Gâd Bîla ba yamni sa lan daukaia dukiara

1. Yu Wâl Aidrubanka 2014 ra kabia ba, ¿ani lalka bribia bara ani makabi walanka nani ansika yabia?

¹ Tasba aiska ra Jehova sika wan Smasmalkra Kau Tara ba (Ais. 30:20, 21). ¿Jehova nahki lan wan daukisa? Buk nani sut tila wina kau pain ba wankan sa, Baibil, Witin ai wingka puhbra sa. ¿Nahki Jehova smalkanka nani ba wan wîna tara, wan sinska, nahki wan dara wali ba mapara bara spirit lâka ra hilp wan munaia sip sa? Naha makabi walanka ansika nani ba 2014 manka ra Yu Wâl Aidrubanka ra laki kaikbia. Naha aidrubanka lalka ba naku kabia: “Gâd Bîla ba yamni sa lan daukaia dukiara”, bara 2 Timoti 3:16 wina sakan sa.

2. ¿Ani makabi walanka nani bâk tânka painkira nani ansika bribia?

² Naha tânka nani ba pliks. Tânka painkira nani ba aidrubanka ra laki kaikbia ba hilp wan munbia naha makabi walanka ansika nani sakaia:

• ¿Gâd smalkanka nani ba wan rayaka ra nahki chens munisa? (Ais. 48:17, 18.)

• Wan rayaka laki kaiki Jehova ra piu aiska mayunaia lukisa kaka, ¿dîa dukiara kasak lukaia sip sa? (Mal. 3:10.)

• ¿“Smalkanka sât aihka” nani wal prawbia kaka dîa daukaia sa? (Hib. 13:9.)

• ¿Jisas ‘nahki upla ra smalki kanʼ ba wina yawan dîa lan takaia sip sa? (Mt. 7:28, 29.)

• ¿Dîa muni kangrigisan ra smalki uplika nani ba sin lan takaia sa? (Ro. 2:21.)

• ¿Dîa muni Gâd Bîla ba yus tara brisa? (2 Ti. 3:16.)

• ¿‘Nisan nani sut nikbanka ba’ nahki upla nani ra rayaka chens munisa? (Hag. 2:6, 7.)

• ¿Dîa muni Jehova yawan ra kasak lukisa? (Epe. 5:1.)

• ¿Dîa muni Jehova smalkanka lamara kaia dukiara karna wark takaia sa? (Luk 13:24.)

3. ¿Dîa muni yawan sut dukiara pain kabia aidrubanka ra waia bara dîa smalkbia ba aman walaia?

³ Naha aidrubanka lalka ba 2 Timoti sapta 3 wina sakan. Borska kum kum kainara apastil Pal ba tnata yua nani nahki karna kabia ba dukiara aisisa. Witin win: “Upla saura nani bara upla ra kunin mamunra nani ba, ban kau saura taki kabia, bara upla ra kunin muni nani kabia” (2 Timoti 3:13). Bamna, yarka kunin wan munbiara. Pain kabia ¡Gâd dîa wan smalki ba wan rayaka ra alki daukbia! Baha mita, yawan trai munbia naha aidrubanka ra waia bara dîa smalkbia ba aman walaia, kan dîa walbia ba aihni pali ridi daukan sa.