Aidrubanka Kau Tara nani ba pyua liliakira sa Jehova ra mayunaia
1. Diaura talia kan Israel uplika nani liliaka tara pyua brikan ba naiwa wan Aidrubanka Kau Tara ba wal?
1 Josep, Meri, ai luhpia nani bara upla wala aikuki Jerusalem ra uli wi bangwi kan mani bani liliaka tara pyua nani ra kaia dukyara. Baha pyua ra witin nani spirit dukya nani ra baman luki kan, ai trabilka nani ra lika apia. Liliaka tara pyua nani ra witin nani sanska brikan Jehova kupia painka laka ra lukaia bara ai Lâka ba sin laki kaikaia. Sim natka ra, wan Aidrubanka Kau Tara aula ba sanska wangbia liliakira Jehova ra mayunaia.
2. Wan Aidrubanka Kau Tara aula ba dukyara nahki ridi takaia sa ki?
2 Ridi Takaia. Jisas pamalika mapara, Nasaret taunka ra wih bara balaia ba 200 kilumita pit wapaia nitkan. Baku sin ai muihka bara lakrika an brikan ba nu apu kabia sin, wan dara walaia sip sa Josep Meri wal, baha daukaia wisi kaina manas ridi takaia ba isi apia kan. Pat laki kaikram sa dia pali nit sma ba wan Aidrubanka Kau Tara aula ba ra kaia dukyara? Bankra bakisan sakaia sma apia kaka, warkam dawanka wal aisaia baku sin, luhpiam nani kul dimi ba smasmalkrika wal aisaia tawi sma baha pyua ra kaia dukyara. Takaskaia pliska kum nit takma kaka, kangrigisan almukka nani ra pat wiram ki? Kangrigisankam ra upla kum kau ai nitka tara bri kaka wilinkira help munaia sip sma aidrubanka ra brih waia? (1 Jan 3:17, 18.)
3. Pana pana ta baiki kaia dukyara, Israel nani liliaka tara pyua ba, witin nani ra dia sanska yabi kan ki?
3 Pana pana ta baiki. Ju uplika liliaka tara pyua dauki kan ba sanka yabi kan ai walka nani wal pana pana ta baiki luaia. Rait pali, Jisas pamalika ba ai brinka pali kan ai pânika almuk nani wal asla prawaia. Baku sin, witin nani ju bara ju laka ra tawan uplika nani Jerusalem bila ra apia kaka yabal ra wih kli bali kan pyua ra sip kan pâna raya nani sakaia.
4. Yawan nahki kulkanka laka yabisa kristian nani aslika laka tila ra kaia ba?
4 Sim smalkanka wauhtaya nani ra sakaia watlika ra, alba kasak sinskira ba yawan dia nit ba saki, aisanka nani wih walbia dukyara ridi daukisa. Dia muni ki? Pana pana wan ta baiki kabia dukyara sa (Hibru. 10:24, 25). Baha mita, kaina manas ridi kaia pyua bani, ta krikras kaina ra bara baku muihni lakri nani aikuki lilia takaia, kau aidrubanka ta bri uplika ba mita miusik tiunka walaia apia kaka iwaia wan paiwras ba ra. Dinar pata sait wala ra wih piaia watlika ra, sut ra kupia bukisa patam wiria lupia brihwi aidrubanka pliska ra pima baku wala nani wal aisaia sip kabia. Muihni lakri tasba aiskara asla ba lika Jehova wina prisanka sa, baha mita bahki kulkaia apia sa (Mai. 2:12).
5. Aidrubanka ridi daukan ba wina dia help wan munbia yamnika sakaia?
5 Lan takaia pyua ba. Jisas ba kau tuktan kan wina, ju nani liliaka tara pyua nani ba ra kau ai Aisa dahra tanka pliki kan (Luk 2:41-49). Yawan bara wan pamali ba, aisanka nani wina dia yamnika sakaia sip sa? Aisanka nani pyua ra iwi bara turi bahki nani aisaia apia. Telepon nani bara pliki wan saki dukya nani ba, upla wala ra apia kaka yawan ra swirika wan sinska turbiara. Aisanka yabi uplika ra mawan kat kaiki tanka kunhku nani ra ulbi briaia. Pamali nani ba aikuki iwi kaia sa, baku witin nani kaikbia ai luhpia nani pain walisa sapa. Bara tihmia ra ani tanka kau pain kaikan ba dahra aisaia.
6. Wan kwalka dimi bara wan wîna aiskahki pyua ra, dia ba wan auya tiwaia apia sa?
6 Wan kwalka dimra bara aiskahkaia ba. Tringsar diara aîatkra uplika nani ba isi pali sip kan Jisas pamalika ra kaikaia, ju laka nina blablikra wala nani aikuki yabal ra wih bara aula kan ba ra sin. Nahki muni? Ai praka mahta un ba slihwan, bara un pura kat awa blu pis lupia kum sipan kan ba mita (Kul.k. 15:37-41). Kristian nani naiwa kwala sat kum baman dimi taukras, sakuna upla sut nu sa wan kwalka dimra ba pain aiskahki dimisa. Aidrubanka taunka ra sa taim aman kaikaia sa wih bara tawi aula pyua ra nahki wan wîna aiskahkisa. Aidrubanka wina taki kwala wala dimbia kra sin wan dimra ba Jehova ra mayuni sat dimaia, wan nina mangkaika wahya ba brih tauki kaia sa. Baku lika, Jehova Witnis apia uplika tila wina sat wala kabia. Bara upla ba wan kaiki yawan dukyara pain aisabia.
7. Dia muni wilin taki, lukaia sa aidrubanka ra wark daukaia?
7 Upla wilinkira nit sa. Wan aidrubanka pain kabia dukyara wark tatakra manis nit kabia. Help munaia wilin takma ki? (Ais. 6:8). Aidrubanka pliska ra wark nani daukaia ba, Jehova ra mayunanka taka kum sa. Bara naha daukanka pain ba upla nani kaiki yamni aisabia. Aidrubanka pliska kum ra klin daukaia dukyara wark tatakra ailal wan, pliska dawanka kaiki naku win: “Daukanka kau tara rayaki aiska ra kaikuna ba dukyara tingki mai wiaia want sna, pyu bani wali kapri man nani ba upla yamni bangwisma. Pat aihwa wina nu sa man nani ba plis kum mihtam ra mangkuya taim kau klin swih bangwisma briram ba wal. Man nani bara asla takankam ba, daukan sa taunka na wina naha pliska kau painkira kabia, bara upla kau latwankira aima kumi sin kaikras kapri ba daknika wal dauki bangwram sa”.
8. Aidrubanka dauki taunka ra kabia ba ra dia sanska bri kabia?
8 Witnis aisaia pyua. Aidrubanka dauki taunka ra upla nani ba kaikbia upla tringsar kwalka dimra yamni, ai wîna pain aiskahki bara wan nina mangkaika wahya brih tauki. Baha ba daukbia upla ba aidrubanka dukyara diara nu takaia want kaia bara yawan mahka witnis aisaia sip kabia. Mani walhwal tuktika kum, piaia pliska kum ra wan taim plun kahbi mairka ra ulbi sakanka raya takan ba marikan, baku daukan mita ai aisika nani ra sanska yaban mairka ra aidrubanka ra paiwaia.
9. Jisas pamalika baku, spirit dukya nani wankan ba tawan nahki muni yawan kulkanka yabia ki?
9 Blasi liliaka tara pyua ba ju uplika nani spirit laka ra tniwi kan mapara baha, ra kaia uba pali want kan (K.smal 16:15). Jisas pamalika ba sakripais dauki kan ba lilia ai dara wali yamnika sin saki bangwi kan. Yawan sin wan Aidrubanka Kau Tara ba kasak kulkanka yabisa, kan wan Aisa latwankira Jehova wina prisantka manakira wankisa pitka kulkisa (Jems 1:17). Kaisa nawas wina ridi takaia mani bani Jehova ra liliakira mayunaia!
[Wahya 7 bakska ba]
Aidrubanka Kau Tara dukyara kupia kraukanka nani
◼ Aidrubanka awarka ba. Yua wal sut ba 9:20 titan ra ta krikan kabia. Aidrubanka watla durka ba 8:00 titan ra kwakan kabia. Ta krikaia miusikka ba mahka kangbi wan maisapahkisa taim, aidrubanka ba pain asla ta krikbia dukyara yawan sut wan sirka ra pain iwan kaia sa. Satadi aidrubanka ba 4:55 tutni ra, bara sandi ba 4:00 tutni ra prakan kabia.
◼ Sir nani. Man wal sim trukka, apia kaka sim watla ra iwi nani ba dukyara baman sir nani suni briaia sip sa, bara ya man wal Baibil stadi taki ba dukyara sin (1 Kor. 13:5).
◼ Pata. Pliskam pali diara piaia wisi aidrubanka watla wina taki waia watlika ra, man silp patam brihwas. Surunka sirpi kum sirkam munuhtara mangkaia sip sa kaka pain kabia. Sakuna surunka uba tara, apia kaka glas dukya nani lika brihwaia adar apu.
◼ Prisantka nani. Aidrubanka ba ridi daukan ba tawan wan tingkika laka marikaia wisi, yawan sip sa tasba aiska smalkaia warkka ba ta baikaia dukyara wan prisantka nani wilinkira yabaia. Shek wahya kum yabaia want sa kaka, “Watch Tower” nina mangki yabaia sa.
◼ Aksidint nani. Aidrubanka ra sma taim aksidint kum takbia sa kaka, pliskam pali asla dadaukra kau lamamra ba ra wis, bara dia daukaia ba laki kaikbia dukyara witinka Sîka Helpka Yabi uplika ra maisapahkbia.
◼ Lilka alkaia. Lilka alkaia sat dukya nani ba aidrubanka watla ra elektrik wayarka nani ra, apia kaka bin dauki pliska ra sin kanik munaia apia sa. Bara bahamuna bri kaka, upla wala ra ambuk munbia apia sin trai munaia sa.
◼ Sírvase visitar wahya ba. Kau Baibil tanka nu takan daukisa uplika kum ba dukyara Sírvase visitar (S-43) wahya kum ulbi bangkaia sip sa. Nahamuna wahya kumi, apia kaka wal twilki kaia aitani kabia. Ulbi bangkan wahya nani ba sika, buk yayabra nani ra, apia kaka kangrigisankam aîulbra ra yabaia sip sa (Noviembre 2009 Gâd Warkka Dauki, wah. 4 ba sin kaiks).
◼ Kirhbaia pliska nani. Kirhbaia pliska nani ra wan daukanka pain mita, Jehova nina ba kau prana daukisa.
◼ Takaskaia pliska. 1) Takaskaia pliska kum nit kama kaka, kangrigisankam almukka nani ra wis. Bara witin nani takaskaia pliska pliki nani ra maisapahkbia. 2)Diara kum taka takaskaia pliska ba dan nit apia kaka, pliskam pali kaina manas maisapahks, bara upla wala dukyara yus munbia. 3)Takaskaia pliska ra kabia taim, watla dawanka adar wankras kaka, upla dukya nani ba alkaia apia sa. 4) Paiwan uplika kum kum ba trai munisa takaski pliska ba ra diara piakaia dukyara plun sat sat —rais, bins, tama sapa— brihwaia, apia kaka lalah wal sin ta baikaia. 5) Wan paiwan uplika watla ra, spirit hulikira ma ba marikaia. Sam taim upla ailal ai watla ra brisa, ai kupia pain bara wihka bila kaikan laka mariki ba dukyara, yawan tingki wiaia sa. 6) Tihmia taim aitani kabia yawan uba let wih dimaia apia, kan wan paiwan uplika ba aihka ai dara walbia want apia sa.
◼ Wilinkira warkka. Aidrubanka liliaka ba kau tara takisa yawan wark nani bara kabia ba daukaia help munbia kaka (W.n 20:35). Ya ya help munaia want sa kaka Wilinkira Warkka Yabi Apiska ra waia sa. Tuktan nani 16 mani wina mayara bri ba help munaia sip sa ai aisa yapti, apia kaka upla almuk kum kaikisa kaka daukaia.