Lan takaia dukiara pain walaia sa
1. Aidrubanka Kau Tara nani ra, ¿dîa muni karna wan munisa aman walaia?
1 Naha manka ra Aidrubanka Kau Tara nani ba mahka tâ krikbia. Tasba aiska ra upla nani ra spirit lâka ra hilp munbia dukiara kasak wark takan sa. ¿Yua kumi tiwaia apia dukiara pat ridi takram sa? Naha sât aidrubanka tara nani ra isi pali wan sinska ra diara wala lukaia sip sa, baha mita aman walaia ba karna sa. Naha aidrubanka nani ba kau yari sa kangrigisan ra dauki ba wal, baha mita nit kabia kau aman walaia. Baku sin, impaki ba mita apia kaka diara wala dukiara swapan wan dara walisa. ¿Dîa ba hilp wan munbia aman walaia lan takaia dukiara? (Kli.S 31:12.)
2. ¿Nahki muni aidrubanka ra kaia dukiara ridi takaia sip sma?
2 Aidrubanka kainara. Aidrubanka nahki kabia wauhkataya ba Internet wan pliska www.jw.org/es bâra kaikaia sip sa, bara aidrubanka lalka nani, bara yua kumi bani dukiara tiks kum takisa. Internet ba brisma kaka, naha ba kaina manis laki kaikaia sip sma aidrubanka ra waia ridi kama dukiara (Esd. 7: 10). Pamali Mayunra Tihmika ra aidrubanka ra kaia dukiara pamali baku sip sa aisaia.
3. ¿Dîa ba hilp mai munbia aman walaia?
3 Aidrubanka piua ra. Sip sma kaka, aidrubanka tâ krikras ba ra tailit ra was. Bara upla ba wan winbia apia kaka aidrubanka piua ra maisa pakanka nani blikaia apia dukiara celular ba daski swiaia sip sa. Angki swiaia nit sma kaka, upla mai winbia taim wala nani ra ambuk munbia apia natka ra mangks. Bara masin wala (tableta) wi ba yus munma kaka, wala nani ra ambuk munbiara. Aidrubanka piua ra diara pipara bara dipara (Smas. 3:1). Aisanka yabi uplika ra aman wali bas bara tiks nani ba aisi kaiks. Baku sin, pain kabia tânka kum kum ulbaia.
4. ¿Aisa yapti nani ba nahki ai luhpia nani ra hilp munaia sip sa walaia bara lan takaia dukiara?
4 Baku sin, bîla kaikisa tuktan nani ba sin walbia bara lan takbia. Sins Lâka 29:15 wisa: “Tuktan ban swin tauki ba ai yaptika swira daukbia”. Baha mita, pain kabia tuktan nani ba ai aisa yapti aikuki iwbia, baku witin nani aman kaiki kabia ai luhpia nani ba aman wali kabia, sturi aisi apia kaka celular bâk maisa pakanka nani bliki bara latara puli tauki kabia watlika ra. Tuktan sirpi lupia nani ra lan daukaia sip sa aidrubanka ra yapaia apia bara aman walaia diara tânka sut briras kabia sin.
5. ¿Dîa muni pain sa aidrubanka tânka nani ba laki kaikaia, bara nahki daukaia sip sa?
5 Aidrubanka danh takbia taim. Uba let yappara. Pain ris bris. Pamali baku aikuki aisas dîa kupiam kraukisa baha yua ra aidrubanka ra aisan ba dukiara. Baku dîa aisan ba isti amya tiwbia apia. Pânikam nani wal plun piaia dukiara plis kum ra wama taim, ¿dîa muni tânka painkira kum apia kaka wâl walram ba dukiara aisaras? Tânka kum kum ulbram ba yus munaia sip sma. Pamali Mayunra Tihmika ra aikuki laki kaikaia sip sma nahki rayakam ra yus munaia sip sma. Baku sin wik bani ra ulbi sakanka raya nani taki ba wina tânka kum kum laki kaikaia sip sma.
6. ¿Dîa muni aitani apia sa dis aidrubanka ra waia?
6 Lilia daukan pata kum ra auma, bara pata ba pain pih kaikras kaka yus âpu sa. Sim sât takisa aidrubanka tara ba ra spirit lâka ra pata nani bri ba. Trai munaia sa diara sut baha aidrubanka aiska ra kaia, aman wali bara dîa lan takbia ba wan rayaka ra alki daukaia.