Aidrubanka Kau Tara dukiara kupia kraukanka nani
Aidrubanka awarka ba. Aidrubanka watla durka ba 8:00 titan ra kwâkan kabia. Tâ krikaia miusikka ba yu yumhpa ba 9:20 ra kangbi wan maisa pakbia, aidrubanka ba pain asla tâ krikbia dukiara, yawan sut wan sirka ra iwan kaia sa. Praidi bara satadi aidrubanka ba 5:00 tutni ra prakan kabia bara sandi ba 4:00 tutni ra.
Lawana nani wal Jehova ra mayunbia. Patitara piua ra, Gâd uplika nani lawana nani wal Jehova ra mayuni kan. Naiwa sin miusik nani ba mayunra rait aihwa tila ra sin kulkanka tara brisa (Law. 28:7). Aidrubanka Kau Tara pîska bani ba lawana nani wal tâ krikisa. Naha ba wali kaia dukiara baman apia sa; ridi daukan sa Jehova ra mayunbia bara Witin wina lan takbia dukiara. Baha mita, aisasara ba miusik ba mangkbia maisa pakbia taim, iwi pain pali walbia sturi aisaia watlika ra. Baku natka ra wan tingkika lâka marikbia Watchtower lawana papaskra nani ra. Mani bîla ra aima wâl naha muihni lakri nani Patterson (Nueva York) kat ai pasiska silp aibapi bali sa naha lawanka painkira nani wali ba paskaia dukiara. Naha tiunka painkira nani walbia taim, Jehova ra King lawana kum aiwani mayunbia.
Truk takaskaia pliska. Aidrubanka dauki ba pliska ra truk nani takaskaia pliska yus munaia dukiara wankan ba mana kulkras kabia, bara ya pas auya ba ai pliska bribia. Bara plis kum kum ba yus munaia sip apia kabia, kan baha pliska nani ba ya wil sirka yus munaia adarka wauhkataya bri kaka baman naha pliska nani ra ai trukka swiaia sip kabia. Truk takaskaia pliska ba uya tara apia ba mita kupiam bukisa pamalikam aikuki sim trukka kum ra wama.
Sir nani. Dur nani kwâkbia taim, pliska kau pain nani briaia dukiara plapi waia apia sa, sim pulanka kum ra dauki ba baku. Wan walka dukiara sakripais takaia lukbia kaka, kristian rait aihwa baku wan kaikbia, bara upla nani ba Gâd ra mayunaia want kabia (Jn. 13:34, 35; 1 Ko. 13:4, 5; 1 Pi. 2:12). Man wal sim trukka, apia kaka sim watla ra iwi nani ba dukiara baman sir nani suni briaia sip sa. Bara ya man wal Baibil stadi taki ba dukiara sin. Sir kum nit apia sma ba pura ra diara mangki swipara. Baku sir nani yus munaia sip ba param kabia. Upla almuk nani bara siknis nani dukiara sir nani bâra kabia. Wiria baman kabia ba mita, sip apia kabia pamali sut ba witin aikuki iwaia. Pliskam pali naha sirka nani ba upla almuk bara ai karnika uya âpu nani bara ya uplika witin nani hilp muni ba dukiara swis.
Wan kwalka dimra pain kum. Aidrubanka ra yus munbia kwalka ba pain pali kaia sa, bara kwalka dimra sât aihka upla wala nani yus muni ba baku kaia apia sa (1 Ti. 2:9). Baku sin, trai munbia wan kwalka dimra ba piua bani ra pain kabia hotel kum ra wabia piua ra apia kaka rumka swibia taim, bara aidrubanka daukras kabia taim sin. Baku yawan liliakira wan nina mangki targeta lupia ba yus munbia bara smalkaia sanska takbia taim, wan swira bribia apia. Wan kwalka dimra bara daukanka pain Aidrubanka Kau Tara aula ba ra marikbia kaka, upla kupia pain nani ba Baibil smalkanka kau walaia want kabia, sakuna baha purkara Jehova lilia kabia (Sof. 3:17).
Celular bara tabletas nani. Celular kum apia kaka masin kum brih wama kaka pliskam pali upla ra ambuk takras natka ra mangks. Lilka alkaia dukia, video grabar munaia dukia, tableta bara masin wala kum yus munisma kaka, upla wala yamnika ra luks, sampla baku uli bui pliska ba yarka upla pain kaikbia apia, balan uplika nani ra nais munaia apia. Upla ra rispik bri ba mita, maisa pakanka nani apia kaka correos nit âpu ba blîkbia apia aidrubanka ra sa taim.
Plun. Pliskam pali dinar piaia wisi aidrubanka watla wina taki waia watlika ra, man silp patam brih was. Plun mangkaika watla sirpi kum sirkam mununhtara mangkaia sip sa kaka pain kabia. Sakuna plun mangkaika watla kum uba tara (pamali tara yus muni ba baku), apia kaka glas dukia nani lika brih waia adar âpu.
Prisantka nani. Aidrubanka ba ridi daukan ba tâwan wan tingkika lâka marikaia wisi, sip sa tasba aiska ra smalkaia warkka ba tâ baikaia. Wan prisantka nani wilinkira shek wahia kum ra yabaia sip sa, “Asociación Testigos de Jehová de Nicaragua” nina ra (Honduras ra “Watch Tower Bible and Tract Society of Pennsylvania” nina yus munbia). Aidrubanka kum kum ra prisantka nani ba débito bara crédito tarjetika wal yabaia sip sa.
Sîka nani. Daktar nani sîka maikan disma kaka, dîa yus munma ba aidrubanka ra brih was, kan aidrubanka ra bahmuna âpu kabia. Sugar sikniska brisma, bara indiksan nani yus munisma kaka, nu bas bahmuna dukia wal aksidint kum takaia sip sa. Baha mita pain kabia plis inipis ra lulkaia apia. Aidrubanka pliska ra dipasta mangki ba, apia kaka takaski pliska ra sin lulkaia apia sa.
Aksidint nani. Aksidint takaia ba wina aman kaikaia sa. Mani bani upla nani ba aksidint takisa sûs kum pain yus munras bara sûs mina pura yus muni ba tâwan. Kau pain sa sûs kum pain atki dimaia. Ban kra tips nani uli wabia, apia kaka unta bri pliska bâk luaia sip sa bara wan sûska pain sa kaka trabil âpu kabia.
Upla nani uya pain walras ba. Aidrubanka ba radiu bâk walaia sip kabia (FM). Bara naha natka yus munaia dukiara batri radiuka kum bara wan kiama kat walaia dukiara brih waia sip sa.
Tuktan sirka nani bara sir sâtka wala. Bahmuna sirka aidrubanka ra brih waia apia sa. Tuktan sirka nani ba aisa yapti lama kat mangkaia sip sa kaka baman brih waia sip kabia.
Isint kîa nani. Aidrubanka dauki pliska aihkika ba pâsa dimras sa. Bara upla wala yamnika ra luki ba mita pain kabia isint kîa karna ba yus munaia apia. Upla kum kum ra siahka trabilka, apia kaka siknis wala nani isint kîa karna wina bali ba yabisa (1 Ko. 10:24).
Plun piakan atki pliska. Naha sât pliska nani ra wan daukanka pain ba, Jehova nina ba kau prana daukisa. Kristian baku kwala ba pain dimi was. Bara wark tatakra nani ra prisantka kum yabisa kaka, yawan sim baku daukaia sa.
Takaskaia pliska (Hoteles):
Yapaia pliska yus munaia sma ba baman makas bara rumkam ra upla ailal dingkpara.
Yapaia pliska kum ridi brisma bara trabil tara kum mai takbia kaka baman sip sma dawanka ra maisa pakaia danh yus munras sma ba, baku upla wala yus munaia sip kabia (Mt. 5:37). Yus munaia apia makabram numbika ba ulbi bris. Kan 48 awar bîla ra daukram kaka, dîa aibapram ba lus tiwma.
Takaskaia pliska kum ra dimi auma taim diara aibapaia tarjeta nani yus munisma kaka, nu bas pliska dawanka nani ba praiska mana ba wina kau pura mai kulkbia. Takaskisma ba ra dîa trabilka takbia kaka mai kulkbia dukiara. Bara yua kum mahka waia lamara, diara sut aibapi takma taim baha lalahkam yus munaia sip kama.
Wan surunka brih waia dukiara truk lupia kum bâra sa. Yus munbia ningkara brisi swiaia sa, baku upla wala yus munaia sip kabia.
Takaskaia pliska ra wark tatakra nani wan surunka twilkaia hilp wan muni ba ra lalah prisantka kum yabisa kaka man sin yas. Bara wan rumka klin dauki mairka ra lalah prisantka kum yas.
Plun piaki pliska nani ra baman patam piaks.
Titan pata, kapi, apia kaka ais nani yabi ba aidrubanka ra brih wapara.
Spirit holikira mâ ba piu bani ra wark tatakra nani ra mariks. Nu bas witin nani upla ailal warkka daukisa. Baha tânka pain brih, wan kupia pihni lâka bara wihka bîla kaikanka lâka marikbia ba witin nani mapara pain kabia.
Takaskaia pliska ra kabia taim pain kabia aisa yapti ba ai luhpia nani yawaia pliska ra (piscina), uptis ra uli iwaia pliska (ascensores), kwala chens takaika pliska bara wan wîna lapta daukaika pliska ra (gimnasio) sa taim pura kaiki kabia.
Takaskaia pliska upla nani kau yus muni ba, Lista de hoteles recomendados wauhkataya ra takisa praiska ulbi swin ba. Yua kumi luaia praiska sa, sakuna lal mana ba kulkras sa. Sakuna diara nani man makabras kapram mana mai kulkbia kaka, Aidrubanka Kau Tara ra Takaskaia Pliska Apiska ra isti pali nu muns.
Rumka makabram ba wal trabil kum takbia kaka, aidrubanka ra sma ba ra Takaskaia Pliska Apiska ra isti pali nu muns.
Wilinkira warkka. Ya ya hilp munaia want sa kaka, Wilinkira Warkka Yabi Apiska ra waia sa. Tuktan nani 16 mani wina mâyara bri ba hilp munaia sip sa, ai aisa yapti, apia kaka upla almuk kum adar yaban lika daukbia.