Gâd Daukanka Painkira nani ba Upla Kupia Nikbia Yas
1 Wan warkka ba, Baibil tanka lan daukaia baman apia sa. Sakuna upla ba Jehova wal kakaira taki, ai daukanka painkira nani ba dukyara sin upla kupia ra dimbia daukaia. Kupia yamni bri uplika ba tanka kasak ba lan takuya taim, ai kupia munuhta wina nikbisa ai rayaka laki “[Jehova] pain kaiki dukya nani baman sin dauki ka[bia]” (Kol. 1:9, 10; 3:9, 10).
2 Baibil Stadika Ta Briaia Helpka kum. Pas wahya nani wina, Baibil Smalkisa bukka ba, Jehova daukanka nani dukyara kau aisisa. Pas saptika ba makabi walisa: Rait pali Gâd ba man ra lukisa ki?, Gâd ba dia sat sa ki?, bara Yawan Gâd panika takaia sip sa ki? Jehova hulika laka ba dukyara (baiki.s 10); umpira wan kaiki, ai kasakka laka ba (baiki.s 11); ai latwanka laka ba (baiki.s 13); ai karnika (baiki.s 16), bara ai kupia swapni alki takaski bri, wan pâtka swih tiki, wihki bila kaiki laka ba dukyara sin aisisa (baiki.s 19). Baiki sakanka 20 ba, bila prahni ra nan wisa: “Witin dukyara kau lan taki wama taim, panikam kau latwan kaikisma ba ra ba baku damra walma”.
3 Baibil Smalkisa bukka ba wal, upla ba Jehova wal pana takbia dukyara nahki yus munbia? Gâd daukanka kum dukyara aisi baiki sakanka kum ningkara, sip sma naku makabi walaia: “Jehova dukyara naha ba dia mamrikisa ki?”, apia kaka “Naha ba nahki mamrikisa Gâd ba man ra lukisa?”. Upla ra naha sat waluya taim, dia lan taki ba aman luki kaikbia, bara Jehova daukanka nani dukyara ai kupia sin nikbia daukisa.
4 Ai Kupia Kraukbia Wisi Ulban ba Yus Muns. Sapta bani tnata ra “Baibil Dia Smalki ba” ulban sa. Stadi tatakra ra paiws bapanka kumi banira selp aisabia. Tiks nani taki ba dukyara sin aisas. Tanka kum dahra uplika ba ai kupia wina mai wibia want sma kaka, naku makabi wals: “Baibil ra baku smalki ba, man nahki lukisma?”. Baku daukuma taim, sapta bani bapanka nani ba upla sinska ra mangki brisma, sakuna diara tara wala kum sin: Ai kupia ra rait pali nahki luki ba nu takma. Bara Baibil stadi tatakra ba Jehova panika taki wabia.