Smalkaia warkka kau pain daukaia sip sa: upla prautkira nani wal pain aisaia lan taks

¿Dîa muni daukaia sa? Smalkaia warkka ra upla manis ba pain wan aisisa. Sakuna Jisas win, misbara wan kaiki uplika nani sin bâra kabia (Jn. 17:14). Baha mita, wari takaia apia sa aima kum kum ra upla yawan wal praut takbia. Baha wan takbia kaka, Jehova yamni kaiki daukanka ba marikbia, kan Witin nina brih taukisa (Ro. 12:17-21; 1 Pi. 3:15). Yawan pain ansika kum yabia kaka trabil ba tara takbia apia. Baku sin, uplika bara wala nani wan kaiki ba mapara sampla pain kum yabia, bara piua wala ra Jehova Witniska nani ra pain walaia wilin kabia (2 Ko. 6:3).

Nahki daukaia:

Kupiam alki takas bara ban pâna lâka mariks. Baku trabil tara bukbia apia. Uplika dîa aisi ba man ra praut mai aisisa lukpara (Smas. 7:9). Ban kra, uplika trabil taki lukisa apia kaka piua saura kum ra winram. Bara Jehova Witnis nani ra saura kaiki kabia sin ban kra, yawan dukiara witin ra kunin aisan sa (2 Ko. 4:4).
Latwan lâka ni upla ra aisas (S.L 15:1). ¿Uplika ba yapi kan bukram ki? ¿Wark taki kan bara man mita alki takaskram ki? Diara kum lika param sa, yawan nit apia sa wan warkka dauki tauki ba dukiara padin makabia. Sakuna piua saura kum ra waram ba mita lika sip sma padin makabaia. ¿Uplika ba yawan dukiara kunin kum walan mita praut takan sa ki? Wiaia sip sa: “Tânka brisna dîa muni baku damra wali sma. Sakuna upla nani dîa yang nani dukiara mai win ba sut ba kasak apia sa. ¿Tânka ba param aisaia sip sna?” Uplika ba tala bara kangrigisan wina kangbi sakan nani dukiara mapara sa kaka wiaia sip sma: “Tânka brisna. Upla wala nani sin baha dukiara aisisa. Sakuna, ¿sip sna Baibil wina mai marikaia dîa muni yang nani baku daukisna?”.
Uplika ba uba praut takan sa kaka, kau pain kabia diara kumi sin wiras mahka waia. Bara Jehova Witniska nani kau witin ra bal kaikbia apia wibia kaka, wis witin dîa makaban ba yawan rispik munbia.

Kati kum bilkara daukaia trai muns:

Pamali Mayunra piua ra naha aisaia natka nani ba praptis muns.
Praut takan uplika wal aisi mahka taki wabia taim, yulam kahbi uplika ra makabi wals natka wala kau pain aisaia sip kan sapa.