Sturka 11

Kumadura Pas Ba

NOA ai pamalika aikuki ark wina takan pyua ra, dia pas daukan ba nu sma ki? Gâd ra prisantka kum yaban. Lilkika ra baku dauki ba man kaikaia sip sma. Naha prisantka ba daiwan sakripaiska wal daukan, Gâd mita ai pamalika ra lisamra tara ba wina swaki sakan ba tingkika yabaia wisi.

Prisantka ba, Jehova yamni kaikan lukisma ki? Au, witin yamni kaikan. Baha mita witin Noa ra pramis munan tasba na kli lisamra tara kum wal sauhki tikbia apia ba dukyara.

Wihka apia kan tasba aiska ba pat lawan kan, bara Noa ba ai pamalika aikuki ark wina taki, iwanka tnatka raya kum ta krikan. Bara Gâd mita witin nani ra blisin muni naku win: ‘Luhpa ailal sahwi bangws tasba na upla bangki takbia kat.’

Sakuna, upla nani ba lisamra tara ba dukyara wali bangwbia taim, sip kaia sa baha sat lisamrika tara wala kum balbia dukyara sibri bangwaia. Baha mita Gâd upla nani ra sain kum dauki pramis munan, witin aima kumira sin tasba na kli lisamra tara wal sauhki tikbia apia ba dukyara. Man nu sma baha ba dia sainka kan? Baha sainka ba sika kumadura kum kan.

Pyu kum kum li auhwi luya ningkara yu ingnika takuya taim, yawan sip sa kasbrika purara kumadura kum takan kaikaia. Kumadura ba kalatka sat ailal brisa. Man yu kum pat kaikram ki? Lilka ra kum na sip sma kaikaia.

Gâd ba naku win: ‘Yang pramis munisna, upla bara daiwan nani ra, kli lisamra ni sauhki tikamna apia. Baha mita yang kumaduriki ba kasbrika ra mangkisna. Baha kaikamna pyua ra, kupi kraubia, yang pramis munri ba.’

Baha mita, man kumadura kum kaikma pyua ra, dia dukyara kupiam kraubia? Gâd lisamra tara kum wal tasba na kli sauhki tikbia apia pramiska munan ba ra.

Blasi sturka 8:18-22; 9:9-17.