Daukanka nani Gâd ra kulkanka yabi ba

1. ¿Dîa muni aidrubanka dauki pliska ra upla nani ba nu sa yawan ba ya sa?

¹ Aidrubanka Kau Tara nani ra auya taim, upla sut ba wan kaikisa. Kuntri kum kum nani ra, upla sut ra maisa pakanka nani bâk nu munisa yawan bahara ba. Yapaia pliska nani, plun piakan atki pliska nani ra Jehova Witniska nani man banhki kabia. Bara yabal ra kaikbia muihni lakri manis tarjeta lupia kum ai nina mangki brih tauki ba. Kaisa kupia kraukanka kum kum laki kaikaia aidrubanka pliska ra kabia taim, hilp wan munbia daukanka pain nani ba marikaia, Gâd ra kulkanka yabaia dukiara (1 Pi. 2:12).

2. Aidrubanka pliska ra kabia taim, ¿nahki natka ra wan kwalka dimra pain ba Gâd ra kulkanka yabia?

² Kwalka dimra pain ba. Param sa yawan sut ba wan kwalka dimra ba aidrubanka ra kabia taim, pain kaia sa. Sakuna, upla kum kum ba plis wala ra kabia taim, wan kwalka dimra nahki ba dukiara tâ iwbia. Sampla baku, yapaia pliska ra dimbia taim, taki wabia apia kaka diara atkaia taki wabia taim; naha piua ra nit apia sa wan kwalka ba aidrubanka ra dimbia baku kabia, sakuna wan kwalka ba rispik lâka mariki ba sât kaia sa. Upla nani ba wan kaikbia taim, nu kaia sa yawan ba upla sât wala sa (Ro. 12:2). Baku sin, wan nina mangki ba tarjetika lupia ba brih tauki kaia sa, kan baku aidrubanka dukiara aisisa witnis aisisa, smalkaia sanska wankisa bara muihni lakri wala nani ba nu kabia yawan ba ya sapa.

3. ¿Dîa sanska brisa wihka bîla kaikanka bara wan daukanka pain nani ba marikaia?

³ Wihka bîla kaikanka bara wan daukanka pain nani. Naiwa piua ra, upla manis ai dukiara baman lukisa bara tingki lâka ba marikras. Baha mita, wan daukanka pain nani marikbia ba tawan bilara yamni kaikbia, sampla baku yapaia pliska bara plun piakan atki pliska nani ra (2 Tim. 3:1-5). Baku sin, pain kabia upla wala yamnika ra lukaia sir nani ba wahbi bribia taim apia kaka ulbi sakanka raya nani sakaia auya taim (1 Ko. 10:23, 24). Waitna kum pas trip aidrubanka kum ra wan taim win: “Aisanka nani sut yaban ba wina kumi sin kupi krawras, sakuna Jehova Witniska nani daukanka pain nani ba lika ban kaia ra sinskira takaskan”.

4. ¿Dîa muni pain kabia, aidrubanka ra hilp munaia dukiara wilin takbia?

⁴ Wilinkira warkka ba. Rait aihwa kristianka nani ba piua bani ra wilinkira sa hilp munaia dukiara (Law. 110:3). ¿Man hilp munaia sip sma? Aidrubanka kum daukaia dukiara, muihni lakri 600 baku klin munaia dukiara hilp munaia wan. Pliska ra wark taki dawanka ba win: “Diara aihka painkira nani kaiki ba wal praki kaiki, diara wala âpu sa. Sip kasak lukras dukiara kum sa naha uplika sut wilinkira wark taki ba.” Aidrubanka Kau Tara nani naha manka ra kabia ba mahka balbia want sa. Baha ra walaia bara lan takaia sanska baman bribia apia, sakuna wan Smasmalkra, Jehova, kulkanka tara ba yabia.

[Wahya 3-6 bakska]

2013 Aidrubanka Kau Tara dukiara kupia kraukanka nani

◼ Aidrubanka awarka ba. Aidrubanka watla durka ba 8:​00 titan ra kwâkan kabia. Tâ krikaia miusikka ba yu bani 9:​20 ra kangbi wan maisa pakbia, aidrubanka ba pain asla tâ krikbia dukiara, yawan sut wan sirka ra pain iwan kaia sa. Satadi aidrubanka ba 4:​50 tutni ra, bara sandi ba 3:​35 tutni ra prakan kabia.

◼ Truk takaskaia pliska. Aidrubanka dauki ba pliska ra truk nani takaskaia pliska yus munaia dukiara wankan ba mana kulkras kabia, bara ya pas auya ba ai pliska bribia. Bara plis kum kum ba yus munaia sip apia kabia, kan baha pliska nani ba ya wil sirka yus munaia adarka wauhkataya bri kaka baman naha pliska nani ra ai trukka swiaia sip kabia. Truk takaskaia pliska ba uya tara apia ba mita kupiam bukisa pamalikam aikuki sim trukka kum ra wama.

◼ Sir nani. Man wal sim trukka, apia kaka sim watla ra iwi nani ba dukiara baman sir nani suni briaia sip sa. Bara ya man wal Baibil stadi taki ba dukiara sin. Ban kra, upla almuk nani bara ai karnika uya âpu nani dukiara sir nani bâra ba wiria baman sa, baha mita sip apia kabia pamali sut ba witin aikuki iwaia. Pliskam pali naha sirka nani ba upla almuk bara ai karnika uya âpu nani bara ya uplika witin nani hilp muni ba dukiara swis (1 Ko. 13:5).

◼ Plun. Pliskam pali diara piaia wisi aidrubanka watla wina taki waia watlika ra, man silp patam brih was. Surunka sirpi kum sirkam mununhtara mangkaia sip sa kaka pain kabia. Sakuna surunka uba tara, apia kaka glas dukia nani lika brih waia adar âpu.

◼ Prisantka nani. Aidrubanka ba ridi daukan ba tâwan wan tingkika lâka marikaia wisi, sip sa tasba aiska smalkaia warkka ba tâ baikaia. Wan prisantka nani wilinkira yabaia dukiara shek wahia kum yabaia sip sa, ani nina kuntrikam ra yus muni ba ulbi blîkbia. Baku sin, prisantka nani yabaia sip sa tarjetas de débito bâk apia kaka crédito aidrubanka kum kum ra.

◼ Sîka nani. Daktar nani sîka maikan disma kaka, dîa yus munma ba aidrubanka ra brih was, kan aidrubanka ra bahmuna âpu kabia. Sugar sikniska brisma, bara indiksan nani yus munisma kaka, nu bas bahmuna dukia wal aksidint kum takaia sip sa. Baha mita pain kabia plis inipis ra lulkaia apia. Aidrubanka pliska ra dipasta mangki ba, apia kaka takaski pliska ra sin lulkaia apia sa.

◼ ¿Dîa sât sûska yus munbia? Mani bani upla nani ba aksidint takisa sus kum pain yus munras tâwan. Kau pain sa sus kum pain atki dimaia. Ban kra tips nani uli wabia, apia kaka unta bri pliska bâk luaia sip sa bara wan sûska pain sa kaka trabil âpu kabia.

◼ Upla nani uya pain walras ba. Aidrubanka ba radiu bâk walaia sip kabia (FM). Bara naha natka yus munaia dukiara batri wâl yus muni radiuka kum bara wan kiama kat walaia dukiara brih waia sip sa.

◼ Tuktan sirka nani bara sir sâtka wala. Bahmuna sirka aidrubanka ra brih waia apia sa. Tuktan sirka nani aisa yapti lamara mangkaia sip sa kaka baman brih waia sip kabia.

◼ Isint kîa nani. Aidrubanka dauki pliska nani aihkika ba pâsa dimras sa. Bara upla wala yamnika ra luki ba mita pain kabia isint kîa karna ba yus munaia apia. Upla kum kum ra siahka trabilka, apia kaka siknis wala nani isint kîa karna wina bali ba yabisa (1 Ko. 10:​24).

◼ Sírvase visitar (S-43) wahia ba. Baibil tânka nu takan dauki uplika kum ba dukiara Sírvase visitar wahia lupia kum ulbi banhkaia sip sa. Aidrubanka wina takma taim, ulbi banhkan wahia nani ba, buk yayabra nani ra, apia kaka kangrigisankam aîulbra ba ra yabaia sip sma.

◼ Plun piakan atki pliska. Naha sât pliska nani ra wan daukanka pain ba, Jehova nina ba kau prana daukisa. Kristian baku kwala ba pain dimi was. Bara wark tatakra nani ra prisantka kum yabisa kaka, yawan sim baku daukaia sa.

◼ Takaskaia pliska.

(1) Yapaia pliska yus munaia sma ba baman makas bara rumkam ra upla ailal dingkpara.

(2) Yapaia pliska kum ridi brisma kaka, trabil tara kum mai takbia kaka baman sip sma dawanka ra maisa pakaia danh yus munras sma ba, baku upla wala yus munaia sip kabia (Mt. 5:​37). Yus munaia apia makabram numbika ba ulbi bris. Kan 48 awar bîla ra daukram kaka, dîa aibapram ba lus tiwma.

(3) Takaskaia pliska kum ra dimi auma taim diara aibapaia targetika nani yus munisma kaka, nu bas pliska dawanka nani ba ­praiska mana ba wina kau pura mai kulkbia. Takaskisma ba ra dîa trabilka takbia kaka mai kulkbia. Bara yua kum mahka waia lamara, diara sut aibapi takma taim lalahkam yus munaia sip kama.

(4) Wan surunka brih waia dukiara truk lupia kum bâra sa. Yus munbia ningkara brisi swiaia sa, baku upla wala yus munaia sip kabia.

(5) Takaskaia pliska ra wark tatakra nani wan surunka twilkaia hilp wan muni ba ra lalah prisantka kum yas. Bara wan rumka klin dauki mairka ra yu bani lalah prisantka kum yas.

(6) Plun piaki pliska nani ra baman patam piaks.

(7) Titan pata, kapi, apia kaka ais nani yabi ba pitka kat yus muns.

(8) Spirit holikira mâ ba piu bani ra wark tatakra nani ra mariks. Nu bas witin nani upla ailal warkka daukisa. Baha tânka pain brih, wan kupia pihni lâka bara wihka bîla kaikanka lâka marikbia ba witin nani mapara pain kabia.

(9) Takaskaia pliska ra kabia taim pain kabia aisa yapti ba ai luhpia nani yawaia pliska ra (piscina), kwala chens takaika pliska bara wan wîna lapta daukaika pliska ra (gimnasio) sa taim pura kaiki kabia.

(10) Takaskaia pliska upla nani kau yus muni ba, Lista de hoteles recomendados wauhkataya ra takisa praiska ulbi swin ba. Yua kum luaia praiska sa, sakuna lal mana ba kulkras sa. Sakuna diara nani man makabras kapram mana mai kulkbia kaka, Aidrubanka Kau Tara ra Takaskaia Pliska Apiska ra isti pali nu muns.

(11) Rumka makabram ba wal trabil kum takbia kaka, aidrubanka ra sma ba ra Takaskaia Pliska Apiska ra isti pali nu muns.

◼ Wilinkira warkka. Ya ya hilp munaia want sa kaka, Wilinkira Warkka Yabi Apiska ra waia sa. Tuktan nani 16 mani wina mâyara bri ba hilp munaia sip sa, ai aisa yapti, apia kaka upla almuk kum kaikisa kaka daukaia.