Wan sinska ba kan kahbaia sa

1. Mani 2013 ra Yu Wâl Aidrubanka lalka ba, ¿ani kabia, bara nahki hilp wan munbia?

¹ Jisas ai disaipilka nani ra lan daukan Jehova ra latwan kaikaia wan kupia, sulka bara wan sinska aiska kira ni sin (Mt. 22:37, 38). Naha manka ra, Yu Kumi Aidrubanka bara Yu Wâl Aidrubanka nani ba hilp wan munbia wan insaitka ra dîa sât uplika bri ba kau wan tânka briaia. Bara kaina manis win baku, Aidrubanka Kau Tara lalka ba naku kabia: “Wan kupia ba kan kahbaia sa”. Bara Yu Kumi Aidrubanka 2013 manka ra kabia lalka ba, “Wan kupia dara walra ba kan kahbaia sa”, bara Yu Wâl Aidrubanka nani kati aula ba tâ krikbia ba naku kabia: “Wan sinska ba kan kahbaia sa”. Naha lalka ba Matiu 22:37 wina sakan sa. Yu Wâl Aidrubanka ba wina nahki kau wan lukanka pain kum Jehova mawanra briaia sanska wankisa.

2. ¿Ani makabi walanka nani Aidrubanka ra ansika yabia ki?

² Dîa laki kaikbia. Yu Wâl Aidrubanka danh takbia taim, dîa lan takan ba wan kupia kraukaia dukiara pain kabia naha makabi walanka nani ulbi brima bara Aidrubanka ra ansika nani ulbaia.

• Upla lukanka nani ba wan sinska blakbia apia dukiara, ¿dîa daukaia sip sa?

• Upla nani, spirit lâka ra, tihmu tilara tauki ba ra, ¿nahki hilp munbia ki?

• ¿Dîa sât lukanka briaia sa?

• Diara nani ba pain luki kaikaia ba wina, ¿dîa yamnika sakisa?

• ¿Nahki natka ra yawan swisa Jehova wan lukanka nani wapni mangkbia?

• Marit nani, aisa yapti, bara luhpa nani ba, ¿nahki pamali bilara lilia lâka ba pakaia sip sa?

• ¿Nahki muni Jehova yua dukiara ridi takaia sip sa?

• ¿Nahki natka ra wan sinska ba lan daukbia kau smalkaia warkka daukaia?

• Upla kum dîa lan taki ba ai rayaka ra daukisa kaka, ¿dîa yamnika brisa?

3. ¿Dîa muni aitani sa Yu Wâl Aidrubanka ra kaia, baku sin dîa wibia ba pain walaia, bara dîa lan takbia ba wan rayaka ra daukaia?

³ Sitan ba wan sinska ra dîa luki ba sauhkaia dukiara kasak trai munisa (2 Ko. 11:3). Baha mita wan sinska ba kan kahbaia sa, bara diara yamni apia ba wina alki takaskaia. Kraist lukanka ba briaia sa, bara naha tasba dukia saura ba mapara kaia (1 Ko. 2:16). Trai muns baha Aidrubanka yua wâl ba ra waia bara dîa aisabia ba pain walaia. Baku sin dîa walbia ba wan rayaka ra daukaia trai munaia sa. Baku natka ra, smalkaia warkka kau daukbia (1 Pi. 1:13).