¡Jisas Pruan Kupia Kraukanka aula ba piua kum lilia daukaia sip sa!
1. ¿Jisas Pruan Kupia Kraukanka piua ra nahki kau lilia kaia sip sa?
1 ¿Smalkaia warkka ba Kakamuk kati, Lih Wainhka kati bara Lih Mairin kati ra kau liliakira daukaia want sa ki? Baku daukaia want sa kaka, wan taimka ba kau yus munaia sa bara sip kabia tâ baiki smasmalkra takaia. ¿Baku daukbia kaka dîa muni lilia kabia?
2. ¿Smalkaia warkka ba kau daukisa piua ra dîa muni lilia wan daukisa?
2 Liliakam lâka kau tara dauks. Jehova wan paskan sa Witin ra mayunbia nitka wal, baha mita yawan daukisa taim, liliaka bara âuyapah lâka wankisa (Mt. 5:3). Baku sin, Witin wan paskan lilia kabia dukiara, upla wala nani ra diara yabi ba wal (Ap.St 20:35). Smalkaia warkka ba naha dukia wal ba daukaia sanska wankisa: Gâd ra mayunaia bara wan walka nani ra hilp munaia. Aitani sa lukaia, naha warkka ba kau daukisa piua ra wan liliaka ba kau tara sa. Baku sin, yawan kau smalkisa piua ra kau lankira takisa, bara baku wan sringka lâka tikisa, bara smalkaia warkka ba sibrin âpukira daukbia. Baku sanska painkira nani brisa smalkaia dukiara, bara Baibil stadika nani tâ krikaia. Naha nani sut daukisa piua ra smalkaia warkka ba kau pranakira kaikisa.
3. ¿Dîa muni Kakamuk kati bara Lih Wainhka kati ba tâ baiki smasmalkra warkka daukaia ba pain sa?
3 Kakamuk kati bara Lih Wainhka kati ra sanska painkira sa tâ baiki smasmalkra warkka daukaia, kan sip sa 30 apia kaka 50 awar daukaia. Bara Jisas Pruan Kupia Kraukanka paiwanka upla nani ra yabia. Naha ba Kakamuk kati pas satadika 22 wina mundi Lih Wainhka kati 14, Jisas Pruan Kupia Kraukanka yua ba kat. Kangrigisan ra wark ailal bara kabia, bara smalki tataukra nani ba kumi baku warkka takbia, smalkisa pliska sut piu mangkan ba kat daukbia (Sof. 3:9).
4. ¿Dîa daukaia sip sma tâ baiki smasmalkra kaia want sma kaka?
4 Mahka ridi taks. Kau baku daukras sma kaka, awarkam nani ba laki kaiks. Dîa chens munaia sip sma ba kaiks. Kati kum apia kaka kati ailal smalkaia warkka ra kau daukaia dukiara Jehova ra puram suns (Je. 1:5). Pamalikam bara kangrigisan ra muihni lakri nani wal aisas (S.L 15:22). Ban kra, siknis trabilka bri kama, apia kaka yu bani awar ailal wark taki kama sin, man sip kama naha liliaka painkira ba briaia tâ baiki smasmalkra daukma ba wal.
5. ¿Dîa yamnika bribia Jisas Pruan Kupia Kraukanka piua ra smalkaia warkka ba kau tâ baikbia kaka?
5 Jehova want sa ai napakanka nani ba lilia kabia (Law. 32:11). Yawan smalkaia warkka ba Jisas Pruan Kupia Kraukanka piua ra kau daukaia trai kaikbia kaka, yawan baman lilia kabia apia kau pali ba Jehova kupia lilia daukbia (S.L 23:24; 27:11).