“Upla nani ba asla dauks”
1. Israel uplika nani Itsip wina taki wan aidrubanka brin ba, ¿nahki Aidrubanka Kau Tara nani bara Nisan Ailal Aidrubanka Tara nani wal talia sa?
1 Israel uplika nani Itsip tasbaya wina taki wan ningkara, Jehova Moses ra win upla nani ba Sinaí ilka ra asla daukbia Ai bîla walbia dukiara. Baku witin nani Gâd ra sibrin briaia lan takaia kan bara sim piua ra ai luhpia nani ra Jehova yabalka nani ba smalkaia (Kli.S 4:10-13). Param sa naha piua liliakira ba ai kasakka lukan lâka ba karna daukan. Kati nani aula ba ra, Gâd uplika nani ba asla takbia Aidrubanka Kau Tara nani bara Nisan Ailal Aidrubanka Tara nani ra Jehova mita smalkbia dukiara. ¿Yawan dîa daukaia sip sa naha aidrubanka wina yamnika manis briaia dukiara?
2. ¿Aidrubanka Kau Tara ba dukiara dîa daukaia sip sa?
2 Ridi kaia sa. Jehova Israel uplika nani ra win ridi kaia baha aidrubanka Sinaí ilka ra daukbia ba dukiara (Imp.St 19:10, 11). Sim baku, ya nani naha Aidrubanka Kau Tara bâ ra wabia ba ridi takaia sa, aisanka bri nani baman lika apia. Sampla baku, kum kum ai warkka pliska ra bakisan makabaia sa. Ban kra, Nihimaya ra takan baku sim trabilka bri sma. Witin want kan king Artajerjes ra wain yabaia warkka ba wina piu kum swih bara Jerusalen kutbanka nani ba kli wih paskaia, sakuna witin nu kan king ba adar yabia apia. Bamna Nihimaya ba ai pura sunan, dîa aisaia kan ba pain lukan bara ningkara king ra ai sringka âpu makabanka nani ba win. King ba Nihimaya ra adar yaban wabia bara Jerusalem kutbanka nani kli paskaia dukiara hilpka yaban (Nih. 2:1-9). Baskam ra wark takaia apia yua nani makabram ba wina, ¿ahkia yua impakaisma bara anira takasma ba pat ridi daukram sa? Kangrigisan almukka nani ba ya naha dukia nit ba ra hilp munbia. Piua bani awarka kat kaia dukiara luki bas, bara diara nani walan ba pain pali alki daukaia dukiara ridi taks (Hib. 2:1).
3. ¿Dîa ba hilp wan munbia wan kupia ridi daukaia aidrubanka ra sa piua ra?
3 Ridi kaia bara walaia, baku sin lan takaia dukiara, pain kabia wan kupia ba ridi daukaia (Esd. 7:10). Aidrubanka programa ba kaina manis wina Internet jw.org pliska ra kabia. Baku sin, aisanka lalka nani sut bri kabia bara Baibil tikska kum apia kaka wâl bribia. Pain kabia wan aidrubanka pali ra waras kainara wik kum kum Pamali Mayunra Tihmika ra laki kaikaia. Smalki tataukra manis programa ba imprimir munisa bara tânka kum kum ulbisa aisanka nani yabisa piua ra.
4. ¿Aisa yapti ba Aidrubanka Kau Tara nani ba nahki yus munbia ai luhpia nani ra smalkaia dukiara?
4 “Luhpiam nani ra lan dauks.” Sinaí ilka ra Israel uplika nani Aidrubanka dauki kan ba sanska yabi kan aisa yapti ba ai luhpia nani ra Jehova bîla smalkaia (Kli.S 4:10). Aidrubanka Kau Tara Nani ra naha sanska wankisa. Aisa yapti ba ai luhpia wal iwaia sa aidrubanka piua ra bara hilp munaia dîa aisi ba pain walaia. Pamali nani ba sip kabia yu bani dîa lan takan ba dukiara aisaia, apia kaka Pamali Mayunra lâka daukbia piua ra.
5. ¿Aidrubanka Kau Tara aula bâra waia ba nahki hilp wan munbia?
5 Sinaí ilka ra aidrubanka pranakira daukan ba Israel uplika ra sanska yaban witin nani Gâd uplika kan ba kulkanka tara yabaia (Kli.S 4:7, 8). Aidrubanka Kau Tara aula ba sim natka ra hilp wan munbia. Yu yumhpa bilka ra Sitan tasbaya wina saitra kabia, diara saura wa wina. Naha aidrubanka ra sip kabia wan karnika kau briaia, bara spirit lâka ra wan muihni lakri aikuki paradais painkira kum ra kaia (Ais. 35:7-9). Gâd yua pat balaia man ba mita, asla takaia lâka sanska yawan bri ba lus tiwbia apia bara pana pana wan kupia bukbia (Hib. 10:24, 25).