Spirit Pata Tara Piaia Ridi Sma ki?
1. Pata tara kum ridi daukaia wisi dia sat wark takisa?
1 Pata tara kum piakaia ba wark tara sa. Plun satka bani ba dukyara diara pliki, pata ba piaki, mahka tibil ra kahbisa. Pata kakahbra nani ba sin ridi bangwi kaia sa. Baku sin, pata ba piaia dukyara, utla kum ra nit pali sa. Bara paiwan uplika ba sin kaina manas ridi kaia sa. Kau pali plis laih wina impakbia sa kaka. Sakuna, wan pamali bara wan panika wal asla prawi, pata kum auhni bara yamni wan muni sat pisa taim, wark ailal bara kabia sin lukras. Wel tisku sin tasba aiskara Jehova Witniska nani ba spirit liliaka tara kum ta krikaisa. Upla dakni tara bara sirpi nani sin aipaswaisa “Aihwaki Bas!” Aidrubanka Kau Tara ba walaia. Smalkanka ba, bara diara wala nani sin ridi kabia dukyara pat wark taki aula sa. Yawan sut paiwan sa. Ban sakuna waia, bara yamnika sakaia dukyara sin yawan kumi bani kaina manas ridi taki kaia sa (Sins.l 21:5).
2. Spirit pata ra mil bani kahbai ba pih kaikma wisi dia ba nit pali sa?
2 Yamni Tara Bris. Spirit pata ra mil bani kahbai ba pih kaikaia dukyara pat diara sut ridi daukram ki? Warkkam wina pri kama dukyara, bara aidrubanka yua sut bara kama dukyara sin, —nit kaka— baskam wal pat aisaram ki? Nahki wama, anira takaskma sin pat luki briram sa? Dama-kuka nani, dutki apia nani ba, apia kaka ya helpka nit ba sin waia sip kabia sapa almuk nani bui kaikaia sa (Jir. 23:4; Gal. 6:10).
3. Dia muni Kuntri Ailal Aidrubanka kum ra wan paiwras kaka ban waia apia sa?
3 Plis kum kum ra kuntri ailal wina muihni-lakri aidrubi bangwbia. Amya ra bri bas, kangrigisan kum kum, bara tringsar muihni-lakri baman baha sat aidrubanka nani ra paiwan sa. Diara sut ridi dauki bara, sir nani, takaskaia pliska sin an bara sa aman laki kaiki, apis tara bui upla an paiwbia sapa luki brisa. Naha sat aidrubanka kum ra wan paiwras ban waia ba sip sa daukaia upla uba ailal aihka tutukwan kabia.
4. Yu bani smalkanka ta krikras kainara ridi kaia wisi dia wan kupia kraukaia sa?
4 Yu bani smalkanka ta krikras kaina pali ra sirkam ba wih plikaia ridi bas. Bara smalkanka lalka bani nahki kabia ba wira purak kaikaia wisi wahya sirpi maiki ba kais. Baku daukisi mai smalkbia lâka ba wali briaia dukyara kupiam ridi kaia help mai munbia (Isra 7:10). Ta bri uplika ba mita miusik tiunka walaia wan paiwuya taim, iwi kyama pri tniki lilia wali, ta krikaia lawana aiwanaia, bara bakahnu pura sunaia ridi taks.
5. Wan pamali ba nahki muni sip sa aidrubanka tara ba wina kau yamnika sakaia?
5 Pamali aiska asla iwisa kaka, aisa-yapti ra sip munbia ai luhpia nani kyama lihni walisa sapa kaikaia (K.smal 31:12). Sut ra kupia bukisa Baibil tikska nani aisi kaikan kabia ba plikaia. Bapanka kum kum ulbaia ba help mai munbia aman wali kaia. Bara ningkara sin, ulbram ba sip sa tanka nani aisan ba kupiam krauwaia. Bahki aisaia twisam alki takas. Bara bahki wapi tauki kaia sin. Telepon kum brisma kaka, yarka man ra upla wala ra sin ambuk munbiara. Yu bani smalkanka ningkara, rait apia aitani kabia ani tanka laik kaikram ba upla wala wal aisaia?
6. Aidrubanka Kau Tara ba ra, ani blisinka tara bara sa, bara yawan nahki baha briaia sip sa?
6 Aidrubanka Kau Tara ba sip munisa wan muihni-lakri nani aikuki pain asla kaia. Asla laka na tasba saura na ra sip kaikras (Lawana 133:1-3; Mark 10:29, 30). Rait apia naha ra luki, dinar pyua ra ya ya lamamra iwbia ba wal man selp aisaia ta krikaia sip sma? Baha taka mita plun uba tara nit apia sa. Bara pain sa latara plun plikaia watlika ra, man selp patam brihwama. Yaka naha sat aslika laka ra pana pana wan ta baiki kaia sip ba lus tiwbiara (Rom 1:11, 12).
7. Wan kwalka dimaia luki ba dukyara, kaina wina dia daukaia sa?
7 Kwalka Dimra. Aitani sa kaikaia Jehova mita Israel uplika ra adar munan ai praka mahta un ba slihwan kaia, bara un pura kat awa blu pis lupia kum sipaia kan (Kul.k 15:37-41). Naha sika, witin nani Jehova ra mayunaia dukyara wahbi sakan kan ba kaikaia sip kupia kraukanka kum kan. Naiwa pyua ra sin, aidrubanka ra, wan kwalka ba tankira, yamni, pain dimi ba sin marikisa, yawan naha tasba saura saitra sa. Bara aidrubanka ra yu bani smalki ba ningkara yawan kirhbi, apia kaka plis wala ra taukisa kaka sin, wan kwalka witnis baku aisi marikisa. Bahamna, kaina manas ani kwalka dimaia lukisma sapa aman luki bris.
8. Aidrubanka taunka ba ra sa taim, nahki muni upla ra witnis aisaia sip sa?
8 Witnis Aisas. Wira wan sinska mangki sip sa ridi kaia aidrubanka taunka uplika ba ra smalkaia. Kristian kum ai maîa mairin wal piaia pliska kum ra wan, pliska ra kan taim, nina mangkaia wahya ba mariki plun kakahbra ra wali win: “Upla ailal naha sat wahya twilki ba kaikram sa ki?” Waitnika ba pana “au” win, bara dia tanka sa sapa sin walan. Ba’wina kau aisaia ikan, bara sip kan waitnika ra aidrubanka ra waia paiwaia.
9. Wan paiwan uplika ra —Jehova pali sika— nahki wan tingkika laka marikisa ki?
9 Aidrubanka ra aisanka nani, aisi makabi walanka nani, bara marikanka nani sut ba wan muihni nani bui daukisa. Ban sakuna, wan Aisa latwankira bui, Jehova mihta param sika, mani bani pata tara na wankisa (Ais. 65:13, 14). Aidrubanka Kau Tara ba ra wih spirit pata satka bani kahbi ba pih kaiki si muni, plun tara na ra wan paiwan ba ra wan tingkika laka marikisa. Tingkikam marikaia dukyara diara sut ridi daukisma ki?
[Wahya 6 Bakska ba]
Aidrubanka Kau Tara dukyara Kupia Kraukanka nani
◼ Aidrubia Awarka: Yu wal sut ba 9:20 titan ra ta krikan kabia. Aidrubanka Watla durka ba 8:00 titan ra kwakan kabia. Ta krikaia miusikka ba mahka kangbuya wan maisapahkisa taim, aidrubanka ba pain asla ta krikbia dukyara yawan sut wan sirka ra pain iwan kaia sa. Satadi aidrubanka ba 4:55 tutni ra, bara Sandi ba 4:00 tutni ra prakan kabia. Kuntri Ailal Aidrubanka nani ba lika Tausdi 1:20 tutni wina 4:45 tutni kat sin aidruban kabia.
◼ Sir nani: Man wal sim trukka, apia kaka sim watla ra iwi nani ba dukyara baman sir nani suni briaia sip sa.
◼ Pata: Pliskam pali diara piaia wisi aidrubanka watla wina tak’waia watlika ra, man selp patam brihwas. Surunka sirpi kum sirkam munuhtara mangkaia sip sa kaka pain kabia. Sakuna surunka uba tara, wihki glas dukya nani lika brihwaia adar apu.
◼ Prisantka nani: Aidrubanka ba ridi daukan ba tawan wan tingkika laka marikaia wisi, yawan sip sa tasba aiska smalki warkka ba ta baikaia dukyara prisant nani wilinkira yabaia. Shek wahya kum yabaia want sa kaka, “Congregación Cristiana de los Testigos de Jehová” nina mangki yabaia sa.
◼ Aksidint nani: Aidrubanka ra sma taim aksidint kum takbia sa kaka, pliskam pali Asla Dadaukra kau lamamra ba ra wis, bara dia daukaia sip laki kaikbia dukyara witin Sîka Helpka Yabi uplika ra maisapahkbia.
◼ Lilka alkaia: Lilka alkaia sat dukya nani ba aidrubanka watla ra elektrik wayarka nani ra, apia kaka bin dauki pliska ra sin kanik munaia apia sa. Bara bahamuna bri kaka, upla wala ra ambuk munbia apia sin trai munaia sa.
◼ Sírvase visitar Wahya ba: Kau Baibil tanka nu takan daukisa uplika kum ba dukyara Sírvase visitar (S-43) wahya kum ulbi bangkaia sip sa. Nahamuna wahya kumi, apia kaka wal twilki kaia aitani kabia. Ulbi bangkan wahya nani ba sika, Buk Yayabra nani ra, apia kaka kangrigisankam Aîulbra ra yabaia sip sa (Febrero 2005 Gâd Warkka Dauki, wah. 6 ba sin kais).
◼ Kirhbaia Pliska nani: Kirhbaia pliska nani ra wan daukanka pain ba, Jehova nina ra kau prana yabisa.
◼ Takaskaia Pliska: 1) Takaskaia pliska kum nit kama kaka, kangrigisankam almukka nani ra wis. Bara witin nani Takaskaia Pliska Pliki nani ra maisapahkbia. 2) Diara kum taka takaskaia pliska ba dan nit apia kama sa kaka, pliskam pali kaina manas maisapahks, bara upla wala dukyara yus munbia. 3) Takaskaia pliska ba ra sa taim, watla dawan adar wankras kaka, wan dukya apia dukya nani ba alkaia apia sa. 4) Paiwan kum kum ba trai munisa takaski pliska ba ra diara piakaia dukyara plun sat —rais, bins, tama sapa— dukya nani, apia kaka lalah wal sin ta baikaia. 5) Wan paiwan uplika watla ra sa taim, spirit hulikira ma ba mariks. Sam taim upla ailal ai watla ra paiwisa, bara ai kupia pain wihki wihka bila kaikan laka mariki ba dukyara, yawan tingki wiaia sa. 6) Tihmia taim aitani kabia yawan uba let wih dimaia apia. Kan wan paiwan uplika ba aihka ai dara walbia want apia sa.