko. (Jemes 1:​2-5) Jerbale nan in kakabilek ko rekeie jej loi ilo Jeje Ko ej bareinwõt juõn men in kejbãrok. Bareinwõt, Jehovah ej letok “Jitõb Kwojarjar ñõn ro otemjej rej kajitõk iben.” (Luk 11:13) Jitõb in ej kajur eo elaptata ilo lañ im lal, inem emol an maroñ keboj kij ñan lo tõbrak in jerbale jabdewõt melejoñ ak men in kabo ko me jemaroñ jelmaiki. Ikijen Christ, Jehovah ear letok “men in letok ko ilo emaan ro.” (Ephesians 4:​8, NW) Emaan rein rej tellokiir im rekajur ilo jitõb rej kate ir ñan kwalok ejja tiriamokake eo emũlal Jehovah ej kwaloke ñan jibañ ri tõmak ro mõttair.​—Jemes 5:​14, 15.

12, 13. (a) Ikijen ta eo Jehovah ej letok ñan kij ekan ko lor jitõb ilo ien ejejjet? (b) Ewi lemnak eo am kin karõk ko Jehovah ear kõmmani kin ejmour eo ad ilo jitõb?

¹² Jehovah ej letok bar juõn men ñan kejbãrok kij: ekan ko ilo jitõb ilo ien ejejjet. (Matu 24:45) Ikijen book ko, ekoba magazine in Imõniaroñroñ im Awake!, im bareinwõt kwelok ko, assembly ko, im convention ko, Jehovah ej letok ñan kij men eo jej aikwiji ilo ien jej aikwij. Kwomaroñ ke kememej juõn ien ke kwar roñ juõn men ilo juõn kwelok an Christian, juõn assembly, ak juõn convention me ear jelet buruõm im ear kakajur ak kainemõn yuk? Kwonañin ke konono juõn katak ilo juõn ian magazine ko kar kwaloke ilañ im eñjake bwe kar jeje kake ñan yuk?

¹³ Juõn ian kein tarinae ko elaptata an keie an Satan ej ñan kabwer armij, im jejjab anemkwoj jen tokjen ko an. E lukkun jelã bwe juõn eñjake emũlal in buromõj emaroñ kwote kajur eo ad, im kõmman ad mõjno. (Jabõn Kennan Ko 24:10) Kinke Satan ej kajerbal eñjake in ebwer eo ad ñan tokjen eo an, jej aikwiji jibañ. Jen ien ñan ien magazine in Imõniaroñroñ im Awake! rej jeje katak ko me rej jibañ kij ñan tarinaik jitõb in ebwer. Ikijen juõn ian katak rot in, juõn Ri Christian sister ear je: “Ij readi katak eo enañin aolep ran, im ej torlok wõt den in meja. Ij likiti iturin jikin kiki eo aõ bwe In maroñ jibwe ilo jabdewõt ien ij buromõj. Ikijen katak rot kein, I maroñ eñjake pein kejbãrok eo an Jehovah ej atbõkwõje iõ.”a Jejjab kamolol ke Jehovah kin an letok ñan kij ekan ko ilo jitõb ilo ien ejejjet? Kememej, karõk ko an kin ejmour eo ad ilo jitõb rej kein kamol bwe ej ebake kij im ear likit kij iumin kejbãrok eo an.

Ial in Kebak Eo Ej “Roñjake Jar”

14, 15. (a) Ta jerammõn eo Jehovah ej lelok ñan ro rebake e? (b) Etke ad anemkwoj in kebak Jehovah ilo jar ej juõn jerammõn elap?

¹⁴ Kwonañin kile ke bwe ñe armij rej bõk kajur im maroñ, ekkã an binlok ñan an ro rettã kebak ir? Ak, ta kin Jehovah Anij? Elap an etolok ke ñan an itoklimo in roñjake nan ko an armij ñan e. Elap an einjuõn! Men in letok eo kin jar ej bar juõn jerammõn Jehovah ej letok ñan ro rebak ñan e. Anemkwoj in kebak Eo ej “Roñjake jar” ej juõn jerammõn elap an karujruj. (Sam 65:2) Etke?

¹⁵ Ñan wanjoñok: Elõñ eddo ko ibben ri utiejtata eo an juõn business elap. Ej bebe kin ta men ko ej aikwij make lolorjake im ta ko emaroñ liloki ñan ro jet. Eindein, Ewõr ibben Iroij Bõtata eo an ijoko otemjej ilañ im ilal maroñ eo ñan bebe kin ta men ko enaj bõk kunan kaki im ta ko enaj liloki ñan ro jet. Lemnak kin aolep men ko me Jehovah ear liloki ñan Nejin jitenburu ibben, Jesus. Ear lelok ñan Nejin “kajur ñõn E bwe En kõmõnmõn ekajet.” (Jon 5:​27) “Ar kõtaik jen E enjel ro.” (1 Piter 3:​22) Jitõb kwojarjar ekajur an Jehovah ear bojak ñan an Jesus kajerbale ñan jibañ e tel ri kalor ro an ion lal. (Jon 15:26; 16:7) Kin men in Jesus ear maroñ ba: “Emwij letok ñõn Iõ kajur otemjej i lõñ im i lõl.” (Matu 28:18) Ak, ikijen jar ko ad, Jehovah ear kãlet ñan an make lale. Eñin unin Bible eo ej jiroñ kij bwe jen jar ñan Jehovah wõt, im kõmmane ilo etan Jesus.​—Sam 69:13; Jon 14:​6, 13.

16. Etke jemaroñ liki bwe Jehovah ej roñjake jar ko ad?

¹⁶ Jehovah ej lukkun roñjake ke jar ko ad? Elañe ear jab itoklimo, ejamin kar rejañ kij bwe jen “niknik ilo jar” ak ñan jolok inek im inebata ko ad ion. (Dri Rom 12:12; Sam 55:22; 1 Piter 5:7) Ri karejar ro retiljek ilo ien Bible rar lukkun tõmak bwe Jehovah ej roñjake jar ko. (1 Jon 5:​14) Kin men in, ri jeje psalm David ear ba: “[Jehovah] e naj roñjake ainikiõ.” (Sam 55:17) Kij bareinwõt jemaroñ liki bwe Jehovah ej ebak, im bojak in roñjake lemnak im inebata ko ad.

Jehovah Ej Kajerammõn Ri Karejar Ro An

17, 18. (a) Ewi lemnak eo an Jehovah kin jerbal in tiljek eo an men in kõmanman ko an remeletlet? (b) Kamelele kin ewi wãwen Jabõn Kennan Ko 19:17 ej kwalok bwe Jehovah ej lo jerbal in tiriamokake ko ad.

¹⁷ Men ko armij rej kõmmani ak makoko in kõmmani rejjab jelet lajrak eo an Jehovah einwõt Iroij Bõtata Ijoko Otemjej ilañ im ilal. Mekarta, Jehovah ej juõn Anij eo ej kwalok an kamolol. Ej kaorõk jerbal eo etiljek an men in kõmanman ko an remeletlet. (Sam 147:11) Inem, men in ej bar juõn tokjen ro rebake Jehovah rej lañliñ kake: Ej kajerammõn ri karejar ro an.​—Dri Hibru 11:6.

¹⁸ Bible eo ej kalikar bwe Jehovah ej kaorõk men eo ri kabuñ ro an rej kõmmane. Ñan wanjoñok, jej read: “Eo ej tiriamokake ro dri jeramel, ej lelok ñõn Jeova, im E naj nawõnan kin an kõmõn emõn.” (Jabõn Kennan Ko 19:17) Lemnak eo etiriamokake an Jehovah kin ro rettã kar alikar ilo Kien eo ikijen Moses. (Livitikõs 14:21; 19:15) Ewi eñjake eo an Jehovah ñe jej kajeoñe e ilo ad jerbal ilo tiriamokake ibben ro rettã? Ñe jej lelok ñan ro rettã, im jab kõtmene in bõk jabdewõt men, Jehovah ej watõk men in einwõt jej lelok ñan E. Jehovah ej kallimur ñan nawõnãn muri in kin kajerammõn. (Jabõn Kennan Ko 10:22; Matu 6:3, 4; Luk 14:12-​14) Aet, ñe jej kwalok tiriamokake ñan juõn ri kabuñ eo mõttad ej bed ilo aikwij, ej jelet buruen Jehovah. Elap ad kamolol ñan jelã bwe Jemed ilañ ej lo jerbal in tiriamokake ko ad!​—Matu 5:7.

19. (a) Etke jemaroñ tõmak bwe Jehovah ej kamolol kin ta eo jej kõmmane ilo jerbal in kwalok nan im kõmman ri kalor ro? (b) Ewi wãwen Jehovah ej kajerammõn jerbal ko armij rej kõmmani ilo jurak Ailiñ eo an?

¹⁹ Elaptata Jehovah ej kaorõk men eo jej kõmmane ñan tokjen Ailiñ eo an. Ñe jej ruaklok ñan Jehovah, ekkã ad naj kõnan kajerbal ien, kajur, im men ko mweied ñan bõk kunad joñan wõt ad maroñ ilo jerbal in kwalok nan kin Ailiñ eo im ñan kõmman ri kalor ro. (Matu 28:19, 20) Jet ien, jemaroñ eñjake bwe jidik wõt ad kõtõbraki. Buruõd ejjab wãppen emaroñ kõmman bwe jen lemnak elañe Jehovah ej buñburuen kake jibadbad ko ad. (1 Jon 3:​19, 20) Ak Jehovah ej kaorõk men in lelok otemjej​—jekdon ewi dikin​—ñe ej itok jen juõn buru eo yokwe ej kamakite. (Mark 12:41-​44) Bible eo ej kamol ñan kij: “Anij e wãnik wõt, im E jamin meloklok ami jerbal in yokwe, eo kom ar kwalok kin etan.” (Dri Hibru 6:​10) Emol, Jehovah ej bareinwõt kememej im kajerammõn jerbal ko redik rej kõmmani ñan jurake Ailiñ eo an. Ijellokin jerammõn ko relap ilo jitõb kiõ, jemaroñ reimanlok ñan lañliñ ko kin mour ilo lal eo ekãl ej itok, ijo Jehovah enaj erlokwe pein im kamaat kõnan ko rewãnik an ro otemjej rebake e!​—Sam 145:16; 2 Piter 3:​13.

20. Ilo aolepen yiõ in 2003, ewi wãwen jemaroñ kememej wõt nan ko ilo unin tel in yiõ eo, im kin ta tokjen eo?

²⁰ Ilo aolepen yiõ eo 2003, jen kajitõkin kij make elañe jej kõmmane wõt jibadbad ko ñan ruaklok ñan Jemed ilañ. Elañe jej kõmmani, inem jemaroñ liki bwe enaj emmakit einwõt ear kallimur kake. Bwe, “Anij E ban riõp.” (Taitõs 1:2) Elañe kwoj ruaklok ñan e, enaj ruakwõj ñan yuk. (Jemes 4:8) Im kin ta tokjen eo? Jerammõn ko relap kiõ im kejatdikdik eo ñan ruaklok ñan Jehovah ñan indio!

[Kamelele ko itulal]

Kwoj Kememej ke?

• Ta men in letok eo Jehovah ej lelok ñan ro rej ruaklok ñan e?

• Ta karõk ko Jehovah ear kõmmani kin kejbãrok ilo jitõb an armij ro an?

• Etke ad anemkwoj in kebak Jehovah ilo jar juõn jerammõn ekabwilõñlõñ?

• Ewi wãwen Bible ej kwalok bwe Jehovah ej kamolol kin jerbal ko retiljek an men in kõmanman ko an remeletlet?

[Pija ko ilo page 12, 13]

Jehovah ej letok kejbãrok ilo jitõb