“Gâd ra kakaira apia nani tilara pain watauki bas”

1. ¿Dîa muni aitanisa Aidrubanka Kau Tara apia kaka Nisan Ailal Aidrubanka Tara aula ba ra kabia taim wan daukanka pain briaia?

¹ Mani bani Aidrubanka Kau Tara nani ra auya taim, upla sut ba wan kaikisa. Baha mita pain kabia wan daukanka nani ba wan Gâdka mayuni ba ra kulkanka yabia (Lib. 20:26). Wan daukanka pain nani bara wan kwalka dimra pain ba param sakaia sa yawan ba Kraist nina blablikra rait aihwa sa. Bahamna, Aidrubanka Kau Tara apia kaka Nisan Ailal Aidrubanka Tara aula ba ra wabia taim, wan Aisa purara ba kulkanka yabaia dukiara, ¿yawan nahki muni “Gâd ra kakaira apia nani tilara pain watauki” kabia? (1 Pi. 2:12.)

2. ¿Aidrubanka Kau Tara ba ra kabia taim, ani piua ra sanska bri kabia kristian daukanka nani marikaia?

² Kristian daukanka nani marikaia. Pana pana wan latwanka lâka bara nahki wan walka ra muni ba sât wala sa, “kristian apia” tila uplika nani wal (Ko. 3:10; 4:5; 2 Ti. 3:1-5). Pain kabia, yapaia pliska bara plun piakan atki pliska wark tatakra nani ra pain munaia bara wihka bîla kaikanka lâka marikaia, diara nani bîla kaikras kan takbia kra sin. Baku sin, wan daukanka pain marikbia, ai warkka dukiara lalah kum aibapbia baha lâka bâra sa kaka yabaia sip sa.

3. ¿Aisa yapti nani ra dîa kupia kraukanka yabisa, bara dîa muni?

³ Aisa yapti ba, ai luhpia nani ra main kaiki bri kaia sa plun atki pliska bara yapaia pliska nani ra kabia taim (S.L 29:15). Plun atki pliska bara yapaia pliska dawanka mairin kum marit uplika kum ra win: “Yang nani lilia sna Jehova Witniska nani bri kaia. Ai luhpia nani ba upla ra rispik munisa bara ai daukanka pain brisa. Suliarki sut ba man nani dahra aisi kan, bara pain kabia wik tnata bani ba nahara balma”.

4. Aidrubanka Kau Tara tawanka ra kabia taim, ¿wan kwalka dimra dukiara dîa ba aman kaiki kabia?

⁴ Kwalka dimra pain ba. Aidrubanka ra wan kwalka dimra yus munbia ba pain kaia sa, bara upla nani dimi ba natka sat aihka nani ba baku yus munbia apia (1 Ti. 2:9). Sim baku, aman kaikbia wan kwalka dimra ba aihka, apia kaka uba saura dimaia apia. Yapaia pliska ra dimbia taim, taki wabia, apia kaka aidrubanka daukras piua ra, wan kwalka ba rispik lâka mariki ba sât kaia sa. Baku natka ra liliakira wan nina ulbi tarjeta sirpi ba yus munbia bara upla kum ra smalkaia sanska takbia taim, wan swira bribia apia. Wan wîna tara skahkanka bara wan daukanka pain nani Aidrubanka Kau Tara apia kaka Nisan Ailal Aidrubanka Tara ba ra yaka upla kupia pain nani Baibil swaki sakan sturka ba bribia, sakuna baha baman apia Jehova kupia lilia daukaia dukiara sin (Sof. 3:17).

2014 Aidrubanka Kau Tara dukiara kupia kraukanka nani

◼ Aidrubanka awarka ba. Aidrubanka watla durka ba 8:00 titan ra kwâkan kabia. Tâ krikaia miusikka ba yu yumhpa ba 9:20 ra kangbi wan maisa pakbia, aidrubanka ba pain asla tâ krikbia dukiara, yawan sut wan sirka ra pain iwan kaia sa. Praidi bara satadi aidrubanka ba 4:55 tutni ra, bara sandi ba 3:50 tutni ra prakan kabia.

◼ Nisan Ailal Aidrubanka Tara. Plis kum kum ra naha sât aidrubanka nani dauki kabia. Betel apiska ba sir nani an yus munbia ba pain kulkisa, truk takaskaia pliska nani bara takaskaia pliska nani aitani bâra sa sapa laki kaikisa, bara naha ra luki kangrigisan kum kum ra paiwisa, baku sin muihni lakri nani kuntri wala wina ba ra sin paiwisa. Smalki tataukra kum kum Nisan Ailal Aidrubanka Tara kum ra wisa kaka, sip sa uba upla bâra kabia. Aidrubankam Kau Tara bâra waia sip apia sma kaka, Nisan Ailal Aidrubanka Tara kum ra wapara.

◼ Truk takaskaia pliska. Aidrubanka dauki ba pliska ra truk nani takaskaia pliska yus munaia dukiara wankan ba mana kulkras kabia, bara ya pas auya ba ai pliska bribia. Bara plis kum kum ba yus munaia sip apia kabia, kan baha pliska nani ba ya wil sirka yus munaia adarka wauhkataya bri kaka baman naha pliska nani ra ai trukka swiaia sip kabia. Truk takaskaia pliska ba uya tara apia ba mita kupiam bukisa pamalikam aikuki sim trukka kum ra wama.

◼ Sir nani. Dur nani kwakbia taim, pliska kau pain nani briaia dukiara plapi waia apia sa, sim pulanka kum ra dauki ba baku. Wan walka dukiara sakripais takaia lukbia kaka, hilp wan munbia upla wala yamnika ra lukaia. Upla nani kristian rait aihwa baku wan kaikbia, bara Gâd ra mayunaia want kabia (Jn. 13:34, 35; 1 Ko. 13:4, 5; 1 Pi. 2:12). Man wal sim trukka, apia kaka sim watla ra iwi nani ba dukiara baman sir nani suni briaia sip sa. Bara ya man wal Baibil stadi taki ba dukiara sin. Ban kra, upla almuk nani bara siknis nani dukiara sir nani bâra ba wiria baman sa, baha mita sip apia kabia pamali sut ba witin aikuki iwaia. Pliskam pali naha sirka nani ba upla almuk bara ai karnika uya âpu nani bara ya uplika witin nani hilp muni ba dukiara swis.

◼ Plun. Pliskam pali diara piaia wisi aidrubanka watla wina taki waia watlika ra, man silp patam brih was. Surunka sirpi kum sirkam mununhtara mangkaia sip sa kaka pain kabia. Sakuna surunka uba tara, apia kaka glas dukia nani lika brih waia adar âpu.

◼ Prisantka nani. Aidrubanka ba ridi daukan ba tâwan wan tingkika lâka marikaia wisi, sip sa tasba aiska smalkaia warkka ba tâ baikaia. Wan prisantka nani wilinkira yabaia dukiara shek wahia kum yabaia sip sa, ani nina kuntrikam ra yus muni ba ulbi blîkbia.

◼ Sîka nani. Daktar nani sîka maikan disma kaka, dîa yus munma ba aidrubanka ra brih was, kan aidrubanka ra bahmuna âpu kabia. Sugar sikniska brisma, bara indiksan nani yus munisma kaka, nu bas bahmuna dukia wal aksidint kum takaia sip sa. Baha mita pain kabia plis inipis ra lulkaia apia. Aidrubanka pliska ra dipasta mangki ba, apia kaka takaski pliska ra sin lulkaia apia sa.

◼ ¿Dîa sât sûska yus munbia? Mani bani upla nani ba aksidint takisa sûs kum pain yus munras bara sûs mina pura yus muni ba tâwan. Kau pain sa sûs kum pain atki dimaia. Ban kra tips nani uli wabia, apia kaka unta bri pliska bâk luaia sip sa bara wan sûska pain sa kaka trabil âpu kabia.

◼ Upla nani uya pain walras ba. Aidrubanka ba radiu bâk walaia sip kabia (FM). Bara naha natka yus munaia dukiara batri radiuka kum bara wan kiama kat walaia dukiara brih waia sip sa.

◼ Tuktan sirka nani bara sir sâtka wala. Bahmuna sirka aidrubanka ra brih waia apia sa. Tuktan sirka nani ba aisa yapti lama kat mangkaia sip sa kaka baman brih waia sip kabia.

◼ Isint kîa nani. Aidrubanka dauki pliska aihkika ba pâsa dimras sa. Bara upla wala yamnika ra luki ba mita pain kabia isint kîa karna ba yus munaia apia. Upla kum kum ra siahka trabilka, apia kaka siknis wala nani isint kîa karna wina bali ba yabisa (1 Ko. 10:24).

◼ Sírvase visitar (S-43-S) wahia ba. Baibil tânka nu takan dauki uplika kum ba dukiara Sírvase visitar wahia lupia kum ulbi banhkaia sip sa. Aidrubanka wina takma taim, ulbi banhkan wahia nani ba, buk yayabra nani ra, apia kaka kangrigisankam aîulbra ba ra yabaia sip sma.

◼ Plun piakan atki pliska. Naha sât pliska nani ra wan daukanka pain ba, Jehova nina ba kau prana daukisa. Kristian baku kwala ba pain dimi was. Bara wark tatakra nani ra prisantka kum yabisa kaka, yawan sim baku daukaia sa.

◼ Takaskaia pliska:

Yapaia pliska yus munaia sma ba baman makas bara rumkam ra upla ailal dingkpara.
Yapaia pliska kum ridi brisma bara trabil tara kum mai takbia kaka baman sip sma dawanka ra maisa pakaia danh yus munras sma ba, baku upla wala yus munaia sip kabia (Mt. 5:37). Yus munaia apia makabram numbika ba ulbi bris. Kan 48 awar bîla ra daukram kaka, dîa aibapram ba lus tiwma.
Takaskaia pliska kum ra dimi auma taim diara aibapaia tarjeta nani yus munisma kaka, nu bas pliska dawanka nani ba praiska mana ba wina kau pura mai kulkbia. Takaskisma ba ra dîa trabilka takbia kaka mai kulkbia dukiara. Bara yua kum mahka waia lamara, diara sut aibapi takma taim baha lalahkam yus munaia sip kama.
Wan surunka brih waia dukiara truk lupia kum bâra sa. Yus munbia ningkara brisi swiaia sa, baku upla wala yus munaia sip kabia.
Takaskaia pliska ra wark tatakra nani wan surunka twilkaia hilp wan muni ba ra lalah prisantka kum yas. Bara wan rumka klin dauki mairka ra lalah prisantka kum yas.
Plun piaki pliska nani ra baman patam piaks.
Titan pata, kapi, apia kaka ais nani yabi ba aidrubanka ra brih wapara.
Spirit holikira mâ ba piu bani ra wark tatakra nani ra mariks. Nu bas witin nani upla ailal warkka daukisa. Baha tânka pain brih, wan kupia pihni lâka bara wihka bîla kaikanka lâka marikbia ba witin nani mapara pain kabia.
Takaskaia pliska ra kabia taim pain kabia aisa yapti ba ai luhpia nani yawaia pliska ra (piscina), kwala chens takaika pliska bara wan wîna lapta daukaika pliska ra (gimnasio) sa taim pura kaiki kabia.
Takaskaia pliska upla nani kau yus muni ba, Lista de hoteles recomendados wauhkataya ra takisa praiska ulbi swin ba. Yua kum luaia praiska sa, sakuna lal mana ba kulkras sa. Sakuna diara nani man makabras kapram mana mai kulkbia kaka, Aidrubanka Kau Tara ra Takaskaia Pliska Apiska ra isti pali nu muns.
Rumka makabram ba wal trabil kum takbia kaka, aidrubanka ra sma ba ra Takaskaia Pliska Apiska ra isti pali nu muns.

◼ Wilinkira warkka. Ya ya hilp munaia want sa kaka, Wilinkira Warkka Yabi Apiska ra waia sa. Tuktan nani 16 mani wina mâyara bri ba hilp munaia sip sa, ai aisa yapti, apia kaka upla almuk kum adar yaban lika daukbia.