Aidrubanka Kau Tara nani ba tânka kasak ba prana daukisa
1. Israel uplika nani ba liliaka holi nani ra, ¿diaura lukaia sip kan?
1 Patitara Israel uplika nani ba mani bani aima yumhpa asla taki kan, liliaka holi nani daukaia dukiara. Naha liliaka ra waia dukiara dis waitna nani baman waia kan, sakuna pamali nani ba sut aidrubi kan (Kli.S 16:15, 16). Bahara witin nani sanska bri kan tânka kasak ba dukiara aisaia. Sampla baku, witin nani sip kan lukaia nahki Jehova Gâd ba latwankira sa bara ai uplika nitka yabi kan ba (Kli.S 15:4, 5). Jehova witin nani ra tâ bri kan bara main kaiki kan ba kasak lukaia sip kan (Kli.S 32:9, 10). Witin nani Gâd uplika baku wahbi sakan ba mita Jehova kasakka lâka marikaia kan (Kli.S 7:6, 11). Naiwa piua ra sin, Aidrubanka Kau Tara nani ba baha sanska wankisa.
2. Aidrubanka Kau Tara ba, ¿nahki hilp wan munisa tânka kasak ba kau pain lan takaia?
2 Aidrubanka Kau Tara ba ra tânka kasak ba lan takisa. Naha aidrubanka nani ra aisanka nani yabisa bara Baibil wina sakan pulanka nani daukisa. Baku sin, marikanka nani bara muihni lakri kum kum ra makabi walanka daukisa. Baha nani ba sut hilp wan munisa tânka kasak ba pain tânka briaia (Jn. 17:17). Jehova asla takanka ba karna wark takisa naha sât aidrubanka tara nani daukaia bara tasba aiska ra, spirit lâka ra, upla nani ra hilp munisa (Mt. 24:45-47). ¡Naha ba kaiki wan kupia bukisa kau lan takaia!
3. Aidrubanka wina yamnika sakaia dukiara, ¿dîa hilp wan munbia?
3 Naha aidrubanka wina yamnika sakaia dukiara yua nani sut ra waia sa, bara aisanka nani ba pain walaia. Kupiam krauks warkkam pliska dawanka ra bakisan makabaia naha aidrubanka ra waia dukiara. Aidrubanka ra dîa wibia ba aman walaia dukiara tihmia ra pain ris briaia sa. Upla kum kum ba aisanka yabi uplika mawanra kaikisa bara tânka nani ba wauhtaya ra ulbisa. Celular bara upla plikaia dukia nani ba yaka man bara upla wala ra ambuk munbiara. Uba sturi aisaia apia, bara maisa pakanka nani bliki pulaia apia sa. Aidrubanka daukisa piua ra plun piaia, diaia sin apia sa.
4. ¿Aisa yapti ba nahki ai luhpia nani ra hilp munbia aidrubanka wina yamnika sakaia?
4 Mani 7 aimaki kan ba ra, Israel uplika nani ba asla taki kan utla papakni liliaka ba briaia dukiara. Baha piua ra Lâ ulbanka ba walaia kan. Pamali sut bara “tuktan” aikuki asla takaia kan, walaia bara lan takaia dukiara (Kli.S 31:12). Naiwa piua ra uba lilia wan daukisa kaikaia pamali nani ba aikuki iwisa bara tuktan nani ba dîa smalki ba aman walisa. Baha mita, aitani kabia pamali baku aidrubanka ra dîa lan takan ba laki kaikaia. “Tanis lâka ba lika kau tuktan nani ba kupia lukanka tâka sa.” Aisa yapti nani ba ai luhpia nani ba “ban swin tauki” kabia apia. Kau pain kabia ai luhpia nani ba —wahma tiara lupia kabia sin— asla aidrubanka ra kabia, apia kaka anira takaskbia pliska ra kabia sin ban main kaiki kabia (S.L 22:15; 29:15).
5. ¿Nahki natka ra wan daukanka pain nani ba tânka kasak ba prana daukisa?
5 Wan daukanka pain ba tânka kasak ba prana daukisa. Ani tawanka ra kabia sin wan daukanka pain nani ba prana daukisa wan Aidrubanka Tara ba ra (Tai. 2:10). Takaskaia pliska ra wark taki uplika nani ba pain ai dara walisa yawan pânika lâka, wan daukanka pain, bîla wawalra sa kaka (Kol. 4:6). Mani luan ra, Betel apiska wina tâ bri daknika kum ba takaskaia pliska kum dawanka wal aisi kan taim, baska mairin ba win: “Yang uba pain daira walisna Jehova Witniska nani wan pliska nâra bal takaskbia. Kan witin nani ba uba latwankira sa, ai daukanka pain nani marikisa. Wark taki uplika nani ra rispik lâka marikisa bara pliska na pain main kaikisa”.
6. Wan skahkanka ba, ¿nahki muni tânka kasak ba prana daukisa aidrubanka pliska ra sa taim?
6 Wan nina mangkaika wahia brih tauki ba muihni lakri nani ba nu kabia yawan ya ba bara Aidrubanka maisa pakanka yabaia dukiara baman apia sa. Sakuna kau pali ba upla wala nani ra smalkaia dukiara sa. Upla nani ba nu takbia ya baha wahia brih tauki ba ai daukanka pain mariki bara ai kwalka dimra pain brisa. Bara ai kwalka dimra ba naha tasba daukanka saura rispik lâka marikras baku apia sa (1 Ti. 2:9, 10). Baha mita, wan kwalka dimra ba aman kaikaia sa nahki dimi ba aidrubanka pliska ra taukisa piua ra, bara takaskaia pliska ra sin. Traus kunhku bara andasat kum wal dimi wama kaka, kristian uplika kum sma ba tânka marikbia apia. Bal pulaia pliska kum ra aidrubanka ba daukbia sin, wan kwalka dimra ba pain kaia sa. Aidrubanka danh takbia ningkara plis kum ra plun piaia wabia kaka, wan auya tikaia apia sa yawan aidrubanka uplika kum sa. Baha mita, wan kwalka dimra ba pain kaia sa.
7. ¿Ani natka ba kau pain kabia muihni lakri aikuki luaia dukiara?
7 Israel uplika nani ai liliaka piua ra sanska bri kan ai muihni lakri nani plis wala wina ba aikuki lilia luaia. Naha ba witin nani ra kau asla dauki kan (Ap.St 2:1, 5). Naha Aidrubanka Kau Tara ba ra muihni lakri nani tasba aiska ra asla iwi ba param kaikisa. Naha daukanka ba upla wala nani kaiki tâ iwisa (Law. 133:1). Bara yawan sanska brisa muihni lakri nani raya tauki ba wal sturi aisaia. Baha mita, latara taki plun atkaia watlika ra, kau pain kabia silp wan pata brih waia.
8. Yawan sip sa kaka, ¿dîa muni wilinkira tâ baikaia sa Aidrubanka Kau Tara ba ra?
8 Upla nani ba tâ iwisa wan aidrubanka daukaia dukiara pain wark taki ba mita. Baku sin, wark taki uplika nani ba wilinkira sa baha daukaia. ¿Wilinkira sma naha aidrubanka ra wark takaia? (Law. 110:3.) Aisa yapti ailal ba wilinkira ai luhpia aikuki wark daukisa, baku natka ra marikisa upla wala aikuki nahki wark takaia. Man mampara pâna raya daukaia karna mai munisa, kan uba swira lâka brisma mita. Baku sa kaka, aidrubanka tara ba hilp mai munbia baha pura luaia. Kristian mairin kum win: “Pamaliki bara pâinika kum kum ba wina upla wala ra kakaira apia kapri, Aidrubanka Kau Tara ba ra. Sakuna wilinkira klin daukaia makabri ba mita, sip kapri muihni lakri wala nani ra kakaira takaia. ¡Baha uba laik kapri!”. Asla Aidrubanka Tara ba ra wark kum kum daukaia hilp muni ba yawan ra lilia lâka tara wankisa (2 Ko. 6:12, 13). Kau baku daukras sma kaka, sip sma kangrigisan almukka nani ra makabi walaia dîa daukaia sip sma.
9. ¿Yawan dîa daukaia sa upla wala ra paiwaia aidrubanka ra kabia dukiara?
9 Upla wala nani ra paiws. Mani nani luan ra daukan baku, wik yumhpa kainara upla nani ra paiwanka yabia aidrubanka ra kabia dukiara. Kangrigisan ra muihni lakri nani ba naha paiwanka ba ai tasbaya pîska sut ra yaban kabia (“¿Nahki natka ra paiwanka ba yabia?” bakska ba laki kaiks). Baha paiwanka nani tâka takaskbia ba aidrubanka ra brih wabia. Baku aidrubanka ra wan uplika nani ba yus munbia upla nani ra paiwaia dukiara.
10. Rayaka ra takan sturka kum kum aisas, paiwanka nani mani bani dauki ba wina dîa yamnika saki ba.
10 Naha paiwanka nani upla ra yabaia ba wina yamnika manis sakan sa. Aidrubanka kum daukan ba ra, kristian waitna kum plis yabi warkka dauki ba marit kum ra plis yaban. Bara witin nani win baha paiwanka ba witin nani ra yaban kan. Baha mita balan. Bara 300 kilumita truk wal impakaia kan. Sampla wala, kristian mairin kum utla utla ra smalki tauki kan ba paiwanka ba waitna kum ra yaban. Bara naha waitnika ba pain kaikan. Baha mita, kristian mairin ba tânka ba kau pain smalkan naha wauhtaya wina. Ningkara, kristian mairin ba kaikan sim waitnika ba ai pânika kum wal bahara kan. Bara witin nani ba ulbi sakanka raya kum kum ba brih auya kan.
11. ¿Dîa muni mani bani aidrubanka tara nani ra waia sa?
11 Naha sât liliaka nani Israel piua ra dauki kan ba Jehova blisinka kum kan. Witin nani ba sip kan Jehova ra mayunaia ai kupia aiska ni (Jas. 24:14). Sim natka ra, aidrubanka tara dauki ba baha sât liliaka nani kaikaia sip sa (3 Jn. 3). Yawan want sa Jehova tânka kasak ba latwan kaiki uplika nani ra blisin munbia. Bara hilp wan munbia naha aidrubanka tara ba ra kaia bara yamnika sakaia.
[Lilkika wahia 4 ra taki ba]
Ani tawanka ra kabia sin wan daukanka pain nani ba prana daukisa wan Aidrubanka Kau Tara ba ra
[Lilkika wahia 5 ra taki ba]
Wik yumhpa kainara upla nani ra paiwanka yabia aidrubanka ra kabia dukiara
[Wahia 3–6 bakska ba]
2012 Aidrubanka kau tara dukiara kupia kraukanka nani
◼ Aidrubanka awarka ba. Yua wâlsut ba 9:20 titan ra tâ krikan kabia. Aidrubanka watla durka ba 8:00 titan ra kwâkan kabia. Tâ krikaia miusikka ba mahka kangbi wan maisa pakisa taim, aidrubanka ba pain asla tâ krikbia dukiara, yawan sut wan sirka ra pain iwan kaia sa. Satadi aidrubanka ba 4:55 tutni ra, bara sandi ba 3:40 tutni ra prakan kabia.
◼ Truk takaskaia pliska. Aidrubanka dauki ba pliska ra truk nani takaskaia pliska yus munaia dukiara wankan ba mana kulkras kabia, bara ya pas auya ba ai pliska bribia. Bara plis kum kum ba yus munaia sip apia kabia, kan baha pliska nani ba ya wil sirka yus munaia adarka wauhkataya bri kaka baman naha pliska nani ra ai trukka swiaia sip kabia. Truk takaskaia pliska ba uya tara apia ba mita kupiam bukisa pamalikam aikuki sim trukka kum ra wama.
◼ Sir nani. Man wal sim trukka, apia kaka sim watla ra iwi nani ba dukiara baman sir nani suni briaia sip sa. Bara ya man wal Baibil stadi taki ba dukiara sin (1 Ko. 13:5).
◼ Plun. Pliskam pali diara piaia wisi aidrubanka watla wina taki waia watlika ra, man silp patam brih was. Surunka sirpi kum sirkam mununhtara mangkaia sip sa kaka pain kabia. Sakuna surunka uba tara, apia kaka glas dukia nani lika brih waia adar âpu.
◼ Prisantka nani. Aidrubanka ba ridi daukan ba tâwan wan tingkika lâka marikaia wisi, sip sa tasba aiska smalkaia warkka ba tâ baikaia. Wan prisantka nani wilinkira yabaia dukiara shek wahia kum yabaia sip sa, ani nina kuntrikam ra yus muni ba ulbi blîkbia.
◼ Aksidint nani. Aidrubanka ra sma taim aksidint kum takbia sa kaka, pliskam pali asla dadaukra kau lamamra ba ra wis. Bara dîa daukaia ba laki kaikbia dukiara witin Sîka Hilpka Yabi uplika ra maisa pakbia bara witin nani dîa daukaia ba laki kaikbia.
◼ Sîka nani. Daktar nani sîka maikan disma kaka, dîa yus munma ba aidrubanka ra brih was, kan aidrubanka ra bahmuna âpu kabia. Sugar sikniska brisma, bara indiksan nani yus munisma kaka, nu bas bahmuna dukia wal aksidint kum takaia sip sa. Baha mita pain kabia plis inipis ra lulkaia apia. Aidrubanka pliska ra dipasta mangki ba, apia kaka takaski pliska ra sin lulkaia apia sa.
◼ ¿Dîa sât sûska yus munbia? Mani bani upla nani ba aksidint takisa sûs kum pain yus munras tâwan. Kau pain sa sûs kum pain atki dimaia. Ban kra tips nani uli wabia, apia kaka unta bri pliska bâk luaia sip sa bara wan sûska pain sa kaka, trabil âpu kabia.
◼ Upla nani uya pain walras ba. Aidrubanka ba radiu bâk walaia sip kabia (FM). Bara naha natka yus munaia dukiara batri wâl yus muni radiuka kum bara wan kiama kat walaia dukiara brih waia sip sa.
◼ Tuktan sirka nani bara sir sâtka wala. Bahmuna sirka aidrubanka ra brih waia apia sa. Tuktan sirka nani aisa yapti lamara mangkaia sip sa kaka baman brih waia sip kabia.
◼ Isint kîa nani. Aidrubanka dauki pliska nani aihkika ba pâsa dimras sa. Bara upla wala yamnika ra luki ba mita pain kabia isint kîa karna ba yus munaia apia. Upla kum kum ra siahka trabilka, apia kaka siknis wala nani isint kîa karna wina bali ba yabisa (1 Ko. 10:24).
◼ Sírvase visitar wahia ba. Baibil tânka nu takan dauki uplika kum ba dukiara Sírvase visitar (S-43-S) wahia kum ulbi banhkaia sip sa. Nahmuna wahia kumi, apia kaka wâl twilki kaia aitani kabia. Ulbi banhkan wahia nani ba sika, buk yayabra nani ra, apia kaka kangrigisankam aîulbra ra yabaia sip sa (Gâd Warkka Dauki, Lih Mairin kati 2011, wahia 3 ba kaiks).
◼ Plun piakan atki pliska. Naha sât pliska nani ra wan daukanka pain ba, Jehova nina ba kau prana daukisa. Bara wark tatakra nani ra prisantka kum yabisa kaka, yawan sim baku daukaia sa.
◼ Takaskaia pliska.
1) Yapaia pliska yus munaia sma ba baman makas bara rumkam ra upla ailal dingkpara.
2) Yapaia pliska kum ridi brisma kaka, trabil tara kum mai takbia kaka baman sip sma dawanka ra maisa pakaia danh yus munras sma ba (Mt. 5:37).
3) Takaskaia pliska kum ra dimi auma taim diara aibapaia tarjetika nani yus munisma kaka, nu bas pliska dawanka nani ba praiska mana ba wina kau pura mai kulkbia. Takaskisma ba ra dîa trabilka takbia kra mai kulkbia. Bara yua kum mahka waia lamara, diara sut aibapi takma taim lalahkam yus munaia sip kama.
4) Wan surunka brih waia dukiara truk lupia kum bâra sa. Yus munbia ningkara brisi swiaia sa, baku upla wala yus munaia sip kabia.
5) Takaskaia pliska ra wark tatakra nani wan surunka twilkaia hilp wan muni ba ra lalah prisantka kum yas. Bara wan rumka klin dauki mairka ra yu bani lalah prisantka kum yas.
6) Plun piaki pliska nani ra baman patam piaks.
7) Titan pata, kapi, apia kaka ais nani yabi ba pitka kat yus muns.
8) Spirit holikira mâ ba piu bani ra wark tatakra nani ra mariks. Nu bas witin nani upla ailal warkka daukisa. Baha tânka pain brih, wan kupia pihni lâka bara wihka bîla kaikanka lâka marikbia ba witin nani mapara pain kabia.
9) Takaskaia pliska ra kabia taim pain kabia aisa yapti ba ai luhpia nani yawaia pliska ra (piscina), kwala chens takaika pliska bara wan wîna lapta daukaika pliska ra (gimnasio) sa taim pura kaiki kabia.
10) Takaskaia pliska upla nani kau yus muni ba, Lista de hoteles recomendados wauhkataya ra takisa praiska ulbi swin ba. Yua kum luaia praiska sa, sakuna lal mana ba kulkras sa. Sakuna diara nani man makabras kapram mana mai kulkbia kaka, Aidrubanka Kau Tara ra Takaskaia Pliska Apiska ra isti pali nu muns.
11) Rumka makabram ba wal trabil kum takbia kaka, aidrubanka ra sma ba ra Takaskaia Pliska Apiska ra isti pali nu muns.
◼ Wilinkira warkka. Ya ya hilp munaia want sa kaka, Wilinkira Warkka Yabi Apiska ra waia sa. Tuktan nani 16 mani wina mâyara bri ba hilp munaia sip sa, ai aisa yapti, apia kaka upla almuk kum kaikisa kaka daukaia.
[Bakska wahia 6 ra taki ba]
¿Nahki natka ra paiwanka ba yabia?
Wan tasbaya pîska sut ra naha paiwanka upla ra yabaia dukiara, isti daukaia sa. Naku wiaia sip sa: “Naksa. Yawan naha paiwanka tasba aiska ra upla mihta ra swisa. Baha mita, man ra maikaia want sna. Nahara diara tânka kum kum ba laki kaikma”. Lilia lâka mariks. Wik tnata las ra naha paiwanka upla mihta ra swisa piua ra, sip sa La Atalaya bara ¡Despertad! wauhkataya nani ba yabaia.