¿Gâd apia kaka Baibil ra kasak lukras uplika ra ani ulbi sakanka nani wal hilp munaia?
1. ¿Dîa muni upla manis Baibil Smalkisa bukka wal stadi takaia want apia sa?
1 Upla kum Jehova napakanka kum takaia want sa kaka, Baibil dîa smalki ba lan takaia sa. Sakuna, upla manis kristian apia ba Baibil ba Gâd Bîla baku kulkras sa. Upla wala nani sin bâra sa, Gâd ra kasak lukras ba mita, Baibil ra rispik munras. Uplika ba Baibil Smalkisa bukka wal stadi takaia want apia sa kaka, ¿Ani ulbi sakanka ba yus munbia? Nahki daukaia sip ba natka nani mununhtara taki ba, kuntri 20 wina smalki tataukra sât sât daukan ba laki kaikbia.
2. Upla kum Gâd ra kasak lukras wan wibia kaka, ¿dîa nu takaia trai munbia, bara dîa muni?
2 Gâd ra kasak lukras nani ba. Upla kum Gâd ra kasak lukras wan wibia kaka, pain kabia nu takaia dîa muni. ¿Upla nani ba ban wina bal takan smalkanka ba kasak lukisa? ¿Tasba ra kasak lâka âpu ba mita, apia kaka ai rilidianka ra kunin lâka uba bâra ba mita ai kasakka lukan lâka tikan sa ki? ¿Gâd ra kasak lukras kuntrika kum wina balan ki? ¿Ai rayaka aiska ra Gâd ra lukaia nit apia kan? Smalki tataukra manis ba uplika ra makabi walisa: “¿Piu bani ra baku lukram sa?” Bara uplika ba tânka kum yabisa. Aisi kabia taim aman pali walbia. Param sa, uplika ra nahki hilp munbia sapa nu takaia dukiara, pain wan tânka briaia sa dîa muni uplika ba Gâd ra kasak lukras. Baha natka ra baman yawan nu takbia dîa uplika ra wiaia bara ani ulbi sakanka yabaia (S.L 18:13).
3. ¿Nahki muni uplika bara ai lukanka dukiara rispik lâka marikaia sip sa?
3 Upla kum dîa aisi ba dukiara rispik lâka marikaia sa. Miriki kuntrika wina kupia kraukanka kum: “Upla bani ba diaura lukaia want ba ai raitka brisa. Baha mita, rispik munaia sa. Uplika ra mistik takan sa marikaia watlika ra, kau pain sa makabi walanka nani daukaia, bara baku uplika ba silp luki ai tânka brih aisabia”. Impaki pura kakaira kum baku daukisa. Uplika ba aisi danh takan taim, makabi walisa: “¿Naha natka wala bâra ba dukiara pat lukram sa ki?”. Bara dîa aisaia bri kan ba smalkisa.
4. Buda rilidianka bri nani ra smalkbia taim, ¿dîa ba pain wan tânka briaia sa?
4 Papaskra kum bâra sa tânka dukiara, Buda rilidianka bri nani ba mapara kakaira apia sa. Naha sât uplika nani wal aisisa taim, Gran Bretaña kuntrika ra Cómo hallar paz y felicidad duraderas wauhkataya ba kasak hilp munisa. Wahia pas wina tânka kum kum laki kaikbia taim, lisin yumhpa lalka nina “¿Existe un Creador todopoderoso?”. Bara piua wala ra lisin wala nina “Una guía para toda la humanidad” ba laki kaikisa. Baha wina sip sa kaka, Baibil Smalkisa bukka ba marikisa bara naku wisa: “Gâd ra lukras kama sin, Baibil ba kupia kraukanka painkira nani brisa bara yamnika manis brima”. Smalki tataukra kum Miriki kuntrika ra China uplika nani ra smalki ba naku win: “Upla manis yang nani smalkisna ba pliska ra aisi kaikaia laik sa, bara upla kum wan ulbi sakanka nani bribia kaka, kli wih kaikuya taim, uplika ba pat sut aisi kaikan sa. Sakuna manis ba karna munisa ai tânka briaia Baibil stadika kum ba dîa muni daukisa. Baha mita, pas yua uplika wal aisisna taim, Sturka yamni nani wauhkataya ba yabisna; naha wauhkataya ba upla wal aisaia dukiara paskan sa.” Miriki kuntrika ra impaki pura kakaira kum China uplika wal wark taki ba wisa naha uplika nani wal pas yua ra Baibil Smalkisa bukka wal tâ krikaia sip sa. Sakuna kau pain sa saptika 2 wina daukaia. Kan baha saptika ra tânka marikisa Baibil ba dîa sât bukka sa. Saptika 1 lika Gâd dukiara aisisa.
5. ¿Dîa muni wihka bîla kaikaia sa?
5 Gâd ra kasak lukaia ba yu kum ra yawan sip briras sa. Baha mita, wihka bîla kaikan lâka briaia sa. Aima kum wal uplika ra wih kaikan ba wal aitani apia kabia uplika ba mahka Gâd ra kasak lukbia. Baha mita, aima ailal wih kaikbia wal uplika ba Gâd kum bâra sa tânka bribia, apia kaka ai tânka bribia dîa muni upla manis ba Gâd ra kasak lukisa.
6. ¿Dîa muni upla kum kum ba Baibil maisa pakanka nani ba walaia ai brinka apia sa?
6 Baibil ra kasak lukras bara lan takaia sin want apia nani ba. Upla kum Gâd ra lukisa, sakuna witin wisa Baibil ba Gâd Bîla apia sa. Baha mita, dîa bahara maisa paki ba kulkanka yabras. Kristian rilidianka âpu kuntrika nani ra baku lukisa, bara Baibil ba kristian rilidianka sât sât bâra ba wal praki kaikisa. Bara sim sât takisa kristian sa wi kuntrika nani ra, kan naha uplika nani ba Baibil kupia kraukanka nani ba yus âpu baku kaikisa. Naha sât uplika nani ra, ¿nahki hilp munbia Baibil ra kasak lukbia dukiara, bara sim piua ra Baibil Smalkisa bukka wal stadi takaia?
7. ¿Upla nani ba Baibil ra kasak lukbia dukiara ani natka pain ba yus munaia sip sa?
7 Grecia Betel apiska wina wauhkataya kum ulbi blikan ba ra wisa: “Baibil ra kasak lukras uplika nani ra hilp munaia dukiara, pain sa Baibil ba yus munaia bara dîa wi ba marikaia”. Smalki tataukra manis ba lan takan sa upla nani ba Baibil ra kau rispik munisa yawan dîa aisabia ba wal (Hib. 4:12). Bara Gâd nina Baibil ra taki ba mita upla manis ba tâ iwisa”. Bara India Betel apiska wina win: “Hindú uplika nani ba Baibil ba rayaka bara prura dukiara aisi ba ai brinka sa kau nu takaia. Baku sin, kiamka kum ra kulkanka kau tara yabaia bara wala ra mâyara kulkaia lâka ba sut Gâd mita sauhki tikbia pramiska ba dukiara ai brinka sa walaia”. Upla nani trabil lui ba dukiara aisaia ba smalki tataukra nani ra sanska yabisa Baibil ba kwâkaia, bara uplika ra marikaia Gâd Kingka lâka ba nahki naha sut sauhki tikbia ba.
8. ¿Rilidian daukanka nani ba mita upla manis Baibil dukiara saura luki ba ra nahki hilp munbia ki?
8 Upla manis ba Baibil ra lukras sa, kan kristian rilidianka nani ba dukiara saura aisi ba mita. Naha uplika nani ra pain kabia tânka marikaia naha rilidianka nani ra dîa smalki bara dauki banhwi ba Baibil dîa smalki ba wal waras. India Betel apiska tânka marikan: “Aima kum kum ra nit sa uplika ra marikaia naha rilidianka nani ba Baibil dîa smalki ba nina blikras sa.” Baku sin win hindú uplika nani ba ¿Qué propósito tiene la vida? ¿Cómo descubrirlo? wauhkataya, pîska 4 ba marikisa taim tâ iwisa. Baha pîska ra tânka marikisa nahki rilidian nani ba Gâd Bîla ba sauhkaia bara yukukaia trai munan sa. Brasil kuntrika wina smalki tataukra kum ba upla nani ra wisa: “Upla manis Baibil ba laki kaikisa rilidian kum tilara kaia dukiara lika apia. ¿Dîa muni naha daukaia trai munras? Ban kra diara ailal nu takaia sip sma”.
9. ¿Dîa muni upla kum Baibil ba lan takan daukras sa wan wibia kaka, danh sip apia baku kaia wan dara walaia apia sa?
9 Jehova upla kumi bani kupia ba kat kaikisa (1 Sam. 16:7; S.L 21:2). Bara ya kupia pain bri ba ra rait aihwa rilidianka ra brih balisa (Jn. 6:44). Upla aihkika ba Gâd ra kakaira takaia sanska âpu kan, bara Baibil sin stadi takras kan. Smalkaia warkka ba mita, sanska brin sa tânka kasak ba lan taki “swaki sakan” lâka briaia (1 Ti. 2:4). Baha mita, upla kum Baibil ba lan takan daukras sa wan wibia kaka, danh sip apia baku kaia wan dara walras kabia. Ulbi sakanka ailal bâra ba tila wina uplika ra kau nu takaia kupia bukbia kum wahbi saks. Piu lubia ba ra wan bukka pali yus muni ba sâkbia: Rait pali Baibil ba Dia Smalkisa ki? bukka.
[Wahya 4 lilkika ba]
Nahki hilp munbia Gâd ra kasak lukras uplika nani ra
• Makabi wals: “¿Piua bani ra baku lukram sa ki?” Baku yawan nu takbia dîa muni uplika ba Gâd ra kasak lukras sa.
• Buda rilidianka wina kum sa kaka, Cómo hallar paz y felicidad duraderas wauhkataya tara, wahia 9 wina 12 ba kat laki kaiks.
• Rayaka ba ban wina bal takan lukanka ba tâ baikisa kaka, naha ulbi sakanka nani yus munaia sip sa:
¡Despertad! wauhkataya, ulbanka lalka “¿Casualidad o diseño?”.
Las maravillas de la creación revelan la gloria de Dios lilkika ba.
Cómo lograr una vida llena de satisfacción wauhkataya, pîska 4 ba laki kaikaia sip sa. Baku sin, ¿Es la vida obra de un Creador? bara El origen de la vida. Cinco cuestiones dignas de análisis wauhkataya tara nani ba.
• Rau munan lâka bara kasak lâka ba âpu ba mita Gâd ra kasak lukras sa kaka, naha ulbi sakanka nani yus munaia sip sa:
¿Existe un Creador que se interese por nosotros? bukka, sapta 10 ba.
¿De veras se interesa Dios por nosotros? wauhkataya tara, pîska 6, bara ¿Qué propósito tiene la vida? ¿Cómo descubrirlo? wauhkataya tara, pîska 6 ba.
• Uplika ba mahka Gâd kum bâra ba dukiara lukbia kaka, Baibil Smalkisa bukka ba marikbia. Pain kabia saptika 2 wina tâ krikbia, apia kaka wala kau ai brinka ba.
[Wahya 5 lilkika ba]
Nahki hilp munbia Baibil ra kasak lukras uplika nani ra
• Sip sa kaikaia La vida... ¿cómo se presentó aquí? ¿Por evolución, o por creación? bukka, sapta 17,18 ba.
• Uplika ba hindú rilidianka wina sa kaka, ¿Por qué debemos adorar a Dios con amor y verdad? wauhkataya tara ba yus munbia.
• Ju uplika nani dukiara, ¿Habrá algún día un mundo sin guerra? wauhkataya tara, wahia 3-11 ba.
• Baibil smalkanka nani ba nina blîkbia kaka, yamnika manis bri ba dukiara aisas. Baha dukiara naha ulbi sakanka nani ba yus munaia sip sa:
¡Despertad! wauhkataya, ulbanka lalka “Ayuda para las familias”.
La Biblia: el poder que ejerce en su vida lilkika ba.
¡Gâd sturka yamni nani ba! wauhkataya, lisin 9, 11, Un libro para todo el mundo wauhkataya tara, wahia 22-26 bara Cómo lograr una vida llena de satisfacción wauhkataya tara, pîska 2 ba.
Buda rilidianka wina sa kaka, El camino de la paz y la felicidad wauhkataya, wahia 3 wina 7 ba kat laki kaikbia.
Musulman rilidianka wina sa kaka, La fe verdadera, la puerta a una vida feliz wauhkataya tara, pîska 3 ba.
Uplika ba Baibil ba walan daukras pliska kum ra iwisa kaka, pain kabia kupia kraukanka nani sinskira yawan aisi ba ani wina sakan sapa wiaia apia.
• Tânka mariks nahki natka ra prapit aisanka nani ba aimakan sa. Baha dukiara, naha ulbi sakanka nani yus munaia sip sa:
La Biblia: historia exacta, profecía confiable likika ba.
Un libro para todo el mundo, wauhkataya tara, wahia 27-29
• Uplika ba Baibil tânka kum kum dukiara kau nu takan daukisa kaikbia taim, Baibil Smalkisa bukka ba mahka yus munaia sip sa.
[Wahya 6 lilkika ba]
Ban kra upla kum wibia: “Yang Gâd ra kasak lukras”
• Makabi walaia sip sa: “¿Man nu sma yang ra dîa pali ba ai munan Gâd ra kasak lukaia?”. Razonamiento bukka wahia 87 wina 89 ba kat tânka kum kum wahbi saki wibia. Baku sin, ulbi sakanka kum yawan ra hilp wan munan ba bri sal yabia wiaia sip sa.
• Makabi walaia sip sa: “Papaskra kum bâra sa kaka, ¿ani daukanka nani bri kaia sa lukisma?”. Naha sât makabi walanka daukisa taim, upla aihkika ba wisa, Gâd ba kasak bara upla mawan kaikras ba sât kaia sa. Baku sin, pain bara kupia pihni kaia sa. Uplika dîa aisan ba walan taim, Baibil ba yus muni marikbia Gâd baha daukanka painkira nani sut brisa. (Sip sa kaka, Baibil Smalkisa bukka, sapta 1 ba laki kaikbia, sakuna baiki sakanka 6 ba wina.)
Ban kra upla kum wibia: “Yang Baibil ba kasak lukras”
• Naku wibia: “Upla manis ba man baku lukisa. Upla kum kum lukisa tasba sinska lâka ba uba pâwan ba mita, diara nani raya saki wal Baibil ba wal kasak apia sa. Baha mita, Baibil ba naiwa yua nani dukiara yus kumi sin âpu sa. ¿Sakuna aima kum ra Baibil ba pat aisi kaikram sa ki? [Ansika maikbia swis. Baha wina, Un libro para todo el mundo wauhkataya, wahia 3 ba uplika ra mariks.] Naha wauhkataya yus muni, brinki sa mai marikaia Baibil kupia kraukanka painkira manis bri ba dukiara. Sampla baku, wahia 4 bara 5 ba laki kaikaia”.
• Apia kaka: “Upla manis ba sim sât aisisa. Sakuna naha tikska ba yang ra kasak hilp ai munan bara mai marikaia want sna [Job 26:7 apia kaka Aiseya 40:22, bahara marikisa Baibil ba sinska lâka tani ra kasak sa]. Baibil ba kupia kraukanka pain nani manis brisa pamali dukiara. Brinki sa kli bal mai kaikaia bara sampla kum mai marikaia”.
• Natka wala: “Tingki pali kupiam aiska wina saki aisi sma ba mita. Gâd yawan ra buk kum wankan sa kaka, ¿dîa sât ulbanka nani takaia sa lukisma?”. Uplika aisabia taim, Baibil ra sim sât taki ba dukiara sampla kum saki mariks.